ئه‌ڤرۆ نيوز:

قائيمقامێ قه‌زا شێخان دياركر ل سه‌ر ئه‌ركێ سه‌رۆكێ هه‌رێمێ نێچيرڤان بارزانى دو پرۆژه‌ بۆ په‌رستگه‌ها لالش  د بوارێ بجهئينانێ دانه.

زێده‌تر سه‌ردار يه‌حيا گۆت: ئه‌و هه‌ردو پرۆژێن خزمه‌تگوزارى بۆ په‌رستگه‌ها لالش هاتينه‌ ته‌رخانكرن و نوكه‌ كار به‌ر ب دووماهيێ دچيت و كوژمێ 500 مليۆن دينارێن عيراقى ل سه‌ر ئه‌ركێ سه‌رۆكێ هه‌رێما كوردستانێ نێچيرڤان بارزانى هاتينه‌ دابين كرن و نوكه‌ پرۆژێ ئێكێ يێ ئاڤا په‌رستگه‌هێ يه‌ كو برێژه‌يا 90% كارێ وێ ب دووماهى هاتيه‌ و ديسان پرۆژێ جوتسايدكرنا رێيا لالشێ يه‌ كو كار ب رێژه‌يا 25% تێدا هاتيه‌ كرن و برياره‌ به‌رى دووماهيا ئه‌ڤ ساله‌ هه‌ردو پرۆژه‌ ب ته‌مامى ب دووماهى بهێن و بكه‌ڤيته‌ خزمه‌تا كوردێن ئێزدى.

لالش تاكه‌ په‌رستگه‌ها كوردێن ئێزديه‌ ل هه‌موو جيهانێ ئێزدى سالانه‌ سه‌ره‌دانا وێ دكه‌ن و نێزيكى 11 كم ژ سه‌نته‌رێ قه‌زا شێخان دووره‌.

سه‌رۆك مه‌سعود بارزانى ب هه‌لكه‌فتا هه‌لبژارتنا ميرێ نوو يێ ئێزديان مير حازم ته‌حسين به‌گ پيروزباهى ل ته‌ڤايا ئێزديێن كوردستانێ و جيهانێ كر، خواست يێ سه‌ركه‌فتى بيت د ئه‌ركێ وى يێ نوو دا.

د په‌يامه‌كێ دا سه‌رۆك بارزانى دياركر ئێزدى نه‌ته‌وه‌يه‌كێ ره‌سه‌ن يێ گه‌لێ كورد و كوردستانێ نه‌ و خواست مير حازم به‌گ بشێت د ئه‌ركێ خوه‌ دا باشترين شێوه‌ خزمه‌تا گه‌لێ كوردێن ئێزدى بكه‌ت و ئه‌م ژى دێ پشته‌ڤان و هاريكارێ وان بين.

ئه‌ڤرۆ نيوز:

پشتى مير حازم به‌گ ل شوونا بابێ خوه‌ ته‌حسين به‌گ هاتيه‌ هه‌لبژارتن وه‌ك ميرێ نوويێ ئێزديێن كوردستانێ و جيهانێ، نێچيرڤان بارزانى سه‌رۆكێ هه‌رێما كوردستانێ د په‌يامه‌كى دا پيروزباهى ل مير حازم به‌گ كر، و ته‌كه‌ز ل سه‌ر وێ چه‌ندێ كر كو وه‌كى به‌رى نوكه‌ ئه‌و دێ ب هه‌موو شيانێن خوه‌ بزاڤێ كه‌ن پشته‌ڤانيێ و هاريكاريێ ل هه‌موو خوشك و برايێن ئيزدى كه‌ن و هيڤى خواست يێ سه‌ركه‌فتى بيت د ئه‌ركێ وى يێ نوو دا.

سه‌رۆكێ هه‌رێمێ ئه‌و چه‌نده‌ ژى دياركر ئه‌و دێ ب هه‌موو شيانێن خوه‌ كاركه‌ن بۆ ڤه‌گه‌راندنا وان ئێزديێن ماينه‌ ده‌ستێ تيرورستێن داعش دا.

ژلايێ خوه‌ ڤه‌ سه‌رۆكێ حوكمه‌تا هه‌رێما كوردستانێ مه‌سرور بارزانى ژى پيروزباهى ل هه‌لبژارتنا مير ته‌حسين به‌گ كر، د په‌يوه‌نديه‌كا ته‌له‌فونى دا سه‌رۆكێ جڤاتا وه‌زيرێن هه‌رێمێ داخوازا سه‌ركه‌فتنێ بۆ ميرێ نوو يێ ئيزديان خواست و دياركر ئێزدى ژ نه‌ته‌وه‌يێن كورد و گه‌لێ كوردستانێ يێن ره‌سه‌نن و سوز دا حوكمه‌تا هه‌رێمێ پشته‌ڤان و هاريكارێن وان بيت.

ژلايێ خوه‌ ڤه‌ مير حازم به‌گ ژى سوپاسيا سه‌رۆكێ حوكمه‌تا كوردستانێ و سه‌رۆكێ هه‌رێمێ كر بۆ پشته‌ڤانيا وان.

ئه‌ڤرۆ نيوز:

جڤاتا ئاسايشا هه‌رێما كوردستانێ ئه‌ڤرۆ ئه‌ينيێ 26/7/2019 به‌ياننامه‌ك ل دۆر روودانا ته‌قه‌كرنا رۆا چارشه‌مبى 17/7/2019 به‌لاڤكر وتێدا دبێژيت” رۆژا چارشه‌مبى 17/7/2019 روودانه‌كا ته‌قه‌كرنێ ل رێستۆرانته‌كا باژيرێ هه‌ولێرێ روودا كو د ئه‌نجامدا كارمه‌نده‌كێ كونسۆلخانا توركيا ل هه‌ولێرێ ب ناڤێ (عوسمان كۆسه‌) ودو وه‌لاتيێن هه‌رێما كوردستانێ ب ناڤێن (عوسمان محه‌مه‌د عه‌لى) و (به‌شدار ره‌مه‌زان سالح) بوونه‌ قوربانى”.

دياركر ژى” هێزێن ئاسايشێ ودژه‌ تيرۆرا كوردستانێ شيان د ده‌مه‌كێ گه‌له‌ك كێم دا شه‌ش كه‌سێن په‌يوه‌ندى ب ڤێ روودانێ هه‌ى ده‌سته‌سه‌ربكه‌ن كو سێ كه‌س وه‌لاتيێن توركى بوون ژ وان ژى ئه‌نجامده‌رێ سه‌ره‌كى يێ روودانێ ب ناڤێ (مه‌زلووم داغ)، سێ كه‌س ژى ژ هاريكارێن ئه‌نجامده‌رێن روودانێ وه‌لاتيێن هه‌رێما كوردستانێ نه‌. هه‌روه‌سا چه‌ند كه‌سه‌كێن دى كو په‌يوه‌ندى ب ڤێ روودانێ هه‌يه‌ ژ روويێ قانوونى ڤه‌ د داخوازكرى نه‌ ودووڤچوون ل سه‌ر وان يا به‌رده‌وامه‌”.

هه‌ر د وێ به‌ياننامێ دا هاتيه‌” لدووڤ دانپێدانێن تاوانباران، روودانه‌كا تيرۆرستى بوو و به‌رى چه‌ند هه‌يڤان ژ لايێ به‌رپرسه‌كێ په‌كه‌كێ ب ناڤێ فاتح(بۆتان) ل قه‌نديلى پلان بۆ هاتيه‌ دارێشتن ب ئارمانجا تيرۆركرنا كارمه‌نده‌كێ كونسۆلخانا توركيا ود ئه‌نجامدا تێكدانا ئاسايشا هه‌رێما كوردستانێ، هه‌ر ل دووڤ دانپێدانێن ئه‌نجامده‌رێ سه‌ره‌كى يێ روودانا تيرۆرستى، هه‌ردو وه‌لاتيێن هه‌رێما كوردستانێ تنێ ب گۆمانا وێ چه‌ندێ كو زێره‌ڤانێن ديبلۆماتكارێ توركى نه‌، هاتينه‌ كوشتن”.

https://www.youtube.com/watch?time_continue=618&v=xOWxu6Ui3qU

ئه‌ڤرۆ نيوز:

سه‌رۆك وه‌زيرێن هه‌رێما كوردستانێ، مه‌سرور بارزانى، په‌يامه‌كا پيرۆزباهيێ ئاراسته‌ى بۆريس جۆنسن كر ب هه‌لكه‌فتا هه‌لبژارتنا وى وه‌كو سه‌رۆك وه‌زيرێن بريتانيا.

د په‌ياما خوه‌ يا پيرۆزباهيێ دا، مه‌سرور بارزانى هيڤيا سه‌ركه‌فتنێ بۆ سه‌رۆك وه‌زيرێن بريتانيا خواست وئاماژه‌ كر كو هه‌رێما كوردستانێ وبريتانيا په‌يوه‌نديه‌كا دوستانه‌ يا هه‌ى وسوپاسيا پشته‌ڤانيا وى ژى بۆ هه‌رێما كوردستانێ كر.

سه‌رۆك وه‌زيرێن هه‌رێما كوردستانێ گۆت ژى” ب تايبه‌تى زۆر سوپاسيا هه‌وه‌ دكه‌م بۆ پشته‌ڤانيا هه‌وه‌ چ ده‌مێ تۆ سه‌رۆكێ باژێرڤانيا له‌نده‌ن يان وه‌زيرێ ده‌رڤه‌يێ بريتانيا، ئه‌م وه‌كو دۆست وهه‌ڤپشكه‌ك دشێين پشت به‌ستنێ ب هه‌وه‌ بكه‌ين”.

ل دووماهيا په‌ياما خوه‌ دا، مه‌سرور بارزانى گۆت” هيڤيدارم د پرسێن هه‌رێمى ونێڤده‌وله‌تى دا ژ نێزيك هه‌ماهه‌نگيێ ل گه‌ل هه‌ڤدو بكه‌ين”.

ئه‌ڤرۆ نیوز:

وه‌زاره‌تا خواندنا بلند وڤه‌كۆلینێن زانستى ل هه‌رێما كوردستانێ، ب گۆره‌ى بریاره‌كا جڤاتا وه‌زیرێن هه‌رێما كوردستانێ، ئه‌ڤرۆ پێنجشه‌مبى 25/7/2019  بریار دا ده‌واما فه‌رمانبه‌ران ل زانكۆ و په‌یمانگه‌هێن سه‌ر ب وه‌زاره‌تێ ڤه‌ ژ ده‌مژمێر 8 سپێدێ ده‌ست پێ بكه‌ت و ل 3 پشتى نیڤرۆ ب دووماهى بهێت.

وه‌زاره‌تا ناڤبرى بریار دا ژى كو مامۆستایێن زانكۆیان ب كێمێ حه‌فتیانه‌ 30 ده‌مژمێران ئاماده‌بوون هه‌بیت ژ بلى ده‌مێ بێهنڤه‌دانا هاڤینێ.

ئه‌ڤرۆ نیوز:

لژنا بلند یا هه‌ڤپشك یا حوكمه‌تا هه‌رێما كوردستانێ وحوكمه‌تا عیراقێ، به‌یاننامه‌ك به‌لاڤكر وتێدا به‌حسێ ناڤه‌رۆكا كۆمبوونا ئه‌ڤرۆ یا هه‌ردو شاندێن بلند یێن به‌غدا وهه‌رێما كوردستانێ دكه‌ت.

د وێ به‌یانناما هه‌ڤپشك دا هاتیه‌” د سه‌قایه‌كێ ئه‌رێنى ولێكتێگه‌هه‌شتنه‌كا هه‌ڤپشك ونیازپاكیێ، دانوستاندن ل دۆر دۆسییێن سه‌ره‌كى هاته‌ كرن ئه‌وژى ده‌ڤه‌رێن ناكۆكى ل سه‌ر وكێشێن دارایى وبودجه‌ وپرسا په‌ترۆلێ وغازێ وهه‌ردولا رێككه‌فتن ل سه‌ر دانانا میكانیزمه‌كێ بۆ ڤه‌كۆلینێ ل سه‌ر هوورده‌كاریێن پرسێن هه‌لاویستى ب رێیا پێكئینانا چه‌ند لژنێن تایبه‌تمه‌ند یێن ته‌كنیكى ژ وه‌زاره‌تێن په‌یوه‌ندیدار ل بن چاڤدێریا لژنا بلند یا هه‌ڤپشك”.

دیسا هاتیه‌” دكۆمبوونێ دا بریار ل سه‌ر به‌رده‌وامیا په‌یوه‌ندیان هاته‌ دان ب ئارمانجا دیتنا چاره‌سه‌ریێن بنه‌ره‌تى ودستوورى بۆ هه‌موو كێشێن هه‌لاویستى ب شێوه‌كى كو خزمه‌تا به‌رژه‌وه‌ندیێن هه‌ردولا بكه‌ت وبریاره‌ ل حه‌فتیا داهاتى لژنێن ته‌كنیكى ل به‌غدا كۆم ببن”.

ئه‌ڤرۆ نیوز:

سه‌رۆكێ حوكمه‌تا هه‌رێما كوردستانێ، مه‌سرور بارزانى، ئه‌ڤرۆ پێنجشه‌مبى 25/7/2019 ل گه‌ل شانده‌كێ بلند یێ حوكمه‌تا عیراقێ كۆمبوو و د وێ كۆمبوونێ دا سێ بابه‌تێن گرنگ هاتنه‌ به‌حسكرن.

د كۆمبوونا ئه‌ڤرۆ یا هه‌ردو شاندێن حوكمه‌تا هه‌رێمێ وبه‌غدا، ل دووڤ كوردستان 24، دانوستاندن هاتنه‌ كرن ل دۆر نڤیسینا ره‌شنڤیسه‌كا هه‌ڤپشك وتایبه‌ت ب چاره‌سه‌ركرنا پرسێن د ناڤبه‌را هه‌ولێرێ وبه‌غدا وهه‌ردولا یێن نێزیك بووین بگه‌هنه‌ رێككه‌فتنێ.

د وێ كۆمبوونێ دا دانوستاندن ل دۆر سێ ته‌وه‌رێن سه‌ره‌كى هاتنه‌ كرن ئه‌وژى هه‌ر ئێك ژ ده‌ڤه‌رێن ده‌رڤه‌ى ئیدارا هه‌رێما كوردستانێ وپه‌ترۆل وغاز وكێشێن دارایى.

شاندێ حوكمه‌تا هه‌رێما كوردستانێ ب سه‌رۆكایه‌تیا مه‌سرور بارزانى سه‌رۆكێ حوكمه‌تا هه‌رێمێ پێكهاتبوو ژ قوباد تاله‌بانى جێگرێ سه‌رۆكێ حوكمه‌تێ ورێبه‌ر ئه‌حمه‌د وه‌زیرێ ناڤخوه‌یى و ئاوات شێخ جه‌ناب وه‌زیرێ دارایى وئابوورى وشاندێ بلند یێ حوكمه‌تا عیراقێ پێكهاتبوو ژ فوئاد حسێن جێگرێ سه‌رۆك وه‌زیرێن عیراقێ بۆ كاروبارێن ئابوورى ووه‌زیرێ دارایى وسامر غه‌زبان جێگرێ سه‌رۆك وه‌زیرێن عیراقێ بۆ كاروبارێن وزێ ووه‌زیرێ په‌ترۆلێ وفالح فه‌یاز شیره‌تكارێ ئاسایشا نیشتمانى ومحه‌مه‌د ئه‌لهاشمى رێڤه‌به‌رێ ئۆفیسا عادل عه‌بدولمه‌هدى سه‌رۆك وه‌زیرێن عیراقێ.