بارهەلگرەك ٦۰ سەرێن پەزی دکوژیت و شڤانەکى ژی بریندار دکەت

31/08/2019 13:48

530

ئەڤرۆ نیوز؍عەلی حاجی :

سپێده‌یا ئەڤرۆ شەمبیێ ۳۱/۸/۲۰۱۹ ل سەر رێیا دوکەرێ ترومبێلەکا بارهەلگر خوە ل گەرەکێ پەزی ددەت و دبیتە ئەگەرێ برینداربوونا شڤانێ پەزی و کوشتنا ٦۰ سه‌رێن پەزی و برینداربوونا ۲۰ پەزەكێن دى .

ئەحمەد گوللی؍شاهد حالەکێ روودانێ بۆ ئەڤرۆ نیوز دیارکر ئەڤ روودانە ل دەمژمێر ۱۰ی سپێدێ روویدا دەما ترومبێلەکا بارهەلگر ژ ئەگەرێ نەمانا ستوپ خوە ل گەرەکێ پەزی د دەت ؍د ئەنجامدا شڤانێ وێ گەڕێ پەزی بریندار دبیت و دهێتە هنارتن بۆ نەخوه‌شخانا زاخۆ، ل دووڤ پێزانینان ژی نوکە رەوشا ساخله‌مى یا وی شڤانی یا باشە.

هه‌روه‌سا د وێ روودانێ دا ٦۰ سەرێن پەزی هاتنە کوشتن و ۲۰ پەزێن دی ژی بریندار دبن؍نێزیکی ۳ هەتا ٤ سەرێن پەزی ژی ژئەگەرێ دژواریا برینا وان دهێنە سەرژێکرن؍ئەڤ روودانە د ناڤبەرا گوندێن گوفکا سەری و گوفکا بنی سەر ب ناحیا باتیفا دروست بوویە .

ناڤهاتی گوت ژی :ب گۆره‌ى پێزانینان ئەو پەزە یێ وه‌لاتیەکێ دەڤەرا زاخۆیە ؍شڤانێ گەڕێ پەزی ژی خزمێ خودانێ وێ گەڕێ؍بتنێ وەکو شڤان ل ڤان گوندان ئەو پەزە د چەراند و شڤانێ پەزی خەلکێ شنگالێ یە و ماوەیەکێ ل ڤێ دەڤەرێ کاری شڤانیێ دكه‌ت.

سه‌رۆك بارزانى پێشوازيێ ل وه‌زيرێ ناڤخوه‌يا عيراقێ دكه‌ت

29/08/2019 19:49

ئه‌ڤرۆ نيوز:

سه‌رۆك مه‌سعود بارزانى ئه‌ڤرۆ پێنجشه‌مبى 29/8/2019 پێشوازى ل ياسين ئه‌لياسرى وه‌زيرێ ناڤخوه‌يا عيراقێ كر.

د كۆمبوونه‌كێ دا ره‌وشا سياسى و دووماهى پێشهاتێن عيراقێ و ده‌ڤه‌رێ هاتنه‌ به‌حسكرن، هه‌روه‌سا به‌حسێ وى سه‌قايێ ئه‌رێنى كو د په‌يوه‌ديێن

د ناڤبه‌را هه‌ولێرێ و به‌غدا هاتينه‌ پێش وب ده‌ليڤه‌كا باش هاته‌ زانين بۆ چاره‌سه‌ركرنا هه‌موو كێشان.

د پشكه‌كا دى يا كۆمبوونێ دا دووپاتى ل هه‌ماهه‌نگيێ د ناڤبه‌را هه‌ولێرێ و به‌غدا د دروستكرنا ئاسايش و سه‌قامگيريێ و روو ب رووبوون و ژ ناڤبرنا تيرۆرێ هاته‌ كرن.

مه‌سرور بارزانى برياره‌كا نوو ده‌ردكه‌ت

29/08/2019 19:12

4748

ئه‌ڤرۆ نيوز:

سه‌رۆك وه‌زيرێن هه‌رێما كوردستانێ، مه‌سرور بارزانى ئه‌ڤرۆ پێنجشه‌مبى 29/8/2019 پێشوازى ل شانده‌كێ بلند يێ وه‌زاره‌تا ناڤخوه‌ يا عيراقێ ب سه‌رۆكايه‌تيا ياسين ئه‌لياسرى وه‌زيرێ ناڤخوه‌ كر.

وه‌زيرێ ناڤخوه‌يا عيراقێ خوه‌شحاليا خوه‌ ده‌ربرى به‌رامبه‌ر دروستبوونا وى سه‌قايێ ئه‌رێنى يێ نوكه‌ د ناڤبه‌را هه‌رێما كوردستانێ و به‌غدا هه‌ى وئاماژه‌ ب وێ چه‌ندێ كر كو لێكتێگه‌هشتنه‌كا باش د ناڤبه‌را هه‌ردو وه‌زاره‌تێن ناڤخوه‌ يێن هه‌رێما كوردستانێ و عيراقێ دا يێ هه‌ى وهه‌ر كێشه‌كا بهێته‌ پێش ژى پێدڤيه‌ ب گۆره‌ى دستوورى بهێته‌ چاره‌سه‌ركرن.

مه‌سرور بارزانى سوپاسيا وه‌زيرێ ناڤخوه‌يێ عيراقێ كر بۆ هه‌ماهه‌نگى وهاريكاريا وان ل گه‌ل وه‌زاره‌تا ناڤخوه‌ يا هه‌رێما كوردستانێ.

د كۆمبوونه‌كێ دا ب به‌رهه‌ڤبوونا رێبه‌ر ئه‌حمه‌د وه‌زيرێ ناڤخوه‌يا هه‌رێمێ، ئاماژه‌ ب كێشا نشينگه‌ وه‌رگرتنێ 10 هزار دينارێن عيراقى هاته‌ كرن كو ژ هه‌موو وه‌لاتيه‌كێ ده‌رڤه‌ى هه‌رێما كوردستانێ دهێته‌ وه‌رگرتن، مه‌سرور بارزانى ئاماژه‌ ب وێ چه‌ندێ كر كو ئه‌و ميكانيزمه‌ ب ناڤێ (ئيقامه‌) دهاته‌ نياسين وبۆ پاراستنا ئاسايشا هه‌رێما كوردستانێ و گه‌شتياران بوو، ژ نوكه‌ و پێڤه‌ ناڤێ وێ دێ بيته‌ (دلنيايى يا ئاسايشێ).

هه‌روه‌سا ل سه‌ر فه‌رمانا مه‌سرور بارزانى سه‌رۆك وه‌زيرێن هه‌رێما كوردستان بريار هاته‌ دان ژ نوكه‌ و پێڤه‌ حوكمه‌تا هه‌رێمێ مه‌زاختيێن (دلنيايى يا ئاسايشێ) دابين بكه‌ت و ژ 1/9 و وێڤه‌ چو پاره‌ ژ وه‌لاتيێن پارێزگه‌هێن عيراقێ كو سه‌ره‌دانا هه‌رێما كوردستانێ دكه‌ن ناهێنه‌ وه‌رگرتن.

په‌روه‌رده‌: ئاستێ هنده‌ك قوتابخانێن ئه‌هلى يێ نزمه‌ ودێ هێنه‌ هه‌لوه‌شاندن

28/08/2019 19:51

449

ئه‌ڤرۆ نيوز:

راوێژكارێ وه‌زاره‌تا په‌روه‌ردێ بورهان ئه‌رگۆشى راگه‌هاند، لژنه‌كا بلند ل وه‌زاره‌تا په‌روه‌ردێ ب سه‌رپه‌رشتيا ئالان حه‌مه‌ سه‌عيد وه‌زيرێ په‌روه‌ردێ دێ پێداچوونێ ب قوتابخانه‌ وپه‌يمانگه‌ و باخچێن زارۆيان دا كه‌ت.

بورهان ئه‌رگۆشى د داخۆيانيه‌كێ دا گۆت” ئاستێ هنده‌ك قوتابخانێن ئه‌هلى گه‌له‌ك يێ نزمه‌ ولژنا ناڤبرى دێ بريارا داخستنا وان ده‌ت ومۆله‌تێن وان ژى هه‌لوه‌شينيت”.

گۆت ژى” مافێن وان قوتابيێن قوتابخانێن وان دهێنه‌ داخستن دێ يێ پاراستى بيت وچو مه‌ترسى بۆ سه‌ر پاشه‌رۆژا وان نابيت”.

سه‌رۆك بارزانى پێشوازيێ ل شانده‌كێ كه‌سايه‌تيێن به‌سرا دكه‌ت

28/08/2019 19:28

ئه‌ڤرۆ نيوز:

سه‌رۆك مه‌سعود بارزانى ئه‌ڤرۆ چارشه‌مبى 28/8/2019 پێشوازى ل شانده‌كێ مه‌زن يێ كه‌سايه‌تيێن پارێزگه‌ها به‌سرا كر كو ژ سه‌رۆك عه‌شير و زانايێن ئايينى وكه‌سايه‌تيێن ئه‌كاديمى يێن وێ پارێزگه‌هێ پێكهاتبوو.

د ديداره‌كێ دا شاندێ مێهڤان سلاڤ ورێزێن خه‌لكێ پارێزگه‌ها به‌سرا گه‌هاندنه‌ سه‌رۆك بارزانى و گه‌لێ كوردستانێ ودووپاتى ل سه‌ر سۆز و خوه‌شتڤيا خه‌لكێ وێ پارێزگه‌هێ بۆ سه‌رۆك بارزانى و خه‌لكێ كوردستانێ كر.

شاندێ به‌سرا ئاماژه‌ ب په‌يوه‌نديێن برايانه‌ و كه‌ڤن يێن خه‌لكێ به‌سرا ل گه‌ل خه‌لكێ كوردستانێ كر و راگه‌هاند كو هه‌ر ئه‌و سۆزه‌ بوو بوويه‌ ئه‌گه‌رێ وێ چه‌ندێ ب ده‌هان هزار خه‌لكێ به‌سرا ل ده‌مێ زڤرينا بارزانيێ نه‌مر و هه‌ڤالێن وى ژ ئێكه‌تيا سوڤيه‌تى يا جاران بۆ پێشوازيكرنا وان د چڤه‌رێكرنا وان دا راوه‌ستن، نوكه‌ ژى هه‌مان سۆز و خوه‌شتڤى بۆ سه‌رۆك بارزانى و خه‌لكێ كوردستانێ يا هه‌ى ودخوازن وێ برايينيا كه‌ڤن زێده‌تر بهێته‌ پێشڤه‌برن.

هه‌ر د وى چارچۆڤه‌ى دا شاندێ پارێزگه‌ها به‌سرا داخواز ژ سه‌رۆك بارزانى كر كو د ده‌ليڤه‌كا گونجاى دا سه‌ره‌دا وێ پارێزگه‌هێ بكه‌ت.

شاندێ مێهڤان به‌حسێ گرفت وكێشێن تايبه‌ت ب نه‌بوونا خزمه‌تگوزاريان ل پارێزگه‌ها به‌سرا كر و هيڤى خواستن ئه‌و پێشكه‌فتنا ل هه‌رێما كوردستانێ هه‌ى بگه‌هيته‌ هه‌موو ده‌ڤه‌رێن دى يێن عيراقێ وبۆ وێ مه‌ره‌مێ داخواز ژ سه‌رۆك بارزانى كر كو ب رێيا وه‌زير و نوونه‌رێن كورد ل به‌غدا بزاڤێ بكه‌ن پرۆژێن ئاڤێ و ئاكنجيكرنێ ل پارێزگه‌ها به‌سرا بجهبينن وكێشێن وێ پارێزگه‌هێ بهێنه‌ چاره‌سه‌ركرن.

سه‌رۆك بارزانى دووپانى ل پێشڤه‌برنا په‌يوه‌نديێن برايينى د ناڤبه‌را گه‌لێ كوردستانێ و خه‌لكێ به‌سرا و هه‌موو خه‌لكێ عيراقێ كر و راگه‌هاند هه‌رچه‌نده‌ رژێمێن ئێك ل دووڤ ئێك يێن عيراقێ گه‌له‌ك بزاڤكرن كێشا د ناڤبه‌را شوره‌ه‌شا كوردى ل گه‌ل ده‌ستهه‌لاتا عيراقێ بكه‌نه‌ كێشا كورد و عه‌ره‌با، به‌لێ شوره‌شا كوردى رێ ب وێ چه‌ندێ نه‌دا.

سه‌رۆك بارزانى سه‌باره‌ت كێشێن خزمه‌تگوزارى يێن پارێزگه‌ها به‌سرا نيگه‌رانيا خوه‌ ده‌ربرى و راگه‌هاند، مه‌ ژى رێز و سۆزه‌كا مه‌زن بۆ خووشك و برايێن مه‌ ل به‌سرا يا هه‌ى وجهێ حێبه‌تيێ يه‌ پارێزگه‌هه‌كا وه‌كو به‌سرا كو شاده‌مارا ئابوورێ عيراقێ يه‌ كێشا خزمه‌تگوزاريان لێ هه‌بيت و هه‌ر چ ژ ده‌ستێ مه‌ بهێت بۆ پشته‌ڤانيا داخوازێن ره‌وا يێن خه‌لكێ به‌سرا خه‌مساريێ ناكه‌ين.

شانده‌كێ عيراقى گه‌هشته‌ هه‌ولێرێ

28/08/2019 19:20

ئه‌ڤرۆ نيوز:

ئه‌ڤرۆ ئێڤارى شانده‌كێ حوكمه‌تا عيراقێ ب سه‌رۆكايه‌تيا ياسين ئه‌لياسرى وه‌زيرێ ناڤخوه‌ گه‌هشته‌ فرۆكخانا نێڤده‌وله‌تى يا هه‌ولێرێ و ژ لايێ رێبه‌ر ئه‌حمه‌د وه‌زيرێ ناڤخوه‌ ل هه‌رێما كوردستانێ پێشوازى لێ هاته‌ كرن.

وه‌زیرێ ناڤخوه‌ ل هه‌رێما كوردستانێ، رێبه‌ر ئه‌حمه‌د دوهى سێشه‌مبى 27/8/2019 راگه‌هاندبوو، سوباهى شانده‌كێ وه‌زاره‌تا ناڤخوه‌ یا عیراقێ دێ سه‌ره‌دانا هه‌ولێرێ كه‌ت وهه‌ردو وه‌زاره‌ت دێ دانوستاندنێ ل دۆر كێشێن د ناڤبه‌را هه‌ولێرێ و به‌غدا كه‌ن.

سەرۆک بارزانی پێشوازیێ ل دەستەیا سەرۆکاتیا پەرلەمانێ کوردستانێ دکەت

28/08/2019 16:30

ئەڤرۆ نیوز:

ئەڤرۆ سەرۆک مەسعود بارزانی ل گەل سەرۆکاتیا پەرلەمانێ کوردستانێ کۆمبوو و د کۆمبوونێ دا سەرۆک بارزانی پشتەڤانیا خوە بۆ پەرلەمانێ کوردستانێ د چاڤدێریا کاروبارێن حوکمەتێ دا دیار کر و راگەهاند کو دڤێت پەرلەمانێ کوردستانێ کار بۆ بهێزکرنا پێکڤەژیانا هەموو ئایین و نەتەوان ل کوردستانێ بکەت.

سەرۆک بارزانی ئەو یەک ژی دیار کر کو پێدڤیە پەرلەمانێ کوردستانێ کار ل سەر پرۆژێ چاکسازیێ بکەت و ئەو یەک ژی ل گۆر بەرژەوەندیێن گشتی یێن گەلێ کوردستانێ بیت.

جڤاتا پارێزگەها دهۆکێ هەلویستێ خوە ل سەر بهایێ ئه‌ریزان راگه‌هاند

28/08/2019 15:07

1227

ئەڤرۆ نیوز، نەوزاد هلۆری:

ئەڤرۆ جڤاتا پارێزگەها دهۆکێ ل دۆر بهایێ ئه‌ریزان پشتی کو ژلایێ كۆمپانیەكا راسپاردی هاتیە دیارکرن، ب بەرهەڤبوونا نوونەرێ کومپانیێ و دادنوس و داواکارێ گشتی ئەنجام دا، ل دووماهیا كۆمبونێ سەرۆکێ جڤاتێ دیارکر کو ئەو وەکو جڤاتا پارێزگەها دهۆکێ ل گەل وێ چه‌ندێ نینن کو بهایێئه‌ریزان بهێتە گرانکرن ژبەرکو دێ بارگرانیێ ل سەر وەلاتیان درۆست کەت.

https://www.youtube.com/watch?v=fxXJGZbdyZ8&feature=share&fbclid=IwAR0pEzt7UVLHnASAVddq4EnuBlqry_qHL2tYkXPvCId2DEwi4u6hJR-ZD0I

ئه‌ڤرۆ نيوز ژڤانێ ڤه‌كرنا رێيا رووڤيا بۆ چه‌مه‌ى ئاشكرا دكه‌ت

28/08/2019 11:59

2540

ئه‌ڤرۆ نيوز: ره‌وان نهێلى:

پرۆژێ دروستكرنا جوتسايدكرنا رێيا رووڤيا بۆ چه‌مه‌ى كو رێيه‌كا ستراتيژى يا د ناڤبه‌را پارێزگه‌ها دهۆك و هه‌ولێرێ دا دايه‌، ژ ئاليێ كۆمپانيا كاڤين گرۆپ ڤه‌ دهێته‌ بجهئينان و نوكه‌ ب رێژا 56% ب دووماهى هاتيه‌ و ل نێزيك دێ 5 كم رێيێ هێنه‌ ڤه‌كرن كو هاتيه‌ قێركرن.
b
پرۆژێ‌ رێیا جوتسایدكرنا رووڤیا بۆ چه‌مه‌ی كو 22 كم رێكێ‌ نه‌، ل دووڤ گوتنا ئه‌ندازیار كامیران عه‌بدولا رێڤه‌به‌رێ پرۆژێ جوتسایدێ روڤيا بۆ چه‌مه‌ى، نوكه‌ ب رێژا 56% ب دووماهی هاتینه‌ و 30% رێ هاتيه‌ قێركرن و ل دوماهيا ئه‌ڤ ساله‌ دێ پرۆژه‌ ب دووماهى هێت ل سه‌ر دو قاتێن قێرى و قاتێ سيێ دێ بۆ سالا بهێت بيت.

پرۆژێ‌ رێیا جوتسایدكرنا رێیا رووڤیا بۆ چه‌مه‌ی كو ب گوپال به‌رنیاسه‌، ل 25/9/2018 ب به‌رهه‌ڤبوونا نێچیرڤان بارزانی سه‌رۆكێ‌ حوكمه‌تا هه‌رێما كوردستانێ‌ به‌رێ‌ بنیاتی بۆ هاتیه‌ دانان كو 22 كم رێكێ‌ نه‌ و ژ ئالیێ‌ كومپانیا كاڤین كرۆپ ڤه‌ دهێته‌ جێبه‌جێكرن كو ژ 7 ئوڤه‌رپاسان پێكدهێت و هه‌ردو پارێزگه‌هێن هه‌ولێر و دهۆك پێكڤه‌ گرێدده‌ت.

دانا عه‌بدولكه‌ریم وەزیرێ ئاڤەدانکرن و ئاکنجیبوونێ یێ حکوومەتا هەرێما کوردستانێ ئه‌ڤرۆ سه‌ره‌دانا پرۆژێ دروستكرنا جوتسايدكرنا رێيا رووڤيا بۆ چه‌مه‌ى دا و ل نێزيك ئاگه‌هدارى قوناغێن بجهئينانا وێ بوو.

ب وێنە: ھژمارەکا زۆرا ماسیان مرن

28/08/2019 10:11

199

ئەڤرۆ نیوز، نەوزاد ھلۆری:

ژ ئەگەرێ نەمانا ئوکسجینێ دناڤ ئاڤێ دا، ھژمارەکا زۆرا ماسیان دناڤ پروژەکێ خودانکرنا وان ل گوندێ چەمترێ ل سنورێ ناحیا مانگێشک یا سەر ب پارێزگەھا دھۆک مرن، خودانێ پروژەی ددەت دیارکرن ئەگەر حوکمەتێ کارەبا نیشتمانی بو وان دابینکربایە ماسیێن وان نەدمرن.

ھێرش تەھا، خودانێ پرۆژەی بو ئەڤرۆ نیوز گۆت: (ژ ئەگەرێ نەبوونا کارەبا نیشتمانی، کارەب ل سەر پرۆژەی نەما و بڤێ یەکێ ژی ئوکسجین دناڤ ئاڤێ دا نەما و بویە ئەگەرا مرنا ماسیان).

زێدەتر گوت: (نێزیکێ 10 ھزار ماسیان مرن، ئەوێن دی ژی توشی نەخوشی و خاڤبونێ بوون، ھندەک ب تنێ ماینە ساخ، مرنا وان ماسیان زیانێن زۆر ب مە گەھاندن، ژبەرڤێ ئەم داخوازا قەرەبوکرنێ ل حوکمەتێ دکەین، دیسان دخوازین کو کارەبا نیشتمانی ژی بۆ مە دابین بکەن، ئەگەر کارەبا نیشتمانی ل سەر پرۆژەی ھەبایە ماسێن مە نەدمرن).

پێشتر ژی چەند جارەکا ل سنوورێ پارێزگەھا دھۆک ماسی توشی ژەھراوی و مرنێ بوینە، ژ وانان پرۆژەکێ دێرەلوکو ئێک ژی ل شێلادزێ.