ئەڤرۆ نیوز:
ئۆسمان بایدەمیر ئەندامێ بەرێ یێ پەرلەمانێ تورکیا و سیاسەتمەدارێ باکورێ کوردستانێ راگەهاند کو هەڤدیتنا وی ل گەل سەرۆک بارزانی گەلەک بەرهەمەدار بوویە و سوپاسیا پێشوازیا گەرم یا سەرۆک بارزانی کر.
بایدەمیر راگەهاند کو ل گەل سەرۆک بارزانی ل دۆر ئێکگەتیا ناڤمالیا کوردی و گەلەک بابەتێن دی وی هەڤدیتنەکا بەرهەمدار ئەنجام دایە و سوپاسیا هەلویستێ سەرۆک بارزانی کر.
ئەڤرۆ نیوز، نەوزاد هلۆری:
ب مەرەما پاراستنا گیانێ گرتی و راگرتیێن ناڤا چاکسازیا ئافرەت و سنێلان ل دهۆکێ، سەرەدانا کەسوکارێن وان بۆ ناڤا چاکسازیێ بۆ دەمەکێ نەدیار هاتە راگرتن.
زەکی سالح، رێڤەبەرێ چاکسازیا ئافرەت و سنێلان ل دهۆکێ دیارکر کو ب گۆرەی بریار و ڕێنمایێن وەزارەتا کاروکاروبارێن کومەلایەتی یا حوکمەتا هەرێما کوردستانێ سەرەدانا وەلاتیان بۆ گرتیێن ئافرەت و سنێلەیێن ناڤا چاکسازیا ئافرەت و سنێلا ل دهۆکێ هاتە راگرتن و بۆ ئەڤرۆ نیوز گوت: (ئەڤ راگرتنە ژبەر بەرسینگرتنا ڤایرۆسا کورۆنایێ یە و ئارمانج پاراستنا سلامەتیا گرتی و راگرتیایە).
زێدەتر گوت: (ئەڤ راگرتنە ژی دێ بۆ دەمەکێ نەدیار بیت، بەلێ کەسوکارێن وان دشێن برێکا هێلێن پەیوەندیێ و تێلەفونان ئاگەهدارێ رەوشا گرتی و راگرتیان ببن).
ئه‌ڤرۆ نیوز:
غالب شابه‌نده‌ر سیاسه‌تمه‌داره‌كێ عیراقی یه راگه‌هاند: كه‌س نه‌شێت نوكه و ل پاشه‌رۆژێ ژی عادل عه‌بدلمه‌هدی سه‌رۆك وه‌زیرێ ده‌ست ژكارڤه‌كێشایی ژ رێتنا ئه‌وێ خوینێ پاقژ بكه‌ت.
ناڤیری ل سه‌ر هژمارا خۆ یا تویته‌ری به‌لاڤكریه عادل عه‌بدلمه‌هدی ب ده‌ستێ خۆ خوین نه رێتی یه، به‌لێ هێسانكاری بۆ ئه‌وێ چه‌ندێ كریه، لاواز بوویه ده‌مێ بێ ده‌نگ بوویی هه‌مبه‌ر بكوژان.
سیاسه‌تمه‌دارێ عیراقی ئه‌و ئێكه ژی دیاركر نه نوكه و نه ژی ل پاشه‌رۆژێ كه‌س نه‌شێت عادل عه‌بدلمه‌هدی ژ وێ خوینا هاتیه رێتن رزگار بكه‌ت و دێ خویكا ئه‌وان كردارێن هاتینه كرن ل سه‌رده‌مێ وی و چه‌ندین كه‌سێن بێ گونه‌ه بووینه قوربان ده‌ت.
ئەڤرۆ نیۆز، قائید میرۆ:
بڕیارە ئەڤرۆ لایەنێن کوردستانی یێن کەرکووکێ ل ھەولێرێ کۆمبوونەکێ ئەنجامبدەن و بەرپرسەکێ پارتی ژی دبێژیت، چەندین پێشنیار ھاتینە بەرھەڤکرن بۆ تەناکرنا رەوشا کەرکووکێ.
دکتۆر محەمەد خورشید ، بەرپرسێ لقا پارتی ل کەرکووکێ بۆ ئەڤرۆ نیۆز دیارکر” بڕیارە ئەڤرۆ شاندەکێ لایەنێن کوردستانی یێن کەرکووکێ سەرەدانا بارەگایێ پارتی بدەن ل ھەولێرێ و لدۆر رەوشا نوکەیا کەرکووک کۆمببن، بەری نوکەژی چەندین کۆمبوون دناڤبەرا لایەنێن سیاسی ھاتینەکرن بۆ تەنارکرنا رەوشا ئالۆزا کەرکووکێ.
دکتۆر محەمەد خورشید گۆتژی” چەند پێشنیارەک بۆ ئاسایی کرنا رەوشا کەرکووکێ ھاتینە بەرھەڤکرن و بڕیارە د کۆمبوونا ئەڤرۆیا لایەنێن سیاسی دا بھێنە گەنگەشەکرن، بتایبەتی ڤێ دوماھیێ رەوشا کەرکووکێ زێدەتر ئالۆزی بخۆڤە دیتیە.
ئه‌ڤرۆ نیوز:
ئه‌ندامه‌كێ جڤاتا نوونه‌رێن عیراقێ راگه‌هاند بودجا هه‌رێما كوردستانێ دناڤا پرۆژه‌یێ یاسایا بودجا عیراقێ په‌یوه‌ندی ب دیتنا كابینا نوو یا حكومه‌تێ ڤه هه‌یه.
شیروان میرزا ئه‌ندامێ جڤاتا نوونه‌رێن عیراقێ راگه‌هاند: د بودجا عیراقێ بۆ سالا 2020 دا مه‌زاختی زێده‌بووینه و كورت هێنان دروست بوویه، لێ ئه‌ڤ چه‌نده مه‌ترسیێ ل سه‌ر موچه‌یێ فه‌رمانبه‌ران ناكه‌ت، چونكو حكومه‌تا عیراقێ یه‌ده‌كێ هه‌ی و دشێت ب وێ رێكێ چاره‌سه‌ریا ئه‌ڤێ چه‌ندێ بكه‌ت.
ل سه‌ر بودجا هه‌رێمێ دناڤا پرۆه‌ژیێ یاسایا بودجا عیراقێ دا ناڤبری دیاركر ژ هه‌ر كابینه‌كێ بۆ كابینه‌كا دی دیتن و ستراتیژیه‌ت دهێته‌گۆهارتن ئه‌ڤه ژی په‌یوه‌دی ب رێكه‌ڤتنێن سیاسی ڤه هه‌یه.
ئه‌ندامێ جڤاتا نوونه‌رێن عیراقێ ئه‌و چه‌نده ژی دیاركر پاشه‌رۆژا بودجا هه‌رێمێ دناڤ پرۆژه‌یێ یاسایا بودجا عیراقێ دا ب دیتنا كابینا نوو یا حكومه‌تێ ڤه هه‌یه، نوكه دانوستاندن ل سه‌ر پێك هاتنێ برێڤه دچن، سه‌ركردایه‌تیا كورد دڤێت پێداگیرێ ل سه‌ر مافێن ره‌وایێن خۆ بكه‌ت.
ئه‌ڤرۆ نیوز:
داخاز ژ حكومه‌تا عیراقێ دهێته‌كرن، بارێ نه ئاساییێ ساخله‌میێ رابگه‌هینیت.
كومسیونا بلندا مافێن مرۆڤی ل عیراقێ د راگه‌هاندنه‌كێ دا ئاماژه ب وێ چه‌ندێ دایه كۆ د پێخه‌مه‌تا پاراستنا وه‌لاتیان و رێگریكرن ژ ڤایرۆسێ كورونا پێدڤیه حكومه‌ت بارێ نه‌ئاسایێ ساخله‌میێ تا ئاستێ (جیم) را بگه‌هینیت.
كومسیونا بلندا مافێن مرۆڤی ئه‌و چه‌نده‌ی ژی دیاركر ئه‌ڤه بۆ وێ ئیكێ یه كۆ خه‌لك هشیار و رێكارێن خۆ پارستنێ ژ به‌لاڤبوونا ڤایرۆسێ كورونا بكار بینن، كۆ پێدڤیه هه‌می سازیێن حكومه‌تێ و نه‌حكومی و میدیا هه‌ڤكار و هه‌ماهه‌نگ بن.
ئه‌ڤرۆ نیۆز، عه‌زیز هه‌ورامیی:
شاسوار عه‌بدولواحید بازرگان و سه‌رۆكی حیزبی نه‌وه‌ی نوێ زیاتر له 70 ملیار دینار قه‌رزاری حكومه‌ته و پاره‌ی سه‌دان خاوه‌ن پشكی پڕۆژه‌ی چاڤی لاند و كاره‌بازرگانییه‌كانی تری لاییه، ئێستا بۆ خۆدزینه‌وه له باج و دانه‌وه‌ی قه‌رزی حكوومه‌ت و خاوه‌ن پشكه‌كان باس له‌خۆپێشاندان ده‌كات.
له‌و باره‌وه نه‌وزاد شێخ كامیل سه‌رۆكی لقی سلێمانیی ئابووریناسانی كوردستان، به ماڵپه‌ڕی ئه‌ڤرۆ نیۆزی ڕاگه‌یاند:” حكوومه‌تی هه‌رێمی كوردستان بڕیاری چه‌ندین پڕۆژه‌ی گرنگی داوه له پارێزگاكانی هه‌ڵه‌بجه و سلێمانی و ئیداره‌كانی گه‌رمیان و ڕانییه، ئه‌گه‌ر شاسوار دڵسۆزی خه‌ڵكه با بڕوات و ئه‌وپاره‌ی قه‌رزاره بیداته‌وه، به‌حكوومه‌ت تاوه‌كو باشتر بتواندرێت خزمه‌ت گوزاری پێ بكرێت.
شێخ كامیل وتیشی، پاش ئه‌وه‌ی حكومه‌ت و په‌رله‌مان له ڕێگه‌ی یاسایی چاكسازی هه‌نگاوی وه‌رگرتنه‌وه‌ی قه‌رزه‌كانیان له بازرگان و سه‌رمایه‌داره‌كان بڕیارلێداوه، شاسوار عه‌بدولواحید كه قه‌رزێكی كه‌وڵه‌كه‌بووی له‌سه‌ره، بانگه‌شه‌ی خۆپێشاندان ده‌كات تاوه‌كوو له ڕه‌وشی ئاڵۆزدا خۆی بدزێته‌وه له دانه‌وی قه‌رزه‌كانی سه‌ری.
نزار مه‌حموود ئه‌ندامی جیڤاتی نیشتیمانی بزووتنه‌وه‌ی گۆڕان، لای خۆیه‌وه به ئه‌ڤرۆ نیۆز ده‌ڵێ:” داوای خۆپێشاندان له‌لایه‌ن شاسوار عه‌بدولواحید مه‌رامی تایبه‌تی خۆی له پشتییه‌وه هه‌یه ئه‌وه‌ییه حكومه‌ت و په‌رله‌مان به یاسا ده‌ست ده‌كه‌ن به وه‌رگرتنه‌وه‌ی قه‌رزه‌كانیان له سه‌رماییه‌داره‌كان، شاسوار عه‌بدولواحید بازرگانه‌و پاره‌یه‌كی زۆری حكومه‌تی له لایه ده‌یه‌وێت له ڕێگه‌ی خۆپێشاندانه‌وه، وا له ده‌سه‌ڵات بكات نه‌رمی بنوێنێت به‌رامبه‌ری.
ئاماژه‌ی بۆ ئه‌وه‌شكرد، شاسوار عه‌بدولواحید له گه‌ڵ ئه‌وكه‌سانه‌ی له كۆمپانیاكانی كارده‌كه‌ن و ئه‌وكه‌سانه‌ی پاره‌ی لێ وه‌رگرتوون به‌ناوی پشكه‌وه شه‌فاف نییه، خه‌ڵكی وا هه‌یه خانووی بۆ فرۆشتوون سه‌یاره‌ی فرۆشتووه داویه‌تی به پشك لای شاسوار به‌ڵام تائێستا یه‌ك فلسی پێ نه‌داونه‌ته‌وه ئه‌وه ناشه‌فافییه.
زیاتر وتی، هه‌رگیز هاوڵاتیان به ده‌م شاسوار عه‌بدولواحیده‌وه ناڕۆن بۆ خۆپێشاندان چوونكه هاوڵاتیان ده‌ی ناسن، خه‌ڵك باش ئه‌وه‌ده‌زانێت كاتێك باسی باشكردنی ژیانی خه‌ڵك ده‌كات ئه‌ی بۆ چه‌ندین ساڵه به‌ناوی پشكه‌وه پاره‌یه‌كی زۆری خه‌ڵكی بردووه كۆمپانیای پێ دروستكردووه پاره‌كانیان ناداته‌وه، باشاسوار له خۆییه‌وه ده‌ست پێبكات و مافی ئه‌وخه‌ڵكه بگه‌ڕێنێته‌وه.
ئەڤرۆ نیوز:
پەیڤدارێ وەزارەتا ساخلەمیا هەرێمێ راگەهاند، چ حالەتێن توشبووی یان گومانلێکری ب ڤایرۆسێ کۆرۆنایێ ل پارێزگەهێن ھەرێما کوردستانێ نەهاتنە تۆمارکرن و نینن ژی.
محەمەد قادر پەیڤدارێ وەزارەتا ساخلەمیا حکومەتا هەرێمێ راگەهاند ، هەموو ڕێکار ل دژى ڤایرۆسێ کۆرۆنایێ ژ ئالیێ وەزارەتا ساخلەمی و ئالیێن پەیوەندیدار ڤە گرتنەبەر و رێ ناهێتە دان گەشتیارێن وڵاتێ ئیرانێ بهێنە دناڤ هەرێمێ دا.
ڕاگەهاند ژی ، تیمەکا وەزارەتا ساخلەمیێ کو ژمارا وان ٢٥ کەسن ژ ئالیێ ڕێکخراوا ساخلەمیا جیهانی ڕاهێنان پێ هاتینەکرن ل تەڤایا دەڤەرێن هەرێمێ هاتینە بەلاڤکرن ب مەرەما پشکنینێ بۆ وان کەسێن دهێنە ناڤ هەرێمێ.
هەروەسا گۆتیە، مە ل گەل وەزارەتا ساخلەمیا عێراقێ هەڤبەندیا بەردەوام هەیە و د نوکە دا تەڤایا پێدڤیێن نۆشداری بۆ پشکنینێ ل بەردەستن.
ئەڤرۆ نیوز:
ئێڤاریا ئەڤرۆ ئەینیێ وەزارەتا کار و کاروبارێن جڤاکی یا حوکمەتا هەرێما كوردستانێ، دەربارەی دۆسیا زارۆیا هەشت سالی ل هەولێرێ، ڕوونکرنەک بۆ رایا گشتی بەلاڤە كریە.
د وێ ڕوونکرنێ دا هاتیە، سەبارەت بەلاڤبوونا نووچەکێ ب ناڤێ دەستدرێژیێ بۆ سەر کچەکا 8 سالی، ل سەر راسپارا کوێستان محەمەد وەزیرا کار و کاروبارێن جڤاکی، یەکا جێندەری یا وەزارەتا مه هاتیە سەر هێلێ بۆ کۆمکرنا زانیاریێن تەمام، داکو دووڤچوونێ بکەن ب رێیا جڤاتا خانمان و رێڤەبەریا توندوتیژیێ ل دژی ژنان، بۆ هندێ داکو چ پێدڤی بیت و پەیوەندی ب وەزارەتا مە ڤە هەبیت، ئەنجام بدەت.
هەروەسا گۆتیە ژی، کەسوکار و وەلاتیێن هەرێمێ دلنیا دکەین چ پێدڤی بیت، دێ وەزارەتا مە ئەنجام دەت، چونکی کابینا حوکمەتا مە و وەزارەتا مە ئارمانج و کارێ وێ دەستەبەرکرنا ئاشتیا جڤاکی و پاراستنا مافێ تاكی و نەهێلانا رق و کینێ و دوبەره‌کیێ یە، ڤێجا ل ژێر هەر ناڤەکێ دا بهێتە ئەنجام دان.
ئەڤرۆ نیوز:
د کۆمبوونا ل گەل شاندێ هەرێمێ دا محەممەد توفیق عەلاوی پێ ڕاگەهاندیە، د پێكئینانا حوکمەتێ دا دێ وەک پارێزگەهێن دی یێن عێراقێ رەفتارێ ل گەل هەرێمێ کەین.
سەلیم شوشكەیی ئەندامێ پەرلەمانێ عێراقێ و ئەندامێ شاندێ دانوستانكارێ هەرێمێ بۆ بەغدا، ب ئاژانسا نووچەیا ئەلعێراقیە راگەهاندیە، د کۆمبوونا عەلاوی و شاندێ هەرێمێ بۆ پیكئینانا حكومەتێ، شاندێ كوردی داخواز ژ سەرۆك وەزیرێن نوو كریە د پێكئینانا كابینا خۆ دا هەرێمێ وەكو گەل تەماشە بکەت نە وەك حزب، د هەمبەر دا ژی عەلاوی ب شاندی ڕاگەهاندیە، هەرێم ژی وەك پارێزگەهێن دی یێن عێراقێ دێ رەفتار ل گەل دا هێتە کرن و پەسەندكرنا بەربژێرێن كورد ژی دێ ب هەمان وێ میكانیزمێ بیت کو بەربژارێن پاریزگەهێن دی یێن عێراقێ پێ دهێنە پەسەند كرن.
ناڤهاتی ئاشكرا كریە ژی ، عەلاوی ب ئەندامێن شاندێ هەرێمێ ڕاگەهاندیە، كو ئەو ب خوە دێ بەربژاران بۆ پۆستێن كابینا خوە دێ هەلبژێریت و ڕێ ژی نادەت چ ژ وەزیرێن نوکە د پۆستێن خوە دا بمینن.
نيشاندان