ئەڤرۆ نیوز ، زنار تۆڤی:
د دەمێ 24 دەمژمێرێن بوری دا، پێلەکا دیتر یا بەفرێ ناحیا کانی ماسێ ڤەگرتینە و د ئەنجامدا رێژەکا باش یا بەفرێ ل سەنتەرێ ناحیا کانی ماسێ و دەروازێ گومەلگەها نێڤدەولەتی یێ سەرزێری باریە، هەروەسا رێکێن هاتنووچوونێ ژی بەردەوام دهێنە ڤەکرن.
کامیران محەمەد رێڤەبەرێ شارەوانیا کانی ماسێ، تایبەت بۆ ئەڤرۆ نیوز دیار کر: شڤێدی رێژەکا باش یا بەفرێ ل سنورێ ناحیا کانی ماسێ باریە و د ئەنجامدا هەتا نوکە 25 سم بەفرێ ل سەنتەرێ ناحیا کانی ماسێ بارینە و بەفر بارین یا بەردەوامە، دهێتە پێشبینی کرن، د ئەڤرۆکە دا بەفر بارین یا بەردەوام بیت.
ناڤهاتی گۆت ژی: هەر زوو تیمێن رامالینا بەفرێ شیاینە رێیا سەرزێری و رێکێن دیتر یێن سەرەکی ژ بەفرێ رابمالن، لێ ژ ئەگەرێ بارینا بەردەوم یا بەفرێ ئاستەنگی دکەڤنە د رێیا هاتنوچوونا شۆفێران دا، ژبەرکو دەمێ رێک دهێنە رامالین ژ بەفرێ، ژ ئەنجامێ بارینا بەفرێ ب رەنگەکێ بەردەوام رێک زوو دهێنە گرتن ڤە.
ئەڤرۆ نیوز، نەوزاد هلوری:
رێڤەبەریا گشتی یا باژێرڤانیان ل پارێزگەها دهۆکێ دیارکر کو رێڤەبەریا گشتی یا کەشناسی و بیڤەلەرزان یا هەرێما کوردستانێ ئەو ئاگەهدارکرینە، کو سوبەهی و دوسبە دێ پێلەکا بەفر و سەرمایێ ب سەر پارێزگەها دهۆکێ دا هێت.
ئەمیر ئەترۆشی، بەرپرسێ راگەهاندنا رێڤەبەریا گشتی یا باژێرڤانان ل پارێزگەها دهۆکێ بۆ ئەڤرۆ نیوز گۆت: (ب گورەی نڤیسارەکا رێڤەبەریا گشتی یا کەشناسی و بیڤەلەرزان یا هەرێما کوردستانێ، کو ئاراستەیێ رێڤەبەرا گشتی یا باژێرڤانیان ل پارێزگەها دهۆکێ کریە، کو دێ سوبەهی و دوسبە پێلەکا بەفر و سەرمایێ ب سەر پارێزگەها دهۆکێ دا هێت، لەوا مە داخواز ژ هەموو باژێرڤانیێن سەر ب رێڤەبەریا گشتی یا باژێرڤانیان ل پارێزگەها دهۆکێ کرینە کو د حالەتێ ئامادەباشیێ دا بن بۆ کارێن پێدڤی و خزمەتکرنا وەلاتیان).
زێدەتر گۆت: (رێڤەبەریا گشتی یا باژێرڤانیان داخوازێ ژ هەموو وەلاتیان دکەت کو ئاگەهدارێ ساخلەمیا خوە بن، بۆ کارێ پێدڤی نەبیت قەستا دەرڤە نەکەن ب تایبەتی هشیارێ زارۆکان بن ، دیسان بۆ هەر حالەتەکێ نەخواستی ژی پەیوەندیێ ب باژێرڤانیێن سنوورێ خۆ بکەن، تیمێن باژێرڤانیان ژی د بەرهەڤن بۆ هەر روودانەکا نەخواستی).
ئەڤرۆ نیوز، نەوزاد هلۆری:
ئەڤ شەڤە پێلەکا بەفرێ چیایێ پیرس ڤەگرت و هەتا نوکە ژی یا بەردەوامە، ئەڤ یەک بوویە ئەگەر کو پتری 40 ترۆمبێلێن وەلاتیان ئاسێ ببوون، باژێرڤانیا دینارتە دیارکر کو د نوکە دا هەموو ترۆمبێل هاتینە رزگارکرن.
ردوان محیەددین، ژ راگەهاندنا باژێرڤانیا دینارتە بۆ ئەڤرۆ نیوز گۆت: دەمەکێ کێم بەری نوکە پێلەکا بەفرێ چیایێ پیرس باری و کێشە بۆ شوفێر و وەڵاتیان دروستکرن و پتری 40 ترۆمبێل د بەفرێ دا ئاسێ بوون ژ وانان 10 لایێ دینارتە و 30 ژی لایێ بارزان، هەموو ترۆمبێل ژی یێن وەلاتیان بوون.
زێدەتر گۆت: تیمێن باژێرڤانیا مە ب زووترین دەم گەهشتنە چیایێ پیرس و شیان هەموو ئەوان ترۆمبێلێن ئاسێ رزگار بکەن، داخوازێ ژ هەموو شوفێرا دکەین کو ئاگەهدارێ خوە بن ژبەرکو دەما بەفر دباریت کێشە ل چیایێ پیرس دروست دبن و جاددە دهێتە گرتن یان ژی حلیسوک دبیت.
ناڤبری دیارکر ژی کو تیمێن وان دبەرهەڤیان دانە بۆ هەر روودانەکا نەخواستی ل چیایێ پیرس و زێدەتر گۆت: ئەڤ سالە تیمێن مە چەندین جاران رێیا چیایێ پیرس ژ بەفرێ ڤەکریە، چەندین جاران ژی ترۆمێلێن وەلاتیان ئاسێ بووینە و ژلایێ تیمێن مە هاتینە دەرئینان و رزگارکرن.
ئه‌ڤرۆ نیوز، نه‌وزاد هلۆرى:
رێڤه‌به‌ریا گشتى یا گه‌شت و گۆزار هه‌ڤكارى ل گه‌ل رێڤه‌به‌ریا گشتى یا به‌ره‌ڤانیا باژێرى ل دهۆكێ رابوو ب ئه‌نجامدانا رونشته‌كا ڤه‌كرى و خوله‌كێ بۆ هه‌موو ئوتێل و موتێلێن باژێرێ دهۆكێ ل ئاڤاهیێ ئوتێل هه‌لات، ب مه‌ره‌ما وێ یه‌كێ كو ب شێوازه‌كێ باشتر پێگیریێ ب سیسته‌مێ به‌ره‌ڤانیا باژێرى بكه‌ن.
محه‌مه‌د عه‌لى سه‌رۆكێ پشكا شیانێن مرۆڤى ل رێڤه‌به‌ریا گشتى یا گه‌شت و گۆزار ل پارێزگه‌ها دهۆكێ بۆ ئه‌ڤرۆ نیوز گۆت: (ب مه‌ره‌ما باشتر رێكخستنا كاروبارێن به‌ره‌ڤانیا باژێرى و گرێدانا سیسته‌مێ به‌ره‌ڤانیا باژێرى ل هه‌موو ئوتێل و موتێل و خوارنگه‌هان، رێڤه‌به‌ریا مه هه‌ڤكارى ل گه‌ل به‌ره‌ڤانیا باژێرى ل دهۆكێ رابوو ب ئه‌نجام دانا رونشته‌كێ و خوله‌كا تایبه‌ت بۆ هه‌موو ئوتێل و موتێلێن باژێرێ دهۆكێ داكو سه‌ر و مالێ وان ب شێوه‌یه‌كێ باشتر بهێته پاراستن ل هه‌موو روودانێن ئاگرى).
زێده‌تر گۆت: (ب سوپاسیڤه هژماره‌كا زۆرا ئوتێل و موتێل و خوارنگه‌هان پشكداربوون و بابه‌تێ خولێ ژى ب تێر و ته‌سه‌لى ژلایێ به‌ره‌ڤانیا باژێرى هاته شرۆڤه‌كرن، دخوازین كو ئه‌ڤ جهه ب شێوه‌یه‌كێ باشتر سیسته‌مێ به‌ره‌ڤانیا باژێرى بكاربینن).
ئه‌ڤرۆ نیوز:
ئه‌ڤرو رۆژا پێنجشه‌مبێ 23/1/ فه‌رهاد ئه‌مین ئه‌تروشی پارێزگا‌رێ دهۆكێ پێشوازیا عه‌مید روكن حماد فازل دزه‌یی فه‌رماندێ پاسه‌وانێن سنوری یێ ناوچا ئێك وشاندێ دگه‌لدا كر.
دهه‌ڤدیتنه‌كێ دا به‌حسێ ره‌وشا پاسه‌وانێن سنوری و ئه‌و ئه‌رك وخزمه‌تا دوارێ به‌رقراكرنا ئارامیا سنوران دا ل هه‌رێما كوردستانێ دانوستادن ل سه‌ركرن و هه‌ردوو لایه‌نان ته‌كه‌زی ل سه‌ر هه‌ڤكاری وهاریكاریێ كر بو وێ یه‌كێ ئه‌من وئاسایشا سنورێن ناوچا ئێك ل هه‌رێما كوردستانێ باشتر بهێنه پاراستن.
پارێزگا‌رێ دهۆكێ رۆلێ پاسه‌وانێن سنوران ل هه‌رێمێ بلند نه‌رخاند وده‌ست خوشی ل فه‌رمانده وپله‌دارێن پاراستنا سنوران كر وپشته‌ڤانیا كارگێریا پارێزگه‌هێ نیشان دا بۆ هه‌ر هه‌ڤكاری وهاریكاریه‌كێ بۆ وێ یه‌كێ هێزێن پاسه‌وانێن سنوران ب ره‌نگه‌كێ باشترئه‌من وئاسایشا وه‌لاتیان وسنورێن هه‌رێمێ ب پارێزن.
ژلایێ خوڤه فه‌رماندێ پاسه‌وانێن سنوری یێ ناوچا ئێك ل هه‌رێما كوردستانێ سوپاسیا پارێزگا‌رێ دهۆكێ وسازیێن په‌یوه‌ندیدار كر ل دور ئه‌و هاریكاریا به‌رده‌وام یا دگه‌ل هێزێن پاسه‌وانێن سنوران ل پارێزگه‌ها دهۆكێ دكه‌ن و خواست ئاستێ وێ هاریكاریێ پتر لێ بهێت بۆ وێ یه‌كێ هه‌ر ئاریشه‌كا ل سه‌ر سنوران دهێته پێش بهێته چاره‌سه‌ركرن.
ئه‌ڤرۆ نیوز، له‌زگین جوقی:
ئێكه‌مین كۆنفرانسێ زانستی نۆژداریا زارۆیان ب پشكداریا نۆژدارێن هه‌رێما كوردستانێ و یێن عیراقێ ل پارێزگه‌ها دهۆكێ ل رۆژا 23/1/2020 هاته ئه‌نجامدان.
د. نزار عسمه‌ت،رێڤه‌به‌رێ گشتی یێ ساخله‌میا پارێزگه‌ها دهۆكێ دیاركركو ئه‌ڤرۆ 23/2020 ئێكه‌م كونفرانسێ زانستی نۆژداریا زارۆیان ل دهۆكێ هاته گێران ل سه‌رانسه‌ری عیراقی و هه‌رێما كوردستانێ نۆژدار و پرۆڤیسۆر نۆژداریا زارۆیان پیشكدارن دكۆنفرانسی دا بۆ وێ چه‌ندێ دانوستاندنه‌كا زانستی ئه‌نجام بده‌ن ل سه‌ر ئاستێ خزمه‌تێن ساخله‌میێ یێن بۆ زارۆكان دهێنه پێشكیشكرن و ئاستی وان باشتربكه‌ن، هه‌روه‌سا ژی ئاستێ فێركرنا پزیشكیا نۆژداران ل زانكۆیا و سه‌نته‌رێ بۆردی ئه‌م سوپاسیا كۆلیژا نۆژداری زانكۆیا دهۆكێ و نه‌خۆشخانا هێڤی یا زارۆیان دكه‌ن كو ڤێ ئه‌ركێ رابووینه شیاینه ڤێ كۆنفرانسی سازبكه‌ن بتایبه‌تی ژی د. خه‌له‌ف حسین و د. ئازاد عبدالجبار و د. نزار بكر وهه‌موو نۆژدارێن دگه‌لدا”.
رێڤه‌به‌رێ گشتی یێ ساخله‌میا پارێزگه‌ها دهۆكێ دیاركركو خزمه‌تیێن ساخله‌میێ یێن زارۆیان ل دهۆكێ رۆژ دووڤ رۆژی باشتر لێ دهێن ب تایبه‌تی ژی نه‌خۆشخانا هیڤی ئاسته‌كێ باش خزمه‌تێ پیِشكیش دكه‌ن وشیاینه ساله‌كێ دا رێژا مرنا زارۆیان 25% كێم بكه‌ن ئه‌ڤه بخوه ژی كاره‌كێ مه‌زن هاتیه كرن دووڤ ئامارێن ساخله‌میێ رێژا مرنا زارۆیێن نوو ژدایك دهێن ل رێزا پێنچێ دهێت ئانكو هیشتا ژی ئه‌ڤه ژی رێژه‌كا بلنده ئه‌ڤ كۆنفرانسێن نوژدارێن زارۆكان دگرنگن بۆ مفا وه‌رگرتنێ ودخوازین ئاستێ نه‌خۆشخانیێن دهۆكێ باشتر بكه‌ین.
د. خه‌له‌ف حسین گه‌رگه‌ری، شیره‌تكارێ نه‌خۆشیێن زارۆكان و ئێك ژ رێكخه‌رێ كۆنفرانسێ زارۆكان ل دهۆكێ دیاركركو كۆنفرانسی ئێكی ل سه‌ر چه‌ندین نه‌خۆشیێن زارۆكان هاته ئه‌نجامدان دێ كار هێته كرن ئه‌ڤه كۆنفرانسێ بیته سالانه هه‌كه شیان ژی هه‌بن ببیته كۆنفرانسه‌كێ نێڤده‌وله‌تی یێن نۆشدارین زارۆكان بۆ ئالوگوركرنا زانستێ نوو یێ نۆشداریا زارۆكان مه‌ره‌م ژ كۆنفرانسی ئه‌وه نۆشداریا زارۆكان بهێته پێشڤه‌برن هه‌موو واره‌كێ ل سه‌رانسه‌رێ هه‌رێما كوردستانێ و پارێزگه‌هێن عیراقێ ژی هه‌روه‌سا ژی په‌یوه‌ندیێن ناڤبه‌را نۆشدارێن كوردستانێ و عێراقی دا بهێنه بهێزكرن نۆژدارین به‌شدار ژی نۆژدارین هه‌رێما كوردستانێ و پارێزگه‌هیێن عێراقی دگه‌ل رێڤه‌به‌رێ بۆردێ عیراقی و رێڤه‌به‌رێ بۆردی كوردستانی وسه‌رۆكی كۆمه‌لا نۆژداریێن زارۆیان و چه‌ندین نۆژدارین زارۆیان به‌شداربوون.
ئه‌ڤرۆ نیوز:
موقته‌دا سه‌در ناخوازیت ل خونیشاندانێن ملیۆنی یێن لایه‌نگرێن خۆ ل دژی ئه‌مریكا و كارتێكرنێ ل سه‌ر خونیشاندانێن جه‌ماوه‌ری یێن به‌غدا هه‌بن، له‌ورا ل ده‌ڤه‌ره‌كا دی یا جودا یا به‌غدا ئه‌نجام ده‌ن.
بریاره سوبه‌هی خونیشاندانێن ملیۆنی بهێنه رێڤه‌برن كۆ به‌ری نوكه موقته‌دا سه‌در رێبه‌رێ ره‌وتێ سه‌دری بانگه‌شه‌یا بۆ دكر كۆ دژی هه‌بوونا هێزێن ئه‌مریكا ل عیراقێ یه.
سه‌لاح عوبه‌یج په‌یڤداری موقته‌دا سه‌در راگه‌هاند: خهونیشاندانین ملیۆنی ل ده‌ڤه‌را چاریانا زانكۆیا به‌غدا ل ده‌ڤه‌را جادریێ بهێته كرن، ژبوی كارتێكرن ل سه‌ر خونیشاندانێن دی یێن جه‌ماوه‌ری نه‌كه‌ت.
ئه‌ڤرۆ نیوز:
دانوستاندنێن حوكمه‌تا هه‌ریما كوردستانێ ل گه‌ل حوكمه‌تا به‌غدا دبیته بابه‌تێ دانوستاندنا جڤینا ئه‌ڤرۆ یا په‌رله‌مانێ كوردستانێ.
بریاره ده‌مژمێر 11 ئه‌ڤرۆ كۆ رۆژا پێنج شه‌مبی 23/1/2020 په‌رله‌مانێ كوردستانێ كۆمبوونه‌كا ئاساییی یا خودا دانوستاندنێ ل سه‌ر رێكه‌تنا هه‌ریمێ و به‌فدا كه‌ت.
د به‌رنامه‌یێ كاری په‌رله‌مانی دا هاتیه كۆ ئه‌ڤرۆ دێ دو كۆمبوونان كه‌ت ل سه‌ر ئه‌ڤان بابه‌تان كه‌ت:
– ب به‌رهه‌ڤبوونا شاندێ دانوستاندكارێ حوكمه‌تا هه‌رێما كوردستانێ ب مه‌به‌ستا ئێخستنه روویا ده‌رئه‌نجامێن وێ ل گه‌ل حوكمه‌تا فیدرال ل سه‌ر پرۆژه‌یێ بودجا سالا 2020 و پرسا پترۆلێ.
– بلبه‌تێ دوێ ئیخستنه روویا هزرا د.گه‌لاوێژ عوبه‌ید ل سه‌ر دامه‌زراندنا سه‌نته‌رێ راوێژكاریی بۆ ماوه‌یی یا نیشتمانی ژبه‌ر زۆر بوونا رێژه‌یا زارۆكین ناكام و نه‌خوشیێن بۆ ماوه‌یی.
ئه‌ڤرۆ، هۆشه‌نگ تاجر:
چاڤدێره‌كێ سیاسی یێ رۆژهه‌لاتێ كوردستانێ راگه‌هاند كو ٧٤ سالان به‌ری نها د ره‌وشه‌كا گه‌له‌ك ئالۆز دا ب پشكداریا بارزانیێ نه‌مر و هه‌ڤالێن وی كوردان شیا بۆ جارا ئێكێ د دیرۆكێ دا كۆماره‌كێ ئاڤا بكه‌ن، ره‌نگه ژیێ كۆمارێ كورت بوو لێ گه‌له‌ك ده‌ستكه‌فتێن خوه یێن دیرۆكی هه‌بوون.
سه‌عید مورادی چاڤدێرێ سیاسی یێ رۆژهه‌لاتێ كوردستانێ بۆ ئه‌ڤرۆ نیوز دیار كر كو راگه‌هاندنا كۆمارا كوردستانێ ل باژێرێ مهابادێ به‌ری ٧٤ سالان نیشا دده‌ت كو كوردان هه‌ر ده‌مه‌كێ بۆ بده‌ستڤه‌ئینانا مافێن خوه یێن ره‌وا كار كرینه و بێگومان راگه‌هاندنا كۆماره‌كێ د ناڤ دلێ سیسته‌مێ پاشایه‌تی یێ ئیرانێ د وی سه‌رده‌می دا تشته‌ك كێم نه‌بوو و گۆت: (كۆمارا كوردستانێ د ده‌مه‌كێ دا هاته راگه‌هاندن كو ل رۆژهه‌لاتا ناڤین شه‌ره‌ك مه‌زن هه‌بوو و وه‌لاتێن زلهێز ژی كار بۆ به‌رژه‌وه‌ندیێن خوه دكرن و بێگومان ژ به‌ر به‌رژه‌وه‌ندیێن خوه یێن ل گه‌ل وه‌لاتێن رۆژهه‌لاتا ناڤین وان پشته‌ڤانی ل كۆمارا كوردستانێ نه‌كر و ژ به‌ر هندێ ژی ژیێ كۆمارێ گه‌له‌ك كورت بوو).
ناڤهاتی ئه‌و یه‌ك ژی دیار كر كو د وی ژیێ خوه یێ كورت دا كۆمارا كوردستانێ شیا گه‌له‌ك ده‌ستكه‌فتێن دیرۆكی بۆ هه‌موو كوردان تۆمار بكه‌ت و ٧٤ سال ل سه‌ر دامه‌زراناندنا كۆمارا كوردستانێ ده‌رباز بوون لێ هه‌تا نها ژی هه‌موو وه‌لاتیێن كورد ل هه‌ر چار پارچێن كوردستانێ و جیهانێ شانازیێ ب كۆمارا كوردستانێ و ده‌ستكه‌فتێن وێ دكه‌ن.
چاڤدێرێ سیاسی یێ رۆژهه‌لاتێ كوردستانێ ئه‌و یه‌ك ژی دیار كر كو كۆمار ژ ئالیێ هێزه‌كا پاشكه‌فتی ڤه هاته ژناڤبرن كو ژ هزرێن دیموكراسیخوازی و ئاشتیانه یێن كوردان دترسیان و هه‌تا نها ژی سیسته‌مێ ئیرانێ هه‌ر د قه‌یرانێ دایه و نه‌شیایه پرسێن خوه ژی چاره‌سه‌ر بكه‌ت و ئه‌ڤرۆكه مه‌زنترین مه‌ترسی ل سه‌ر سیسته‌مێ ئیرانێ هه‌یه و بێگومان هه‌ر گوهۆرینه‌ك ل ئیرانێ روو بده‌ت دێ د به‌رژه‌وه‌ندیا كوردان دا بیت.
ناڤهاتی د دووماهیا ئاخڤتنا خوه دا ئه‌و یه‌ك ژی دیار كر كو پشكداریا بارزانیێ نه‌مر و هه‌ڤالێن وی د ئاڤاكرنا كۆمارا كوردستانێ دا بۆ هه‌موو جیهانێ سه‌لماند كو دۆزا كوردان ئێكه و كورد ل هه‌ر جهه‌كێ بن دێ پشته‌ڤانیێ ل برایێن خوه كه‌ن، ئه‌ڤرۆكه هه‌موو كورده‌ك ل جیهانێ شانازیێ ب ده‌ستكه‌فتێن هه‌رێما كوردستانێ دكه‌ت و هێڤیا مه هه‌موویان ئه‌وه كو رۆژه‌كێ ده‌وله‌تا كوردی ل هه‌رێما كوردستانێ بهێته راگه‌هاند دا خه‌ونا هه‌موو كوردان ببیته راستی و گۆت: (ئه‌ڤرۆكه ل هه‌رێما كوردستانێ سیسته‌مه‌ك دیموكراتی هه‌یه، زۆلم و زۆرداری ل چو كه‌سه‌كێ ناهێته كرن، هه‌موو پێكهاتێن ئایینی و جڤاكی د ناڤ سیسته‌مێ دیموكراتی یێ هه‌رێما كوردستانێ دا وه‌كو برا پێكڤه دژین و ئه‌و یه‌ك ژی سه‌ركه‌فتنه‌كا مه‌زنه بۆ هه‌موو كوردان و ل كۆمارا كوردستانێ ژی هه‌مان هزر هه‌بوو و دوژمنێن كوردان هه‌تا نها ژی ژ هزرێ پێشكه‌فتی و دیموكراتی یێ كوردان دترسن و نها ژی گه‌له‌ك جاران پیلانان دگێرن دا ده‌ستكه‌فتێن گه‌لێ كوردستانێ ل هه‌رێما كوردستانێ و پارچێن دی یێن كوردستانێ ژناڤ ببه‌ن، ژ به‌ر هندێ ژی پێدڤیه ئه‌م وانان ژ دیرۆكا خوه وه‌ربگرین و ب هه‌موو ره‌نگه‌كێ خوه‌دان ژ ده‌ستكه‌فتێن هه‌رێما كوردستانێ و كۆمارا كوردستانێ ده‌ركه‌ڤین و ب ڤه‌كۆلینێن زانستی راستیان بۆ رایا گشتی یا جیهانێ ئاشكرا بكه‌ین).
نيشاندان