ئەڤرۆ نیوز، نەوزاد ھلۆری:

دەما چەند روژایە جورە کرمەکا بھاری بەردایە ناڤا مال و چاندا حەفت گوندێن سنوورێ قەزا بەردەرەش و کارتێکرنێن زور لسەر کریە، وەلاتی ددەن دیارکرن کو ئەگەر چارەسەری بو نەھێتەکرن دێ چنە دناڤا خوارنێ ژی دا.

شێرزاد ئەمجەد، موختارێ گوندێ قادسیا بچوک بۆ ئەڤرۆ نیوز گۆت: (ئەڤە پتری 12 رۆژە جورە کرمەکێ بھاری بەردایە ناڤا مال و کولان و چاندنا گوندێ مە و ھژمارەکا زور ژ گوندێن دەروبەرێ مە، ھەر جھەکێ ئەڤ کرمە گەھشتێ پیچ دکەت).

زێدەتر گۆت: (ھەتا نوکە مە چەند جارەکا ب دەرمانی رەشاندیە، بەلێ پشتی چەند دەمژمێرەکا جارەکا دی، دێ دووبارە پەیدا بن ڤە، کارتێکرنەکا زور لسەر چاندن و دەرامەتێ مەکریە ب گشتی ھەر کەسکاتیەکێ ببینن دچن سەرێ و دخون، ئەگەر ئەم رۆژانە ژ ناڤ نەبەین و نەکوژن دێ ھێنە د ژورڤە و چنە دناڤ خوارنێ ژی دا، ژبەرڤێ ئەم داخوازێ دکەین کو ھاریکاریێن بلەز بھێنەکرن داکو ئەم ژی بشێن ژ ڤان کرمان خلاس بین چونکی نوکە رەمەزانە و مرۆڤ ماندودبیت ب دەست ڤان کرمان).

ژلایەکێ دنڤە، زوبێر حەسەن، ئەندازیارێ چاندنێ ل بارا ئەڤ جورێ کرمی بۆ ئەڤرۆ نیوز گۆت: (ئەڤ کرمە ئێکە ژ کرمێن بھاری و رەنگێن جوداجودا ھەنە، بەلێ پرانیا وان رەنگەکێ تێکەل ژ زەری ھەیە، ل بھاران دەردکەڤیت و پرانیا جاران ژی ژ ئەگەرێ زوربارینا بارانێ پەیدا دبیت، بەلێ کارتێکرنێن خراپ لسەر چاندن و دەرامەتی دکەت).

زێدەتر گۆت: (ئەڤ کرمە ب رەشاندنا زەڤیەکێ یان جھەکێ بتنێ ب ھەبوونا ئەڤان کرمان ژناڤ ناچن، بەلکو دڤێت ھەموو ئەو جھە بھێتە رەشاندن کو ئەڤ جورە کرمە تێدا ھەیی، چونکی نە رەشاندنا ھەر جھەکێ دێ بیتە ئەگەر کو جارەکا دی کرمێن دەوروبەر دووبارە بھێنەڤە، ژبەرکو ئەڤ کرە جھێ خوە دگوھریت و بەردەوام دچونێ دایە و نا راوستیت).

ئەو گوندێن کو ھەتا نوکە ب رەنگەکێ بەردەوام کرم تێدا ھەیی و زیان ل چاندنا وان کری ھەر ئێک ژ گوندێن قادسیا بچوک، گوندێ بارەوا، گوندێ تلبە سپی، گوندێ درین، گوندێ زمزموک، گوندێ دووسەرە و گوندێ شێخالک بخوڤە دگریت.

ئه‌ڤرۆ نيوز:

وه‌زاره‌تا دارايى وئابوورى ل هه‌رێما كوردستانێ د برياره‌كێ دا ئينانا هه‌سپان ژ وه‌لاتێ توركيا قه‌ده‌غه‌ دكه‌ت.

كۆمه‌لگه‌ها ئيبراهيم خه‌ليل يا سنوورى به‌لاڤكر كو وه‌زارتا دارايى وئابوورى ل هه‌رێما كوردستانێ بريارا ئينانا هه‌سپێن توركى بۆ ناڤ هه‌رێما كوردستانێ قه‌ده‌غه‌ كريه‌.

ل دووڤ وێ بريارێ” پشتى به‌لاڤبوونا ڤايرۆسێ (رۆژئاڤايێ نيل) ل توركيا وسه‌رهلدانا مه‌ترسيا ڤه‌گوهاستنا ڤايرۆسى، بريار هاتيه‌ دان ب رێگرتنێ ل هاتنا هه‌سپێ توركى ب هه‌موو جۆرێن خوه‌ڤه‌ بۆ ناڤ هه‌رێما كوردستانێ”.

دهێته‌ زانين ڤايرۆسێ (رۆژئاڤايێ نيل) يێ مه‌ترسيداره‌ وژبلى هه‌سپ وسه‌ياان، تووشى بالندا ژى دبيت وئه‌گه‌ر هه‌يه‌ بۆ مرۆڤان ژى بهێته‌ ڤه‌گوهاستن.