ئەڤرۆ نیوز، رێوار مزیری:
رێڤەبەرێ گشتی یێ گەشت و گۆزارێ ل پارێزگەھا دھۆکێ دیار کر کو د سالا ٢٠١٨ێ دا رێژا ھاتنا گەشتیاران نێزیکی ٣٠% بۆ پارێزگەھا دھۆکێ ژ سالا ٢٠١٧ێ زێدەتر لێ ھاتبوو و گۆت: “د ئەڤ سالە دا ٣٥ بنگەھێن گەشتیاری ژ ئەگەرێ پێنەگیریێ ب رێنمایان یێن ھاتینە داخستن”.
عوبەیدوللا داود، رێڤەبەرێ گشتی یێ گەشت و گۆزارێ ل پارێزگەھا دھۆکێ ئەڤرۆ رۆژا ٣١/١٢/٢٠١٨ێ د کۆنگرەکێ رۆژنامەڤانی دا پشتی ب ھەلکەفتا ھاتنا سەرێ سالا ٢٠١٩ێ ب ناڤێ رێڤەبەریا گشتی یا گەشتوگۆزارێ ل پارێزگەھا دھۆکێ پیرۆزباھیا ھەموو خەلکێ ھەرێما کوردستانێ ب شێوەکێ گشتی کری و خواستی سالا نوو ببیتە سالا بجە ھاتنا ئۆمێدێن ھەموو خەلکێ ھەرێما کوردستانێ، ئامارێن سالا ٢٠١٨ێ یێن رێڤەبەریا گشتی یا گەشتوگۆزارێ ل پارێزگەھا دھۆکێ راگەھاندن و پلانا رێڤەبەریا ناڤھاتی بۆ سالا ٢٠١٩ێ ژی ئاشکرا کر و دیار کر کو د سالا ٢٠١٨ێ دا نێزیکی ٤٠٠ ھزار گەشتیاران سەرەدانا جھێن گەشتیاری یێن سنوورێ پارێزگەھا دھۆکێ کریە و ب ڤێ چەندێ نێزیکی ٣٠% رێژا ھاتنا گەشتیاران بەراورد ل گەل سالا ٢٠١٧ێ زێدەبوویە و گۆت: “تیمێن رێڤەبەریا مە ب شێوەکێ گەلەک باش خزمەتا وان گەشتیاران کریە”.

ناڤھاتی ئاماژە دا وێ چەندێ کو ھەتا نوکە ٧٣٢ جھێن گەشتیاری ل پارێزگەھا دھۆکێ مۆلەتا فەرمی ھەیە، لێ رێژا ڤەکرنا ڤان جھان رۆژ بۆ رۆژێ بەر ب زێدەبوونێ ڤە دچیت و ھەکە بەراوردی دگەل سالا ٢٠١٧ێ بھێتەکرن رێژا ڤەکرنا ڤان جھان دناڤبەرا ١٥% ھەتا ٢٠% زێدەبوویە و گۆت: “رێڤەبەریا مە بەردەوام چاڤدێری و پشکنینا جھێن گەشتیاری یێن سنوورێ پارێزگەھا دھۆکێ دکەت و ب خوەشحالی ڤە ئەڤ سالە تیمێن مە یێن تایبەت شیاینە ھزار و ٥٠٠ جاران پشکنینا جھێن گەشتیاری بکەن و د ئەنجامێ ڤان پشکنینان دا ١٣٢ ئاگەھداری و ھۆشداری داینە جھێن گەشتیاری، ھەروەسا ٣٥ بنگەھێن گەشتیاری ژ ئەگەرێ پێنەگیریێ ب رێنمایێن گەشتیاری یێن ھاتینە داخستن و ٢٥ بنگەە ژی ب پارەی ھاتینە سزادان و سەرەرایی ڤێ چەندێ ١٠ سۆپاسی ژی یێن ئاراستەیی بنگەھێن گەشتیاری ھاتینەکرن، د ھەمان سال دا ژ ئەنجامێ ڤێ دووڤچوونێ شەش بنگەھێن گەشتیاری دێ خەلاتێ جۆری یێ سالا ٢٠١٨ێ ل سەر ئاستێ پارێزگەھا دھۆکێ وەرگرن”.
رێڤەبەرێ گشتی یێ گەشت و گۆزارێ ل پارێزگەھا دھۆکێ خویا کر کو رێڤەبەریا وان گەلەک گرنگیێ ب خۆلێن رەوشەنبیری بۆ بلندکرنا ئاستێ رەوشەنبیریا گەشتیاری ددەت و د ئەڤ سالە دا وان ٢٠ خۆل ل سەر بابەتێن جۆراوجۆر بۆ کارمەندێن خوە و وان کارمەندێن ل جھێن گەشتیاری کار دکەن ڤەکرینە و نێزیکی ٣٠٠ کارمەندان ژ ڤان خۆلان مفاداربووینە و گۆت: “د سالا ٢٠١٨ێ دا داھاتێ گەشتیاری ١٨% ھەمبەر سالا ٢٠١٧ێ ل پارێزگەھا دھۆکێ زێدەبوویە”.

عوبەیدوللای دیار کر کو ژ بەر قەیرانا دارایی یا سەر ب ھەرێمێ دا ھاتی چو بۆدجە بۆ چێکرنا پرۆژێن گەشتیاری نەھاتبوونە تەرخانکرن، لێ بۆدجەک ب رێژا ١٧% ژ داھاتێ وان یێ گەشتیاری ل بەر دەستێ رێڤەبەریا وانە و گۆت: “ب ڤی داھاتی ئەم شیاینە ھندەک پرۆژان بۆ خزمەتکرنا گەشتیاران ئەنجامبدەین، ژ وان پرۆژان ئەم یێن شیایین ھژمارەکا بەرچاڤ یا دەست ئاڤان ل جھێن تایبەت و کۆرسیکێن روونشتنێ و سەلکێن گلێشی بۆ گەشتیاران ب دانین، ھەروەسا مە ھندەک جھێن گەشتیاری ژی ب ھەمان داھات مە خەملادینە و چەندین رێ ژی بۆ ھاتنوچوونا گەشتیاران ل جھێن گەشتیاری چێکرینە و سەرەرایی ڤێ چەندێ ھەر ب ڤی داھاتی مە پشتەڤانیا بنگەھێن شوونواری ژی یا کری بۆ پاراستنا وان جھان”.

ناڤھاتی خویا کر کو ل سالا ٢٠١٩ێ رێڤەبەریا گشتی یا گەشت و گۆزارێ ل پارێزگەھا دھۆکێ دێ ل سەر سێ تەوەران سەرەکی کارکەت، یێ ئێکێ خۆلێن مەشق و راھێنانێ دێ ب شێوەکێ بھێزتر و بەرفرھەھتر ڤەکەن بۆ وێ چەندێ داکو رەوشەنبیریا گەشتیاری بەر ب ئاستەکێ باشتر ببەین، تەوەرێ دویێ ژی: دێ بزاڤێ کەن بازارکرنا گەشتیاری خورتر لێ بکەن داکو زێدەتر بەرێ گەشتیاران بدەنە جھێن گەشتیاری یێن پارێزگەھا دھۆکێ، تەوەرێ سێیێ ژی: ب ھەماھەنگیا سازیێن پەیوەندیدار دێ ئاسانکاری و ھەماھەنگەیێ ل گەل کەرتێ تایبەت کەن بۆ وێ چەندێ کەرتێ تایبەت ب شێوەکێ باشتر و ب ھێزتر ھاریکاری و پشتەڤانیا وان بۆ ئاڤەدانکرن و چێکرنا پرۆژێن گەشتیاری بکەت و گۆت: ” دخوازم جھێن پەیوەندیدار پشتەڤانیا مە بکەن بۆ وێ چەندێ ئەم بشێن ب شێوەکێ باش پلانا خوە یا سالا ٢٠١٩ێ بجە بینین”.

ئەڤرۆ نیوز، رێوار مزیری:

ب هەلکەفتا هاتنا سەرێ سالا نوو رێڤەبەریا گشتی یا گەشت و گۆزارێ ل پارێزگەها دهۆکێ دێ ئەڤ شەڤە ل دەمژمێر 9:00 ئاهەنگەکا مەزن ب پشکداریا چەندین هونەرمەندان ل پارکا نەورۆز یا دناڤ سەنتەرێ باژێرێ دهۆکێ دا گێریت.

شەمال جەعفەر، رێڤەبەرێ کاروبارێن پشکنینێ ل رێڤەبەریا گشتی یا گەشت و گۆزارێ ل پارێزگەها دهۆکێ بۆ ئەڤرۆ نیوز دیار کر کو هەموو بەرهەڤی بۆ گێرانا ئاهەنگا سەرێ سالا 2019 ێ ژ ئالیێ رێڤەبەریا گشتی یا گەشت و گۆزارێ ل پارێزگەها دهۆکێ ڤە هاتینە کرن و گۆت: “هەر ئێک ژ هونەرمەندان (عەبدولقەهار زاخۆلی، لوجین ئەلحەنین، ئەحمەد زێباری، ئاشڤان فەرەج) و هەلبەستڤان (بورهان زێباری) و تیپا شاریا یا هونەرێ مللی دێ د ڤێ ئاهەنگێ دا د پشکدار بن”.

ناڤهاتی ئاماژە دا وێ چەندێ کو د هەمان ئاهەنگ دا دێ چەندین کەس ب جلکێن بابانۆئێلان دیاریان ل سەر زارۆیێن ل ئاهەنگێ ئامادەدبن بەلاڤکەن، هەروەسا ل چرکێن دووماهیێ یێن سالا 2018ێ دێ یاریێن ئاگری هێنە هاڤێتن.

ئەڤرۆ نیوز، قائید میرۆ:
پۆلیسێن پارێزگەھا ھەولێرێ ئامارێن ئەڤ سالە یێن سنوورێ ھەولێرێ بەلاڤکرن و ل گورەی ئامارێ ژی نێزیکی 90 حالەتێن کوشتن و خوەکوشتنا ژن و زەلامان ھاتینە تۆمارکرن و پەیڤدارێ پۆلیسان ژی دبێژیت، ئەڤ سالە رێژا تاوانان کێمبوویە.
ھۆگر عەزیز، پەیڤدارێ پۆلیسێن ھەولێرێ ئەڤرۆ رۆژا ئێک شەمبیێ د کۆنگرەکێ رۆژنامەڤانی دا ئامارا ئەڤ سالە یا تاوانێن پارێزگەھا ھەولێرێ دیارکرن کو تێدا ھاتیە” د سالا 2018 ێ نێزیکی 90 کەسان ھاتینە کوشتن، ب ڤی شێوەی 44 زەلام ھاتینە کوشتن دگەل 21 ژنان، ھەروەسا 22 ژن و زەلامان ژی خوە کوشتیە و دووماھی ب ژیانا خوە ئینایە.
پەیڤدارێ پۆلیسێن ھەولێرێ خویا کر کو د ئەڤ سالە دا 819 حالەتێن دزیێ ھاتینە تۆمارکرن و زێدەتری 100 تاوانێن دزیان تایبەت بووینە ب دزینا تڕۆمبێلان و 542 کەسان ژی ل دادگەھێ سکالا تۆماکرینە کو دزی ژ وان ھاتینە کرن و گۆت: “ھەر د ئەڤ سالە دا 846 حالەتێن شەڕکرنێ ل سنوورێ ھەولێرێ ھاتینە تۆمارکرن و 700 ژوان ھاتینە چارەکرن و ئێکلاکرن”.
ھۆگر عەزیز گۆت: “رێژا تاوانان د ئەڤ سالە دا ژ بەراورد ل گەل سالا بۆری گەلەک کێمکریە، ئەڤە ژی بۆ بجە ئینانا ئەرکێ ھێزێن ئەمنی ڤەدگەڕیت ل ھەرێما کوردستانێ، کو زێدەتر ب ئەرکێ خوە رابووینە و تاوانبار ھاتینە دەستەسەرکرن”.