ئه‌ڤرۆ نیوز:
رێڤه‌به‌ریا په‌روه‌ردا قه‌زا كۆیه ب سه‌ر پارێزگه‌ها هه‌ولێرێ ڤه راگه‌هاند، سوباهى دوشه‌مبى 1/4/2019 ل هه‌موو ناڤه‌ندێن خواندنێ ل سنوورێ قه‌زا كۆیه بێهنڤه‌دانا فه‌رمى یه.
رێڤه‌به‌ریا ناڤبرى دیاركر” ژبه‌ر تێكچوونا پتریا رێیان وژبۆ سلامه‌تیا زێده‌تر یا قوتابى ومامۆستایان ووه‌لاتیێن سنورێ كۆیه، سوباهى رۆژا دوشه‌مبى بێهنڤه‌دانا فه‌رمى یه ل هه‌موو ناڤه‌ندێن خواندنێ ل كۆیه”.
دیاركریه ژى” ئه‌و بێهنڤه‌دانه دیوانا په‌روه‌ردا قه‌زا كۆیه ب خوه‌ڤه ناگریت وسوباهى ده‌واما ئاسایى یه”.
ئەڤرۆ نیوز، زنار تۆڤی:
کلارا عودیشۆ یەعقۆب نوونەرا گەلێ کلدانی سریانی ئاشۆری ل پەرلەمانێ کوردستانێ بۆ ئەڤرۆ نیوز گۆت: ئەكیتو نوو بوونا ژیانێ و ھیڤی و سەركەفتن و خوراگرتن و پێكڤەكاركرنێ ژبۆ گەھەشتنا ئارمانجێ، ئەكیتو، ئانكو ژیانەكا ئارام پری سەركەفتن، بەری ھزاران سالان مرۆڤان بزاڤکریە ژیانا خو رێكبێخیت و كار بكەت بۆ بەردەوام بوونا ژیانێ، گەلێ كلدانی سریانی ئاشووری ژی ئەڤ ھەولدانە كرینە و شارستانیەكا مەزن ئاڤاكریە و لدووڤ ژێدەر و ڤەكۆلینین مێژوویی ل سالا ٤٧٥٠ بەری زاینی ئاشووریا سەر سالا خوە یا نوو و ب رێورەسمێن تایبەت گێرایە، بناڤێ ئەكیتو بوویە، ئانكو نوو بوونا ژیانێ و ئەڤ سالە دێ بیتە سالا ٦٩٦٧ی و لدووڤ ھزر و ڤەكولینێن زانا و گەردون ناسێن بابلی ل ٢١/ئادارێ لدووڤ رۆژناما زاينى و 1/نيسانێ لدووڤ يا بابلى يا كەڤن گوهۆرینا گەش و ھەوا دبیت و شەڤ و رۆژ یەكسان دبن وەسا گەش و ھەوا بەرەڤ گوهۆرینێ دچیت و پلا گەرماتیێ زێدە دبیت و وەرزەكێ نوو بۆ چاندنێ ژی دەست پێدكەت و د ھزرا وان دا ئەگەری ئەڤێ گوھۆرینێ خوداوەندە دەمێ خوداوەنی گەردونی مردوخ ژ ئاسمانی دھێتە خوار و شەرێ خوداوەندێ خرابیێ دكەت و ھەولدەت بگەھیتە خوداوەندا جانیێ و نەزوكیێ خوداوەند عشتار و ژ ئەنجامێ ئەڤ ھەڤژینیە عەرد جارەكا دى كەسك دبيت و روەك شين دبيت.
هەروەسا گۆت: ژيان جارەكادى ڤەدگەريتە ڤە و بەرەكەت ل دونيايى بەلاڤەدبيت ، و ژبەر ھندى جەژنا ئەكيتو دھاتە كرن و بۆ ماوێ ١٢رۆژان بەردەوام دبۆ، چونكە زانستنڤان و فەلەكناسێن بابلى يێن كەڤن شياينە سال دابەش بكەن بۆ ١٢ ھەيڤ و ٤ وەرز د سالى دا و ھەر وەرزەك بۆ خوداوەندەك دھاتە تەرخان كرن بۆ نمونە بھار بۆ خوداوەندى مەزن بناڤى مەردوخ و ھاڤين بۆ خوداوەند ننورتا كو يى بايى باشوورى يە و پايز بۆ نابۆ خوداوەندى زانين و زانستى و زفستان بۆ خوداوەند نرگال یێ مرنێ و جیھانا بن ئەردی ودابەشکرنا سالێ دا بزانن کەنگی وەرزێ گونجای بو چاندنێ کەنگی یە بۆ وەسا ل ٢١/٣لدیف روزناما زاینی و ١/٤ لدووڤ رۆزناما بابلی یا کەڤن ھاتە دانان سەری سالا وی و بۆ جەژنەکا نەتەوەیی و ئاینی چونکی گەل ھەمو بەشداردبوو و ھەروەسا خوداوەند و کاھنا درێورەسمێن ئەکیتو و روژێن دەسپێکی رێورەسمێن تایبەت ھەبون کو کاھن بەحسێ چاوایا چێبونا گەردونی و مرۆڤی بۆ ئامادەبوویان دکر و پێشکێشکرنا قوربانان و پیرۆزکرنا ئاڤا روویبارێ دیجلە و روژێن دی بۆ شاھیێ دھاتە تەرخان کرن کو بەحسێ باردۆخێ سیاسی و دانانا قانوونان و چاوانیا رێڤەبرنا کاروبارێن دەولەتی دکر و بەراوردکرنا سیستەمێ سیاسی یێ سەرکەفتی و سیستەم و دەسەلاتا نە ئارام و چاوا کارتیکرنا ڤان ھەردو سیستەمان لسەر ژیانا خەلکی و جڤاکی و ل رۆژا دوماھیێ خرڤەبوونەکا مەزن ژ گەلێن دەولەتی و رێپڤانەکا مەزن دھاتە کرن و ئاھەنگ و کەرنەڤالەکێ مەزن دھاتە رێکخستن و خوداوەند ھەموو ئێکگرتن دکرن بو خوداوەندێ مەزن مردوخ و دھزروبیرین وان دەمێ مللەت و گەل ھەست بخوشیێ و ئارامیێ دکەت ل وی دەمی خوداوەند ژی دی یێ کەیف خۆش و ئارام بیت.
ئەو ژی دیار کر: داخوازێ ژ حکومەتا کوردستانێ دکەم ئەڤ جەژنە ببیتە بھێنڤەدانا فەرمی و گشت پێکھاتێن کوردستانێ و ھەروەسا ھەموو ئەو کەیس و داخوازی و گرفتین دەربارەی گەلێ مە بھێنە چارەکرن.
پیروزباھێین خو ئاراستەیێ ھەمی کوردستانیا دکەم بگشتی و گەلێ کلدانی سریانی ئاشوری بتایبەتی و ئەڤ چەژنە ببیتە پالدەرک بو ژیانەکا نوی پری ھێز و خوراگرتن و ئێک بون و ئاشتی و بەلاڤەکرنا گیانێ پێکڤە ژیانێ و ئاڤاکرنا کوردستانەکا بھێز و دروستکرنا پاشەرۆژەکا گەش بۆ ھەموو پێکھاتێن کوردستانێ.
ئه‌ڤرۆ نیوز:
سه‌رۆك وه‌زیرێن هه‌رێما كوردستانێ، نێچیرڤان بارزانى ئه‌ڤرۆ ئێكشه‌مبى 31/3/2019 پێشوازى ل فه‌خرى كه‌ریم سه‌رۆكێ ده‌زگه‌هێ مه‌دا یێ رۆژنامه‌ڤانى وره‌وشه‌نبیرى وهونه‌رى كر.
د دیداره‌كێ دا دووماهى پێشهاتێن مه‌یدانا عیراقێ وكوردستانێ وپێدڤیا به‌رده‌وامیا بزاڤان بۆ ئێكخستنا هه‌لویستێ هێز ولایه‌نێن سیاسى یێن كوردستانى ب مه‌ره‌ما پشكداریا هه‌موویان د بده‌ستڤه‌ئینانا ئارمانجێن هه‌ڤپشك.
د پشكه‌كا دى یا دیدارێ دا، گرنگیا به‌رده‌وامیا گاڤ وبزاڤێن ئه‌رێنى یێن سه‌ركردایه‌تیا هه‌رێما كوردستانێ وحوكمه‌تا وێ بۆ زیندیكرنا په‌یوه‌ندیێن د ناڤبه‌را هه‌رێمێ وحوكمه‌تا فیدرال د چارچۆڤێ دستوورى دا و دووپاتى ل سه‌ر وان هه‌موو فاكته‌رێن دبنه ئه‌گه‌رێ چه‌سپاندنا بنه‌مایێ راست ودروست یێ په‌یوه‌ندیێن هه‌ردولا هاته كرن.
ئه‌ڤرۆ نیوز:
پارێزگه‌رێ دهۆكێ ب هه‌لكه‌فتا هاتنا سه‌ر سالا نوو یا ئاشوری (ئه‌كیتو) په‌یامه‌كا پیرۆزباهیێ به‌لاڤكریه و ئه‌ڤ هه‌لكه‌فته ل وان پیرۆز كریه.
ئه‌ه ده‌قێ په‌یامێ یه:
ب هه‌لكه‌فتا هاتنا سه‌ر سالا نووی (6769)یا ئاشوری (ئه‌كیتو)، ب ناڤێ كارگێریا پارێزگه‌ها دهوكێ پیروزباهیان ئاراسته‌ی هه‌موو برا وخویشكێن مه‌سیحی ل پارێزگه‌ها دهوكێ وهه‌رێما كوردستانێ وجیهانێ دكه‌ین ، هیڤی دارین سالا نوو یا ئاشوری ببیته هه‌لكه‌فتا خێر وخوشی وته‌ناهیێ و ڤه‌گه‌ریانا ئاواره‌یان بو سه‌ر جه و وارێن خو.
هه‌روه‌سا ئومێده‌وارین گیانێ پێكڤه ژیانێ دناڤبه‌را هه‌موو پێكهاتێن ده‌ڤه‌رێ دا پتر بهێته موكومكرن وهه‌موو ئول ونه‌ته‌وه سه‌ر سال وهه‌لكه‌فتێن خو ب ته‌ڤایی و ئازادی بگێرن …
دوباره سه‌ر سالا نووی یا ئاشوری ئه‌كیتو ل هه‌مییان پیروزبیت.
فه‌رهاد ئه‌مین ئه‌ترووشی
پارێزگه‌رێ دهۆكێ
31-3-2019
ئه‌ڤرۆ نیوز:
ئێكه‌تیا قوتابیێن كوردستانێ راگه‌هاند، ئه‌م دبزاڤێن خوه دا دبه‌رده‌وامین بۆ ڤه‌گه‌راندنا ده‌رمالا قوتابیان وئه‌م ل گه‌ل مافێن قوتابیانه.
سەنگین ئەحمەد، بەرپرسێ کاروبارێن ئێكه‌تیا قوتابیێن كوردستانێ گۆت” نوكه ئه‌م یێ كارى بۆ ڤه‌گه‌راندنا ده‌رمالا قوتابیان دكه‌ین ودبزاڤێن خوه دا ل گه‌ل جڤاتا وه‌زیران ووه‌زاره‌تا دارایى ووزاره‌تا خواندنا بلند د به‌رده‌وامین، به‌لێ حوكمه‌ت به‌حس ل وێ چه‌ندێ دكه‌ت كو نوكه پیچه‌ك بارێ ئابوورى یێ باش بووى وپاشكه‌فت نه‌مایه، هه‌روه‌سا ل داهاتى دا دێ مژوولى وێ چه‌ندێ بین كو ده‌رمالا قوتابیان ڤه‌گه‌رینین”.
ئه‌ڤرۆ نیوز:
ل رۆژا چارشه‌مبیا داهاتى 3/4/2019 پیشانگه‌ها هه‌ولێر یا نێڤده‌وله‌تى بۆ په‌رتۆكێ دێ هێته ڤه‌كرن وتێدا ئێك ملیۆن ناڤه‌نیشانێن جۆرا وجۆر دێ تێدا هێنه به‌رچاڤكرن.
ئه‌ڤرۆ ئێكشه‌مبى 31/3/2019 پیشانگه‌ها هه‌ولێر یا نێڤده‌وله‌تى د به‌یاننامه‌كێ دا به‌لاڤكر كو ل رۆژا چارشه‌مبیا داهاتى پیشانگه‌ها هه‌ولێر یا نێڤده‌وله‌تى یا 14 بۆ په‌رتۆكێ دێ هێته ڤه‌كرن.
دیاركر ژى”د ڤێ پیشانگه‌هێ دا 300 ده‌زگه‌هێن چاپ وبه‌لاڤكرنێ د پشكدارن وئێك ملیۆن ناڤونیشانێن جۆرا وجۆر تێدا دێ هینه به‌رچاڤكرن ودێ بۆ ده‌مێ 10 رۆژان یا به‌رده‌وام بیت”.
خویاكر” په‌رتۆكێن 21 وه‌لاتان دێ هێنه به‌رچاڤكرن و40 چالاكیێن جۆرا وجۆر دێ هێنه ئه‌نجامدان”.
ئه‌ڤرۆ نیوز:
سه‌رۆك وه‌زیرێن هه‌رێما كوردستانێ، نێچیرڤان بارزانى ئه‌ڤرۆ ئێكشه‌مبى 31/3/2019 پێشوازى ل نانسى لینبۆرك سه‌رۆكا په‌یمانگه‌ها ئه‌مریكى بۆ ئاشتیێ وشانده‌كێ دگه‌لدا كر.
شاندێ مێهڤان خوه‌شحالیا خوه ب سه‌ره‌دانا هه‌رێما كوردستانێ ده‌ربرى وسوپاسیا هاریكاریێن حوكمه‌تا هه‌رێمێ كر بۆ كار وچالاكیێن نڤیسینگه‌ها وان وپێشوازیكرن ل هژماره‌كا مه‌زن یا ئاواره وپه‌نابه‌رێن شه‌رێ داعشێ، هه‌روه‌سا دووپاتى ل وێ چه‌ندێ كر كو ل گه‌ل حوكمه‌تا هه‌رێمێ دێ دهه‌ڤكاربن بۆ دروستكرنا باوه‌ریێ ل وان ده‌ڤه‌رێن ئاواره ژێ هاتین ودلته‌نگیا خوه دیاركر بۆ نه‌زه‌ڤرینا وان ژئه‌گه‌رێ نه‌بوونا ئێمناهیێ وخزمه‌تگوزاریان ل ده‌ڤه‌رێن وان ول دۆر ڤێ چه‌ندێ دانوستاندنه‌كا رژد د ناڤبه‌را ده‌زگه‌هێن حوكمه‌تێ وخه‌لكێ ده‌ڤه‌رێ ب پێدڤى زانى.
نێچیرڤان بارزانى سوپاسیا وێ سه‌ره‌دانێ كر ودیاركر كو حوكمه‌تا هه‌رێمێ هه‌موو بزاڤان دكه‌ت بۆ دروستكرنا باوه‌ریێ ودانوستاندنێ د ناڤبه‌را پێكهاتێن جودا جودا ب مه‌ره‌ما ڤه‌گه‌راندنا وان وپێشكێشكرنا خزمه‌تگوزاریان.
سه‌رۆك وه‌زیرێن هه‌رێمێ پوخته‌ك ده‌رباه‌ى پرۆسا سیاسى ل عیراقێ وبزاڤێن دروستكرنا په‌یوه‌ندیه‌كا باش د ناڤبه‌را حوكمه‌تا عیراقێ وهه‌رێما كوردستانێ پێشكێشكر كو ژئه‌نجامێ وێ چه‌ندێ هژماره‌كا كێشان هاتنه چاره‌كرن ول داهاتى ژى دا ل سه‌ر كێشێن دى دانوستاندن دێ هێته كرن، هه‌روه‌سا ئاماژه ب بزاڤێن پێكئینانا كابینا نوو یا حوكمه‌تا هه‌رێما كوردستانێ كر ودیاركر كو بزاڤه‌كا رژد د ناڤبه‌را لایه‌نان یا هه‌ى ب مه‌ره‌ما پێكئینانا كابینا نوو د داهاتیه‌كێ نێزیك دا.
ئه‌ڤرۆ نیوز:
جڤاتا پاریزگه‌ها هه‌ولێرێ نڤیساره‌ك بۆ دوباره هنارتنا پرۆژێ ڤه‌گه‌راندنا پاشكه‌فتێ مووچێ فه‌رمانبه‌ران به‌رهه‌ڤكریه وئه‌ڤرۆ ئێكشه‌مبى 31/3/2019 دێ ئاراسته‌ى حوكمه‌تا هه‌رێما كوردستانێ وپاشى په‌رله‌مانێ كوردستانێ كه‌ت.
خانزاد مام وه‌سو، جێگری سەرۆکێ لژنا دارایی ل جڤاتا پارێزگه‌ها ھەولێرێ ئاشکرا کر” پشتى كو ل حه‌فتیا بۆرى جڤاتا پارێزگه‌ها هه‌ولێرێ كۆمبوونا خوه ئه‌نجامداى وبریار داى دوباره پرۆژێ ڤه‌گه‌راندنا پاشكه‌فتێ مووچێ فه‌رمانبه‌ران ئاراسته‌ى حوكمه‌تێ بكه‌ت ژبه‌ر باشبوونا ره‌وشا ئابوورى یا هه‌رێما كوردستانێ، ئه‌ڤرۆ ل جڤاتا پارێزگه‌ها هه‌ولێرێ نڤیسار یا هاتیه به‌رهه‌ڤكرن وب رێیا وه‌زاره‌تا دارایى وئابوورى دێ هێته ئاراسته‌كرن بۆ حوكمه‌تێ، بۆ وێ چه‌ندێ كار ل سه‌ر بكه‌ت”.
جێگرا سه‌رۆكێ لژنا دارایى ل جڤاتا پارێزگه‌ها هه‌ولێرێ زێده‌تر بۆ مالپه‌رێ فه‌رمى یێ پارتى دیموكراتى كوردستان گۆت” پرۆژه ڤه‌گه‌راندنا پاشكه‌فتا مووچێ فه‌رمانبه‌ران، ژبلى حوكمه‌تێ، دێ هێته ئاراسته‌كرن بۆ په‌رله‌مانێ كوردستانێ ژى تاكو ل په‌رله‌مانى ببیته قانوون وحوكمه‌ت بهێته پێگیریكرن ب ڤه‌گه‌راندنا پاشكه‌فتێ مووچێ فه‌رمانبه‌ران، چونكى ئه‌ڤه مافێ فه‌رمانبه‌رێن هه‌رێما كوردستانێ وپێدڤیه بهێته دان”.
ل دووڤ وى پرۆژێ جڤاتا پارێزگه‌ها هه‌ولێرێ، پێدڤیه حوكمه‌تا هه‌رێما كوردستانێ هه‌یڤانه ل گه‌ل مووچه‌ى، گۆژمه‌كێ پارێ پاشكه‌فتكرى بۆ فه‌رمانبه‌ران ڤه‌گه‌رینیت وئه‌و قه‌رزێن حوكمه‌تێ ژى ل سه‌ر فه‌رمانبه‌ران ژ پاشكه‌فتێ مووچێ وان بهێته كێمكرن”.
ل دووڤ پێزانینان، د ده‌مێ سالێن قه‌یرانا دارایى دا ل هه‌رێما كوردستانێ، حوكمه‌ت ب حه‌فت مووچێن تمام و33 مووچێن پاشكه‌فتكرى یێن فه‌رمانبه‌ران یا قه‌رداره.
ئەڤرۆ نیوز:
ئەڤرۆ ٣١-٣-٢٠١٩ ل سەلاحەدین سەرۆک مەسعود بارزانی دگەل ریاز ساری سەرۆکێ حزبا تورکمان ئێللی کومبوو.
د ڤێ کومبوونێ دا دووپاتی ل سەر کارکرن پێخەمەت پێکڤەژیان و برایەتیێ کر، ریاز ساری سوپاسیا ھەلویستێن سەرۆک مەسعود بارزانی کر و پشتەڤانیا وی بۆ مافێن پێکھاتەیا تورکمانا د قوناغێن جودا دا.
د لایەکێ دی یێ ڤێ کومبوونێ دا تەکەست ل سەر لێکتێگەھشتن ژ هه موو لایان ڤە بۆ چارەسەرکرنا کێشەیان دیسان دەبارەی کێشەیێن پارێزگەھا کەرکووکێ ژی تەئکید ل سەر وێ چەندێ ھاتە کرن کو پێدڤیە ئەڤ پارێزگەھە بیتە نموونەیا پێکڤەژیانا ھەموو ئایین و مەزھەبان و خەلکێ کەرکووکێ ب خوە ژی ئیدارەیا ڤێ پارێزگەھێ بکەن.
ئەڤرۆ نیوز:
ب هەلکەفتا سەرێ سالا نوو یا بابلی کلدانی سریانی ئاشووری سەرۆک مەسعود بارزانی پەیامەک بەلاڤ کر ئەڤە ژی دەقێ پەیامێ یە.
ب ناڤێ خودێ مەزن و دلۆڤان
ب هەلکەفتا سەرێ سالا نوو یا بابلی کلدانی سریانی ئاشووری و جەژنێن ئەکیتۆ سلاڤێن گەرم ئاراستەی برایێن ئاشووری سریانی کلدانی ل کوردستانێ و عیراقێ دکەم. هێڤیا شادی و بەختەوەریێ بۆ وان دخوازم.
ب ڤێ هەلکەفتێ جارەکا دی رژدیا خوە بۆ کەلتورێ پێکڤەژیانێ ل کوردستانێ دوپات دکەین و ب تایبەتی ژی خوشک و برایێن مە یێن مەسیحی دڤێت باش بزانن کو کوردستانێ وەلاتێ وانە و نابیت جهێ باب و باپیرێن خوە بهێلن، پێدڤیە ئەم هەموو پێکڤە وەلاتێ خوە پێشڤە ببەین.
هێڤیدارم ئاوارە و پەنابەر ل مووسل و دەڤەرێن دی جارەکا دی ڤەگەرنە ڤە سەر مال و جهێن خوە، هێڤیدارم سالا هەوە یا نوو ب خێر و خوەشی دەرباز بیت و هەموو جەژنێن هەوە ب ئارامی دەرباز بن.
مەسعود بارزانی
٢٠١٩/٣/٣١
نيشاندان