ئەڤرۆ نیوز،بارزان مزووری:
سالم سەعید،بەرپرسێ راگەهاندن و پەیوەندیان ل بوردێ كارۆبارێن مرۆڤایەتی ل پارێزگەها دهوكێ بۆ ئەڤرۆ نیوز گوت :بوردێ كارۆبارێن مروڤایەتی ب هەڤكاری ل گەل هەموو دامودەزگەهێن شولەژێ و رێكخراوێن كارۆبارێن مروڤایەتی كاردكەن و هەموو بەرهەڤی كرینە بۆ ڤەحەواندنا پەنابەرێن رۆژئاڤا ل هەرێما كوردستانێ.
گۆت ژى” ئێك ژوان جهێن هاتیە دەست نیشانكرن ل قەزا بەردەرەش كەمپه‌كا ڤەحەواندنا ئاواره و پەنابەرانه كۆ جهێ ڤه‌حه‌واندنا 3 هزار خێزانان تێدا هاتیە دروست كرن”.
دياركر” ل شەڤا 14 ل سه‌ر 15 ڤێ هەیڤێ ئێكەم گەرا پەنابەران كو ژ 180 كەسان پێك دهات ب رێيێن نە قانوونى ژ رۆژئاڤا گەهشتە پارێزگەها دهوكێ و ل كەمپا دومیز ئێك هاتن ئاكنجی كرن و بوردێ كارۆبارێن مروڤایەتی دگەل دەزگەهێ بارزانى يێ خێرخازی هەموو جورێن هاریكاریان ل سەر وان به‌لاڤكرن”.
ناڤهاتی خویاكر ئەڤرۆ رچارشه‌مبى 16/10/2019 ل خالا سحێلا 88 پەنابەرێن رۆژئاڤا ب رێيا ترومبێلێن ڤەگوهاستنێ ژلایێ رێكخراوا (ئای ئو ئێم) هاتینە دابین كرن بۆ كەمپا بەردەرەش هاتن ڤەگوهاستن و ستافێ بوردی هەموو ل كەمپێ بەرهەڤ بوویە و پێدڤيێن سه‌ره‌كى بۆ هاتينه دابين كرن.
ناڤهاتی گوت زێدەتری 800 پەنابەرا ل لایێ رۆژئاڤا ماینە ل نێزیك خالا سنوری ل سحێلا بەرهەڤن بهێنە ناڤ هەرێما كوردستانێ دا ئەو ژمارا پەنابەران ژی بۆ كەمپا بەردەرەش ژی دهێن ڤەگوهاستن هەتا ژمارا وان بگەهیتە 3 هزار خێزان ژبەركۆ جهێ 3 هزار خێزانا دناڤ وێ كەمپێ دا دروست كریە ،
ناڤهاتی زێدەتر گوت ل سنورێ پارێزگەها دهوك 27 كەمپ یێن ئاوارا و پەنابەرا یێن هەین پشتی ڤەگەریانا ئاوارێن مووسل 5 كەمپ د ڤالانە یێن شێخان و بەردەرەش ، د نها دا 21 كەمپ مە یێن هەین نێزیك 600 هزار ئاوارا و پەنابەرا دناڤ وان كەمپا و دەرڤەی كەمپا ئاكنجینە ل سنورێ پارێزگەها دهوك بەلێ د نها دا رێكخراوا بودجەیا وان كێم بویە مەگەلەك پرۆژە د دەستان دا بۆن بۆ ئاواران و پەنابەرا بەلێ هەموو هاتن راوەستاندن ژبەر نەبونا بودجەیا وان و رێكخراوا .
ئه‌ڤرۆ نيوز:
لژنا دووڤچوونا بازارى ل قايمقاميا قه‌زا دهۆكێ، ل دووڤ به‌رپه‌رێ قايمقاميا قه‌زا دهۆكێ ل سه‌ر تۆرا فه‌يسبووكى، ئه‌ڤرۆ چارشه‌مبى 16/10/2019 دووڤچوونا چه‌ند ماركت و خوارنگه و سه‌مونخانه و كارگه‌هه‌كا ماستى كر.
هه‌يهات ئيبراهيم، ئه‌ندامێ لژنا دووڤچوونا بازارى دياركر كو كارگه‌ها (چياڤين) يا چێكرنا ماستى هاته سزادان ب گۆژمه‌كێ پاره‌ى ژ به‌ر هه‌بوونا پتر ژ دو ته‌نێن شيرێ خرابووى ل گه‌ل ژناڤبرنا وى شيرى.
گۆت ژى” ده‌ست ب سه‌ر چه‌ند مێلاكا قه‌ده‌غه‌كرى ل ماركتا (لاناس) هلاته گرتن و هوشدارى ژى بۆ چه‌ندين سه‌مونخانا هاتنه دان كو نابيت زه‌رفێن نايلۆنى بكاربينن”.
ئه‌ڤرۆ نيوز:
جڤاتا پارێزگه‌ها دهۆكێ د به‌رپه‌رێ خوه دا ل سه‌ر تۆرا جڤاكى يا فه‌يسبووكى چه‌ندين وێنه ژ مالا په‌رستاران به‌لاڤكرن و دياركر كو لژنا ساخله‌ميێ ل جڤاتا پارێوگه‌ها دهۆكێ سه‌ره‌دانا مالا په‌رستاران كر دا ژ نێزيك هايدار ره‌وشا وان ببن و كا چ خزمه‌ت بۆ دهێته پێشكێشكرن و ره‌وشا خوارن و پاقژيێ يا چاوايه.
ئه‌ڤرۆ نيوز:
جڤاتا وه‌زيرێن هه‌رێما كوردستانێ ئه‌ڤرۆ چارشه‌مبى 16/10/2019 ب سه‌رپه‌رشتيا مه‌سرور بارزانى سه‌رۆكێ جڤاتا وه‌زيرێن هه‌رێنا كوردستانێ كۆمبوو.
نڤيسنگه‌ها راگه‌هاندنا جڤاتا وه‌زيران د به‌ياننامه‌كێ دا ئاماژه‌كر كو ل ده‌ستپێكا كۆمبوونێ دانوستاندن ل دۆر بابه‌تێ دامه‌زراندنا هه‌رسێ ئێكه‌مێن زانكۆيێن حكومى بۆ سالا خواندنێ 2015- 2016 هاته كرن و پشتى كو ئارام محه‌مه‌د وه‌زيرێ خواندنا بلند راپۆرته‌ك پێشكێشكرى، جڤاتا وه‌زيران بريارا دامه‌زراندنا وان وه‌كو قۆناغا ئێكێ يا دامه‌زراندنا ئێكه‌مێن زانكۆيان ده‌ركر.
به‌لاڤكر ژى” پاشى بێگه‌رد تاله‌بانى، وه‌زيرا چاندنێ و ژێده‌رێن ئاڤێ پرۆژه‌ك ل دۆر ب بازاركرنا ناڤخوه‌يى يێ گه‌نمێ به‌رهه‌مئيناى ل هه‌رێما كوردستانێ به‌رچاڤكر، سه‌رۆكێ جڤاتا وه‌زيرێن هه‌رێمێ ئاماژه كر كو گرنگيدان ب كه‌رتێ چاندنێ ئێك ژ ئه‌ركێن به‌راهيێ يێن كارناما كابينا نه‌هێ يا حوكمه‌تا هه‌رێما كوردستانێ يه، ب جۆره‌كى كو پێدڤيه كار ل سه‌ر دابينكرنا ئاسايشا خوراكى بكه‌ين و بزاڤێ بكه‌ين بازارى بۆ به‌رهه‌مێن چاندنێ يێن ناڤخوه‌يى ل هه‌رێما كوردستانێ ببينين، جڤاتا وه‌زيران ژى ل دۆر وى بابه‌تى بريار دا چه‌ند وه‌زاره‌ت و فه‌رمانگه و ده‌سته‌يێن حوكمه‌تێ راسپێريت بۆ ئه‌نجامدانا ڤه‌كۆلينێن زێده‌تر ل دۆر پرۆژه‌ى بۆ وێ چه‌ندێ بريارا پێدڤى بهێته دان”.
زاخۆ ، عه‌لی حاجی :
رێڤه‌به‌رێ ناحیا باتیفا د داخویانیه‌كێ دا بۆ ئه‌ڤرۆ نیوز دیار كر پشتی چه‌ندین جاران ب رێیا جهێن په‌یوه‌ندیدار داخازا نووژه‌نكرنا چه‌پێن زرێزه‌ی كرین،ماوه‌یێ دو روژایه كار ل سه‌ر نووژه‌نكرنا وان چه‌پان دهێته كرن و كومپانیه‌كا كه‌رتێ تایبه‌ت رادبیت ب كارێ نووژه‌نكرنا وێ .
زێده‌تر دلشێر عه‌بدولسه‌تار گوت : كوژمێ 665 ملیون دینارێن عێراقی هاتیه ته‌رخان كرن ژلایێ رێڤه‌به‌ریاسه‌خبێریا رێك و پران ل پارێزگه‌ها دهوكێ و ئه‌ڤ پاره‌یی ژ لایێ وه‌زاره‌تا باژێرڤانیان هاتیه به‌رهه‌ڤ كرن و بریاره ب كوژمێ پاره‌یی هه‌می ئه‌و چه‌پێن خراب بوویی دووباره بهێنه دروست كرن ڤه و كومپانیا كاڤین رادبیت ب سه‌خبێریكرنا وێ جادده‌یا گرنگ و نێڤ ده‌وله‌تی و هه‌ر دیسان دگه‌ل نووژه‌نكرنا چه‌پێن زرێزه‌ی دێ قه‌سته‌له‌كا دیتر ژی ل نێزیك ۆێیا گوندێ به‌رزیركێ توشی هه‌رفینێ بوو نوكه دا دێ كار ل سه‌ر وێ ژی هێته كرن دا كو دزووترین ده‌م دا هێته نووژه‌نكرن ڤه و ئێدی مه‌ترسیا هه‌رفینێ ل سه‌ر نامینیت .
ئه‌و چه‌نده ژی گوت : بریاره ب رژدی كار ل سه‌ر نووژه‌نكرنا چه‌پێن زرێزه‌ی بهێته كرن دا كو ژبه‌ریا هاتنا وه‌رزێ زڤستانێ نووژه‌نكرنا وێ ب دوماهی بهێت ژبه‌ر كو ل وه‌رزێ زڤستانێ وێ جادده‌یێ گه‌له‌ك نه‌خوه‌شی بۆ مه و هاولاتیان دروست كر و ئه‌ڤ نووژه‌نكرنا دێ ده‌مكی بیت هه‌تا كو پاره‌یێ پێدڤی بۆ دروست كرنا رێیه‌كا دیتر ل وێ ده‌ڤه‌رێ بهێته ته‌رخان كرن ژبه‌ر كو ل ده‌مێ هاتنا وه‌زیرێ ئاڤه‌دانكرنێ ژی مه ئه‌ڤ داخازی یه ژێ كربوو و ئه‌م ژی چاڤه‌ری رازیبونێ نه بۆ دروست كرنا وێ جادده‌یێ ب ئێكجاری .
سێ ساله نێزيكى چار هزار سه‌ركه‌فتيێن ئێكێ يێن زانكۆ و په‌يمانگه‌هان نه‌هاتينه دامه‌زراندن. سالا بۆرى وه‌زاره‌تا خواندنا بلند ب تنێ داخوازا دامه‌زراندنا هزار و 369 ده‌رچوويێن سالا 2015ێ كريه.
ئه‌ڤرۆ نيوز:
ئاژانسا ده‌نگوباسێن فرانس پرێس به‌لاڤكريه كو فلاديمێر پۆتن، سه‌رۆكێ رۆسيا، گازى ره‌جه‌ب ته‌يب ئه‌ردوگان، سه‌رۆك كۆمارێ توركيا كريه هه‌تا د چه‌ند رۆژێن بهێت دا، سه‌ره‌دانا مۆسكۆ بكه‌ت.
فرانس پرێس ئاشكه‌را ژى كريه كو ئه‌گه‌رێ گازيكرنا ئه‌ردوگان بۆ مۆسكۆ، هێرشكرنا توركيايه بۆ سه‌ر باكوورێ سوريا.
نڤيسينگه‌ها سه‌رۆكێ رۆسيا به‌لاڤكريه كو پۆتن په‌يوه‌نديه‌كا تله‌فۆنى ل گه‌ل ئه‌ردوگان ئه‌نجام دايه و به‌حس ل هه‌ڤركيێن سوريا كريه و پاشان سه‌رۆكێ رۆسيا گازى سه‌رۆكێ توركيا كريه و ئه‌ردوگان ژى رازى بوويه.
ئه‌ڤرۆ نيوز:
سه‌رۆكێ حوكمه‌تا هه‌رێما كوردستانێ مه‌سرور بارزانى ئه‌ڤرۆ سێشه‌مبى 15/10/2019 پێشوازى ل سه‌رۆك وئه‌ندامێن جڤاتا بزنسا ئه‌مريكا – كوردستان كر كو ژ نوونه‌رێن هژماره‌كا كۆمپانيێن ئه‌مريكى پێكهاتبوون.
د كۆمبوونه‌كێ دا كو به‌يان سامى عه‌بدولره‌حمان نوونه‌ران حوكمه‌تا هه‌رێمێ ل واشنتۆن به‌رهه‌ڤ بووى، دانوستاندن ل دۆر پێشڤه‌برنا په‌يوه‌نديێن بازرگانى د ناڤبه‌را ئه‌مريكا و هه‌رێما كوردستانێ دا هاتنه كرن.
سه‌رۆكێ حوكمه‌تا هه‌رێما كوردستانێ ئاماژه كر كو كابينا نه‌هێ يا حوكمه‌تا هه‌رێمێ بزاڤا هه‌مه‌جۆركرنا ئابوورێ هه‌رێما كوردستانێ دكه‌ت، ب تايبه‌تى ژى دێ گرنگى ب كه‌رتێ چاندنێ هێته دان، ده‌ليڤا وێ چه‌ندێ ژى يا هه‌ى هه‌رێما كوردستانێ ببيته سه‌به‌ته‌كا خۆراكێ نه‌كو تنێ بۆ ناڤخوه و عيراقێ، به‌لكو بۆ هه‌موو ده‌ڤه‌رێ.
گۆت ژى” هه‌رێما كوردستانێ د شاندايه ببيته بنگه‌هه‌كێ بازرگانى ل ده‌ڤه‌رێ، بۆ ڤێ مه‌ره‌مێ ژى ئاسانكاريێن پێدڤى بۆ وه‌به‌رئێنه‌رێن ناڤخوه و بيانى دێ هێنه كرن”.
نيشاندان