ئەڤرۆنیوز، عەلی حاجی:
ئەندامەکێ لژنا تایبەت یا دەرمانان ل زاخۆ بۆ ئەڤرۆ نیوز ئاشکرا کر، د بەردەوامیا دووڤچوونێن وان دا ل سەر کلینیک و دەرمانخانان، وان دەست ب سەر چەندین دەرمانێن دەم ب سەرڤەچوویی دا گرت و دو کلینیک و دەمانخانەک ژی ھاتنە داخستن.
خەلات نوونەرێ قایمقامیا زاخۆ زێدەتر گۆت: “د بەردەوامیا دووڤچوونێن مە دا ل رۆژا ١٩/٥/٢٠١٩ مە دو کلینیکێن ھاریکارێن نۆشداری بۆ ماوێ حەفتیەکێ داخستن، ژ بەرکو وان کلینیکا پێگری ب رێنمایێن جڤاتا وەزیران نەدکرن و زێدەتر ژ وی رادێ بۆ ھاتیە دیارکرن ب فرۆتنا دەرمانان رادبوون و ئەڤ چەندە ژی بەروڤاژی رێنمایانە، دیسا ئەم شیاین دەست ب سەر چەندین دەرمانێن دەم ب سەرڤەچووی دا بگرین کو د ناڤ دەرمانخانەکێ دا بوون و ئەو دەرمانخانە ب کوژمەکێ پارەیی ژی ھاتە سزادان و بۆ ماوێ سێ رۆژان ژی ھاتە دائێخستن”.
ناڤھاتی زێدەتر گۆت: “لژنا تایبەت یا دووڤچوونا دەرمانخانە و کلینیکێن نۆشداری ل دووڤ بڕیارێن جڤاتا وەزیران بێ دیارکرنا ژڤانی سەرەدانا دەرمانخانە و کلینیکێن د ناڤ باژێرێ زاخۆ دا دکەت و ئەم شیاینە چەندین کلینکێن ھاریکارێن نۆشداری و دەرمانخانان سزا بدەین و دائێخین ژ ئەگەرێ پێگری نەکرنا وان ب رێنمایێن جڤاتا وەزیران.

ئەڤرۆنیوز، عەلی حاجی:
بەرپرسێ ئاواران ل قایمقامیا زاخۆ بۆ ئەڤرۆ نیوز دیار کر، ئەو خێزانێن ئاوارە یێ ل سنوورێ قەزا زاخۆ دژین، وان ب ھاریکاریا رێکخراوەکێ ھژمارەکا ھاریکاریان ل سەر بەلاڤکرن و دبێژیت: ئەم یێ بەرھەڤیان دکەین، داکو ژ روویێ ماددی ڤە ژی ھاریکاریا وان بھێتە کرن.
خەلات ئوسمانی، بەرپرسێ ئاواران ل قایمقامیا زاخۆ ئاشکرا کر، ژ بەرکو ل زڤستانا ئەڤ سالە ھژمارەکا زۆر یا وەلاتیان ل زاخۆ ژ ئەگەرێ دروستبوونا لەھیان ئاڤ چوو بوو د مالێن وان ڤە و زیان گەھشتبوونێ و گۆت: “مە ب رێیا نڤیسینگەھا بەرسڤدانا قەیرانان ھژمارەکا پێدڤیێن ناڤمالێ وەکو ھاریکاریێن دەستپێکی ل سەر ١١٥ خێزانان بەلاڤ کرن، دیسا مە ب ریێا نڤیسارەکێ ژی داخواز ژ رێکخراوەکێ کریە ھاریکاریێن ماددی ل سەر وان وەلاتیان بەلاڤ بکەت، ئەز ل وێ باوەرێ مە د دەمەکێ نێزیک دا ب کوژمەکێ پارەی ئەو وەلاتیە دێ ھاریکاریان وەرگرن”.

ئەڤرۆ نیوز، بارزان مزووری:
رێڤەبەرێ سەخبێری و پاراستنا رێک و پران ل پارێزگەھا دھۆکێ بۆ ئەڤرۆ نیوز دیار کر، ل دووڤ پلانا ھاتیە دارێژتن بۆ دوبارە نووژەنکرنا رێیێن پارێزگەھا دھۆکێ و یێن گوندێن سەر ب پارێزگەھێ ڤە، وان پێدڤی ب ١٠٠ ملیار دیناران ھەیە.
ئەندازیار دێولی حەمێ بریندار، رێڤەبەرێ سەخبێری و پاراستنا رێک و پران ل پارێزگەھا دھۆکێ خویا کر، ب درێژاھیا زێدەتری دو ھزار کیلۆمەتران رێ ل سنوورێ پارێزگەھا دھۆکێ پێدڤی ب نووژەنکرنێ نە و گۆت: “ئەم چاڤەڕێینە کانێ چەند بودجە بۆ نووژەنکرنا رێیێن پارێزگەھا دھۆکێ دێ ھێتە مەزاختن، ئەم ل دووڤ وێ بودجێ دێ ھێتە دەستنیشانکرن دێ شێین دەست ب نووژەنکرن و سەخبێریکرنا رێیێن پارێزگەھێ کەین و دووماھی رێ دێ یێن گوندان بن”.
ناڤھاتی گۆتژی: “ژ لایێ حوکمەتا بەغداڤە چو بۆ سەخبێریا رێک و پرێن پارێزگەھا دھۆکێ نەھاتیە کرن، ژ بەرکو رێیا سەرەکیا شێخان بۆ بەدریکێ د ناڤبەرا ھەردو ئیداران دایە، مە ڤەدیتن بۆ کریە کو ئەڤ رێیە دوبارە بھێتە دروستکرن”.
ئەندازیار دێولی حەمێ ئاشکرا کر، ئەڤە شەش سالە ژ بەر قەیرانا دارایی یا ب سەر ھەرێما کوردستانێ دا ھاتی سەخبێریەکا دروست بۆ رێیێن پارێزگەھا دھۆکێ نەھاتیە کرن، ژ بەرکو پلان و بودجە و پارێ گەشەپێدانا پارێزگەھان نەبوون، ب تنێ سەخبێریەکا بلەز و سڤک بۆ رێیێن سەرەکی دھاتە کرن، ژ بەرکو ھەکە پێنج سالا چ سەخبێریێن دروست بۆ رێیا نەھێنە کرن ئەڤ رێیە ب تمامی دێ ژ کارکەڤن.

ئەڤرۆ نیوز، رەمەزان ھەرنی:

ل شەڤێن ھەیڤا رەمەزانیا پیرۆز جودا ژ ھەموو وەرزان خوارنگەھێن دەمکی ل سەر جادان و عەرەبانان دھێنە دانان و وەلاتی ب رێژەکا باش خوارنێ لێ دخون، بەلێ ل ئاکرێ کارکرنا وان خوارنگەھا ھاتە قەدەغەکرن.

شەھاب یاسین، بەرپرسێ چاڤدێریا بازرگانی ل ئاکرێ بۆ ئەڤرۆ نیوز دیار کر کو ژ بەر بەرژەوەندیا گشتی و پاراستنا ساخلەمیا وەلاتیان لژنا تایبەت یا دوڤچوونا بازاری ل ھەیڤا رەمەزانێ کو ب سەرۆکاتیا قایمقامێ ئاکرێ یە و ب نوونەراتیا ھەر ئێک ژ (بنگەھێ چاڤدێرییا بازرگانی، پشکا پۆلیسێن ئاکرێ، سەرۆکاتیا باژێرڤانیا ئاکرێ، رێڤەبەریا گەشت و گۆزارا ئاکرێ و رێڤەبەریا ساخلەمیا ئاکرێ) بڕیار ھاتە دان خوارنگەھێن بێ مولەت بھێنە گرتن.

ناڤھاتی خویا کر کو ئەڤ لژنە ب شەڤ سەرەدانا چەند خارنگەھێن بێ مولەت دکەت ئەوێن ل سەر لێڤێن جادان و شوستەیان ھاتینە دانان ب تایبەتی ل جھێن گەشتوگۆزاری ھاتنە قەدەغەکرن و گۆت: “نابیت ژ ئەڤرۆ پێڤە ل شەڤێن ھەیڤا رەمەزانا پیرۆز ئەو خوارنگەھێن بێ مولەت خوارنێ بدەنە وەلاتی و گەشتیاران”.

ئەڤرۆ نیوز، لەزگین جوقی:

بەرپرسێ راگەھاندنا جڤاتا خۆدانێن قوربانیێن جینوسایدا شنگالێ دیار کر کو جڤاتەک بۆ کاروبارێن قوربانیێن کارەساتا شنگالێ بۆ کوردێن ئێزدی ژ ١٥ کەسان ھاتە پێک ئینان، ئەڤ جڤاتا دێ کارێ ھەماھەنگیێ د ناڤبەرا کەس و کارێن قوربانیێن جینوسایدا شنگالێ و دامودەزگەە و رێکخراوان دا کەت.

داود موراد خەتاری، بەرپرسێ راگەھاندنا جڤاتا خۆدانێن قوربانیێن کارەساتا شنگالێ بۆ ئەڤرۆ نیوز دیار کر کو ھەر بریارەکا د ناڤ ئێزدیان دا بھێتە دان گرێدایی کەسوکارێن قوربانیێن کارەساتا شنگالێ بیت دێ بۆچوونێن جڤاتێ ل سەر ھێنە وەرگرتن، چونکو ھەموو کەسێن د ناڤ جڤاتێ دا کەسوکارێن قوربانیان و رزگاربوویێن بن دەستێن تیرۆرستێن داعشێ نە و گۆت: “پلان ئەوە سەرەدانا جڤاتا بابە شێخ و جڤاتا پارێزگەھا نەینەوا بکەن و ل سەر بابەتێ ئاشتیبوونێ و چەکسازی کۆمبوونەکێ ئەنجام بدەن بۆ وێ چەندێ بێ دیتن و بوچوونا کەسوکارێن کارەساتا شنگالێ ھیچ پێنگاڤەک نەھێتە ھاڤێتن بۆ چاکسازی و ئاشتبوونێ دگەل عەرەبان، بەلکو دڤێت بوچوونا کەسوکارێن قوربانی و رزگاربوویان بھێتە وەرگرتن”.

ناڤھاتی ئەو ژی ئاشکرا کر کو پێدڤیە کەسوکارێن قوربانیان بریارێ بدەن کا چەوا سەرەدەری دگەل وان عەرەبان بھێتە کرن یێن کو ل ٣/٨/٢٠١٤ دگەل تیرۆرستێن داعش ھێرشی سەر قەزا شنگالێ کرین و بووینە داعش و رێخوشکەرێن تیرۆرستێن داعش.
ناڤھاتی ئاماژە دا وێ چەندێ کو ھەر بریارەک یان کارەکێ گرێدایی قوربانیێن جینوسایدا شنگالێ بھێتەکرن باشترە دگەل کەس و کارێن قوربانیان و رزگاربوویێن دەستی داعش شیرەتکاری بھێتەکرن، چونکو کەسێن بووینە قوربانی پتر د ئێش و ئازارێن خوە دگەھن، لەوڕا ئەڤ جڤاتە ھاتیە پێک ئینان ژ کەسوکارێن قوربانیان و رزگاربوویێن بن دەستێن تیرۆرستێن داعش و گۆت: “ئەڤ جڤاتە دێ چەندین پینگاڤێن باش بۆ خزمەتکرنا لێقەومایان و قوربانیێن جینوسایدا شنگالێ ھاڤێت”.

ئەڤرۆ نيوز:

بەرپرسێ راگەھاندنێ ل رێڤەبەریا گشتی يا ساخلەمیا پارێزگەھا دھۆکێ دیار کر کو ژ پێخەمەت بەرھەنگاریا مێش و مۆرا ل دەڤەرێ تیمێن ساخلەمیا دھۆکێ دەست ب رەشاندنا سەنگەرێن پێشمەرگێ کوردستانێ و ناڤ کەمپێن ئاواران و بازارێ دھۆکێ و چەندین جھێن دی یێن گشتی کر.

حەمزە رەزیکی، بەرپرسێ راگەھاندنێ ل رێڤەبەریا گشتی ساخلەمیا پارێزگەھا دھۆکێ دیار کر کو تیمێن رەشاندنێ یێن سەر ب پشکا کۆنترۆلکرنا نەخۆشیێن ڤەگر ل رێڤەبەریا کاروبارێن خوە پاراستنا ساخلەمیێ دەست ب ھەوەکا بەرەفرەە یا رەشاندنا دەرمانێ دژی مێش و مۆرا ل سەنگەرێن پێشمەرگێ کوردستانێ ل میحوەرێ مەحمودی و عێن عوێز و د ناڤ کەمپێن ئاواران و بازارێ دھۆکێ و چەندین جھێن گشتی دا کر و بۆ باسنیۆز گۆت: “ئەڤ ھەوا رەشاندنێ دێ یا بەردەوام بیت ھەتا چەند رۆژین دی دێ پتریا جە و دەڤەران ڤەگریت”.

ناڤھاتی ئاماژە دا وێ چەندێ کو چەندین جە و دەڤەرێن پارێزگەھا دھۆکێ ھەوا رەشاندنا دەرمانێ دژی مێش و مۆرا دھێتە ئەنجامدان ب مەرەما نەھێلانا مێش و مۆرا و پاراستنا ساخلەمیا وەلاتیێن پارێزگەھێ.