وه‌زاره‌تا به‌رگریا ئه‌مریكى داخوازا هنارتنا 120 هزار سه‌ربازان بۆ رۆژهه‌لاتا ناڤه‌راست دكه‌ت

14/05/2019 23:05

152

ئه‌ڤرۆ نیوز:

رۆژناما ( نیویۆرك تایمز) یا ئه‌مریكى به‌لاڤكر كو پاتریك شاناهان وه‌زیرێ به‌رگریێ ئه‌مریكا د كۆمبوونه‌كێ دا ل گه‌ل دۆنالد ترامپ سه‌رۆكێ ئه‌مریكا وهژماره‌كا شیره‌تكارێن ئاسایشا نیشتمانى یا ئه‌مریكى، پلانا خوه‌ یا له‌شكرى به‌رچاڤكر وداخوازكر 120 هزار سه‌ربازێن ئه‌مریكى بۆ رۆژهه‌لاتا ناڤه‌راست بهێنه‌ هنارتن.

رۆناما ناڤبرى به‌لاڤكر ژى كو به‌رپرسێن ئه‌مریكى یێن د ناڤ وێ كۆمبوونێ دا دیاركرن كو ئه‌ڤ چه‌نده‌ بۆ داگیركرنا ئیرانێ نینه‌ وره‌وش ڤێ چه‌ندێ دخوازیت.

ل دووڤ وێ رۆژنامێ پلان بۆ وێ چه‌ندێ هاتیه‌ دانان هه‌كه‌ د ده‌مه‌كى دا ئیران هێرشێ بكه‌یته‌ سه‌ر هیزێن ئه‌مریكى، یان ژى كار د وارێ چه‌كێ ئه‌تۆمى دا بكه‌ت.

فراكسیۆنا پارتى ل به‌غدا هوشداریێ دده‌ت

14/05/2019 22:29

1514

ئه‌ڤرۆ نیوز:

فراكسیۆنا پارتى دیموكراتى كوردستان ل په‌رله‌مانێ عیراقێ ل دۆر هێرشێن ل سه‌ر ده‌ڤه‌رێن په‌لكانه‌ وسه‌رگه‌ران هاته‌ ده‌نگ ود به‌یاننامه‌كێ دا داخواز ژ ده‌زگه‌هێن عیراقى دكه‌ت شاشیێن رژێما به‌عس دووباره‌ نه‌كه‌ن.

فراكسیۆنا پارتى ل په‌رله‌مانێ عیراقێ ئه‌ڤرۆ سێشه‌مبى 14/5/2019 به‌یاننامه‌ك دا ل سه‌ر پرسا گوهۆرینا دیموگرافیا كه‌ركووكێ وده‌ڤه‌رێن ده‌وروبه‌ر به‌لاڤكر وتێدا هاتیه‌” پرۆسا گوهۆرینا دیموگرافى هێشتا ل گوند وباژێركێن ب سه‌ر كه‌ركووكێ ژ لایێ پارێزگارێ كه‌ركووكێ وده‌ستهه‌لاتا له‌شكرى یا ده‌ڤه‌رێ یا به‌رده‌وامه‌ وب شێوه‌كێ دیار ژى ڤێ جارێ ل گوندێن په‌لكانه‌ وسه‌رگه‌ران و 16 گوندێن دى هاتیه‌ ئه‌نجامدان”.

فراكسیۆنا پارتى داخوازا ژ ده‌ستهه‌لاتدارێن به‌غدا كر شاشیێن رژێما به‌عس دووباره‌ نه‌كه‌ت ب تایبه‌تى كو نوكه‌ عیراق وده‌ڤه‌ر د ره‌وشه‌كا سیاسى یا هه‌ستیار دانه‌ ودیاركر” د ڤێ ره‌وشێ دا پێدڤی ئێكگرتنا جڤاكى وسیاسى بهێته‌ پاراستن، دستوور ژى بهێته‌ بجهئینان”.

زێده‌بارى وێ چه‌ندێ فراكسیۆنا پارتى ئه‌و روودانه‌ شه‌رمزاكرن وب كارێن شوفینى هژمارتن، هه‌ڤده‌م ئه‌ڤ كاره‌ ب گه‌فه‌كا رژد ل سه‌ر پێكڤه‌ژیانا ئاشتیانه‌ ل عیراقێ هژمارت ودووپاتكر كو پارتى دیموكراتى كوردستان بێده‌نگ نابیت ل به‌رانبه‌ر ڤان كاران وب شێوازێن دستوورى وقانوونى دێ ل گه‌ل خه‌لكێ گوند وباژێركێن كه‌ركووكێ راوه‌ستیت.

عيراق بزاڤا دروستكرنا هه‌يڤا ده‌ستكرد دكه‌ت

14/05/2019 21:55

211

ئه‌ڤرۆ نيوز:

حوكمه‌تا عيراقێ بزاڤا دروستكرنا هه‌يڤه‌كا ده‌ستكرد دكه‌ت وگۆژمه‌كێ پاره‌ى بۆ ڤێ مه‌ره‌مێ دێ ژ فره‌نسا قه‌ر كه‌ت.

ئه‌مير كينانى، بريكارێ وه‌زاره‌تا ڤه‌گوهاستنا عيراقێ راگه‌هاند كو حوكمه‌تا عيراقێ گۆژمه‌كێ پارى ژ فره‌نسا قه‌ركريه‌ بۆ دانانا ئاژانسا گه‌ردونناسى ودروستكرنا هه‌يڤا ده‌ستكرد وبۆ ڤێ مه‌ره‌مێ گرێبه‌سته‌ك ل گه‌ل كۆمپانيا (ئيرباس) يا فره‌نسى هاتيه‌ ئيمزاكرن”.

ئاماژه‌كر ژى كو دروستكرنا هه‌يڤا ده‌ستكرد يا عيراقى دێ خزمه‌تا بارێن ئه‌منى وئابوورى وپيشه‌سازى وچاندنێ وله‌شكرى ل عيراقێ كه‌ت”.

ل كوردستانێ مالپه‌رێن سكسى دێ هێنه‌ فلته‌ركرن

14/05/2019 21:11

1623

ئه‌ڤرۆ نيوز:

زێده‌تر ژ ژێده‌ره‌كى دووپاتيێ ل فلته‌ركرنا مالپه‌رێن سكسى ل هه‌رێما كوردستانێ دكه‌ن ول دۆر ڤێ چه‌ندێ نڤيسارا فه‌رمى هاتيه‌ ئاراسته‌كرن بۆ كۆمپانيان.

مه‌لا عه‌دبولا وه‌يسى، سه‌رۆكێ ئێكه‌تيا زانايێن ئاينێ ئيسلامێ ل كوردستانێ د داخۆيانيه‌كا رۆژنامه‌ڤانى دا گۆت” ژبۆ رێگرتنێ ل تێكچوونا بهايێن جڤاكى ل هه‌رێما كوردستانێ، مه‌ داخواز فلته‌ركرنا وان مالپه‌ران كريه‌”.

پرسيار كر ژى” چاوان چێ دبيت ل پتريا وه‌لاتان ئه‌و مالپه‌ره‌ د فلته‌ركرى بن، به‌لێ ل كوردستانێ د ڤه‌كرى بن؟”.

دياركر ژى” مه‌ داخوازه‌ك ئاراسته‌ى وه‌زاره‌تا ڤه‌گوهاستن وگه‌هاندنێ ل هه‌رێما كوردستانێ كريه‌ ل دۆر فلته‌ركرنا ڤان مالپه‌ران، وه‌زاره‌تا ناڤبرى ژى پێرابوونێن باش يێن ئه‌نجام داين”.

ئومێد محه‌مه‌د، په‌يڤدارێ وه‌زاره‌تا ڤه‌گوهاستن وگه‌هاندنێ ل هه‌رێما كوردستانێ د داخۆيانيه‌كا رۆژنامه‌ڤانى دا راگه‌هاند” بۆ فلته‌ركرنا وان سايت ومالپه‌ران، مه‌ نڤيساره‌ك ئاراسته‌ى كۆمپانيێن وارێ ئه‌نترنێتێ كريه‌”. به‌لێ په‌يڤدارێ وه‌زاره‌تێ چو پێزانين ل دۆر ژڤانێ فلته‌ركرنا وان مالپه‌ران ئاشكرا نه‌كرن”.

سوباهى مووچێ ڤان وه‌زاره‌تان دێ هێته‌ به‌لاڤكرن

14/05/2019 20:33

3029

ئه‌ڤرۆ نیوز:

بریاره‌ سوباهى چارشه‌مبى 15/5/2019 مووچێ هه‌ر ئێك ژ وه‌زاره‌تێن خواندنا بلند، داد، سامانێن سروشتى، ئه‌وقاف وكاروبارێن ئایینى، كار وكاروبارێن جڤاكى زێده‌بارى مووچێ كێمئه‌ندامان ژى دێ هێته‌ به‌لاڤكرن.

هونه‌رمه‌نده‌كا كورد وه‌غه‌ركر

14/05/2019 20:10

3060

ئه‌ڤرۆ نیوز:

هورنه‌مه‌نده‌كا شێوه‌كارى یا كورد ئه‌ڤرۆ سێشه‌مبى 14/5/2019 وه‌غه‌ركر.

به‌رپه‌رێ (گه‌له‌ریا شانه‌ده‌ر) ل سه‌ر تۆرا فه‌یسبووكێ به‌لاڤكر” دلپاك سه‌عید ئه‌ڤرۆ وه‌غه‌ركر”.

دلپاك سه‌عید چه‌ندین ساله‌ دوارێ هونه‌رێ شێوه‌كارى دا كار دكه‌ت وچه‌ندین پاشانگا بۆ كارێن وێ هاتینه‌ ڤه‌كرن.

وه‌زاره‌تا دارایى رۆهنكرنه‌كێ به‌لاڤ دكه‌ت

14/05/2019 20:02

2487

ئه‌ڤرۆ نیوز:

ل دووڤ نڤیساره‌كا وه‌زاره‌تا دارایى وئابوورى ل هه‌رێما كوردستانێ، تێدا رۆهنكرنه‌ك ل دۆر خانه‌نشینكرنا خودان پلێن بلند به‌رچاڤكر.

د وێ نڤیسارا وه‌زاره‌تا دارایى دا كو هاتیه‌ ئاراسته‌كرن بۆ هه‌موو رێڤه‌به‌ریێن گشتى یێن ب سه‌ر وه‌زاره‌تان ڤه‌، تێدا ئاماژه‌ ب وێ چه‌ندێ هاتیه‌ كرن كو ده‌قێ دویێ ژ قانوونا خانه‌نشینا خودان پلێن بلند یا هژمار 36 ل سالا 2004، گه‌له‌ك یا رۆهن وئاشكرایه‌ وپێدڤى ب چو شرۆڤه‌كرنان ناكه‌ت وپێدڤیه‌ وه‌كو خوه‌ بهێته‌ بجهئینان، ئانكو هه‌كه‌ فه‌رمانبه‌رێ پله‌ بلند ژیێ وى 64 سال بیت، دێ هێته‌ خانه‌نشین كرن.

ل دووڤ گشتاندنه‌كا سه‌رۆكاتیا جڤاتا وه‌زیران كو ب نڤیسارا هژمار 4302 ل 4/10/2017 ده‌رچووى وهاتیه‌ ئاراسته‌كرن بۆ هه‌موو وه‌زاره‌تان وتێدا ئاماژه‌ كریه‌ كو فه‌رمانبه‌رێ پله‌ بلند به‌رى ژیێ وى بگه‌هیته‌ 65 سالیێ، كارێن خانه‌نشینبوونێ بۆ بهێنه‌ ئه‌نجامدان، به‌رۆڤاژى وێ چه‌ندێ لایه‌نێ كارگێرى یێ په‌یوه‌ندیدار دێ به‌رپرسیار بیت.

خانه‌نشینكرنا خودان پلێن بلند هه‌ر ئێك ژ بریكارێ وه‌زاره‌ت، پارێزگار، راوێژكار، رێڤه‌به‌رێ گشتى، شاره‌زا، سه‌رۆك وئه‌ندامێن ئه‌كادیمیا كوردى، سه‌رۆكێ زانكۆ.

ناحیا كانی ماسێ‌ 40% ژ مین و تەقەمەنیان هاتیە پاقژكرن

14/05/2019 19:15

ئەڤرۆ نیوز ، زنار تۆڤی:

ل گوندێ‌ باتیفا سەیدا زەڤیەكا مینرێژكری یا ل سەر دەمێ‌ رژێما بەعس ژ مین و تەقەمەنیان هاتە پاقژكرن و د رێورسمەكێ‌ دا ل ئاڤاهیێ‌ ناحیا كانی ماسێ‌ ئەو زەڤیە بۆ خودانێ هاتە رادەست كرن.

سەربەست سەبری ئاكرەیی، رێڤەبەرێ‌ ناحیا كانی ماسێ‌ بۆ ئەڤرۆ نیوز گۆت: 6 هزار و 458 میترێن چارگۆشە یێن زەڤی و رەزان ژ مین و تەقەمەنیان ژ ئالیێ‌ رێكخراوا ” ئێم ئەی جی” ب هەماهەنگی ل گەل دەزگەهێ‌ مینا ل دهۆكێ‌، ل گوندێ‌ باتیفا سەیدا ل ناحیا كانی ماسێ‌ هاتینە پاقژكرن و ئەو زەڤیە بۆ خودانان هاتە رادەست كرن، كو ئەڤە چەند سال بوون خودانێن وان زەڤی و رەزان نە دشیان كارێ‌ چاندنێ‌ تێدا بكەن و هەروەسا ئەو زەڤی و رەزە نێزیكی گوندی ژی بوون.

زێدەتر گۆت: دەڤەرا كانی ماسێ‌ دەڤەرەكا سنووریە و ژ ئەنجامێ‌ شەرێ‌ عیراقێ‌ و دیسا شەرێ‌ پەكەكێ‌ ژی گەلەك مین و تەقەمەنی ل ڤێ‌ دەڤەرێ‌ هاتینە دانان و هەتا نوكە 40% ژ وان مین و تەقەمەنیان هاتینە راكرن و پاقژكرن، لێ‌ دیسا ژی هەتا نوكە 60% ماینە نەهاتینە پاقژكرن.

عەبدولعەزیز عەبدلغەفۆر موختارێ‌ گوندێ‌ باتیفا سەیدا گۆت: ئەو گەلەك د دلخۆش بوون، كو ئەو زەڤیا مینرێژكری هاتیە پاقژكرن و بۆ خەلكێ‌ گوندی هاتیە رادەست كرن، چونكی ئەو زەڤی یا نێزیكی گوندی بوو، دیسا جهەكێ‌ ب مەترسی بوو ل سەر ژیانا خەلكێ‌ گوندی، لێ‌ پشتی هاتیە پاقژكرن ئێدی ئەو مەترسی نەمایە، هەروەسا ئەو دێ‌ شێن جارەكادی كارێ‌ چاندنێ‌ د وێ‌ زەڤیێ‌ دا كەن.

عه‌بدولمه‌هدى: ئه‌مريكا وئيران شه‌رى ناكه‌ن

14/05/2019 19:02

267

ئه‌ڤرۆ نيوز:

سه‌رۆك وه‌زيرێن عيراقێ عادل عه‌بدولمه‌هدى ئه‌ڤرۆ سێشه‌مبى 14/5/2019 راگه‌هاند، ئيران وئه‌مريكا شه‌رێ هه‌ڤدو ناكه‌ن.

عه‌بدولمه‌هدى گۆت ژى” ئه‌مريكا وئيران ناخوازن شه‌ر روو بده‌ت وعيراق ژى دبزاڤان دايه‌ بۆ لێكگه‌هه‌شتنا وان هه‌ردو وه‌لاتان”.

دياركر ژى” ئه‌مريكا وئيران نه‌يارێن هه‌ڤدو نينن، به‌لێ هه‌ر ئێك ب ئاراسته‌كى دا هه‌ڤپه‌يمانێن سه‌ره‌كى يێن عيراقێ نه‌، له‌وما به‌غدا دخوازيت رۆل هه‌بيت د كێمكرنا گرژى د ناڤبه‌را وان هه‌ردو وه‌لاتان دا”.

فره‌نسا: به‌رده‌وام دێ هاریكاریا هه‌رێما كوردستانێ و پارێزگه‌ها دهۆکێ كه‌ین

14/05/2019 15:03

ئەڤرۆ نیوز:

ئه‌ڤرۆ 14/5/2019 ل كوچكا مێڤانداریا فه‌رهاد ئه‌مین ئه‌تروشى پارێزگه‌رێ دهوكێ پێشوازیا (دومینیك ماس ) قونسلێ وه‌لاتێ فره‌نسا ل هه‌رێما كوردستانێ كر.
دهه‌ڤدیتنه‌كێدا به‌حسێ په‌یوه‌ندیێن هه‌رێما كوردستانێ دگه‌ل حكومه‌تا فره‌نسا ژلایێ سیاسى وئابورى وله‌شكرى هاته‌ كرن.
دته‌وه‌ره‌كێ دن دا به‌حسێ ره‌وشا ده‌ڤه‌رێ و سه‌روبه‌رێ ئاواره‌ و په‌نابه‌را و ئه‌و هاریككاریێن پارێزگه‌ها دهوكێ ورێكخراوێن نیڤ ده‌وله‌تى پێكێش دكه‌ن هاته‌ كرن.
پارێزگه‌رێ دهوكێ دیار كر كو هه‌بونا رێژه‌كا مه‌زن یا ئاواره‌ وپه‌نابه‌ران ل پارێزگه‌هێ بارگرانیه‌كا مه‌زن ئێخستیه‌ سه‌ر هه‌موو سه‌كته‌رێن خزمه‌تكارى مینا خزمه‌تكاریێن په‌روه‌ردێ وساخله‌میێ وپروژێن ئاڤێ ورێك وئه‌لكتریكى و…هتد وخواست كو حكومه‌تا فره‌نسا وجڤاكێ نیڤده‌وله‌تى به‌رده‌وامیێ بده‌نه‌ هاریكاریكرنا ئاواره‌ وپه‌نابه‌ران ل سنورێ پارێزگه‌هێ و سوپاسیا وى وه‌لاتى كر بو وێ پشته‌ڤانیا به‌رده‌وام یا بو هه‌رێما كوردستانێ دكه‌ن .
ژلایێ خوڤه‌ قونسلێ فره‌نسا ده‌ست خوشى ل پارێزگه‌ها دهوكێ و حكومه‌تا هه‌رێما كوردستانێ كر بو حه‌واندنا وێ رێژا زور یا ئاواره‌ و په‌نابه‌ران وته‌كه‌زكر كو فره‌نسا به‌رده‌وام دێ هاریكاریا هه‌رێما كوردستانێ وئاواره‌ وپه‌نابه‌ران كه‌ت.
بریاره‌ قونسلێ وه‌لاتێ فره‌نسا سه‌را چه‌ند كه‌مپێن ئاواره‌یان بده‌ت وژنێزیك هایدارى ره‌وشا وان ببیت.

نيشاندان 1...740741742 1,740 2,740...2,758 زێده‌تر

لاپه‌ر 741 ژ 2,758