نوونەرایەتییا ئێكەتییا ئۆرۆپا ل ئیراقێ، پێشوازی ل ئەنجامدانا هەلبژارتنێن پەرلەمانێ كوردستانێ كر و داخواز ژ هەموو ئالیێن سیاسی كر ژ بەر بەرژەوەندی و ئێكڕێزی و سەقامگیرییا هەرێما كوردستانێ، حوكمەتا نوو یا هەرێما كوردستانێ پێكبینن.
نوونەرایەتییا ئێكەتییا ئۆرۆپا ل ئیراقێ، د پەیامەكێدا راگەهاند» پێشوازیێ ل هەلبژارتنێن خولا شەشێ یا پەرلەمانێ كوردستانێ دكەین كو زێدەترە ژ دو سالان هەلبژارتن گیرۆ ببوون، لەوما ئێكەتییا ئۆرۆپا یا رژد بوو ل سەر وێ چەندێ هەلبژارتن بهێنە ئەنجامدان. چونكە هەلبژارتن كلیلەكە بۆ وێ چەندێ هەڤوەلاتی ئیرادەیا سیاسییا خوە دەرببڕن».
ئێكەتییا ئۆرۆپا دیاركر ژی كو پەیوەندیێن وێ ل گەل هەرێما كوردستانێ د ئاستەكێ باشدانە و داخوازكر پەرلەمانێ كوردستانێ زوو دەست ب كارێن خوە بكەت.
هەروەسا داخواز ژ هەموو ئالیێن سیاسی كر ژ بەر بەرژەوەندی و ئێكڕێزی و سەقامگیرییا هەرێما كوردستانێ و ئیراقێ، حوكمەتا نوو یا هەرێما كوردستانێ پێكبینن.

نوونەرایەتییا ئێكەتییا ئۆرۆپا ل ئیراقێ، پێشوازی ل ئەنجامدانا هەلبژارتنێن پەرلەمانێ كوردستانێ كر و داخواز ژ هەموو ئالیێن سیاسی كر ژ بەر بەرژەوەندی و ئێكڕێزی و سەقامگیرییا هەرێما كوردستانێ، حوكمەتا نوو یا هەرێما كوردستانێ پێكبینن.
نوونەرایەتییا ئێكەتییا ئۆرۆپا ل ئیراقێ، د پەیامەكێدا راگەهاند» پێشوازیێ ل هەلبژارتنێن خولا شەشێ یا پەرلەمانێ كوردستانێ دكەین كو زێدەترە ژ دو سالان هەلبژارتن گیرۆ ببوون، لەوما ئێكەتییا ئۆرۆپا یا رژد بوو ل سەر وێ چەندێ هەلبژارتن بهێنە ئەنجامدان. چونكە هەلبژارتن كلیلەكە بۆ وێ چەندێ هەڤوەلاتی ئیرادەیا سیاسییا خوە دەرببڕن».
ئێكەتییا ئۆرۆپا دیاركر ژی كو پەیوەندیێن وێ ل گەل هەرێما كوردستانێ د ئاستەكێ باشدانە و داخوازكر پەرلەمانێ كوردستانێ زوو دەست ب كارێن خوە بكەت.
هەروەسا داخواز ژ هەموو ئالیێن سیاسی كر ژ بەر بەرژەوەندی و ئێكڕێزی و سەقامگیرییا هەرێما كوردستانێ و ئیراقێ، حوكمەتا نوو یا هەرێما كوردستانێ پێكبینن.

سەرۆكێ جڤاتا نوونەرێن ئیراقێ ب وەكالەت د پەیامەكێدا پیرۆزباهیێ ب هەلكەفتا سەركەفتنا پڕۆسەیا هەلبژارتنێن خولا شەشێ یا پەرلەمانێ كوردستانێ بەلاڤكر و تێدا هیڤی خواست كابینەیا نوو یا حوكمەتا هەرێما كوردستانێ، ب لەز بهێتە پێكئینان.
موحسن مەندەلاوی، سەرۆكێ جڤاتا نوونەرێن ئیراقێ ب وەكالەت د پەیاما خوە دا پیرۆزباهییا سەركەفتنا پڕۆسەیا هەلبژارتنێن خولا شەشێ یا پەرلەمانێ كوردستانێ ل سەرۆكایەتییا هەرێما كوردستانێ، حوكمەتا هەرێما كوردستانێ و دەنگدەران كر.
موحسن مەندەولای د پەیاما خوە دا بزاڤێن كۆمسیۆنا بلند یا سەربخوە یا هەلبژارتنان ل ئیراقێ، دەزگەهێن ئەمنی یێن هەرێما كوردستانێ و ئالیێن پەیوەندیدار كر بلند هەلسەنگاندن بۆ بڕێڤەبرنا هەلبژارتنان د سەقایەكێ ئارام و سلامەتدا.
سەرۆكێ جڤاتا نوونەرێن ئیراقێ ب وەكالەت گۆت ژی» ئەنجامدانا هەلبژارتنێن پەرلەمانێ كوردستانێ د ڤی سەقایێ ئارام و سەقامگیردا، ئەنجامێ باوەرییا خەلكێ هەرێما كوردستانێیە ب دیموكراسیێ و لێكگوهارتنا ئاشتییانەیا دەستهەلاتێ. هەروەسا پێنگاڤەكە كو دەربڕینێ ژ ئیرادەیا دەنگداران و خواستێن وان بۆ چەسپاندنا سەقامگیریێ و گەهشتن ب گەشەپێدانێ و خوەشگوزەرانیێ دكەت».
مەندەلاوی هیڤی خواست» ئەنجامێن هەلبژارتنێن پەرلەمانێ كوردستانێ، هاریكار بن بۆ ب لەز پێكئینانا كابینەیا دەهێ یا حوكمەتا هەرێما كوردستانێ و هاریكار بیت بۆ ب هێزكرنا پەیوەندیێن د ناڤبەرا بەغدا و هەولێرێدا» .

دوهی دوشەمبی 21/10/2024، ئەیاد عەلاوی، سەرۆكێ هەڤپەیمانییا (وەتەن) و سەرۆك وەزیرێن پێشتر یێ ئیراقێ، ل تۆرا جڤاكییا ئێكس پەیامەكا پیرۆزباهیێ ب هەلكەفتا سەركەفتنا ئەنجامدانا پڕۆسەیا هەلبژارتنێن پەرلەمانێ كوردستانێ بەلاڤكر.
ئەیاد عەلاوی د پەیاما خوە دا گۆت» ب هەلكەفتا سەركەفتنا هەلبژارتنێن پەرلەمانێ كوردستانێ، پیرۆزباهیێ ل خووشك و برایان ل هەرێما كوردستانێ دكەین، ئەو سەركەفتنا بوویە رەنگڤەدانا پێگیریبوونێ ب دیموكراسیێ و سەقامگیریێ».
ئەیاد عەلاوی گۆت ژی» ئەڤە پێنگاڤەكا گرنگە بۆ بەر ب پێشڤەبرنا چاكسازیێ و گەشەپێدانێ، چاڤێن مە یێن ل پەرلەمان و حوكمەتەكێ كو پشكدار بیت د هێزكرنا پەیوەندییان و چارەسەركرنا هەموو تاكۆكییەكێ ل گەل حوكمەتا بەغدا ب شێوەیەكی كو خزمەتا بەرژەوەندییا هەموو ئیراقییان بكەت».

سەرۆكێ هەڤپەیمانییا عەزم یا سوننی، ب هەلكەفتا سەركەفتنا هەلبژارتنێن پەرلەمانێ كوردستانێ د پەیامەكێدا پیرۆزباهی ل گەل و سەركردایەتییا هەرێما كوردستانێ كر و دیاركر كو ئەڤ چەندە رەنگڤەدانا وێ قوربانییا مەزنە كو خەلكێ كوردستانێ ژ پێخەمەت هەلبژارتنا دیموكراسیێدا دای.
موسەننا سامەرائی، سەرۆكێ هەڤپەیمانییا عەزم یا سوننی گۆت ژی» ب ڤێ هەلكەفتێ رۆلێ مەزن یێ حوكمەتا هەرێما كوردستانێ و كۆمسیۆنا بلند یا سەربخوە یا هەلبژارتنان ل ئیراقێ بۆ رێكخستنا باش یا هەلبژارتنان ب بلند د هەلسەنگینین، ب رێكا پشكدارییا وان یا كارا د سەركەفتنا ڤێ پڕۆسەیا دیموكراسیدا.

دوهی ئێكشەمبی 20/10/2024، بارەگەهێ بارزانی بەلاڤكر، سەرۆك بارزانی ل بنگەهەكێ دەنگدانێ ل باژێركێ پیرمام، پشكداری د پڕۆسەیا دەنگدانێ بۆ هەلبژارتنێن خولا شەشێ یا پەرلەمانێ كوردستانێدا كر و دەنگێ خوە دا.

دوهی ئێكشەمبی 20/10/2024، مەسرور بارزانی، سەرۆكێ حوكمەتا هەرێما كوردستانێ ل بنگەهەكێ دەنگدانێ ل باژێركێ پیرمام دەنگێ خوە د هەلبژارتنێن خولا شەشێ یا پەرلەمانێ كوردستانێ دا.
سەرۆكێ حوكمەتا هەرێما كوردستانێ د پەیڤەكێدا راگەهاند» هیڤیدارم هەموو ئەو هەڤوەلاتیێن مافێ دەنگدانێ هەی، بچنە سەر سندۆقێن دەنگدانێ و بڕیارێ ل سەر دیاركرنا نوونەر و حوكمەتا داهاتییا خوە بدەن».
مەسرور بارزانی هیڤی خواست هەلبژارتنێن پەرلەمانێ كوردستانێ د سەقایەكێ ئارام و بێ گرفت بهێنە ئەنجامدان و گۆت» هیڤیدارم خەلكێ كوردستانێ پاداشتا خزمەت و راستگۆیێ بدەت و وان ئالییان ژی سزا بدەن كو یارییان ب چارەنڤیس و مافێ خەلكێ هەرێما كوردستانێ دكەن».
سەرۆكێ حوكمەتا هەرێما گۆت ژی» هیڤیدارم سەركەفتن بۆ كوردستانێ بیت و یێ پشتڕاستم خەلكێ كوردستانێ دێ هەردەم د سەركەفتی بن».

بەرپرسێ دەستەیا كارگێرییا مەكتەبا سیاسییا پارتی دیموكراتی كوردستان راگەهاند: ئەوێن بۆ هەلبژارتنان درووشمێن زڤر بكاردئینن، پاشی د ئۆپۆزسیۆنێدا بن یا حوكمەتێ، هەر دڤێت پێكڤە مامەلێ بكەین. هەروەسا گۆت ژی: ئەم دێ هەر د حوكمەتێدا مینن.
فازل میرانی، بەرپرسێ دەستەیا كارگێرییا مەكتەبا سیاسییا پارتی دیموكراتی كوردستان پشتی پشكداریكرنێ د دەنگدانا گشتی یا هەلبژارتنێن خولا شەشێ یا پەرلەمانێ كوردستانێ ل ئێك ژ بنگەهێن دەنگدانێ ل هەولێرێ د كۆنفرانسەكێ رۆژنامەڤانیدا راگەهاند» سەركەفتنا دیموكراسیێ و هەڤڕكیێ د وێ چەندێ دایە كا ئەم چەند ل رامانا دیموكراسیێ تێگەهشتنیە، چاوان دێ خاوەنداریییەتا وێ كەین و چاوان دێ بڕێڤە بەین».
فازل میرانی ئاماژە ب درووشمێن زڤر یێن هندەك ئالیێن سیاسی یێن پشكدار د پڕۆسەیا هەلبژارتنێن پەرلەمانێ كوردستانێ كر و گۆت» مە درووشمێن جودا جودا دیتن، ئێكی گۆت دێ گوهۆڕین، بەلێ دێ ئەنجامێن هەلبژارتنان گوهۆڕینان كەن، خوە كەس ژ مە ب شۆڕەشێ نەهاتینە كو ب شۆڕەشێ بهێنە گوهۆڕین، ئەڤ زمانێ زڤر بزاڤا سیاسی ژ كەلتووری، ئەدەبی و پەروەردەیا كورد و كوردستانی دوور دكەت، كو مە پێنەخوەشە».
میرانی خویاكر ژی» ئەوێن درووشمێن ژناڤ ببەن، بار بكەن و هەرن، دێ گوهۆڕین و بەسە رادكرن، سوباهی ل ئۆپۆزسیۆنێ بن یان ل حوكمەتێ بن، هەر دڤێت پێكڤە مامەلێ بكەین، خوە كەس ژمە بار ناكەت و ژڤی وەلاتی بچیت، هەكە ئەم برا ژی نەبین، هەڤپشكێن هەڤدوینە».
رۆهنكر ژی» ئینشائەللا ئەم دێ هەر د حوكمەتێدا مینین، بۆ من جهێ حێبەتیێە پەیڤا ئینشائەللا بكارنائینن، هەتا ئیسلامی ژی نابێژین ئینشائەللا بەسە یان دێ گوهۆڕین، ئینشائەللا یا ژبیرا وان چووی و ئەڤە باش نینە، چونكە هێچ تشتەك بێی ئینشائەللا ناهێتە كرن».
ل دووماهیێ گۆت» ب دیتنا من ئەڤرۆ ئاخڤتنێن مە هەموو بەر ب ئاشتەواییێ، پێكڤەژیان و ئارامییا وەلاتێ مە دچن، بەلێ مخابن من گوه ل هندەك ئاخڤتنان ژ هندەك برادەران بوو كو دگۆت دێ دووماهیێ پێ ئینین، بەلێ تنێ مرنە دووماهیێ ب مرۆڤی دئینیت، نەكو هیچ تشتەكێ دی».

پەیڤدارێ پارتی دیموكراتی كوردستان راگەهاند: وەلات یێ هەموویانە و دڤێت پێكڤە بڕێڤەببەین، هەروەسا گۆت: خەلك ژی دزانیت دێ دەنگی دەنە كێ و دزانیت كیش ئالی ژی دشێت ڤی وەلاتی بڕێڤەببەت.
مەحموود محەمەد، پەیڤدارێ پارتی دیموكراتی كوردستان د كۆنفرانسەكێ رۆژنامەڤانیدا سەبارەت پڕۆسەیا دەنگدانێ گۆت» هیڤییان دخوازین پڕۆسە ب ئارانی بڕێڤەبچیت و خەلك ژی دزانیت دێ دەنگی دەتە كێ و دزانیت كیش ئالی دشێت وەلاتی بڕێڤەببەت».
ل دۆر پێشێلكاریێن رۆژا دەنگدانا تایبەت، پەیڤدارێ پارتی گۆت» مە ژی وەكو هەر ئالییەكێ دی، بریكار و سەرپەرشتێن مە ل بنگەهێن دەنگدانێ هەكە تێبینییەك هەبیت سكالا یا تۆماركری».
سەبارەت رەوشا پشتی هەلبژارتنێن پەرلەمانێ كوردستانێ، گۆت» ئەم وەكو پارتی دیموكراتی كوردستان دەرگەهێ مە بۆ هەموو ئالییان یێ ڤەكری بوو و دێ ڤەكری ژی بیت، هەكە هەموو گەفێن ل بانگەشەیا هەلبژارتنان هەین، تنێ بۆ بانگەشێ بن و تشتەكێ دی ل پشت نەبیت بێگومان دڤێت تێكگەهشتن هەبیت و وەلات یێ هەموویانە و دڤێت پێكڤە بڕێڤە ببەین».

دوهی ئێكشەمبی 20/10/2024، نێچیرڤان بارزانی، سەرۆكێ هەرێما كوردستانێ پشتی ل بنگەهەكێ تایبەت یێ دەنگدانێ ل هەولێرێ دەنگدای، د داخۆیانییەكێدا باس ل گرنگییا هەلبژارتنان كر و بەرسڤا پرسیارێن رۆژنامەڤانان دا.
نێچیرڤان بارزانی گۆت» هەرێما كوردستانێ پێنگاڤەكا گرنگ هاڤێت، د چارچۆڤەیێ پڕۆسەی دیموكراتی د ڤی وەلاتیدا. د ڤێ پڕۆسەیێدا سەركەفتیێ ئێكێ خەلكێ هەرێما كوردستانێیە، كوردستان یا سەركەفتییە».
پتر گۆت» ئەڤ هەلبژارتنە بۆمە د گرنگن، چونكە دیسان دێ رەوایەتیێ و شەرعییەتدانێ دەتە دامودەزگەهێن هەرێما كوردستانێ كو ژ ئالیێ خەلكێ كوردستانێ ڤە دهێنە هەلبژارتن».
گۆت ژی» د سەركەفتنا ڤێ پڕۆسەیێدا سوپاسییەكا تایبەت بۆ محەمەد شیاع سودانی، سەرۆك وەزیرێن ئیراقێ و دادوەر فایق زێدان، سەرۆكێ دەستهەلاتا دادوەرێ ل ئیراقێ و حاكم جاسم ژ كۆمسیۆنا هەلبژارتنان ل ئیراقێ و یوونامی و هەموو وان وەلاتان دكەم كو د ڤێ پڕۆسەیێدا ل گەل مە بوون و خوازیارێن وێ چەندێ ئەڤ پڕۆسەیە بهێتە ئەنجامدان».
د بەرسڤا پڕسیارەكێدا ل دۆر پێكئینانا كابینەیا داهاتی یا حوكمەتا هەرێمێ و پڕسەیا هەلبژارتنان ل گشتی، سەرۆكێ هەرێمێ گۆت» هیڤیدارم ب زووترین دەم دەست ب پێكئینانا حوكمەتێ بهێتە كرن چونكە د بەرژەوەندییا هەموو گەلێ كوردستانێ دایە و ب پشتڕاستیڤە دێ قۆناغەكا نوو دەستپێكەت. هەتا نوكە قۆناغا بانگەشەیا هەلبژارتنان و ئەنجامدانا هەلبژارتنان بوو، ژ ئەنجامێ وێ قۆناغێ دێ قۆناغەكا دی دەستپێكەت كو دڤێت هەموو ئالی پێكڤە روونن و حوكمەت و پەرلەمان و دامودەزگەهێن دی ب زووترین دەم بكەڤنە كاری».
سەرۆكێ هەرێمێ گۆت ژی» هەموو حزب د ئازادن د وێ چەندێ دا ل گەل هەڤدو روونن و نەخشەرێكا داهاتییا هەڤپەیمانیەتیێ دیار دكەن. ئەڤە تشتەكێ ئاسایییە د هەر پڕۆسەیەكا دیموكراسیدا. ئەوا من دڤێت دوپاتیێ لێ بكەم ئێك خالە، د ڤان هەلبژارتناندا سەركەفتنا خەلكێ كوردستانێ و هەموو وان پێكهاتەیان بوو كو ل كوردستانێ دژین. ئەڤ پڕۆسەیە سەركەفتنا كوردستانێ بوو، ئەوا دمینیت حزب د چارچۆڤەیێ سیاسەتا خوە دا چەند كورسیێن دێ هەڤپەیمانییەكێ پێكئینن».
ل دۆر سەرەدانا خوە بۆ توركیا گۆت» مە پەیوەندییەكا گەلەك باش یا ل گەل توركیا هەی و جار جار ئەو سەرەدان دهێنە ئەنجامدان، د چارچۆڤەیێ پێشئێخستنا زوورتر یا پەیوەندییان د ناڤبەرا ئیراقێ و هەرێما كوردستانێ ل گەل توركیا ئەو سەرەدان هاتە ئەنجامدان».
ئاماژەكر» وەكو هەموو خەلكێ كوردستانێ چاڤەڕێ دكەم ب زووترین دەم حوكمەتەكا ئێككرتییا ب رێكوپێك بهێتە پێكئینان كو بشێت زێدەتر خزمەتا وەلاتیێن هەرێما كوردستانێ بكەت، خوەشحالم ل كوردستانێ ب ئێكلاكرنا كێشەیان ئەم ب رێكا سندۆقێن دەنگدانێ وی كاری دكەین. ئەڤە پێشكەفتنەكا مەزنە و جهێ شانازییا گەلێ كوردستانێ یە».
هەروەسا گۆت» هەر حوكمەتەك ژی دەمێ دهێت یا گرنگ ئەوە رەوشا هەڤوەلاتیێن هەرێما كوردستانێ قۆناغەكێ ڤەگوهێزیتە قۆناغەكا باشتر. چاڤەڕێیا من ژ وێ حوكمەتێ ئەوە ب زووترین دەم بهێتە پێكئینان بۆ وێ چەندێ بشێت خزمەتا هەڤوەلاتیێن هەرێما كوردستانێ و هەموو هەڤوەلاتی و پێكهاتەیێن هەرێما كوردستانێ بكەت».
سەبارەت پاشەڕۆژا پەیوەندیێن هەولێرێ – بەغدا گۆت» هەرێما كوردستانێ پشكەكە ژ ئیراقا فیدرال و دێ پشكەك ژ ئیراقا فیدرال مینیت، سیاسەتا هەرێمێ ئەوە كو د ڤی چارچۆڤەیدا ب بەردەوام بزاڤ بهێتە كرن ئەو كێشەیێن ل گەل بەغدا هەین ب دانوستاندنێ بهێنە چارەسەركرن. ئەو چاڤەڕێبوونا هەی ب تایبەتی پشتی پێكئینانا ڤێ كابینەیێ، حوكمەتا هەرێما كوردستانێ دخوازیت كێشەیان ب دانوستاندنێ و د چارچۆڤەیێ دستوورێ ئیراقێدا چارەسەر بكەت».
خویاكر ژی» بجهئینانا دستووری، زڤرین بۆ روونشتنان و ب جدی راوەستییان ل سەر چارەسەركرنا كێشەیان، ب دیتنا من ئەڤە كلیلا سەقامگیرییا سیاسییە بۆ ئیراقێ و دڤێت بەغدا ڤێ چەندێ بزانیت، مە ژی ل هەرێما كوردستانێ ئەڤ چەندە زانییە، هیڤیدارم ل گەل بەغدا بگەهینە ئەنجامەكی كو خێرا هەموو ئیراقێ تێدا بیت ب هەموو پێكهاتەیان ڤە».
ل دۆر پاشەڕۆژا پەیوەندیێن هەرێما كوردستانێ ل گەل وەلاتێن دەوروبەر، گۆت» چار سالێن داهاتی و چار سالێن بۆری ژی، سیاسەتا هەرێما كوردستانێ سیاسەتا سەقامگیریێ بوو ل دەڤەرێ. ئەم فاكتەرەكین بۆ سەقامگیریێ ل دەڤەرێ. دخوازین ل گەل جیرانێن خوە ب خوەشی و پێشكەفتنا ئابووری، ب پێشكەفتنا جڤاكی پەیوەندیێن خوە پێشڤە ببەین».
سەبارەت توندییا بانگەشەیا یا هەلبژارتنان یا هندەك ئالییان ، سەرۆكێ هەرێمێ گۆت» بانگەشەیا هەلبژارتنان هندەك جاران د توندن و هندەك جاران ژی د نەرمن. ئەڤە واتەیا بانگەشەیا هەلبژارتنان، بەلێ بنێرنە پڕۆسەیا دیموكراسی ل كوردستانێ، ئەوا روودای دبیت هندەك جاران بلندی و نشیڤی تێدا هەبیت، ئاخڤتن تێدا هەبوو، بەلێ د ئەنجامدا ئەڤە پڕۆسەیەكا دیموكراسی بوو ب هەموو رامانانڤە. گەلێ مە گەهشتە وی ئاستێ دڤێت ب رێكا سندۆقێن دەنگدانێ، كێشەیان چارەسەر بكەت».
رۆهنكر ژی» بانگەشەیا هەلبژارتنان یا جودایە ژ واقعێ دهێتە پێش، یا گرنگ ئەوە مە دڤێت پێكڤە روونین، كوردستان مولكێ ئێك ئالی و ئێك حزب نینە، یا ڤی مللەتی پێكڤەیە، لەوما ب پشتڕاستیڤە ئاخڤتن ل گەل هەڤدو و روونشتن ل گەل هەڤدو ل رۆژێن داهاتی دێ دەستپێكەت، بانگەشیا هەلبژارتنان ب دووماهی هات، دێ قۆناغەكا نوو دەستپێكەت، قۆناغا نوو پێدڤی ب وێ چەندێ یا هەی ئالی د چارچۆڤەیێ بەرژەوەندییا هەرێما كوردستانێ و هەڤوەلاتیێن هەرێما كوردستانێدا، بڕیارا خوە بدەن».
ل دۆر پشكدارینەكرنا هندەك ئالییان د حوكمەتێدا كو پێشتر خوە ب ئۆپۆزسیۆن راگەهاندییە و دابوو دیاركرن كو هەر دێ ب ئۆپۆزسیۆن مینن، نێچیرڤان بارزانی گۆت» ئەو مافێ وانە، ئەو ئالیێن سیاسی یێن دخوازن پشكدار بن یان نە، ئەڤە پڕۆسەیەكا دیموكراسییە و مافێ وانە. وان ئەو ماف یێ هەی كا چاوان خوە د چارچۆڤەیێ بەرژەوەندییا خوە بڕیارێ بدەن، دروستە».