ئه‌ڤرۆ نيوز، نيوار محه‌مه‌د سه‌ليم:
جڤاتا نوونه‌رێن عيراقێ 14 مادده ژ پرۆژێ قانوونا هه‌لبژارتنا جڤاتا نوونه‌رێن عيراقێ په‌سه‌ند كرن و نوونه‌رێن كورد ژى بايكوتا كۆمبوونا شه‌ڤا بۆرى يا جڤاتا نوونه‌ران كر.
شه‌ڤا بۆرى جڤاتا نوونه‌رێن عيراقێ 14 مادده ژ 50 ماددێن قانوونا هه‌لبژارتنان په‌سه‌ندكرن، ده‌مێ ده‌نگدان گه‌هشتيه سه‌ر ماددێن 15 و 16 نوونه‌رێن كورد داخواز كر كو ده‌نگدان ل سه‌ر وان ماددان بهێته پاشخستن و پشتى گوهـ ل داخوازيا وان نه‌گرتى ئه‌و و نوونه‌رێن سونه و هنده‌ك نوونه‌رێن دژى ژ هۆلا كۆمبوونێ ده‌ركه‌فتن و رێژا قانوونى يا ئه‌ندامان نه‌ما د ژوورا كۆمبوونێ ڤه.
پاشان سه‌رۆكێ جڤاتا نوونه‌ران ل گه‌ل نوونه‌رێن كورد كۆم بوو و سۆز دايێ وان دو ماددان نه‌ئێخيته ده‌نگدانێ و جاره‌كا دى ئه‌ندامێن كورد ڤه‌گه‌ريانه كۆمبوونێ، به‌لێ ده‌ما هه‌ست پێ كرى كو دێ جاره‌كا دى وان ماددان ئێخنه ده‌نگدانێ نوونه‌رێن كورد ڤێ جارێ هۆل ب ئێكجارى ب جهـ هێلا و سه‌رۆكێ جڤاتا نوونه‌ران ژى نه‌چار بوو بۆ دووشه‌مبيا بهێت كۆمبوون پاشخست.
ماددێ 15ێ يێ تايبه‌ته ب سيسته‌م و بازنێ هه‌لبژارتنان، كورد دخوازن ل سه‌ر ئاستێ پارێزگه‌هان ئێك بازنه بيت نه‌ك ل سه‌ر ئاستێ قه‌زايان بيت، به‌ربژێركرن ژى ل سه‌ر ئاستێ ليستان بيت نه‌ك يێ تاكان. به‌لێ پشكه‌كا دى يا لايه‌نان يێ ل گه‌ل فره‌بازنه‌يا پارێزگه‌هان و به‌ربژاركرنا تاك يا نوونه‌ران. ماددێ 16ێ ژى په‌يوه‌ندى ب كوتا ژنێ ڤه هه‌يه و په‌يوه‌نديا ئێكسه‌ر ب ماددێ 15ێ ڤه هه‌يه.
نيشاندان