ئه‌ڤرۆ نیوز:

بریاره‌ پالاوگه‌هه‌كا پێشكه‌فتى ل پارێزگه‌ها دهۆكێ بهێته‌ چێكرن كو ب دروستكرنا وێ دێ چه‌ندین مفایان گه‌هینیته‌ هه‌رێما كوردستانێ.

د. بێوار خنسى، شیره‌تكارێ ئابوورى ل جڤاتا ئاسایشا هه‌رێما كوردستانێ راگه‌هاند” به‌رى شه‌رێ داعشێ، بریارا حوكمه‌تا هه‌رێما كوردستانێ ئه‌وبوو پالاوگه‌هه‌كا مه‌زن یا په‌ترۆلێ ل سنوورێ پارێزگه‌ها دهۆكێ بهێته‌ دروستكرن، ل سالا 2014 ژى فه‌رمانا دروستكرنا وێ پالاوگه‌هێ هاتبوو ده‌ركرن، به‌لێ ژبه‌ر شه‌رێ تیرۆرستێن داعشێ، كار تێدا هاته‌ پاشخستن”.

گۆت ژى” بزاڤ دهێنه‌ كرن پیشه‌سازى د په‌ترۆلێ دا بهێته‌ كرن، ژبه‌ركو دێ داهاته‌كێ مه‌زن بۆ حوكمه‌تا هه‌رێما كوردستانێ وبۆ خه‌لكێ هه‌رێمێ ژى ئینیت، هه‌كه‌ نوكه‌ به‌رمیله‌كا په‌ترۆلێ ب 70 دۆلاران بفرۆشین، به‌لێ پشتى پالاوتنا په‌ترۆلێ، دێ داهاتێ وێ بیته‌ دو به‌رامبه‌ر”.

شیره‌تكارێ ئابوورى ل جڤاتا ئاسایشا هه‌رێما كوردستانێ زێده‌تر بۆ مالپه‌رێ فه‌رمى یێ پارتى خویاكر” هه‌بوونا پالاوگه‌هێ دێ ده‌لیڤێن كارى بۆ وه‌لاتیان په‌یداكه‌ت وبه‌رهه‌مێ ناڤخوه‌یى ژ پانزینێ پركه‌ت، هه‌روه‌سا كێشێن ووزێ وپه‌ترۆلا سپى وپانزینێ وكاره‌بێ هێنه‌ چاره‌سه‌ركرن، ب دیتنا من هه‌رێما كوردستانێ پێدڤى ب پالاوگه‌هه‌كا پێشكه‌فتى یا هه‌ى، ژبه‌ر كو رۆژانه‌ پێدڤى ب شه‌ش ملیۆن لترێن پانزینێ یه‌، ئه‌وژى ب ساناهى ب ده‌ست هه‌رێمێ ناكه‌ڤیت”.

ل دۆر جهێ دروستكرنا پالاوگه‌هێ، بێوار خنسى گۆت”قه‌زا شێخان باشترین جهه‌ بۆ دانانا پالاوگه‌هه‌كا په‌ترۆلێ، چونكى ده‌وروبه‌رێن شێخان هه‌موو كێلگێن په‌ترۆلێ نه‌ وده‌ڤه‌ره‌كا زه‌نگینه‌ ب سامانێ په‌ترۆلێ”.

ئەڤرۆ نیوز، نەوزاد ھلۆری:

پتری پێنج ھەیڤایە ژ بەر روودانێن کانونا دوویێ سا ئەڤ سالە ھەموو بازار و ھاڤینگەھـ و جھێن گەشتوگۆزاریێن ئاڤا مارک، گەلێ بالندا و نێروەورێکان ھاتینە گرتن، بەلێ نوکە کو وەرزێ گەرمێ یە و ھاڤینگەە ل دەڤەرێ بێ بەرامبەر نینن، بەشەکێ زور ژ خەلکی زێدەباری ھەبوونا مەترسیێ قەستا ئاڤا مارک دکەن.

مێھڤان بێزەلی، وەلاتیەکێ شێلادزێ یە بۆ ئەڤرۆ نیوز گۆت: (ئاڤا مارک و دەڤەرا نێروەورێکان کو نێزیکێ 20 جھێن گەشتوگۆزاری تێدا ھەنە، جھەکێ خوش و ھوینە و خەلکەکێ زور قەست دکەتێ داکو گەرماتیا ھاڤینێ بشێکنن، ژ ئەگەرێ رودانێن کانونا دویێ یا سالا 2019 ھاتینە دائێخستن و خەلک و گەشتیار نوکە نەشێن قەست بکەنێ).

زێدەتر گۆت: (بەلێ ژبەرکو دەڤەرا مە ھاڤینگەھێن بێ بەرامبەر نینن و رووبار ژی بوشە و کێم نەبوینە، ھژمارەکا زور یا خەلکی نوکە قەستا ئاڤا مارک دکەن ئەڤە زێدەباری وێ یەکێ کو رێیا گەھشتنا وێرێ ب فەرمی نەھاتیە ڤەکرن و مەترسی ھەیە، بەلێ خەلک ھەر دچن، ئەڤێ یەکێ مەترسی لسەر ژیانا وان دروستکریە و دخوازین خەلکێ مە خوە بپارێزن).

ب گورەی ئاخفتنێن بێزەلی، ئەگەر خەلک زور بچن دبیت نەبیتە مەترسی بو سەر ژیانا وان،بەلێ ئەگەر کێم بچن دبیت مەترسی ھەبیت و زێدەتر گۆت: (دەڤەرا مە رۆژ بو روژێ یا دبیتە ئاگر و بوردومان بەردەوامە، بەلێ ئەم ناخوازین جھێن خوە بو ھندەک لایەنێن حزبی و سوپایێ تورکیا چول بکەین کو چو پەیوەندی ب ھەرێما کوردستان و دەڤەرێ ڤە نەبیت، لەورا خەلکێ مە دێ ھەر چیتە دەڤەرا خوە، خوە ئەگەر بزانیت دێ بیتە قوربانی ژی).