سوپاسالارێ بەرێ یێ وەزارەتا كاروبارێن پێشمەرگەی راگەهاند، هەتا نوكە داعش مەترسییە ل سەر ئیراقێ ب تایبەت پشتی وێ رەوشا ل سووریێ هاتییە پێش ئەو مەترسییە یا زێدەتر بووی، هەڤدەم ب دیتنا وی بۆ رێگریكرنێ ل مەترسیێن داعشێ پێدڤییە ئیراق هەماهەنگییا زێدەتر ل گەل هێزا پێشمەرگەی بكەت و زێدەتر پشتبەستنێ ب هەڤپەیمانان بكەن.
فەریق (جەمال ئێمینكی) سوپاسالارێ بەرێ یێ وەزارەتا كاروبارێن پێشمەرگەی گۆت» داعش ب دوماهی نەهاتیە و هەتا نوكە یا ل سووریێ و ئیراقێ ژی مای ب تایبەت ل وان دەڤەرێن ڤالاهییا ئەمنی تێدا هەی، كریارێن وان یێن تیرۆرستی یێن زێدەتر بووین، چونكە پشتی نەمانا رژێما سووریێ وان ژی ب دەلیڤە یا زانی كریارێن خوە زێدەتر لێ بكەن و خوە رێكبێخن، لەوما داعش ب دوماهی نەهاتیە و رۆژانە كریارێن وان یێن تیرۆرستی زێدەتر دبن».
ب دیتنا فەەریق جەمال ئێمینكی» ئەو مەترسییا داعشێ ل سەر سووریێ مەترسی ل سەر ئیراقێ ژی یا هەی ژ ئەگەرێ وێ رەوشا ل سووریێ پەیدابووی و جارێ نوكە دەستپێكە، لەوما هەر مەترسییەكا ل سەر سووریێ دروست دبیت دێ كاریگەریێ ل سەر ئیراقێ ژی دروست كەت، چونكە ل ئیراقێ ژی ڤالاهییا ئەمنی یا هەی ب تایبەت ل دەڤەرێن كوردستانی یێن ژ دەرڤەی ئیدارەیا هەرێما كوردستانێ د ناڤبەرا هێزا پێشمەرگەی و هێزێن ئیراقی، چونكە بەردەوام ل كەركووكێ و مووسلێ و دیالا داعش كریاران ئەنجام ددەت».
ئێمینكی باس ل چارەسەریێ ژی كر و گۆت» بۆ وێ چەندێ رێگری ل دوبارە دیاربوونا داعشێ بهێتە گرتن، باشترین چارەسەری ئەوە هەماهەنگییا زێدەتر د ناڤبەرا پێشمەرگەی و لەشكرێ ئیراقێ دا هەبیت و لێكگوهارتنا پێزانین و هەوالگیری هەبیت، هەڤدەم ئەو دەڤەرێن ڤالاهییا ئەمنی لێ هەی ئەو ڤالاهی لێ نەمینیت، هەروەسا نوكە دو لیوایێن هەڤپشك یێن هاتینە پێكئینان بۆ وان دەڤەران، ب دیتنا من ئەو ڤالاهی ب دو لیوایان ناهێتە پڕكرن و پێدڤییە لیوایێن زێدەتر بهێنە دروستكرن و زێدەتر پشتبەستنێ ب هەڤپەیمانان بكەن، چونكە ژ دەستپێكا شەڕێ داعشێ هەڤپەیمان د هاریكار و پشتەڤانن».
سوپاسالارێ بەرێ یێ پێشمەرگەی باس ل وێ چەندێ ژی كر» هەڤپەیمان یێن ل هەرێما كوردستانێ هەین و هاریكارییا هێزا پێشمەرگەی و هێزێن ئیراقی دكەن، لەوما ئیراقێ پێدڤییەكا مەزن ب هەڤپەیمانان یا هەی، پێدڤییە مەترسیێن داعشێ ب گرنگ وەربگرن و نابیتە بهێنە پشت گوه هاڤێتن ژ بەر كو دێ پاشی مەترسییەكا مەزن ل سەر ئیراقێ دروست كەن».

سەرۆكێ جڤاتا نوونەرێن ئیراقێ راگەهاند، دۆنالد تڕەمپ نامەیەك بۆ محەمەد شیاع سۆدانی، سەرۆك وەزیرێن ئیراقێ هنارتییە و تێدا داخوازیە كو پێدڤییە ل ئیراقێ چەك تنێ د دەستێ دەولەتێدا بیت.
مەحمود مەشهەدانی، سەرۆكێ جڤاتا نوونەرێن ئیراقێ د چاڤپێكەفتنەكا رۆژنامەڤانیدا ئاشكراكر كو سەرۆكێ هەلبژارتیێ ئەمریكا دۆنالد تڕەمپ داخواز ژ محەمەد شیاع سۆدانی، سەرۆك وەزیرێن ئیراقێ كریە كو دڤێت چەك تنێ د دەستێ دەولەتێدا بیت نەكو گرۆپێن چەكدار.
د پشكەكا دی یا ئاخڤتنێن خوە دا، سەرۆكێ جڤاتا نوونەرێن ئیراقێ راگەهاند» گرۆپێن چەكدار ل ئیراقێ هێرشێن خوە ل سەر هێزێن ئەمریكی یێن راوەستاندین و ل نێزیك دێ هەبوونا هێزێن ئەمریكی ل ئیراقێ هێتە رێكخستن».
ل رۆژا 26 مەها بۆری، شاندەكێ ئیراقی ب سەرۆكایەتییا حەمید شەتری، سەرۆكێ دەزگەهێ هەوالگیریێ سەرەدانا دیمەشقێ كربوو و ل گەل ئەحمەد شەرع، سەرۆكێ دەستهەلاتا نوو ل سووریێ كۆمبوو و ل دۆر وێ سەرەدانێ ژی مەحمود مەشهەدانی دوپاتی ل وێ چەندێ كر كو سەرەدانەكا ئەرێنی بوو.
هەڤدەم ل دۆر هەلویستێ ئیرانێ سەبارەت رەوشا سووریێ، سەرۆكێ جڤاتا نوونەرێن ئیراقێ گۆت» ئیران یا نەرازییە ژ وێ رەوشا ل سووریێ روودای».
مەشهەدانی دیاركر ژی» سەرۆكێ هەلبژارتیێ ئەمریكا دۆنالد تڕەمپ د نامەیەكێدا بۆ محەمەد شیاع سۆدانی، سەرۆك وەزیرێن ئیراقێ داخواز ژێ كریە كو پێدڤییە چەك تنێ د دەستێ دەولەتێدا بیت نەكو گرۆپێن چەكدار».
ب گۆڕەی وان پێزانینێن د هندەك دەزگەهێن راگەهاندنێ ل ئیراقێ بەلاڤبووین د نامەیا تڕەمپی دا بۆ سۆدانی چەند تەوەرێن دی هاتینە بەرچاڤكرن ژ وان دوپاتی ل وێ چەندێ كریە كو چالاكیێن گرۆپێن چەكدار یێن ب سەر ئیرانێ ڤە ل ئیراقێ بهێنە راگرتن، هەروەسا ئیراق دەستێوەردانێ د رەوشا سووریێ دا نەكەت و پێدڤییە ئیراق پشتەڤانیێ ل دەستهەلاتا نوو یا سووریێ بكەت.
ژ ئالییەكێ دی ڤە محەمەد شیاع سۆدانی، سەرۆك وەزیرێن ئیراقێ د رێوڕەسمێ رۆژا شەهیدێ ئیراقێ و بیرئینانا شەهید محەمەد باقر ئەلحەكیم، د پەیڤەكێدا گۆت» هندەك ئالییان بزاڤكر ئیراقێ بێخنە دناڤ گوهۆڕینێن سووریێ دا و باس ل گوهۆڕینا سیستەمێ سیاسیێ ئیراقێ دكر، بەلێ بۆ هیچ دەولەت و ئالییەكی نینە گوهۆڕینێن سیاسی و ئەمنی ل سەر مە ب سەپینیت».
سۆدانی گۆت ژی» ل چەند مەهێن بۆری، ب راوێژ و پەیوەندی ل گەل چەند وەلاتێن دۆست، مە بزاڤەكا مەزن كر بۆ وێ چەندێ شەڕی ژ ئیراقێ دووربێخین و وەلاتێ مە نەبیتە مەیدانا ئێكلاكرنا ململانییا دەڤەرێ». هەروەسا گۆت» ل سەر ئاستێ نێڤدەولەتی، مە پەیوەندیێن ئیراقێ ل گەل وەلاتان، ل سەر بنەمایێ دیبلۆماسی ئاڤاكرینە».
دهێتە زانین بڕیارە ل رۆژا چارشەمبی 8/1/2025 ، محەمەد شیاع سۆدانی، سەرۆك وەزیرێن ئیراقێ سەرەدانا ئیرانێ بكەت و ل سەر چەند تەوەران دانوستاندنان بكەت ژوان ژی رەوشا سووریێ.

پەیڤدارێ وەزارەتا كۆچ و كۆچبەرێن ئیراقێ راگەهاند، ژ ئەگەرێ زڤرینا ئاوارەیان، هەژمارەكا كەمپێن ئاوارەیان ل هەرێما كوردستانێ دێ هێنە دائێخستن.
دهێتە زانین ل هەرێما كوردستانێ 20 كەمپێن ئاوارەیان یێن ماین كو 16 ژ وان ل دهۆكێ نە و 4 ژی ل هەولێرێ.
عەلی عەباس، پەیڤدارێ وەزارەتا كۆچ و كۆچبەرێن ئیراقێ گۆت» هەژمارەكا كێم یا ئاوارەیان ل هندەك كەمپان یێن ماین، ئەو كەمپە دێ ل گەل كەمپێن دی هێنە تێكهەلكرن، وەكو كەمپێن حەسەن شام و خازر».
پەیڤدارێ وەزارەتا كۆچ و كۆچبەرێن ئیراقێ ئەوژی بەرچاڤكر» ل ڤێ مەهێ دێ كەمپێن نوو و گونجای ل سنوورێ پارێزگەها هەولێرێ بەرهەڤ كەین و دێ پێدڤیێن وان دابین كەین، بۆ وێ چەندێ ئاوارەیێن ل كەمپێن دێ هێنە دائێخستن بۆ وان كەمپێن نوو بهێنە ڤەگۆهاستن».

سەرۆكێ هەڤپەیمانییا دەولەتا قانوونێ هۆشداری دا و راگەهاند: ئیسرائیلێ پلان یا هەی دەڤەرێ پارچە بكەت، ئاماژە ب وێ چەندێ ژی كر، روودانێن ڤێ دوماهیێ یێن سووریێ درێژەپێدەرێن وێ پلانێیە.
نوری مالكی، سەرۆكێ هەڤپەیمانییا دەولەتا قانوونێ د پەیڤەكێ دا ل رێوڕەسمێ سالڤەگەرا كوشتنا قاسم سلێمانی، فەرماندەیێ فەیلەقا قودس یا پاسدارێن ئیرانێ و ئەبو مەهدی موهەندس هۆشداری ژ پارچەكرنا دەڤەرێ ژ ئالیێ ئیسرائیلێ ڤە دا كو ب گۆڕەی ئاخڤتنا وی پلانا وێ پارچەكرنێ ل سالا 1967 و 1982 یا هاتییە نڤیسین، ب شێوەیەكی ل دووڤ وێ پلانێ هەموو وەلاتێن دەڤەرێ دێ بنە كانتۆنێن بچووك بچووك كو چ ژ وان نەشێن ببنە گەف ل سەر ئیسرائیلێ.
نوری مالكی د پەیڤا خوە دا دیاركر ژی كو پێشتر ئەركێ وان پاراستنا غەزە و باشوورێ لوبنانێ بوو، بەلێ نوكە ئەركێ وان یێ ئالۆز بووی، ب شێوەیەكی ژ ئەگەرێ ژناڤچوونا رژێما بەشار ئەسەدی، مەترسییا كەفتییە سەر ئیراقێ و دبیت جارەكادی نەخشەیەك بهێتە داڕێشتن.
سەرۆكێ هەڤپەیمانییا دەولەتا قانوونێ باس ل وێ چەندێ ژی كر، ئەوا ل ڤێ دوماهیێ ل سووریێ روودای، دەستپێكەكە بۆ بەردەوامییا پڕۆسەیا پارچەكرنا وەلاتێن دەڤەرێ بۆ چەند وەلاتێن بچووك و لاوازكرنا وان كو نەشێن بەرانبەر ئیسرائیلێ ب راوەستن.
مالكی رۆناهی ئێخستە سەر وێ چەندێ كو دوژمنێن وان ئیراقییان پالددەن بۆ كارێن تێكدەرانە و ل سەر بنەمایێ شیانێن گوهۆڕینا رەوشا وەلاتی، بەلێ دێ روو ب روویێ وان بن و دێ پلان و پڕۆژەیێن وان ژناڤ بەن و دێ وەلاتێن دەڤەرێ پێكڤە دەڤەرێ پارێزن.

ئەندامەكێ جڤاتا نوونەرێن ئیراقێ راگەهاند، نەبوونا ل هەڤهاتنێ ل سەر كۆمسیۆنا نوو یا هەلبژارتنان ل ئیراقێ دبیت ببیتە ئەگەرێ پاشئێخستنا هەلبژارتنێن داهاتی یێن جڤاتا نوونەرێن ئیراقێ.
عەلی بەنداوی، ئەندامێ جڤاتا نوونەرێن ئیراقێ د داخۆیانییەكا رۆژنامەڤانیدا گۆت» دەمێ كۆمسیۆنا بلند یا سەربخوە یا هەلبژارتنان ل ئیراقێ یا نوكە یێ ب دووماهی هاتی و هەلوەشاندنا وێ بێی گەهشتن ب رێككەفتنێ ل سەر پێكئینانا كۆمسیۆنەكا نوو ئاستەنگەكا مەزنە، ژ ئەگەرێ مكوریا ئالیێن سیاسی ل سەر نوونەرێن خوە ل ناڤ كۆمسیۆنێ».
وی پەرلەمانتاری دیاركر ژی» نەبوونا ل هەڤهاتنێ ل سەر كۆمسیۆنەكا نوو دبیت ببیتە ئەگەرێ پاشئێخستنا هەلبژارتنێن داهاتی یێن جڤاتا نوونەرێن ئیراقێ».
پتر رۆهنكر» درێژكرنا دەمێ كۆمسیۆنا بلند یا سەربخوە یا هەلبژارتنان ل ئیراقێ بژاردەیا ب هێزە بۆ گرەنتیكرنا تمامكرنا بەرهەڤییان بۆ هەلبژارتنێن داهاتی ل ژڤانێ بۆ هاتیە دیاركرن».
خویاكر ژی» ئالیێن سیاسی ب شێوەیەكێ مەزن د هەڤڕانە ل سەر ڤێ چەندێ، ئەڤە ژی دێ بیتە پالدەرەك ب هێز بۆ دەنگدانێ ل سەر درێژكرنا دەمێ كارێ كۆمسیۆنا بلند یا سەربخوە یا هەلبژارتنان ل ئیراقێ د روونشتنا داهاتی یا جڤاتا نوونەراندا».

مەسرور بارزانی سەرۆكێ حوكمەتا هەرێما كوردستانێ و مایك والتز، شیرەتكارێ دەستنیشانكریێ ئاسایشا نیشتمانی ل ئیدارەیا داهاتی یا سەرۆكێ هەلبژارتیێ ئەمریكا دۆنالد ترەمپ، باس ل دوماهی پێشهات وگوهۆڕینێن ئیراقێ و هەرێما كوردستانێ و دەڤەرێ كر. هەڤدەم دوپاتی ل پێشڤەبرنا پەیوەندیێن دو ئالییانە و پاراستنا ئاسایشێ و سەقامگیریێ كر.
مەسرور بارزانی، سەرۆكێ حوكمەتا هەرێما كوردستانێ و مایك والتز، شیرەتكارێ دەستنیشانكریێ ئاسایشا نیشتمانی ل ئیدارەیا داهاتییا ئەمریكا، پەیوەندییەكا تەلەفۆنی ئەنجامدا.
د وێ پەیوەندییا تەلەفۆنیدا، گەنگەشە ل دۆر دوماهی پێشهات و گوهۆڕینێن ئیراقێ و هەرێما كوردستانێ و دەڤەرێ هاتە كرن، هەروەسا دوپاتی ل پێشڤەبرنا پەیوەندیێن دو ئالییانە و پاراستنا ئاسایش و سەقامگیریێ هاتە كرن.
مەسرور بارزانی پیرۆزباهی ل ئەندامێ كۆنگرێسی والتزی كر ب هەلكەفتا دەستنیشانكرنا وی وەكو شیرەتكارێ ئاسایشا نیشتمانی ل ئیدارەیا داهاتییا ئەمریكا، هەروەسا تێكگەهشتنا وی بۆ بابەتێن ئەمنی و پەیوەندیدارێن دەڤەرێ بلند هەلسەنگاند.
هەڤدەم هەردو ئالییان بیر و بۆچوون ل دۆر دەرئەنجامێن هەلبژارتنێن ڤێ دوماهیێ یێن هەرێما كوردستانێ و ئەمریكا لێكگوهارتن و دوپاتی ل گرنگییا گوهۆڕینێن دیموكراسییانە و ب هێزكرنا هاریكاری و هەماهەنگییا نێڤدەولەتی ل دۆر ڤێ چەندێ كر.
پشكەكا دی یا دانوستاندنان، د تایبەت بوون ب رۆلێ گرنگێ هەرێما كوردستانێ وەكو هەڤپشكەكا جهێ باوەریێ ل دەڤەرێ و پێگیری بوون ب بها و ئارمانجێن هەڤپشكێن ئاشتیێ و ئاسایشێ. هەردو ئالی د هەڤڕابوون ل سەر گرنگییا بزاڤێن هەڤپشك بۆ بەرهنگارییا ئاستەنگان و پشتڕاستبوون ل بەردەاومبوونا سەقامگیریێ.

پشتی پتر ژ دو حەفتییان ژناڤچوونا رژێما بەشار ئەسەدی، ئینیستیتیۆتا ئاشتیێ یا ئەمریكی چەندین كارتێكرنێن پێشبینی كری ل دۆر ئەوا دێ ل سووریێ روودەت، ل سەر ئیراقێ و ئیراقییان بەرچاڤكرن.
د راپۆرتەكا وێ ئینیستیتیۆتێدا هوشداری هاتە دان كو دبیت كورد و پێكهاتەیێن دی، زیاندارێن مەزن بن هەكە رژێمەكا دیكتاتۆر پەیدا ببیت و زالبوونەكا تایفگەری ل سەر دەستهەلاتێ ل سووریێ هەبیت، لێ وێ راپۆرتێ ئاماژەكر هەبوونا پڕۆسەیەكا دیموكراسی ل سووریێ، دێ وزەیا دیموكراسیێ ل ئیراقێ نووكەت.
وێ راپۆرتێ خویاكر ژی كو ژناڤچوونا رژێما بەشار ئەسەدی، و ئەوا پشتی وێ ل سووریێ رووددەت، دێ كارتێكرنێن ئەمنی و سیاسی یێن مەزن ل سەر ئیراقێ هەبن. هەروەسا دیاركر ژی كو رەوش یا دینامیكییە و دبیت د بەرژەوەندییا سەقامگیرییا ئیراقێ دا بیت.
ئینیستیتیۆتا ئاشتیێ یا ئەمریكی د راپۆرتا خوە دا دیاركر ژی كو ژ ئەنجامێ پێشڤەچوونێن پشتی روودانێن 7/10/2023 (هێرشا حەماس ل سەر ئیسرائیلێ) عیراق ژ وێ چەندێ د ترسییا كو پشتی غەزە و لوبنانێ و سووریێ ئەو ببیتە مەیدانەكا نوو یا شەڕی ژ بەركو هندەك گرۆپێن ئیراقی یێن سەر ب ئیرانێ ڤە پشكەك بوون ژ ( میحوەرێ موقاوەمێ) و هەر وان گرۆپێن ئیراقی یێن نێزیكی ئیرانێ چەندین هێرش ب فرۆكەیێن بێ فرۆكەڤان ل سەر ئیسرائیلێ ئەنجامدان، ژ ئالیێ خوەڤە ئیسرائیلێ ژی گەفێن بەرسڤدانا وان هێرشان كر.
وێ راپۆرتێ بەرچاڤكر ژی كو سەقامگیربوونا سووریێ و لاوازكرنا گرۆپێن توندڕەو دێ د مفایێ سەقامگیربوونا ئیراقێ دا بیت، هەڤدەم دیاركر ژی كو مەترسییا ب دەلیڤە دیتنا گرۆپێن سووری یێن توندڕەو ژ ڤالاهییان د دەستهەلاتێدا، و ئاستەنگێن ئابووری و هەڤڕكییا تایفگەری دبیت مەترسیێن مەزن ل سەر ئیراقێ پەیدا بكەت كو ب درێژاهییا 600 كیلۆمەتران سنوورەكێ هەڤپشك ل گەل سووریێ یێ هەی.
وێ راپۆرتێ دیاركر ژی كو ئیراق هەتا بەری كەفتنا ژناڤچوونا رژێما ئەسەدی، یا نیگەران بوو ژ گەفێن داعشێ و گرۆپێن دی، ب تایبەتی پشتی بەلاڤبوونا راپۆرتێن ئاماژێ ب دوبارە دیاربوونا داعشێ ل سووریێ و رەوشا نە ئارام ل دەڤەرێن دبن دەستهەلاتا هێزێن سووریا دیموكراتی (قەسەدە) یێن كەمپا (هۆل) ب رێڤەدبەن، كو هێشتا 17 هزار عیراقی د وێ كەمپێ دانە، زێدەباری زیندانێن ب هزارەها چەكدارێن داعشێ ب خوەڤە دگرن، ژ وان ژی چەند هزار ئیراقی نە.
ئینیستیتیۆتا ئاشتیێ یا ئەمریكی باس ل وێ چەندێ ژی دكەت، دبیت دیموكراسیكرنا سووریێ دێ كارتێكرنەكا ئەرێنی ل سەر پرسا دیموكراسیێ ل ئیراقێ ژی كەت، كو ل 10 سالێن بۆری ل سەر ئاستێ دەزگەهان بەر ب پاشڤە چبوو.
د بەرامبەر دا وێ راپۆرتێ دیاركر هەكە تایفگەری ل سەر سووریێ زال ببیت و ب تایبەتی هەكە وەلاتێن هەرێمی یێن سوننی پشتەڤانی لێكر، دێ بیتە ئەگەرێ رابوونا هەمان هەستی ل ئیراقێ، هەروەسا دیاركر كو ئەڤ چەندە دێ نەرەحەتیێ ل دەف شیعەیێنئ یراقێ دروست كەت و دێ پتر فشار ل سەر سوننەیان ل ئیراقێ هێنە كرن ئەوێن دێ هێزا خوە ژ هەڤكیفێن خوە ژ سوننەیێن سووریێ وەرگرن.
سەرەرای وێ چەندێ ئینیستیتیۆتا ئاشتیێ یا ئەمریكی دبێژیت، هەڤوەلاتیێن ئیراقی یێن ب ژدەستدانا ئیرانێ هەڤپەیمانێ خوە بەشار ئەسەد و دەرگەهێ وێ یێ ئەردی ل سووریێ یێن دلخوەش بووین، كو دبیت ئەڤ چەندە فشاران ل سەر وان كێم بكەت، بەلێ ئیراقییان ترس ژ وێ چەندێ یا هەی ئیران بزاڤا پتر كونترۆلكرنا ئیراقێ بكەت بۆ رێگریكرنێ ژ پتر پاشڤەچوونێ و قەرەبووكرنا زیانێن هەتا نوكە ڤێكەفتین.
ل دووڤ وێ راپۆرتێ، ئەمریكا و ئیراق یێن رێككەفتین ل سەر ب دوماهی هاتنا ئەركێ سەربازی یێ هەڤپەیمانییا نێڤدەولەتییا دژی داعشی ل ئیراقێ ل ئیلۆنا 2025 و دانوستاندنێ ل سەر هەڤپشكیەكا ئەمنی كو یا گونجای بیت ل گەل رێككەفتنا چارچۆڤەیێ ستراتیژی یا سالا 2008 و ل گەل دستوورێ ئیراقێ. هەروەسا ئەوژی بەرچاڤكر كو ئیراقییان ل سالا 2014 دخوازا پشتەڤانییا ئەمریكی كر دژی داعشێ و نوكە ژی ژ ئەمریكا دخوازن رێگریێ ل هێرشەكا ئیسرائیلێ ل سەر ئیراقێ بكەت.
ئینیستیتیۆتا ئاشتیێ یا ئەمریكی ل دوماهییا راپۆرتا خوە دبێژیت كورد و پێكهاتەیێن دی یێن نەتەوەیی و ئایینی ل ئیراقێ و سووریێ، چاڤدێرییا پێشڤەچوونان دكەن و دخوازن ئەمریكا و جڤاكا نێڤدەولەتی ل وان هەردو وەلاتان (ئیراقێ و سووریێ) لڤینان بكەن ژبۆ پەیداكرنا حوكمڕانییەكێ كو هەموویان بخوەڤە بگریت و دەربڕینێ ژ هەموویان بكەت و تنێ ئەڤ چەندە دێ سەقامگیریێ پەیدا كەت.

دادگەها كەرخ ل بەغدا سكالایا وەزارەتا پەترۆلا ئیراقی بۆ هەلوەشاندنا گرێبەستێن پەترۆلی یێن هەرێما كوردستانێ رەت دكەت.
بڕیارا دادگەها كەرخ دبێژیت، گرێبەستێن د ناڤبەرا وان كۆمپانییان و حوكمەتا هەرێما كوردستانێ، د قانوونی نە، سەرەرای وێ چەندێ گرێبەستان پشتبەستنێ ب وان بنەمایێن قانوونی دكەت كو دادگەها بلند یا ئیراقێ ل شوباتا 2022 ب نە دستووری دانابوون.
ئەو بڕیارا دادگەها كەرخ دهێتە هەژمارتن سەركەفتنەكا مەزن بۆ وان كۆمپانیێن پەترۆلێ كو ل هەرێما كوردستانێ كار دكەن.
بڕیارا دادگەها كەرخ ل بەغدا رێگریێ دكەت ل بزاڤێن وەزارەتا پەترۆلا ئیراقی بۆ هەلوەشاندنا گرێبەستێن پەترۆلی یێن هەرێما كوردستانێ ل گەل (9) كۆمپانییان كو د بوارێ بەرهەمئینانا پەترۆلێدا ل دەڤەرێ كار دكەن .
هەروەسا ئەو بڕیارا دادگەها كەرخ، دوماهیێ ب هەوا قانوونییا وەزارەتا پەترۆلا فیدرالی دئینیت دژی كۆمپانیێن (ئاداكس، دانا گاز، دی ئێن ئۆ، گازپرۆم نەفت، جێنێل ئینێرجی، گۆلف كیستۆن، ئێچ كەی ئێن ئینێرجی، شاماران و وێسترن زاگرۆس).
ل دۆر ڤێ چەندێ، سەباح سوبحی، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان و ئەندامێ لژنەیا پەترۆل و غازێ ل جڤاتا نوونەرێن ئیراقێ گۆت» پشتی بڕیارا دادگەها كەرخ، دەمێ 30 رۆژان یێ ل بەر دەستێ وەزارەتا پەترۆلا ئیراقێ بۆ وێ چەندێ تانێ ل بڕیارێ بدەت، هەكە د وی دەمی دا وەزارەتا پەترۆلا ئیراقێ هیچ تانەیەكێ ل بڕیارا دادگەهێ نەدەت، دێ ئەو بابەت ب تمامی هێتە دائێخستن».
سەباح سوبحی گۆت ژی» ئەڤ بڕیارە دێ بیتە پالدەرەكێ ب هێز بۆ كۆمپانیێن كارا ل كەرتێ پەترۆل و غازێ ل هەرێما كوردستانێ بۆ وێ چەندێ زێدەتر سەرمایێ خوە ب كاربێخن و كارێن خوە بەرفرەهتر بكەن، هەڤدەم دێ هاندانا كۆمپانیێن دی ژی كەت بۆ وێ چەندێ بهێنە هەرێما كوردستانێ و كار بكەن».

سەرۆك مەسعود بارزانی ب هەلكەفتا سالڤەگەڕا 72 یا دامەزراندنا ئێكەتییا ئافرەتێن كوردستانێ پەیامەك بەلاڤكر و راگەهاند: ئێكەتییا ئافرەتێن كوردستانێ، ئێك ژ دەستكەفتێن گرنگێن شۆڕەشا ئیلۆنا مەزنە و د هەمان دەمدا ئەزموونەكا سەركەفتییا پشكدارییا ئافرەتێ دژیانا سیاسی و جڤاكییا كوردستانێ دابوو.
دەقێ پەیاما سەرۆك بارزانی:
ب هەلكەفتا سالڤەگەڕا 72 یا دامەزراندنا ئێكەتییا ئافرەتێن كوردستانێ، پیرۆزباهیێن گەرم ئاراستەی هەوە و هەموو ئەندامێن رێكخراوا هەوە یا خەباتكەر و هەموو ئافرەتێن كوردستانێ دكەم.
ئێكەتییا ئافرەتێن كوردستانێ، ئێك ژ دەستكەفتێن گرنگێن شۆڕەشا ئیلۆنا مەزن بوو و د هەمان دەمدا ژی ئەزموونەكا سەركەفتییا پشكدارییا ئافرەتێ د ژیانا سیاسی و جڤاكییا كوردستانێ دا بوو. ئێكەتییا ئافرەتێن كوردستانێ رێكخراوەكا خەباتكەرا د ناڤ شۆڕەش و خەباتا گەلێ كوردستانێ دابوو كو رۆلێ خوە د بەلاڤكرنا هشیاری و پێگەهاندنا ئافرەتان و بەرگریكرن ژ مافێن وان گەلەك ب باشی یا بجه گەهاندی و شوون تپلا وێ د خەباتا رزگاریخوازا گەلێ كوردستانێ دا هەردەم یا دیارە.
ئەو چاڤەڕێیە ژ ئێكەتییا ئافرەتێن كوردستانێ یا هەی كو ل قۆناغێن داهاتی یێن ژیانا گەلێ مە د چارچۆڤەیێ كەلتوورێ پێكڤەژیانێ و مەدەنییەتێ و ئێكسانیێ و نەهێلانا توندوتیژییا خێزانی و جڤاكی كار بۆ ب هێزكرنا هەشتێ نیشتمانپەروەری د ناڤ رێزێن خوە دا بكەن.