ئه‌ڤرۆ نيوز:

په‌يڤدارێ فه‌رميێ پارتى ديموكراتى كوردستان ئه‌ڤرۆ شه‌مبيێ راگه‌هاند، پارتى سياسه‌ته‌كا بێهن فرهه‌ په‌يره‌وكريه‌ و گازنده‌ ژ وێ چه‌ندێ كر كو بابه‌تێ بجهئينانا رێككه‌فتنان دبيته‌ بابه‌ته‌كێ راگه‌هاندنێ.

مه‌حموود محه‌مه‌د، په‌يڤدارێ فه‌رميێ پارتى گۆت ژى” هه‌تا نوكه‌ ئێكه‌تيێ ناڤێن به‌ربژارێن خوه‌ بۆ به‌هرا خوه‌ د پۆستێن خوار وه‌زيران دا نه‌داينه‌ حوكمه‌تێ كو ڤێ چه‌ندێ كه‌م و كورتى ژ روويێ ئيدارى ڤه‌ دروست كريه‌”.

دياركر”مه‌سرور بارزانى، سه‌رۆكێ حوكمه‌تا هه‌رێما كوردستانێ ل گه‌ل شانده‌كێ ئێكه‌تيێ دانوستاندنێن جدى بۆ چاره‌سه‌ركرنا وێ كێشێ كريه‌”.

ل دۆر وێ چه‌ندێ كو به‌رپرسێن ئێكه‌تيێ به‌حس دكه‌ن كو رێككه‌فتنا وان ل گه‌ل پارتى بۆ پێكئينانا حوكمه‌تێ نه‌هاتيه‌ بجهئينان، مه‌حموود محه‌مه‌د راگه‌هاند” مه‌ پێ باش بوو گوتبا كا ل كيرێ نه‌هاتيه‌ بجهئينان”.

په‌يڤدارێ پارتى ئاماژه‌ كر كو ل هه‌يڤا 8 يا بۆرى پارتى داخواز ژ ئێكه‌تيێ كربوو كۆمبوونه‌كێ بكه‌ن و ل سه‌ر ده‌م و جهى ژى رێككه‌فتن، به‌لێ ئێكه‌تيێ داخوازكر كۆمبوون بهێته‌ پاشخستن و هه‌تا نوكه‌ ژى ئه‌و كۆمبوون نه‌هاتيه‌ ئه‌نجامدان”.

خوياكر ژى” سه‌رده‌مێ فيفتى فيفتى يێ پارتى و ئێكه‌تيێ يێ ب دووماهى هاته‌ و ئێكه‌تيێ ژى ئه‌و چه‌نده‌ قبوول كريه‌”.

ئه‌ڤرۆ نیوز:

جێگرا  سه‌رۆكێ لژنا سامانێن سروشتى و وزه‌ و پیشه‌سازى ل په‌رله‌مانێ كوردستانێ راگه‌هاند، ب مه‌ره‌ما چاره‌سه‌ركرنا كێشا كاره‌بێ ل هه‌ردو قه‌زایێن زاخۆ و سۆران، سه‌رۆكێ حوكمه‌تا هه‌رێما كوردستانێ مه‌سرور بارزانى، ب نڤیساره‌كێ وه‌زیرێ كاره‌بێ ل هه‌رێمێ راسپاردیه‌ كو راسته‌وخوه‌ سه‌رپه‌رشتیا چاره‌سه‌ركرنا كێشا كاره‌بێ ل وان هه‌ردو قه‌زایان بكه‌ت، بریار ژى هاتیه‌ دان كو هێله‌كا كاره‌بێ یا 132 كه‌ ى ڤى بۆ زاخۆ و سۆران بهێته‌ راكێشان.

گولیزار ره‌شید سندى، جێگرا سه‌رۆكێ لژنا سامانێن سروشتى و وزه‌ و پیشه‌سازى ل په‌رله‌مانى كوردستانێ بۆ مالپه‌رێ فه‌رمیێ پارتى گۆت” فه‌رمانا سه‌رۆكێ حوكمه‌تا هه‌رێمێ یا هاتیه‌ ده‌ركرن و بریاره‌ ل ڤان نێزیكان ده‌ست بجهئینانا وێ بهێته‌ كرن كو دێ د ده‌مێ شه‌ش هه‌یڤان دا هێته‌ ئه‌نجامدان.

گۆت ژى” ب راكێشانا وێ هێلا كاره‌بێ، دێ كێشا كاره‌بێ ل زاخو و سۆران هه‌تا راده‌كێ باش هێته‌ چاره‌سه‌ركرن”.