ئه‌ڤرۆ نیوز، نه‌وزاد هلۆرى:

رێڤه‌به‌ریا چاندنێ ل قه‌زا مێرگه‌سوورێ دیاركر كو ئه‌ڤ ساله‌ رێژه‌یه‌كا زور یا به‌فرێ ل سنوورێ ده‌ڤه‌را بارزان بارى یه‌ كو دبیته‌ 9 جاران هندى سالا بورى هه‌تا ڤى ده‌مى.

محه‌مه‌د مێرگه‌سوورى، رێڤه‌به‌رێ چاندنێ قه‌زا مێرگه‌سوورێ بۆ ئه‌ڤرۆ نیوز گۆت: (بارینا به‌فرێ و بارانێ ل سنوورى َده‌ڤه‌را بارزان ب گشتى به‌رده‌وامه‌ ب تایبه‌تى ل ده‌ڤه‌رێن چیایى و سنوورى، دده‌ما 24 ده‌مژمێرێن بورى دا 8ملم باران بارى یه‌، كوما گشتى یا بارینا بارانێ یا زڤستانا ئه‌ڤ ساله‌ گه‌هشته‌ هزار و 138ملم، دیسان یا به‌فر بارینێ ژى گه‌هشتیه‌ 72سم ب تایبه‌تى ل سه‌نته‌رێ قه‌زایێ).

زێده‌تر گۆت: (سالا بورى هه‌تا ئه‌ڤرۆ رێژا باران بارینێ 316ملم بوو ل گه‌ل بارینا 8سم یێن به‌فرێ، كو ئه‌ڤ یه‌ك ژى رامانه‌ ئه‌ڤ ساله‌ 9 جاران پتر ژ سالا بورى به‌فر و 3.60 جاران ژى پتر ژ سالا بورى باران بارى یه‌).

ئه‌ڤرۆ نیوز:

وه‌زاره‌تا خواندنا بلند و ڤه‌كولینێن زانستى راگه‌هاند، ل دووڤ دووماهى ئامارا وه‌زاره‌تێ، پشتى ئه‌نجامێن راست و دروست یێن تایبه‌ت ب باوه‌رناما شیانێن زمانێ ئینگلیزى ده‌ركه‌فتیه‌ تا نوكه‌ 106 باوه‌رنامێن سه‌خته‌ ( ته‌زویر) بۆ وه‌زاره‌تێ هاتینه‌ پێشكێشكرن و پێرابوونێن یاسایى و كارگێرى به‌رامبه‌ر وان هاتینه‌ وه‌رگرتن.

پترترین باوه‌رنامێن ساخته‌ یێن زانكۆیا سلێمانیێ بوون كو 48 باوه‌رنامه‌ بوون، پاشان زانكۆیا سه‌لاحه‌دین، 26 باوه‌رنامێن ساخته‌، هه‌روه‌سا زانكۆیا هه‌له‌بجه‌ 12 باوه‌رنامه‌، زانكۆیا دهۆك ژى 4 باوه‌رنامه‌، و زانكۆیا پولیته‌كنیكیا دهۆك 2 باوه‌رنامه‌، زاخو 3 باوه‌رنامه‌ هاتبوو پێشكێش كرن.

ئه‌ڤرۆ نیوز:

شانده‌كێ پارتى دیموكراتى كوردستان بڕیاره‌ سوبه‌ سه‌ره‌دانا سلێمانیێ بده‌ت و ل گه‌ل بزاڤا گۆران بده‌ت.

ئه‌ڤرۆ نیوز، مه‌حمود نهێلى:

ئه‌ڤه‌ هه‌یاما چه‌ند رۆژه‌كایه‌ ئاڤا پیس تێكه‌لى ئاڤا ڤه‌خوارنێ یا هه‌ژماره‌كا خێزانێن تاخێ شه‌هیدان ل دێره‌لۆكێ دبیت و جهێن په‌یوه‌ندیدار ژى دبێژن ئه‌م یێ بزاڤا چاره‌سه‌ریێ دكه‌ین.
هه‌ژماره‌كا ئاكنجیێن ڤى تاخى بۆ ئه‌ڤرۆ نیوز دیار كرن كو ئه‌ڤه‌ نێزیكى هه‌یڤه‌كى یه‌ ئه‌ڤ ئاریشه‌ د ئاڤا چه‌ند كولانه‌كا دا ل تاخێ وان دروست بوویه‌ و وان داخازیا خوه‌ گه‌هاندیه‌ جهێن په‌یوه‌ندیدار لێ تا نوكه‌ نه‌هاتیه‌ چاره‌سه‌ركرن.
ل سه‌ر ڤێ یه‌كێ ئه‌ندازیار به‌شار حه‌جى رێڤه‌به‌رێ ئاڤا ئامێدیێ بۆ ئه‌ڤرۆ نیوز دیاركر، كو راسته‌ ئه‌ڤه‌ هه‌یاما چه‌ند رۆژایا ل تاخه‌كێ ناحیا دێره‌لۆكێ ئاڤا پیس تێكه‌لى ئاڤا ڤه‌خوارنێ دبیت و گۆت: ئه‌ڤه‌ ب رێكا پشكداره‌كى دروست بوویه‌ و ئه‌ڤ ئاڤا پیس تێكه‌لى وێ قفلێ دبیت و پاشان د سولینێن ئاڤێ دا بۆ هند مالێن دیتر ژى دچیت. و خویاكر، ل ده‌سپێكا به‌ردانا ئاڤێ باش دیار دبیت و پاشان نامینت و ل ده‌مێ گرتنا ئاڤێ ژى جاره‌كا دى دیار دبیته‌ ڤه‌.
ناڤهاتى ئاشكرا كر، كو هه‌ر نوكه‌ تیمه‌كا وان سه‌را وى تاخى دایه‌ و پێدڤیه‌ ئه‌و پشكدارى بهێته‌ ئاشكراكرن یێ ب رێكا وێ ئاڤ تێكه‌ل دبیت و پاشان چاره‌سه‌رى بهێـته‌ كرن. و ته‌كه‌ز كر، كو دده‌مه‌كى نێزیك دا دێ ئه‌ڤ ئاریشه‌ هێته‌ چاره‌سه‌كرن.

ئەڤرۆ نیوز، قائید میرۆ:
ل نێزیک باژێڕێ ھەولێرێ ژ ئەگەرێ غازا سوپێ کوڕ و بابەکی گیانێ خوە ژدەستدا و پۆلیسان ژی دەست ب ڤەکۆلینێ کریە.
رائید ھۆگر عەزیز، پەیڤدارێ پۆلیسێن ھەولێرێ بۆ ئەڤرۆ نیوز دیارکر کو بەری نیڤرۆیا ئەڤرۆ ھێزێن پۆلیسان ھاتنە ئاگەھدارکرن ل دۆر ھەبوونا روودانەکا مرنێ ل کۆمەلگەھا پیرزین یا نێزیک سەنتەرێ باژێڕێ ھەولێرێ و پشتی گەھشتنا ھێزێن پۆلیسان دەرکەفت کۆڕ و بابەکی ژ ئەگەرێ غازا سوپێ گیانێ خوە ژ دەستدایە.
ناڤهاتی خویا کر کو ھێشتا بتەمامی ئەو پشتڕاست نەبووینە ژ ئەگەرێ مرنا ئەڤان کۆڕ و بابا، بەلێ ڤەکۆلین ھاتینە دەستپێکرن و وان دڤێت بزانن خێزانا ئەڤێ مالێ ل کیڤە بووینە دەمێ روودان پەیدابووی، ھەروەسا بۆچی ب تنێ کوڕ و باب بتنێ نڤستی بووینە.

ئه‌ڤرۆ نیوز، نه‌وزاد هلۆرى:

ئه‌ڤرۆ جڤاتا وه‌زیران یا هه‌رێما كوردستانێ ب سه‌روكاتیا نێچیرڤان بارزانى كومبوو، د كومبوونێ دا چه‌ندین بابه‌ت هاتنه‌ به‌حسكرن، ئێك ژ وان بابه‌تێن كو هاتیه‌ به‌حسكرن بریارا دامه‌زراندنا ئێكه‌م و دووه‌م و سێیه‌مێن زانكویێن هه‌رێما كوردستانێ نه‌.

ب گوره‌ى زانیاریێن ناڤا جڤاتا وه‌زیران، دامه‌زراندنا ئێكه‌م و دووه‌م و سێیه‌مێن زانكویێن هه‌رێما كوردستانێ، په‌یمانگه‌هان بخوڤه‌ ناگریت به‌لكو ب تنێ زانكویان بخوڤه‌ دگریت.

زێده‌بارى بابه‌تێ دامه‌زراندنا قوتابیێن ئێكه‌م و دووه‌م و سَیه‌میێن زانكویێن هه‌رێمێ، دكومبوونێ دا به‌حس ل پشكا بودجا هه‌رێما كوردستانێ د بودجا عیراقێ و چه‌ند بابه‌تێ، دن یێن گرێداى به‌غدا و هه‌ولێر ژى هاتیه‌كرن.

ئەڤرۆ نیوز، لەزگین جوقی:

بەرپرسێ پەیوەندی و راگەھاندنێ ل سەرۆکاتیا باژێرڤانیا دھۆکێ دیار کر کو د سالا بۆرێ دا ٨٥٠ کەس ل گۆرستانا شاخکێ یێن ھاتینە ڤەشارتن ژ وان ژی ٤٥٩ کەس رەگەزی نێر و ٣٩١ ژی رەگەزێ مێ بووینە کو رێژا مرنا زەلامان پتر بوویە ژ یا ژنان.

ئیسماعیل مستەفا، بەرپرسێ پەیوەندی و راگەھاندنێ ل سەرۆکاتیا باژێرڤانیا دھۆکێ بۆ ئەڤرۆ نیوز دیار کر کو خێرخوازەکی 10 دونەمیێن ئەردی بۆ گۆرستانێ داینە و باژێرڤانیێ ژی ٣٠ دونەمێن ئەردی دابینکرینە، ئانکو ھەموو دبنە ٤٠ دونەمێن ئەردی دێ ل سەر گۆرستانا شاخکێ ھێنە زێدەکرن و گۆت: “د ناڤ گۆرستانا شاخکێ ژی دا ئەرد ھاتیە بەرفرھکرن وجە گەلەک مایە ھەتا چار سالێن دی تێرا خەلکێ دھۆکێ دێ کەت ژبلی ئەو رووبەرێ خێرخوازەکی و باژێرڤانیێ دابینکری”.

ناڤھاتی ئاشکرا کر کو باژێرڤانیا دھۆکێ دگەل دارستانێ و رێکخراوان چەندین داروبار ل گۆرستانا شاخکێ چاندینە و تانکەرەکێ ئاڤێ ژی ھاتیە دابینکرن بۆ گۆرستانێ و ئاڤدانا داروباری و کارگێریا پارێزگەھا دھۆکێ ژی حەفارەک بۆ گۆرستانا شاخکێ دابینکریە و جادە ژی ھاتینە قێرکرن و خزمەتەکا باش ل گۆرستانێ ھاتیە کرن و پەرژان ژی ھاتیە دروستکرن و بەردەوام باژێرڤانی کاردکەت بۆ سەخبێری و پاراستنا گۆرستانا شاخکێ.