ئه‌ڤرۆ نیوز، نه‌وزاد هلۆرى:
ئه‌ڤرۆ پاسا گه‌رۆك يا وه‌زاره‌تا كار و كاروبارێن جڤاكى ل هه‌رێما كوردستانێ كو ب هه‌ڤكاریا رێكخراوا GIZ یا ئه‌لمانى هاتیه رێكخستن، ب مه‌ره‌ما وه‌رگرتنا CV و داتایێن كه‌سانێن بێ كار گه‌هشته شێلادزێ و هژماره‌كا مه‌زن یا خه‌لكێ ده‌ڤه‌رێ ژ ده‌رچویێن زانكۆ و په‌یمانگه‌هان و وه‌لاتيێن بێ كار ناڤێن خوه تۆماركرن.
ئەڤرۆ نیوز، رەمەزان ھەرنی:
پرۆفیسورەکێ ھاریکار د زانستێن سیاسی دا ئاشکرا کر کو ئیران ل ڤان نزیکان دێ دکتور بەرھەم سالحی سەرۆک کومارێ عیراقێ وەکو کارتەکێ ب کارئینیت داکو سەردانا دیمەشقێ بکەت بۆ وێ چەندێ ب رێیا وی بشێت ڤان دو مەرەمان ب دەست ڤە بینیت.
د. سالح مەلا عومەر، پروفیسورێ ھاریکار ل زانستێن سیاسی بۆ ئەڤرۆ نیوز دیار کر کو ئیرانێ دڤێت ژ بەر وێ ڤالاھیا کو ژ بەر پاشکەفتکرنا ھێزێن ئەمریکا ل رۆژ ھەلاتا فورات دروست بیت ، دکتور بەرھەم سالح د ناڤبەرا بەشار ئەسەد و پەیەدێ دا ل سەر روژھەلاتا فورات ببیتە دادڤان بۆ وێ چەندێ پەیەدە وان دەڤەران رادەستی بەشار ئەسەد و ئیرانێ بکەتە ڤە و گۆت: ” ب رێیا سەرەدانا سەرۆک کومارێ عیراقێ بۆ دیمەشقێ ل سەر ئاستێ دەڤەرێ و جیھانێ پروژەکێ زێدەتر ب بەشار ئەسەدی بدەت”.
ئەڤرۆ نیوز، لەزگین جوقی:
رێڤەبەرێ گشتیێ ساخلەمیا پارێزگەھا دھۆکێ دیار کر کو رێکخراوا جیھانی یا مافێن مرۆڤی ژ دەستپێکا قەیرانێ ھەتا نوکە چەندین پشتەڤانی بۆ ساخلەمیێ ئیناینە و خزمەت پێ دھێتە کرن و گۆت: “مە بانگەوازیەک راگەھاندبوو بۆ ھەموو جیھانی کو مە شیان وەکو پێدڤی نینن بەرسڤا ڤان قەیرانان بدەین دەمێ دەستپێکا سەرھلدانا قەیرانان و ھاتنا رێکخراوا تیرۆرستێن داعش و ئاوارەبوونا خەلکێ بۆ دھۆکێ”.
د. نزار عسمەت، رێڤەبەرێ گشتیێ ساخلەمیا پارێزگەھا دھۆکێ دیار کر کو نوونەرێ رێکخراوا جیھانی یا مافێن مرۆڤی ھەر ژ دەستپێکی ھایتە ساخلەمیێ بۆ ھەڤکاری ئەڤ ترۆمبێلا ھاوار ھاتنی یا ڤێجارێ ئیناین گەلەک یا بەرفرەە و باشە و ھەموو ئامیرە ژی دگەلدانە و چەندین ئامیرێن دی یێن نۆشداری ژی ئیناینە دگەل ئامیرێن چاڤدێریا سلامەتیا زارۆیان و گۆت: “داخوازێ دکەین پتر ھەڤکار بن دگەل ساخلەمیێ و ئەو زیرەکی و شیانێن وان ھەین و نۆشدارێن وەلاتێ ئەلمانیا یێن بسپۆر یێن حەز ھەبن بھێن ل پارێزگەھا دھۆکێ خزمەتێ بکەن دگەل خوە دا بینن داکو دگەل نۆشدارێن مە پتر خزمەتا وەلاتیان بھێتە کرن”..
خەلیل بۆزانی، نوونەرێ رێکخراوا جیھانی یا مافێن مرۆڤان دیار کر کو ئەرکەکێ گەلەک پیرۆزە ل سەر ملێن ھەر کەسەکێ کورد پشتەڤانیا ساخلەمیێ بکەت و گۆت: “ھەموو پێدڤیێن نۆشداری د ناڤ ئەڤێ ترۆمبێلا ھاوار ھاتنێ دا ھەنە و ئەڤە ترۆمبێلا ھاوار ھاتنێ یا سیێ یە ئەم پێشکیشی ساخلەمیا دھۆکێ دکەین”.
ناڤھاتی خویا کر کو سەرەرایی پێشکێشکرنا ترۆمبێلا ھاوارھاتنێ ب ساخلەمیا دھۆکێ 183 کۆرسی و پێدڤیێن دی ل سەر کێم ئەندامان ھاتنە بەلاڤکرن زێدەباری ڤێ چەندێ وان چەندین خۆلێن ھەمە جۆرە ل کەمپین ئاواران ب تایبەتی ژی ل کەمپێن مام رەشا و شێخان و ئیسیان ڤەکرینە و گۆت: “دێ بزاڤێ کەین دەرمان و پێدڤیێن دی ژی بۆ ساخلەمیێ دابین بکەین”.
ئەڤرۆ نیوز، لەزگین جوقی:
سەرۆکێ جڤاتا قەزا شنگال بۆ ئەڤرۆ نیوز دیار کر کو پشتی شەش خێزان د رۆێن بۆری دا چووینە شنگالێ دووبراە داخوازا ئاوارەبوونێ ژ جڤاتا شنگالێ کریە و ئەو ژی ل سەر داخوازا وان رازی بووینە.
وەیس نایف، سەرۆکێ جڤاتا قەزا شنگالێ بۆ ئەڤرۆ نیوز دیار کر کو ڤەکرنا رێیا شنگال بۆ سحێلا نەبوویە ئەگەر خەلکێ شنگال ڤەگەرنە سەر مالێن خوە بەلکو بەروڤاژی خەلکێ چووینە شنگالێ ژی یێن داخوازیێن خوە پێشکیشی ئێدارا شەرعیی یا شنگال دکەن داکو دووبارە ژ شنگال ئاوارەیێ ناڤ کەمپان بن ل ھەرێما کوردستانێ و گۆت: “خەلک شنگالێ بێ پێشمەرگێ کوردستانێ یێ بەرھەڤ نینە بزڤرنە شنگالێ”.
ناڤھاتی خویا کر کو ئاریشە سەرەکی یا نەزڤرینا خەلکێ شنگالێ نەبوونا ئێمناھیێ یە ل شنگالێ، خەلک شنگالێ بتنێ باوەری ب پێشمەرگێ کوردستانێ ھەیە، چونکو ئەڤ گرۆپ و ھێزێن نوکە ل شنگالێ گەلەک جاران زۆرداریێ ل خەلکی دکەن و خەلک دترسن بزڤرنە سەر مال و مولکێن خوە و گۆت: “مە داخواز کریە ھێزەکا بھێز یا ھەڤپشک بۆ پاراستنا ئیمناھیا شنگالێ د ناڤبەرا حوکمەتا ھەرێما کوردستانێ و حوکمەتا عیراقێ دا بھێتە پێک ئینان “.
ئەڤرۆ نیوز، بارزان مزووری:
دەڤەرا ئەلقوش ئێک ژ وان دەڤەرێن گەشتیاری یێن گرنگ دھێتە ھژمارتن سالانە ھژمارەکا مەزن یا گەشتیاران ب تایبەت گەشتیارێن بیانی و یێن ناڤەراستا عیراقێ سەرەدانا ڤێ دەڤەرێ دکەن ،ل دووڤ پێزانینێن دروست کو شوونوارناسێن وێ دەڤەرێ دیارکریە کو مێژوویا ڤی باژێری بۆ سەردەمێ پێغەمبەر مووسای (س، خ) ڤەدگەریتن کو گوندەک بوو بەر ب باژێرەکێ شوونواری چوویە، ھونەرمەندەکێ مەسیحی بناڤێ (دانی ئەسمەرو) خەلکێ ناحیا ئەلقوشە گوندێ ئەلقوش یێ کەڤن ب شێوەکێ فلکلوری دووبارە ئاڤاکریە.
ھونەرمەند دانی ئەسمەرو، بۆ ئەڤرۆ نیوز ئاشکرا کر کو ژبلی کارێ وی یێ ھونەری ئێک ژ پرۆژێن وی یێن گرنگ ل دەڤەرێ دووبارە دروستکرنا گوندێ کەڤن یێ ئەلقوش بوو، کو ببیتە ئێکەم گوندێ شوونواری ل پارێزگەھێن نەینەوا و دھۆک ژ بەر کو ئەڤ دەڤەرە ژ دەڤەرێن ڤەقەتیایی نە ژ ھەرێما کوردستانێ، بەلێ سەر ب ھەر دو ئیداران ڤەیە و گۆت: ” گوندێ کەڤن یێ ئەلقوش دووبارە ئەو گوند ب ھەموو تیتالو رەوشتێن گوندی ڤە ھاتە ئاڤاکرن و ئەو کەلوپەلێن ب گوندان ڤە گرێدایی ھەموو د ناڤ گوندی دا ھاتنە دانان بتنێ ژیانا مرۆڤان لێ نینە و ئەڤ گوندە ل ئەینیا بوری 21 کانونا ئێکێ 2018 ب شێوەیەکی فەرمی ژ لایێ ئیدارا ناحیێ و کەساتیێن ئاینی یێن دەڤەرێ ڤە ھاتە ڤەکرن”.
ناڤھاتی ئاماژە دا وێ چەندێ ئەڤ گوندە ب ھەموو شێوەیەکی ل سەر نەخشێ کەڤنار ھاتیە ئاڤاکرن، ھەر گەشتیارەکێ سەرەدانا ڤی گوندی بکەت دێ سەرنجا وی راکێشیتە خوە و حەز ناکەت ژێ ب دەرکەڤیت، ژ بەر کو ئەو کەلوپەلێن شوونواری و خانیێن ئاخێ و جھێن ناپێژیێ یێن کەڤنار ھەموو کەلوپەلێن گوندان د ناڤ دا ھاتینە دروستکرن.
ئەڤرۆ نیوز:
رێڤەبەریا پاسپورتان ل دھۆکێ داخوازێ ژ وان وەلاتیان دكەت یێن ناڤێن وان د لیستا خوارێ دا هاتین سەرەدانا رێڤەبەریا ناڤبری بكەن ل پشکا بەلاڤكرنا پاسپورتان ژبو وەرگرتنا پاسپورتێن خو بزیترین دەم.
ئەڤرۆ نیوز، قائید میرۆ:
پێشنیار ھاتیەکرن دەمێ کارکرنا جڤاتێن پارێزگەھان بۆ دەمێ دو سالان بھێتە درێژکرن و بەرپرسەکێ پارتی ژی دبێژیت، ئەم ب باشی نابینین ھەلبژارتن د ڤی دەمی دا بھێنە ئەنجامدان.
کەنعان خەیلانی، سەرۆکێ فڕاکسیۆنا پارتی ل جڤاتا پارێزگەھا ھەولێرێ بۆ ئەڤرۆ نیوز دیار کر کو ھەر سێ جڤاتێن پارێزگەھان ل ھەرێما کوردستانێ ب نڤیسارەکا فەرمی داخوازا چارەکرنا پرسا جڤاتێن پارێزگەھان کریە، ژ بەر کو دەمێ وان یێ قانوونی تەمام بوویە و ھەلبژارتن ژی نەھاتینە ئەنجامدان، لەوڕا وان داخوازکریە دەمێ جڤاتێن پارێزگەھان بھێتە درێژکرن و رۆژا ھەلبژارتنان بھێتە دیارکرن.
ناڤھاتی ئاماژە دا وێ چەندێ کو کاودانێن نوکە بۆ ئەنجامدانا ھەلبژارتنان د گونجای نینن، چونکی دو ھەلبژارتن ھاتینە ب رێڤەبرن و وان پێشنیارکریە پشتی دو سالێن دی ھەلبژارتنێن جڤاتێن پارێزگەھان بھێنە ئەنجامدان و پەرلەمان و سەرۆکاتیا جڤاتا وەزیران دێ بڕیارا دوماھیێ بدەن.
ئه‌ڤرۆ نيوز:
رێڤەبەریا گشتیا کەشناسی و بیڤەلەرزێ ل ھەرێما کوردستانێ راگەھاند کو سوبەھی رۆژا دوشه‌مبى رێکەفتی 24ى كانوونا ئێكێ 2018ێ ئه‌سمان دێ باران بيت و ب دژوارى ژى ل هنده‌ك ده‌مان باريت و ل ده‌ڤه‌رێن بلند و چياى ژى به‌فر دێ باريت.
پشکا پێشبینیان ل رێڤەبەریا گشتیا کەشناسی و بیڤەلەرزێ ل ھەرێما کوردستانێ د نڤیسارەکێ دا کو دانەک بۆ ئەڤرۆ نیوز رەوانە کرینە راگەھاند کو ژ ئه‌نجامێ فشارێن نزمێن ده‌ريا ناڤه‌راست و فشارێن نزمێن وه‌لاتێ توركيا دھێتە پێشبینیکرن باران بيت و ب دژوارى ژى ل هنده‌ك ده‌مان باريت و ل ده‌ڤه‌رێن بلند و چياى ژى به‌فر دێ باريت.
پشکا پێشبینیان دایە زایە زانین کو دێ ئله‌زاتيا بايى د ناڤبەرا 5 ھەتا 15کم دا و ماوێ دیتنێ ژی دێ د ناڤبه‌را 8 بۆ 9كم دا بیت، پلێن گەرمێ ژی دێ د ناڤبەرا 5 بۆ 15 پلان دا بن.
ئاماژه ب وێ چه‌ندێ ژى كريه كو ئه‌و پێشبينى دكه‌ن ل پارێزگه‌ها دهۆكێ زێده‌ترين رێژا به‌فر و بارانێ لێ بباريت ل چاڤ ده‌ڤه‌رێن دى يێن هه‌رێما كوردستانێ و پلێن گه‌رمێ ژى دێ هێنه خوار و رۆژا ب دووڤ دا كارتێكرنا ڤێ فشارێ دێ ب دووماهى هێت.
ئه‌ڤرۆ نيوز:
ئه‌ڤرۆ جڤاتا نوونه‌رێن عيراقێ دێ كۆم بيت و دێ بزاڤێ كه‌ت د ڤان دو رۆژان دا، كابينا نوو يا حوكمه‌تێ ته‌مام بكه‌ت و ده‌نگى ل سه‌ر بده‌ت.
ب گۆره‌ى وى به‌رنامێ ل مالپه‌رێ جڤاتا نوونه‌رێن عيراقێ هاتيه به‌لاڤكرن، جڤاتا نوونه‌رێن عيراقێ ئه‌ڤرۆ دێ گه‌نگه‌شێ ل سه‌ر هه‌لبژارتنێن جڤاتێن پارێزگه‌هان و چه‌ند پرسه‌كێن دى كه‌ت.
ئه‌ندامه‌كێ جڤاتا نوونه‌رێن عيراقێ ل سه‌ر فراكسيۆنا پارتى ديموكراتى كوردستان راگه‌هاند كو د ڤان دو رۆژان دا، دو پرسێن گرنگ يێن هه‌ين بهێنه به‌حسكرن كو ئه‌و ژى پرسا بوودجێ و ته‌مامكرنا كابينا نوو يا حوكمه‌تا عه‌بدولمه‌هدى نه.
د. ديار ته‌يب بۆ ئه‌ڤرۆ نيوز گۆت: “هه‌ر چه‌نده ئه‌ڤ هه‌ردو پرسه د ناڤ كارنامێ ئه‌ڤرۆ دا نينن و باوه‌ر ناكه‌م سوبه‌هى ژى بچنه د ناڤ به‌رنامێ كارى دا، ژ به‌ر كو هه‌تا نها چو رێكه‌فتنێن سياسى نه‌هاتينه كرن، به‌لێ تشته‌ك ژى يێ دوور نينه ل عيراقێ و ده‌باره‌ى بوودجێ ژى تێبينيێن لژنا دارايى ل سه‌ر ب دووماهى نه‌هاتينه، به‌لێ دبيت گڤاشتن ل سه‌ر لژنێ ژى بهێته كرن هه‌تا سوبه‌هى تێبينيێن خوه ب دووماهى بينن و بێخنه ناڤ به‌رنامێ كارى”.
ئه‌ندامێ جڤاتا نوونه‌رێن عيراقێ ئاشكه‌را ژى كر كو جڤاتا نوونه‌ران نه‌ڤێت ژيێ خوه درێژ بكه‌ت و دڤێت ڤان هه‌ردو پرسان چاره بكه‌ت، ژ به‌ر هندێ ژى پێشبينى دهێته‌كرن گڤاشتن ل سه‌ر لژنا دارايى بهێته كرن دا كو كارێ خوه ب دووماهى بينيت، هه‌كه ئه‌ڤه نه‌هاته كرن ژى دبيت د حه‌فتيا ئێكێ يان دويێ يا پشتى سه‌رێ سالێ بوودجه بكه‌ڤيته به‌ر ده‌نگدانێ.
نيشاندان