ئه‌ڤرۆ نیوز:
سه‌رۆك مه‌سعود بارزانى ئه‌ڤرۆ سێشه‌مبى 13/8/2019 پێشوازی ل نه‌جاح حه‌سه‌ن ئه‌لشمه‌رى وه‌زیرێ به‌رگریێ عیراقێ كر.
د دیداره‌كێ دا به‌حسێ ره‌وشا سیاسى یا عیراقێ و په‌یوه‌ندیێن د ناڤبه‌را هه‌ولێرێ و به‌غدا هاته كرن، هه‌روه‌سا شه‌رێ داعشێ وپێشهات وگوهۆرینێن ده‌ڤه‌رێ ژى ته‌وه‌ره‌كا دى یا دیدارێ بوو.
ئەڤرۆ نیوز، بارزان مزووری:
ئەفسەرێ پشکا هاتنوچوونا قه‌زا شێخان، سەکڤان ئەنوەر بۆ ئەڤرۆ نیوز راگه‌هاند:ئێڤاریا ئه‌ڤرۆ سێشه‌مبى 13/8/2019 ل سەر رێیا سەرەکی شێخان بۆ کومەلگەها چرە بەرامبەری گوندێ زیناڤا، ترۆمبێلەک ژ جۆرێ (هیونداى تایبەت) وەرگەریا و د ئەنجامدا شوفێری گیانێ خوه ژ دەستدا وبۆ نەخوه‌شخانا شێخان یا گشتی پاشى بۆ نۆشداریا داد ل پارێزگەها دهۆکێ هاته ڤەگوهاستن.
ئه‌ڤرۆ نیوز:
پشتى په‌یدابوونا ئاریشا ئاڤێ ل چه‌ندین تاخێن باژێرێ دهۆكێ، به‌رپرسێ لقا ئێك یا پارتى دیموكراتى كوردستان راگه‌هاند، دووڤچوونا ڤى بابه‌تى هاتیه كرن و ل ده‌مێ 48 ده‌مژمێرێن داهاتى دا ئه‌و ئاریشه دێ هێته چاره‌سه‌كرن.
سه‌ربه‌ست تروانشى، به‌رپرسێ لقا ئێك یا پارتى دیموكراتى كوردستان راگه‌هاند” پشتى په‌یدابوونا ئاریشا ئاڤێ ودووڤچوونا مه بۆ بابه‌تى، دیار بوویه كو ئه‌ڤ ئاریشه ژ ئه‌گه‌رێ هاتنا وێ پلا گه‌رمێ یه كو ده‌ڤه‌را مه ڤه‌گرتى و كێشه‌كا ته‌كنیكى بۆ پرۆژێ به‌لاڤكرنا ئاڤا سه‌نته‌رێ باژێرێ دهۆكێ دروست بوویه ونوكه تیمێن سه‌خبێركرنا ڤى پرۆژه‌ى ل سه‌ر كارینه سه‌ره‌راى رۆژێن جه‌ژنێ، كو هه‌تا نوكه 60% ئاڤ دهێته به‌لاڤكرن”.
ل دووماهیێ به‌رپرسێ لقا ئێك گۆت” خه‌لكێ خوه ئاگه‌هدار دكه‌ین كو ل 48 ده‌مژمێرێن داهاتى ئه‌ڤ ئاریشه دێ هێته چاره‌سه‌ركرن”.
ئەڤرۆ نیوز ، زنار تۆڤی:
ل دەمژمێر 6:45 ل سپێدەهیا ئەڤرۆ سێشەمبی 13/8/2019 فرۆکێن تورکی گوندێ چەلکا مه‌سيحيان ل دەڤەرا بەرواری بالا بوردۆمانکر.
مەحمود شوکری، وەلاتیەکێ ده‌ڤه‌رێ يه بۆ ئەڤرۆ نیوز دیار کر: ل سپێدەهیا ئەڤرۆ سێشەمبی فرۆکێن تورکی چار بۆمبە ل نێزیک گوندێ چەلکا مه‌سيحيان دان و دەنگەکێ مەزن ژ وان بۆمبەیان هات و ڤێ چەندێ گەلەک ترس ل دەف وان پەیداکریە، هەروەسا ئەو جهێ بۆمبە لێداین ژی نێزیکی کۆمەلگەها بێگۆڤا بوویە، دەنگێ وان بۆمبەیان خانیێن وان هەژاندینە و هەروەسا نوکە ئاگر بەربوویه پیش و پەلەخێ گوندێ چەلکا مه‌سيحيان، لێ زیانێن بۆمبەبارانێ نەهاتینە زانین.
ئەڤرۆنیوز:
دەمژمێر 6:15ێ ئێڤاریا ئەڤرو سنێلەکێ 14 سالی د سکرێ دهوکێ ب ناڤێ (چ. ش ) خەندقی.
ئەو گەنج خەلکێ دهوکێ یە و ب مەرەما مەلەڤانیا دگەل چەند هەڤالێن خو چوو بوو سەر سکرێ دهوکێ و پشتی تیمێن نقومڤانا گەهشتینە جهێ رودانێ تەرمێ وی ژ سکری ئینایەدەر و هاتە رەوانەکرن بو پزیشکیا داد و پەرێن ڤەکولینێ ژلایێ بنگەهێ پولیسێن زاویتە هاتینە ڤەکرن بو تەمامکرنا ڤەکولینی .
ئه‌ڤرۆ نیوز، نه‌وزاد هلۆرى:
وه‌زاره‌تا ئه‌قاف و كاروبارێن ئاینى یا حوكمه‌تا هه‌رێما كوردستانێ ژڤانێ زڤرینا حه‌جیان ل مه‌ككه‌ها پیروز بو هه‌رێما كوردستانێ دیاركر كو ئه‌و ژى د رۆژا 17/8/2019 دێ ده‌ست پێ كه‌ت.
نه‌به‌ز ئیسماعیل، ئاخفتنكه‌رێ وه‌زاره‌تا ئه‌وقاف و كاروبارێن ئاینى یا حوكمه‌تا هه‌رێما كوردستانێ بۆ ئه‌ڤرۆ نیوز گۆت: (پشتى داوى هاتنا هه‌موو ئه‌ركێن حه‌جێ، روژا 17/8/2019 دێ ئێكه‌م كاروانێ حه‌جیێن هه‌رێما كوردستانێ ل مككه‌هێ بو كوردستانێ ده‌ست پێ كه‌ت كو نوكه ل سعودیێ ئه‌ركێن خوه‌یێن حه‌جێ داوى دئینن).
زێده‌تر گۆت: (ئه‌گه‌ر چ كێشه‌یێن ته‌كینكى دروست نه‌بن، دێ دده‌ما 20 روژان دا هه‌موو حه‌جیێن هه‌رێما كوردستانێ زڤرن مالێن خوه كو هژمارا وان حه‌فت هزار و 130 حه‌جى نه، دێ ب رێا هه‌ردوو فروكخانێن هه‌ولێر و سلێمانیێ بیت).
ئه‌ڤ ساله هه‌تا نوكه 11 حه‌جیان ل عیراقێ گیانێ خوه ژ ده‌ستدایه، دوو ژوان خه‌لكێ هه‌رێما كوردستانێ بوون، ئێك ل زاخۆ و ئێك ژى حه‌له‌بچه و هه‌ردوو ژى ئافره‌ت بوون.
ئه‌ڤرۆ نيوز:
حوكمه‌تا هه‌رێما كوردستانێ ئه‌ڤرۆ ئه‌ينيێ 9/8/2019 رۆهنكرنه‌ك ل دۆر بابه‌تێ ڤه‌گه‌راندنا مووچێ 13 هزار خودان پێدڤيێن تايبه‌ت به‌لاڤكر.
جوتيار عادل، په‌يڤدارێ حوكمه‌تا هه‌رێما كوردستانێ گۆت” هنده‌ك كه‌نالێن راگه‌هاندنێ ب شێوه‌كى بابه‌تێ ڤه‌گه‌راندنا هاريكاريا 13 هزار خودان پێدڤيێن تايبه‌ت به‌رچاڤكريه كو ده‌ستكه‌فتێ حزبه‌كێ يه”.
ئه‌ڤرۆ نيوز، نه‌وزاد هلورى:
ئێڤاريا دره‌نگا ئه‌ڤرۆئاگربەربوو هژمارەکا دوکان و بازارێن تاخێ زوزان ل دهوکێ و د ئەنجامدا زیانێن زورێن مادی بەر وان بازاران کەفت.
یوسف بەختیار، ئێک ژ شاهد حالێن روودانا ئاگری ل دهۆکێ بو ئەڤرۆ نیوز گوت: (دەمەکێ کێم بەری نوکە ئاگربەربویە هژمارەکا دوکان و بازارێن تاخێ زوزان ل سەنتەرێ باژێرێ دهوکێ و زیانێن زۆرێن مادی بەر دوکاندار و خودانێن بازاری کەفتیە).
زێدەتر گوت: (هەتا نوکە ئەگەرا روودانێ نەهاتیە زانین، بەلێ تیمێن بەرەڤانیا باژێری و ئاگرڤه‌مراندن و خودان دوکان و بازار و وەلاتی ژی مژوولێ کونترولکرنا ئاگری نە، بەلێ جهێ داخێ یە زور زیان گەهشتنە وان دوکانان).
ناڤبری دیارکر ژی کو چ زیانێن گیانی نینن، بەلکو تنێ زیانێن مادی يێن هه‌ين.
ئه‌ڤرۆ نیوز:
سه‌رۆك وه‌زیرێن هه‌رێما كوردستانێ، مه‌سرور بارزانى ئه‌ڤرۆ پێنجشه‌مبى 8/8/2019 ب چاندنا داره‌كا زه‌یتونێ پشكدارى د هه‌وا (داره‌كێ بچینه و باژێره‌كێ كه‌سك بكه) دا كر.
مه‌سرور بارزانى ل ده‌مێ چاندنا دارێ گۆت” كوردستان مالا مه‌زن یا مه هه‌موویانه، دا هه‌موو پێكڤه بزاڤێ بكه‌ین وێ مالێ خوه‌شتر وجوانتر بكه‌ین”.
سه‌رۆك وه‌زیرێن هه‌رێما كوردستانێ گۆت ژى” به‌رسڤا چالێنجا سه‌رۆكێ هه‌رێمێ، برایێ من یێ به‌رێز كاك نێچیرڤان دده‌م، ب چاندنا داره‌كا زه‌یتوونێ كو داره‌كا ژى درێژ وبه‌رهه‌مداره”.
مه‌سرور بارزانى داخواز ژ هه‌ر ئێك ژ رێواز فایق سه‌رۆكا په‌رله‌مانێ كوردستانێ وحاكم به‌نگین سه‌رۆكێ جڤاتا دادوه‌رى كر، ئه‌وژى ب چاندنا داره‌كێ پشكداریێ د د وێ هه‌وێ دا بكه‌ن.
دهێته زانین د هه‌ه‌وا ( داره‌كێ بچينه و باژێره‌كێ كه‌سك بكه)، نێچيرڤان بارزانى سه‌رۆكێ هه‌رێما كوردستانێ ل 6/8/2019 ل سه‌ر داخوازا كونسولێ گشتى يێ ئه‌مريكا ل هه‌ولێرێ داره‌ك چاند، نێچيرڤان بارزانى داخواز ژ مه‌سرور بارزانى سه‌رۆك وه‌زيرێن هه‌رێما كوردستانێ كر كو ئه‌وژى پشكدار بيت د ڤێ هه‌وێ دا و داره‌كێ بچينيت.
https://www.youtube.com/watch?v=lxg1LqgMqtA
ئه‌ڤرۆ نیوز:
كه‌نالێ حه‌جیێن كوردستانێ ئه‌ڤ ساله ل باژیرێ مه‌كه یێ سعودى ب زمانێ كوردى و ب كوالێتیا HD ده‌ست ب به‌خشێ به‌رنامێن خوه كر.
كاروان ستونى، رێڤه‌به‌رێ كه‌نالێ ناڤبرى د به‌رپه‌رێ خوه دا ل سه‌ر تۆرا فه‌یسبووكى به‌لاڤكر” پشتى بزاڤ و وه‌ستیانه‌كا مه‌زن شیام كه‌نالێ حه‌جیێن كوردستانێ ل باژێرێ مه‌كه دامه‌زرینم وده‌ست ب به‌خشكرنا به‌رنامێن وى بكه‌م”.
گۆت ژى” ئه‌ڤ كه‌ناله رۆژانه ده‌نگوباس ورێنما ودیدارێن حه‌جیان ب كوالێتیا HD به‌خش دكه‌ت”.
نيشاندان