ئەڤرۆ نیوز:
نوری مەحمود پەیڤدارێ یەپەگێ راگەهاند کو نێزیکی ١٠ هزار چەکدارێن رێکخراوا تیرۆرستی یا داعشێ د دەستێ مە دانە و نها ل زیندانان دانە و مە دڤێت ل دادگەهەکا نێڤدەولەتی دا بهێنە دادگەهکرن.
ناڤهاتی راگەهاند کو مە بەری نها ژی داخواز ژ هەڤپەیمانیا نێڤدەولەتی یا کری کو دادگەهەکێ بۆ وان تیرۆرستان ئاڤا بکەن دا ئەو تیرۆرستە بهێنە دادگەهکرن. چونکو دڤێت وەلاتێن بیانی ژ بۆ چارەکرنا ڤێ ئاریشێ هاریکاریا مە بکەن.
ئەڤرۆ نیوز:
جەلال محەمەد ئەمین ئەندامێ فراکسیۆنا بزاڤا گۆران ل پەرلەمانێ کوردستانێ راگەهاند کو هەتا ٢٤ دەمژمێرێن دی بزاڤا گۆران دێ ناڤێن بەربژێرێن خوە رادەستی مەسرور بارزانی راسپاردی بۆ سەرۆک وەزیرێن کابینا داهاتی یا حوکمەتا هەرێما کوردستانێ کەت.
دهێتە چاڤەرێکرن کو ل ڤێ حەفتیێ هەموو ئالی ناڤێن بەربژێرێن خوە رادەستی مەسرور بارزانی بکەن دا ل پەرلەمانی دەنگ ل سەر وەزیرێن نوو بهێتە دان.
ئەڤرۆ نیوز:
رێڤەبەرییا گشتی یێ حەج و عومرێ ل ھەرێما کوردستانێ گەشتا چوونا حەجیێن کوردستانێ یێن ئەڤ سالە بۆ سعودیێ راگەھاند.
ئەڤرۆ رۆژا شەمبی ٦-٧-٢٠١٩ د راگەھاندنەکێ دا رێڤەبەریا گشتی یا حەج و عومرێ ل کوردستانێ بەلاڤ کریە گەشتا ئێکێ یا حەجیێن کوردستانێ بۆ وەلاتێ سعودیێ دێ ل رۆژا پێنج شەمبی رێککەفتی ١١-٧-٢٠١٩ ژ فروکخانەیا ھەولێرێ بۆ باژێرێ جەدە یێ سعودیێ چن و پاش بۆ باژێرێ مەدینێ د کاروانێ ئێکێ دا دێ ٣٧٦ حەجی دێ چن، جیسان ل ھەمان رۆژ دێ ١٨٨ حەجی ژ باژێرێ سلێمانیێ بەر ب مەدینێ رێککەڤن.
ئەڤرۆنیوز،ڕەزوان ڕۆژبەیانى:
رائید عوسمان حەم عەبدولا رێڤەبەرێ بنگەهێ بەرەڤانیێ ل قەزا بەردەرەش بۆ ئەڤرۆنیوز خویاکر پشتی نیڤرۆیا ئەڤرۆ گەنجەک بناڤێ موسعەب عیماد دهام کو ژیێ وی 20سالن و خەلکێ گوندێ موریلانە ل سنوورێ قەزا بەردەڕەش دگەل هەڤالێن خوە دچیتە مەلاڤانگەها بەردەڕەش ژبەر نەزانینا مه‌له‌ڤانيان ناڤبری دخەندقیت.
گۆت ژى”ر ئەو مەلەڤانگەهه کو ل بەردەڕەش هەیە یا بنگەهێ لاوانە ل قەزا بەردەرەش بەلێ ژلایێ کەسەکی ڤە ب گرێبەست ب کرێ هاتیە گرتن و پێدڤى بوو بەردەوام کەسه‌ک کو شارەزایی مەلەڤانيان بیت ل وێرێ ئامادە با داکو سەلامەتیا وه‌لاتیان بهێتە پاراستن ل دەمێ کو مەلەڤانیان دکەن، بەلێ مخابن کەس ل وێرێ نەبوویە و ئەو کەسێن کو دگەل وی گەنجێ بووینە د مەلەڤان نەبوون و نەشیان ژمرنێ ڕزگار بکەن”.
خوياكر” پشتی کو ئەم هاتینە ئاگەهدارکرن، ل جهێ روودانێ ئامادەبووین تەرمێ وی گەنج ژی هاتە رەوانەکرن بۆ نوشداريا داد ل دهۆکێ”.
ئەڤرۆ نیوز ؍ عەلی حاجی :
دروودانەکێ دا ل درەنگیا شەڤا دەرباز بوی ژئەگەرێ شەرە دەڤەکێ د ناڤبەرا هندەک گەنجان دا ل باژێرێ دهوکێ ؍ سێ کەس ب گرانی بریندار دبن و دهێنە رەوانەکرن بۆ نەخوشخانێ .
ئێک ژ کەسوکارێن وان گەنجێن بریندار بوین نەخاست ناڤێ خوە ئاشکەرا بکەت بۆ ئەڤرۆ نیوز دیار کر پشتی برایێ من دگەل هەڤالێن خوە ژکاری ڤەگەریاین ؍ قەستا دوکانەکا لەفا دکەن ب مەرەما کرينا لەفان ل ئێک ژ تاخێن باژێرێ دهوکێ؍ بەلێ ژنشکەکێ ڤە گەنجەکێ سەر خوەش ئاخڤتنەکا نەخوەش دبێژیتێ ئێک ژ وان کەسێن بریندار بوین ؍ پاشی شەرە دەڤ دروست دبیت و ئەو گەنجە ب رێیا موبایلێ داخوازێ ز ۱۰ هەڤالێن خوە دکەت و ئەو هەڤال ل وی جهی ئامادە دبن ؍ برایێ من و هەردو هەڤالێن دگەل دا ؍ دانان بەر کێرا و داران و هەر سێ یان بریندار دکەن ؍ برینا دو ژ وان ژی یا ب مەترسی یە و بۆ نەخوشانه‌يا دهوک هاتنە رەوانە کرن و هەر ب رێیا کامیرا ژی دیار دبیت ۱۱ کەس ل وان هەر سێ گەنجان ددەن .
ل دور ڤێ چەندێ ژێدەرەکێ باوەر پێکری بۆ ئەڤرۆ نیوز گوت : ژبەر کێشەیێ هەتا نوکە مە ٤ کەس دەستەسەر کرینە کو ئەو ژی پشکدار ببون دوێ روودانێ دا و ڤەکولین هێشتا یا بەردەوامە د ڤێ کەیسێ دا .
بو زانین ئەو گەنجێن بریندار بوین خەلکێ ناحيا باتیڤانە ل قەزا زاخۆ و ل ئێک ژ فروشگەهێن دهوکێ کار دکرن .
ئه‌ڤرۆ نیوز:
پارێزگارێ به‌رێ یێ نه‌ینه‌وا راگه‌هاند، ره‌وشا ئه‌منى ل باژێرێ مووسل یێ مه‌ترسیداره وهێشتا هژماره‌كا مه‌زن یا ئه‌ندامێن داعشێ ل وى باژێرى یێن ماین.
ئه‌سیل نجێفى، پارێزگارێ به‌رێ یێ نه‌ینه‌وا بۆ كه‌نالێ (RT) یێ رووسى گۆت” نوكه داعش ل ده‌وروبه‌رێن مووسل لڤینان دكه‌ت ب تایبه‌تى ل بیابانێن نێزیك سنورێ سووریێ، هه‌رچه‌نده هێز بۆ پاراستنا وان سنوران یێن هاتینه هنارتن، به‌لێ ئه‌و هێزێن ساده‌نه وچه‌كێن وان د وه‌سا نینن كو بشێن به‌رهنگاریا وان ئاسته‌نگان ببن”.
ئه‌ڤرۆ نيوز:
ل دووڤ پێزانينێن ده‌زگه‌هێن راگه‌هاندنا ئيكه‌تيێ، پارتى وئێكه‌تى ل سه‌ر پرسا پارێزگارێ كه‌ركووكێ يێن رێككه‌فتين وبه‌ربژاره‌كێ كورد ژى هاتيه دياركرن بۆ وى پۆستى.
سايتێ PUKmedia ژ ژێده‌ره‌كێ باوه‌رپێكرى ڤه‌گوهاست” ئه‌ندازيار ته‌يب جه‌بار به‌ربژارێ كوردان وليستا برايه‌تى يه ل جڤاتا پارێزگه‌ها كه‌ركووكێ بۆ پۆستێ پارێزگارێ نوو يێ كه‌ركووكێ كو نێزيكى دو سالانه ئه‌و پۆسته ب وه‌كاله‌ت ژ لايێ راكان جبوورى ڤه دهێته ب رێڤه‌برن”.
ژێده‌ره‌كێ ئێكه‌تى نيشتمانى كوردستان ژى بۆ رووداو گۆت” ئه‌ندازيار ته‌يب جه‌بار ئێك ژ به‌ربژارێن ب هێزه و ده‌ليڤا وه‌رگرتنا وى پۆستى يا هه‌ى، چونكى پارتى ژى رازيبوونا خوه ل سه‌ر وى يا دياركرى”.
دهێته زانين ئه‌ندازيار ته‌يب جه‌بار ده‌مه‌كى بريكارێ وه‌زاره‌تا ئاڤه‌دانكرنێ بوو ل هه‌رێما كوردستانێ.
ئه‌ڤرۆ نيوز:
سه‌رۆك مه‌سعود بارزانى ئه‌ڤرۆ چارشه‌مبى 3/7/2019 ل گه‌ل فراكسيۆنێن پێكهاتێن مه‌سيحى وتوركمان ل په‌رله‌مانێ كوردستانێ كۆمبوو.
سه‌رۆك بارزانى د په‌يڤه‌كێ دا دياركر كو كوردستان وه‌لاتێ مه هه‌موويانه و د رێڤه‌برنێ دا د هه‌ڤپشكين وئاماژه كر كو نابيت ب هيچ پێكهاته‌كى بهێته گۆتن (كه‌مينه) وهه‌ر نه‌ته‌وه‌كى تايبه‌تمه‌نديا خوه يا هه‌ى ودڤێت رێز ل وان تايبه‌تمه‌نديا بهێته كرن.
سه‌رۆ ك بارزانى دووپات كر كو د دستوورێ كوردستانێ دا مافێن هه‌موو پێكهاتان ب تمامى دێ هێنه چه‌سپاندن ورێ ب هيچ جوداكاريه‌كا نه‌ته‌وى وئاينى ناهێته دان وئه‌م هه‌موو ل كوردستانێ دێ يه‌كسان وهه‌ڤپشك بين.
ئه‌ڤرۆ نیوز:
كاروان گه‌زنه‌یى ئه‌ندامێ لژنا په‌یوه‌ندى و ره‌ڤه‌ندا كوردستانێ ل په‌رله‌مانێ كوردستانێ دیاكر ، رۆژا چارشه‌مبى ئه‌و ل گه‌ل باربارا شوماخه‌ر جێگرا قونسولا ئه‌لمانیا ل هه‌رێما كوردستانێ كوم بووینه و یاداشته‌كا نه‌رازیبوونێ ئاراسته‌ى ئه‌نگێلا مێركل راوێژكارا ئه‌لمانیا كرینه ل هه‌مبه‌ر داخویانیا وێ یا سه‌باره‌ت ده‌وله‌تا كوردى داى.
حه‌فتیا چوویى مێركلێ دیاركربوو كو ئه‌و پشته‌ڤانیا ده‌وله‌ته‌كا كوردى بۆ كوردان ناكه‌ت.
ئه‌ڤرۆ:
سه‌رۆكێ هه‌رێما كوردستانێ د رێوره‌سمه‌كێ دا، قوتابیێن ئێكێ یێن 9 بنه‌ره‌تى و 12 ئاماده‌یى ل سه‌ر ئاستێ هه‌رێما كوردستانێ خه‌لات كرن و راگه‌هاند: شانازیێ دكه‌م ب وێ یه‌كێ كو كه‌سێن وه‌كو هه‌وه ل وه‌لاتێ مه په‌یدا دبن كو هیڤیێ دده‌نه نه‌ڤیێن نوكه و یێن پاشه‌رۆژێ.
سه‌رۆكێ هه‌رێما كوردستانێ راگه‌هاند: دێ د پرۆسا چاكسازیێ دا د به‌رده‌وام بین تا سیسته‌مه‌كێ بهێز و سه‌رده‌میانه بنه‌جهـ دكه‌ین، هه‌ر چ د شیاندا بیت دێ مفاى ژ پلان و په‌پره‌و و بكارئینانا ته‌كنولوژیا نوو ب باشترین شێوه بۆ په‌روه‌ردێ و فێركرنێ وه‌رگرین و دێ هه‌مى بیاڤێن خواندنێ ب هه‌ردو كه‌رتێن گشتى و تایبه‌ت ڤه پێشئخین.
نيشاندان