ئه‌ڤرۆ نیوز:
ل دووڤ نڤیساره‌كا وه‌زاره‌تا كاروبارێن شه‌هید وئه‌نفالكریان كو ل 25/6/2019 ده‌رچوویه، بریار هاتیه دان ب مه‌زاختنا گۆژمێ 17 ملیار و306 ملیۆن دیناران وه‌كو كریا خواندن وده‌رمالێن هاتنوچوون وئاكنجیبوونا كور وكچێن شه‌هید و ئه‌نفالكریان وزیندانیێن سیاسى.
هه‌ر د وێ نڤیسارێ دا هاتیه” ئه‌و گۆژمێ پاره‌ى دێ هێته دان ب ئێك ژ كه‌سێن وان ته‌خان كو ل زانكۆ وپه‌یمانگه وقوتابخانێن ئه‌هلى وحكومى د خوینن بۆ سالا خواندنێ 2017 – 2018″.
ئه‌ڤرۆ نیوز:
وه‌زاره‌تا په‌روه‌ردێ ل هه‌رێما كوردستانێ مه‌رجێن دانا مۆله‌تا بێ مووچه بۆ مامۆستایێن بنه‌ره‌تى وئاماده‌یى بۆ سالا خواندنێ 2019 – 2020 به‌لاڤكرن.
ل دووڤ نڤیساره‌كا وه‌زاره‌تێ په‌روه‌ردێ، مامۆستایان مافێ مۆله‌تا بێ مووچه یا هه‌ى ودشێن داخوازیێن خوه ژ 1/7/2019 هه‌تا 1/9/2019، هه‌روه‌سا 30/9/2019 دووماهى ژڤانێ نڤیسارێن رێڤه‌به‌ریێن گشتى یێن پارێزگه‌هان كار دێ پێ هێته كرن وژ وى ژڤانى وێڤه كار ب چو نڤیساره‌كا بلندكرى ناهێته كرن كو داخوازا مۆله‌تا بێ مووچه بیت.
دیاركریه ژى” پێدڤیه داخوازكه‌ر سۆونامه‌كێ بده‌ت كو ب هیچ شێوه‌كى داخوازا هه‌لوه‌شاندن وبرینا مۆله‌تا بێ مووچه نه‌كه‌ت، به‌روڤاژى كار ل سه‌ر ناهێته كرن”.
ئه‌ڤرۆ نیوز:
رێڤه‌به‌رێ گشتى یێ ئاڤێ ل هه‌رێما كوردستانێ ئاشكراكر كو هاتنا زۆر یا پارێ ئاڤێ ل هنده‌ك جهان شاشى یا تێدا و وه‌لاتى دشێن سه‌ره‌دانا رێڤه‌به‌ریێن ئاڤێ بكه‌ن بۆ چاره‌سه‌ریێ.
مه‌سعود كاره‌ش، رێڤه‌به‌رێ گشتیێ ئاڤێ ل هه‌رێما كوردستانێ ئه‌ڤرۆ چارشه‌مبى 26/6/2019 د كۆنگره‌كێ رۆژنامه‌ڤانى دا راگه‌هاند” هاتنا بهایێ بلند یێ ئاڤێ هه‌كه هه‌ر شاشیه‌ك هه‌بیت، وه‌لاتى دشێن سه‌ره‌دانا رێڤه‌به‌ریێن ئاڤێ بكه‌ن بۆ چاره‌سه‌ركرنا كێشا وان یا بهایێ زۆر یێ ئاڤێ”.
دیاركر ژى” ژ سه‌رجه‌مێ 800 هزار هه‌ڤپشكان، نێزیكى هزار كه‌سان ژ سێ ملیۆن دیناران زێده‌تر بۆ هاتیه، هه‌روه‌سا 374 وه‌لاتیان ژى د ناڤبه‌را دو هه‌تا سێ ملیۆن دیناران بۆ هاتیه، دیسا نێزیكى دو هزار كه‌سان د ناڤبه‌را 500 هزار هه‌تا ئێك ملیۆن دینار بۆ هاتیه”.
دیاكر یى ژى كو زێده‌تر ژ 40 هزار كه‌سان د ناڤبه‌را 100 هزار دیناران هه‌تا 500 هزار دیناران بۆ هاتینه، د هه‌مان ده‌م دا ئه‌وێن د ناڤبه‌را 25 هزار دیناران هه‌تا 50 هزار دیناران بۆ هاتین، هژمارا وان 86 هزار و 237 كه‌سن.
گۆت ژى” زوورترین هژمار كو 25 هزار دینار بۆ هاتین 727 هزار كه‌سن كو دبنه رێژا 84% ژ هه‌ڤپشكێن ئاڤێ ل هه‌رێما كوردستانێ”.
ئه‌ڤرۆ نیوز:
به‌رپرسه‌كێ وه‌زاره‌تا ئه‌وقاف وكاروبارڤین ئاینى ل هه‌رێما كوردستانێ ئاشكراكر كو ل دۆر راستڤه‌كرنا چه‌ند برگێن دستوورێ عیراقێ، یاداشتنامه‌ك هاتیه ئاراسته‌كرن بۆ سه‌رۆك مه‌سعود بارزانى وعه‌لى سیستانى وه‌كو دو كاریگه‌رترین كه‌سایه‌تى ل سه‌ر ئاستێ عیراقێ.
مه‌ریوان نه‌قشبه‌ندى، به‌رپرسێ په‌یوه‌ندیێن وه‌زاره‌تا ئه‌وقاف وكاروبارێن ئاینى ل هه‌رێمێ د داخۆیانیه‌كا رۆژنامه‌ڤانى دا گۆت” بۆ جارا سیێ یه 25 كه‌س ل سه‌ر ئاستێ عیراقێ كوربه‌نده‌كى بۆ چاكسازیێ د هنده‌ك برگێن دستوورێ عیراقێ دا ئه‌نجام دده‌ن كو په‌یوه‌ندى ب پرسا ئازادیا تاكێ عیراقى و وه‌لاتیبوونێ هه‌یه، پشكه‌ك ژى په‌یوه‌ندى ب ئاینێن جودا ڤه هه‌یه كو ل سه‌رانسه‌رى عیراقێ گورانكارى تێدا بهێنه ئه‌نجامدان، ئه‌ڤه ژى دێ بیته پرۆژه‌ك وهێته بلندكرن بۆ هه‌رسێ سه‌رۆكایه‌تیێن عیراقێ وهه‌رێما كوردستانێ”.
گۆت ژى” ئه‌و پرۆژه‌یه دێ هێته ئاراسته‌كرن بۆ هه‌ر ئێك ژ سه‌رۆك بارزانى وعه‌لى سیستانى وه‌كو دو مه‌رجه‌عێن خه‌لكى ل عیراقێ”.
گۆت ژى” ئه‌و مادێن په‌یوه‌ندى ب بابه‌تێ مافێ وه‌لاتیبوونێ وئازادیا گشتى ڤه هه‌ى، ب تایبه‌تى ژى ئه‌و برگه‌یا دبێژیت(نابیت چو قانوونه‌ك ده‌ربچیت به‌رۆڤاژى شه‌ریعه‌تا ئیسلامى بیت) و (چو قانوونه‌ك ده‌رنه‌چیت بێ ل به‌رچاڤ وه‌رگرتنا مافێن مرۆڤى) كو جۆره تێكهه‌لیه‌ك تێدایه وپێدڤیه ده‌ستكارى تێدا بهێته كرن ل گه‌ل چه‌ند پرسێن سیاسى ژى، بۆ نموونه ل بابه‌تێ بكارئینانا هێزێ وه‌كو چاوان پشتى ریفراندۆمێ مه دیتى هێز بۆ كوردستانێ هاتیه لڤین”.
ئەڤرۆ نیوز:
فەرھاد ئەمین ئەترووشی، پارێزگەرێ دھۆکێ سەرەدانا سەرۆکێ پارتا SPD یا ئەلمانی و وەزیرێ داد یێ بەرێ یێ ئەلمانیا کر و د ھەڤدیتنەکێ دا بەحسێ رەوشا دەڤەرێ و چاوانیا بھێزترکرنا تێکەلیان د ناڤبەرا کوردستانێ و ئەلمانیا دا ھاتەکرن.
پارێزگەرێ دھۆکێ سوپاسیا حوکمەت و گەلێ ئەلمانیا بۆ وێ پشتەڤانیا وان یا بەردەوام د ھەموو بیاڤان دا، ب تایبەت د بیافێ مرۆڤایەتی دا بۆ کوردستانێ کر.
ژ لایێ خوەڤە سەرۆکێ پارتا SPD یا ئەلمانی دەستخوشی ل حوکمەتا ھەرێما کوردستانێ کر بۆ وێ پشتەڤانی و ھاریکاریکرنا ھەموو ئاوارە و پەنابەران و ئەو کەلتورێ پێکڤەژیانێ یێ بھێز؛ ئەوێ ل کوردستانێ ھەی و ھیڤی خواست بەردەوام بیت و پشتەڤانیا پارتا خوە بۆ کوردستانێ و خەلکێ وێ دوپات کر و دەستخوشی ل پارێزگەرێ دھۆکێ کر بۆ وێ خزمەتا مەزن و ژ ھەژی ئەوا ل سنوورێ پارێزگەھێ بۆ ھەموو ئاوارە و پەنابەران دھێتە کرن.
ئەڤرۆ نیوز:
ئەڤرۆ سەرۆک مەسعود بارزانی پێشوازی ل مارتین وار کونسولێ گشتی یێ بریتانیا ل هەرێما کوردستانێ کر و د هەڤدیتنەکێ دا بەحسێ رەوشا گشتی یا عیراقێ و هەرێما کوردستانێ و گوهۆرینێن ل دەڤەرێ هاتە کرن.
کونسولێ گشتی یێ بریتانیا راگەهاند کو ئەرکێ وی وەکو کونسولێ گشتی ل هەرێما کوردستانێ ب دووماهی هاتیە و سوپاسیا سەرۆک بارزانی و هەرێما کوردستانێ کر کو د دەمێن بۆری دا پشتەڤانیا وی کرینە.
ل هەمبەر دا سەرۆک بارزانی سوپاسیا کونسولێ گشتی یێ بریتانیا کر و هێڤی خواست کو د ئەرکێ خوە یێ نوو دا سەرکەفتی بیت.
ئەڤرۆ نیوز، مەحمود نھێلی:
ژ ئەنجامێ درووست بوونا روودانەکا ئاگری ل سەنتەرێ ناحیا دێرەلۆک نیڤرۆ یا ئەڤرۆ 26/6/2019 دوکانەکا کەرەستەیێن جوانکاریێن ترۆمێلان ب تمامی ھاتە سوتن.
بەرپرسێ بنگەھێ بەرەڤانیا باژێری ل دێرەلۆک بۆ ئەڤرۆ نیوز دیار کر، کو تیمێن وان ھەر چەندە یێن مژیلی ڤەمراندنا رووانا ئاگرەکی پیش و
پەلەخی بووینە لی د زووترین دەم دا گەھشتنە جھێ روودانێ و شیان کونترول بکەن و نەھێلن زیان بگەھنە دوکانێن دەوروبەران.
ناڤھاتی دیار ژی کر، کو زیانێن زۆر گەھشتنە دوکانێ کو پرانیا کەرەستەیێن دناڤ دا ھاتینە سوتن.
ئاشکرا کر، چێدبیت ئەڤ روودانە ژ ئەنجامێ شورتەکا کارەبێ یان ژی پەقینا بوتلەکی بێھنێ دروست ببیت.
ئه‌ڤرۆ نيوز:
فازل ميرانى، به‌رپرسێ مه‌كته‌با سياسى يا پارتى ديموكراتى كوردستان به‌رسڤا گۆتنێن سه‌عدى ئه‌حمه‌د پيره دده‌ت ل دۆر وێ چه‌ندێ كو پارتى بزاڤێ دكه‌ت سه‌رۆك بارزانى وه‌كو مه‌رجه‌عێ هه‌موو كوردان بدانيت.
د ته‌وه‌ره‌كێ دى يێ ديدارا خوه ژى دا فازل ميرانى بۆ راديۆيا ده‌نگێ ئه‌مريكا به‌حس ل كه‌ركووك دكه‌ت و ئاماژێ ب وێ چه‌ندێ دكه‌ت كو هنده‌ك ژ براده‌رێن ئێكه‌تيێ كه‌ركووك كو دلێ كوردستانێ يه ئينا ده‌ر و دا ده‌ست هنده‌كێن دى و نها نشته‌رگه‌ريان بۆ دكه‌ن و ده‌رزيان بۆ ددانن و دبێژنه مه وه‌رن چاره كه‌ن.
ئه‌ڤرۆ نيوز:
جڤاتا نشتيمانى يا بزاڤا گۆڕأن بۆ ئێكلاكرنا ناڤێن چار وه‌زيرێن بۆ كابينا نوو يا حوكمه‌تا هه‌رێما كوردستانێ، رۆژا پێنجشه‌مبى ل باژێرێ سلێمانيێ دێ كۆم بيت.
ب گۆره‌ى ميديا بزاڤا گۆڕان، د كۆمبوونا جڤاتا نشتيمانى يا بزاڤا گۆڕأن دا، ناڤێ چار به‌ربژاران ئێكلا كه‌ت كو بڕياره د كابينا نوو يا حوكمه‌تا هه‌رێما كوردستانێ ب سه‌رۆكاتيا مه‌سرور بارزانى دا پۆستێن وه‌زارى وه‌رگرن.
هه‌ر وه‌سان د كۆمبوونا جڤاتا نشتيمانى يا بزاڤا گۆڕان دا، 11 به‌ربژێر ژ لايێ لژنێ ب سه‌رۆكاتيا رێكخه‌رێ گشتى يێ بزاڤا گۆڕان هاتينه ئاماده‌كرن، دانوستاندن دێ ل سه‌ر سيڤيان هێته كرن و چار كه‌س بۆ پۆستان دێ هێنه هه‌لبژارتن دا كو راده‌ستى سه‌رۆك وه‌زيرێ راسپاردى يێ هه‌رێما كوردستانێ بكه‌ن.
ئەڤرۆ نیوز، عەلی حاجی:
ب گورەیی ئامارەکا رێڤەبەریا ھاتنوچوونا قەزا زاخۆ، د ماوەیێ 48 دەمژمێران دا چار روودانێن ھاتنوچوونێ رووداینە و نەھـ کەس ژی د وان روودانان دا بریندار بووینە.
کومیسەر بەشیر یوسڤ، ژ راگەھاندنا ھاتنوچوونا قەزا زاخۆ بۆ ئەڤرۆ نیوز ئاشکەرا کر د ماوێ 48 دەمژمێرێن بوری دا ل سنورێ رێڤەبەریا وان چار روودانێن ھاتنوچوونێ ھاتینە تومار کرن، ژ وان روودانان ژی ئێک د ناڤ سەنتەرێ باژێری زاخۆ دا بوو، سێ روودانێن دیتر ژی ژ دەرڤەی سەنتەرێ باژێری بوو، روودانەک ژ وان روودانا وەلاتیێن باکوورێ کوردستانێ بوون کو د ناڤبەرا دو ترۆمبێلێن بارھەلگر دا بۆ کو دو شوفێر بریندار ببوون، ب مخابنی ڤە د وان چار روودانان دا نەھـ کەس بریندار بووینە.
کومیسەر بەشیر یوسڤ ل دۆر ئەگەرێ روودانان ژی گۆت: ھەموو روودان ژی ژ ئەگەرێ ب لەز ھاژۆتنا ترۆمبێلێ بووینە و شوفێران لەزاتیەکا بێ سنور ب کار ئینایە.
نيشاندان
