ئەڤرۆ نیوز، لەزگین جوقی:
رێڤەبەرێ کاروبارێن ئێزدیان ل پارێزگەھا دھۆکێ دیار کر کو ئەڤە بۆ دەمێ دو سالانە تەندەر بۆ چێکرنا مەزارگەە و نیشانگەھێن ئێزدیان یێن کو ژ لایێ رێکخراوا تیرۆرستێن داعش ڤە ھاتینە پەقاندن ھاتینە بەرھەڤکرن، بەلێ ھەتا نوکە چو دیارنەبوویە بۆ چێکرنا ڤان مەزارگەە و نیشانگەھێن ئێزدیان.
عیدان شێخ کالو، رێڤەبەرێ کاروبارێن ئێزدیان ل پارێزگەھا دھۆکێ بۆ ئەڤرۆ نیوز دیار کر کو تیرۆرستێن داعش ٦٨ مەزارگەە و نیشانگەھێن ئێزدیان ل شنگالێ و باشیک و بەحزانێ و دەڤەرێن دی یێن دەشتا نەینەوا پەقاندینە و ئەڤە بۆ دەمێ دو سالانە تەندەر بۆ چێکرنا ڤان مەزارگەە و نیشانگەھێن ھاتینە پەقاندن ھاتینە بەرھەڤکرن، بەلێ ھێشتا چو دیارنینە و ھندەک مەزارگەە و نیشانگەھێن ئێزدیان ب تایبەتی ژی ل باشیک و بەحزانێ و کۆمەلگەھا بابیری یێن ھاتینە ئاڤاکرن، ژ لایێ خەلکێ وان دەڤەران و خێرخوازان ڤە و گۆت: “ئەم ب ھیڤی نە ئەڤ سالە قەیرانا دارایی نەمینت و دەست ب ئاڤاکرنا مەزارگەە و نیشانگەھێن ئێزدیان بھێـتە کرن”.
ناڤھاتی دیار کر کو بۆ دەمێ پێنج سالانە پارچەکا ئەردی بۆ ئاڤاھیێ رێڤەبەریا کاروبارێن ئێزدیان ژی ھاتیە تەرخانکرن، بەلێ ھەتا نوکە نەھاتیە ئاڤاکرن و گۆت: “ئەم دخوازین پووتەکی باشتر ب رێڤەبەریا کاروبارین ئێزدیان بھێتە دان داکو ئەم ژی بشێن باشتر خزمەتا خەلکێ خوە بکەین”.

ئەڤرۆ نیوز:
وەزیرێ دارایی یێ حوکمەتا ھەرێما کوردستانێ راگەھاند کو رەوشا دارایی یا ھەرێمێ باشبوویە و ھەموو پێشبینی ژی بۆ رەوشا دارایی یا حوکمەتا نوو د گەشبینن و حوکمەتا نوو دێ شێت قەرەبوویا مووچەخورێن ھەرێمێ کەت.

رێباز حەملان، وەزیرێ دارایی یێ حوکمەتا ھەرێما کوردستانێ پەیامەک ب رێیا تۆرا جڤاکی یا فەیسبووکی بەلاڤکریە کو تێدا ھاتیە ژ بەر سیاسەتا بھێز یا ئابووری و پێگەھێ ھەرێمێ ل دەڤەرێ، رەوشا دارایی ب ھەڤبەرکرن ل گەل سالێن شەڕێ دژی داعشێ و نە ھنارتنا بۆدجێ ژ بەغدا، گەلەک باشبوویە و ھەموو پێشبینی ژی بۆ رەوشا دارایی یا حوکمەتا نوو د گەشبینن و حوکمەتا نوو دێ شێت قەرەبوویا مووچەخورێن ھەرێمێ کەت.

ناڤھاتی ئاماژە دایە وێ چەندێ ژی کو ئەرکێ ل سەر ملێن ھەموو ئالیانە ب تایبەتی ئالیێن سەرەکی یێن ھەرێمێ، لەزێ د پێکئینانا حوکمەتێ دا بکەن، دا کو پاداشتێ مووچەخورێن ھەرێمی بدەنێ، چونکی د شەڕێ دژی تیرۆرستێن داعش و بڕینا بۆدجێ دا، گەلەک د ئارامبوون و خوە ل بەر قەیرانا دارایی و پاشکەفتکرنا مووچەی گرتن.

ئەڤرۆ نیوز، لەزگین جوقی:

بەرپرسێ لیژنا ناوچا زومار یا پارتی دیموکراتی کوردستان دیار کر کو پشتی روودانێن 16 ئۆکتۆبەری ھەتا نوکە 86 پۆلیسێن کورد نەشیاینە بچنە زومار ودەست ب دەواما خوە بکەن.

حسێن خەلۆ، بەرپرسێ لیژنا ناوچا پارتی دیموکراتی کوردستان ل ناحیا زومار بۆ ئەڤرۆ نیوز دیار کر کو دەمێ حەشدا شەعبی ھاتیە زومار ل وی دەمی 86 پۆلیسێن کورد نەشیان ل بن فشارا حەشدا شەعبی دا بمینن و بەردەوامیێ ب دەواما خوە بدەن، ئەڤ ھژمارا پۆلیسیان نەچاربوون زومار بجە بھێلن و قەستا ھەرێما کوردستانێ بکەن، لێ مخابن ھەتا نوکە ژی کێشا زڤرینا ڤان پۆلیسێن کورد نەھاتیە چارەسەرکرن و کێشا وان بۆلیسێن کورد دناڤبەرا بەغدا و حەشدا شەعبی دا مایە ھەلاویستی و ھەتا نوکە ژی چارەنڤیسێ وان یێ دیار نینە کا دێ زڤرنە دەواما خوە یان ژی دێ ژ کاری ھێنە لادان.

ناڤھاتی ئاماژە دا وێ چەندێ کو حەشدا شەعبی عەرەب یێن ل سەر ب ھزاران دونەمێن ئەردی ل زومار ئاکنجیکرین و ئەڤە دێ کێشەکا مەزن ل دەڤەری دروست کەت ھەکە ئەو عەرەب ب رێ یێن قانوونی نەھێنە دەرخستن، چونکو د بنیاتدا ئەو ئەرد مولکێ کوردایە و عەرەب یێن ل سەر ھاتینە ئاکنجیکرن ژ بەر ڤێ چەندێ پێدڤیە حوکمەتا عیراقێ رێگریێ ل حەشدا شەعبی بکەت و نەھێلیت عەرەبان بینیتە سەر مال و مولکێ کوردان.

بەرپرسێ لیژنا ناوچا زومار یا پارتی دیموکراتی کوردستان خویا کر کو نوکە ل زومار گەلەک مال یێن ھاتینە تالانکرن و کێشەکا مەزن ل زومار سەر ھەلدایە ئو ژی ئەو کوردێن ل سالێن حەفتێیان مال و مولکێن خوە ژ بەر رژێما عیراقێ بجە ھێلاین و ئاوارە بووین و عەرەب ل سەر مال و مولکێن وان ھاتینە ئاکنجیکرن، پشتی سالا 2003 و رووخاندنا رژێما عیراقێ جارەکا دی خەلکێ کورد زڤرینە سەر مالێن خوە، لێ پشتی حەشدا شەعبی ھاتیە زومار کورد جارەکا دی ئاوارە بوون و عەرەب یێن زڤرینە سەر مال ومولکێن وان.