ئه‌ڤرۆ نیوز:
وه‌زیرێ دارایی و ئابووری یێ حوكمه‌تا هه‌رێما كوردستانێ راگه‌هاند، ئه‌و دێ هه‌موو بزاڤان كه‌ن به‌ری نه‌ورۆزێ مووچه‌یێ هه‌موو فه‌رمانبه‌ران بێ پاشكه‌فت بده‌ن و سوبه‌هی دێ ده‌ست ب به‌لاڤكرنا مووچه‌ی بێ پاشكه‌فت كه‌ن.
رێباز حه‌ملان د كۆنگره‌كێ رۆژنامه‌ڤی دا گۆت ژی:(وه‌زاره‌تا دارایی داخواز ژ هه‌موو ده‌سته و وه‌زاره‌تان كریه لیستێن خوه یێن مووچه‌ی بێ پاشكه‌فت ئاماده بكه‌ن).
ل دۆر مووچێن پاشكه‌فتكریێن فه‌رمانبه‌ران، رێباز حه‌ملان ئاشكرا كر كو ئه‌ڤ بابه‌ته د كۆمبوونا بۆری یا جڤاتا وه‌زیران دا هاتیه گه‌نگه‌شه‌كرن و و د بڕیارا ژماره 141 بڕگا دویێ دا دبێژیت: ب دانوستاندنان ل گه‌ل به‌غدا و بزاڤێن رژد دێ كه‌ین بۆ چاره‌كرنا دانا مووچێن بۆری، لێ نابیت وه‌لاتیێن هه‌رێما كوردستانێ وێ چه‌ندێ ژ بیر بكه‌ن كو فاكته‌رێ سه‌ره‌كی یێ قه‌یرانا دارایی و پاشكه‌فتكرنا مووچه‌ی بڕینا بودجا هه‌رێمێ بوو ژ لایێ به‌غدا ڤه، ئانكو دڤێت به‌غدا ژی پشكه‌كا سه‌ره‌كی یا ڤێ پرسێ ل سه‌ر مللێن خوه راگریت بۆ دانا وان قه‌رێن ل بۆری كو ل سه‌ر حوكمه‌تێ ماین ئه‌و ژی پاشكه‌فتا مووچه‌یه.
سه‌باره‌ت ڤه‌گه‌ڕاندنا قه‌رێن حوكمه‌تێ یێن پێشینانان، وه‌زیرێ دارایی گۆت:( ئه‌و پارێ حوكمه‌تێ یێ كو ل ده‌ف خه‌لكی مه‌رج نینه هه‌موو یێ مووچه‌خۆران بیت، خه‌لكه‌ك هه‌یه بازرگانه یان خه‌لكێ ئاسایی یه، ل سالێن بۆری مه پێشینێن ژنئینانێ پیشه‌سازی و چاندنێ یێن داین، ئه‌ڤه پارێ حوكمه‌تێ یه ل ده‌ف خه‌لكی و دڤێت بۆ حوكمه‌تێ بهێڤه ڤه‌گه‌ڕاندن و ئه‌ڤه چه‌ند ساله‌ك بوون ژ به‌ر قه‌یرانا دارایی مه ژێ نه‌دوه‌رگرتن).
ئه‌ڤرۆ نیوز:
سه‌رۆك وه‌زیرێن عیراقێ دێ سه‌ره‌دانا كوردستانێ كه‌ت و پارتى و ئێكه‌تى پێكڤه دێ پرۆژه‌كێ به‌رهه‌ڤ كه‌ن بۆ چاره‌كرنا كێشێن ناڤبه‌را هه‌ولێر و به‌غدا.
ژێده‌ره‌كێ ژ ئه‌نجوومه‌نێ وه‌زیرێن عیراقێ راگه‌هاند، بۆ شرۆڤه‌كرنا چه‌ند پرسێن تایبه‌ت ب هه‌ولێر و به‌غدا، بریاره عادل عه‌بدولمه‌هدى سه‌رۆك وه‌زیرێن عیراقێ سه‌ره‌دانا هه‌رێما كوردستانێ بده‌ت، ب تایبه‌ت پرسا راده‌ستكرنا نه‌فت و بودجێ و كه‌ركووكێ ل گه‌ل به‌رپرسێن هه‌رێمێ دانوستاندنان بكه‌ت.
ئه‌ڤرۆنیوز:
جڤاتا سه‌ركردایه‌تیا پارتى دیموكراتى كوردستان دێ كۆم بیت وتێدا دێ ره‌وشا سیاسى وپرسا پێكئینانا كابینا نوو یا حوكمه‌تا هه‌رێما كوردستانێ هێته به‌حسكرن.
بریاره سوباهى ئێكشه‌مبى 10/3/2019، ل دووڤ مالپه‌رێ كوردستان 24، جڤاتا سه‌ركردایه‌تیا پارتى دیموكراتى كوردستان كۆم ببیت وتێدا دێ ره‌وشا سیاسى ودووماهى پێشهات وگاڤێن پێكئینانا كابینا نوو یا حوكمه‌تا هه‌رێما كوردستانێ وره‌وشا دانوستاندنان ل گه‌ل لایه‌نان ورێككه‌فتنا سیاسى یا پارتى ل گه‌ل هه‌ر ئێك ژ ئێكه‌تیێ وگۆران هێته به‌حسكرن.
هه‌روه‌سا پێشبینى دهێته كرن دوێ كۆمبوونا جڤاتا سه‌ركردایه‌تیا پارتى بریار ل سه‌ر چه‌ند پرسێن تایبه‌ت ب وان بابه‌تان ڤه بهێته دان.
ئه‌ڤرۆنیوز:
قایمقامیا قه‌زا ناڤه‌ندا هه‌ولێرێ هوشداریێ دده‌ته وان كه‌سێن بهایێن كه‌لوپه‌لان بلند دكه‌ن ودیاركر ئه‌و چه‌نده ژێ ناهێته قبوولكرن وب توندى دێ هێنه سزادان ووه‌لاتى دشێن لژنێن قایمقامیێ ئاگه‌هدار بكه‌ن.
قایمقامیا قه‌زا ناڤه‌ندا هه‌ولێرێ ئه‌ڤرۆ شه‌مبیێ 9/3/2019 دئاگه‌هداریه‌كێ دا بۆ هه‌موو بازرگان وكاسبكاران دبێژیت” پشتى كو دوهى ئه‌ینیێ 8/3/2019 سه‌رۆك وه‌زیرێن هه‌رێما كوردستانێ بریارا هه‌لوه‌شاندنا پاشكه‌فتێ مووچێ فه‌رمانبه‌ران راگه‌هاندى، بوویه جهێ دلخوه‌شیا هه‌موو ئاكنجیێن هه‌رێما كوردستانێ، له‌وما ب پێدڤى دزانین هه‌موو بارزگان وكاسبكارێن سنوورێ پارێزگه‌ها هه‌ولێرێ ئاگه‌هدار بكه‌ین كو ب چو شێوه‌كى ناهێته قبولكرن گۆرانكارى دبهایێن كه‌لوپه‌لان دا بهێته كرن كو ببیته ئه‌گه‌رێ بلند بوونا وان”.
دیاركر ژى” هه‌ر كه‌سه‌كێ سه‌رپێچیێ بكه‌ت، ل دووڤ قانوونێ ب توندترین شێوه دێ پێرابوونێن قانوونى ل به‌رامبه‌ر هێنه وه‌رگرتن”.
خویاكر ژى” هه‌موو لژنێن قایمقامیا هه‌ولێرێ دێ ب هوورى چاڤدێریا بازارى كه‌ن وبۆ ڤێ مه‌ره‌مێ داخوازێ ژوه‌لاتیان دكه‌ین هه‌ر جهه‌كێ گورانكاریێ دبهایان دا بكه‌ت، مه ئاگه‌هدار بكه‌ن ل سه‌ر ڤان هژمارێن ته‌له‌فونان
07502224466
07502224488
ئەڤرۆ نیوز، هۆشەنگ تاجر:
بەرپرسەکێ کوردی ل رۆژئاڤایێ کوردستانێ کو نەخواست ناڤێ خوە ئاشکرا بکەت بۆ ئەڤرۆ نیوز دیار کر کو هێزەکا نوو یا کوردی ب پشتەڤانیا تورکیا هاتیە ئاڤاکرن و گۆت: (هێزا نوو ب ناڤێ هەڤپەیمانیا سەربخوە یا کوردی ل سووریێ هاتیە ئاڤاکرن، ڤێ هێزێ هەتا نها سێ کۆمبوون گێراینە و کۆمبوونا وان یا دووماهیێ ل باژێرێ مێرسینێ یێ تورکیا بوویە، بەری نها ژی ل باژێرێ عەفرینێ کۆمبوونەکا وان هاتیە گێران).
هەمان ژێدەری ئەو یەک ژی دیار کر کو ل گۆر پێزانینێن ل بەر دەستێ مە ئەڤ هێزە ب پشتەڤانیا تورکیا هاتیە ئاڤاکرن، چونکو د کۆمبوونا ل مێرسینێ دا ل هۆلا کۆمبوونێ ئالایێ تورکیا هاتیە بلندکرن، ئەو یەک ژی نیشا ددەت کو ئەڤ هێزە یان ژ ئالیێ تورکیا ڤە هاتیە ئاڤاکرن یان ژی تورکیا پشتەڤانیا وان دکەت و گۆت: (گەلەک کەسێن رەوشەنبیر، رۆژنامەڤان، پارێزەر و ماموستایێن ئایینی د ڤێ رێکخراوێ دا جه دگرن، لێ ژ بەر کو هەتا نها ب فەرمی نەهاتیە راگەهاندن من نەڤێت بەحسێ چو کەسەکێ بکەم).
ئه‌ڤرۆ نيوز:
سه‌ره‌راى وێ چه‌ندێ كو ئه‌ڤرۆ ده‌واما فه‌رمى نينه، به‌لێ وه‌زاره‌تا دارايى و ستافێ وێ نها ل ده‌وامێ نه و د كۆمبوونێ دانه و كار ل سه‌ر به‌لاڤكرنا مووچه‌ى دكه‌ن.
ب گۆره‌ى ژێده‌ره‌كى ژ وه‌زاره‌تا دارايى و ئابوورى بۆ ئه‌ڤرۆ نيوز ئاشكه‌را كر كو ئه‌ڤرۆ وه‌زاره‌تا دارايى نها د كۆمبوونه‌كا نه‌ئاسايى دانه ب مه‌ره‌ما به‌رهه‌ڤكرنا مووچان ب ره‌نگه‌كى كو هه‌موو مووچان بشێن به‌رى نه‌ورۆزێ بده‌ن، سه‌ره‌راى وان هه‌موو بهێنڤه‌دانێن هه‌ين و ماوێ كێم.
ئاشكه‌را ژى كر كو بۆ وێ مه‌ره‌مێ ل گه‌ل گه‌نجينان ليستا مووچێن داموده‌زگه‌هان ئاماه بكه‌ن و ده‌ست ب به‌لاڤكرنا مووچێ بێ پاشكه‌فت بكه‌ن.
نه‌ڤه‌شارت ژى كو سوبه‌هى دێ ده‌ست ب به‌لاڤكرنا مووچێ ديوانا وه‌زاره‌تا پێشمه‌رگه‌ى يێ هه‌يڤا 12 يێ سالا 2018ێ بێ پاشكه‌فت وه‌رگرن، “دڤێت د ماوێ دو رۆژان هه‌موو وه‌زاره‌ت ليستێن مووچه‌ى بگه‌هيننه وه‌زاره‌تا دارايى بۆ وێ چه‌ندێ د ماوه‌كێ نێزيك دا مووچێن خوه وه‌رگرن”.
ئه‌ڤرۆ نيوز:
ژێده‌ره‌كى ژ وه‌زاره‌تا دارايى و ئابوورى راگه‌هاند كو 100 مليار دينار يێ به‌رهه‌ڤه دا كو دڤێ حه‌فتيێ دا بده‌نه به‌لێنده‌ران و زێده‌تر بۆ وان به‌لێنده‌رايه يێن د كه‌رتێ په‌ترۆلێ دا كارى كرى.
ژێده‌ره‌كێ به‌رپرسێ ژ وه‌زاره‌تا دارايى و ئابوورى ل حوكمه‌تا هه‌رێما كوردستانێ ئاشكه‌را كر كو 100 مليار دينار يێ ئاماده‌يه بۆ دانا قه‌رێن به‌لێنده‌ران و د ڤێ حه‌فتيێ دا، دێ ده‌ست ب به‌لاڤكرنا وان هێته كرن.
ئه‌وى ژێده‌رێ نه‌خواستى ناڤێ وى بهێته ئاشكه‌را كرن ئاماژه ب وێ چه‌ندێ ژى كر كو رێنمايێن تايبه‌ت ژ لايێ وه‌زاره‌تا دارايى ڤه هاتينه دان و ئه‌و به‌لێنده‌ر دێ ب رێژا 20% پارێن خوه وه‌رگرن.
ئاماژه ب وێ چه‌ندێ ژى كريه كو پشكه‌ك ژ وى پاره‌ى بۆ به‌لێنده‌رايه ب گشتى و پشكه‌ك ژى بۆ وان به‌لێنده‌رايه يێن د ناڤا كه‌رتێ په‌ترۆلێ دا كار دكه‌ت.
د دو هه‌يڤێن بۆرى ژى دا وه‌زاره‌تا دارايى و ئابوورى 100 مليار دينار دابوونه به‌لێنده‌ران وه‌كو پشكه‌ك ژ قه‌رێن وان.
ئەڤرۆنیوز، نەوزاد ھلۆری:
ب مەرەما کومکرنا گژ و گیای و سەخبێرکرنا رەزێن خوە، زێدەتری سێ روژایە پتری 15 کەسان چوینە دەڤەرا زێبارێ یا سەر ب ناحیا دینارتە، بەلێ ژبەر فروکێن تورکیا نەشێن بزڤرن مالێن خوە.
مێھڤان زێباری، وەلاتیەکێ گوندێ بامشمش یا سەر ناحیا دینارتێ یت بۆ ئەڤرۆنیوز گۆت: (ب مەرەما کومکرنا گژ و گیا و سەخبێرکرنا رەزێن سماقێ، بابێ من و ھژمارەکا خەلکێ گوندێن زێبارێ، چوینە سەر گوندێن خوە، ئەڤە سێ روژەچوینە وھێشتا نەزڤرینە مال).
زێدەتر گۆت: (روژا ئێکێ و دوویێ ب رێیا تێلەفون مە پەیوەندی ل گەل ئێک ھەبوو، بەلێ ئەڤرۆ مە ب رێیا تێلەفونێ ژی ئاگەھی ل ھەڤدوو نەمایە، ئەڤرۆ ژی فروکێن تورکیا ئەو گوند ودەڤەر بوردومانکرینە، بوردومانکرنا وان جێن وان مەترسیەکا ئێکسەر بو سەر گیانێ وان دروستکریە، دخوازین ژ جھێن شولەژێ ب جدی کار بکەن بو نەھێلانا بوردومانێ، چونکی خەلک ھەژارە و ژیانا وان لسەر ژ و گیا و رەز و بیستان و سماقێ یە).
ئەڤرۆ نیۆز، قائید میرۆ
بڕیارە د وەرزێ دویێ یێ جڤاتا نوونەرێن عێراقێ دا کار لسەر بەرھنگاریا گەندەلیێ بھێتەکرن و پەرلەمانتارەکا کوردژی دبێژیت، عێراق ئێکە ل وەلاتێن گەندەلن و پێدڤیە لێپرسین دگەل گەندەلکاران بھێتەکرن.
ھەدار بارزانی، پەرلەمانتارا پارتی لپەرلەمانێ عێراقێ بۆ ئەڤرۆ نیۆز دیارکر” بڕیارە ئەڤرۆ رۆژا شەمبی دوماھیێ ب بھێنڤەدانا پەرلەمانێ عێراقێ بھێت و ئێکەم کۆمبوونا وەرزێ دویێ دێ ھێتە دەستپێکرن، گورەی کارناما کۆمبوونا پەرلەمانی عادل عەبدولمەھدی سەرۆک وەزیرێن عێراقێ و سەرۆکێ دەستەیا دەستپاکی و سەرۆکێ دیوانا چاڤدێریا دارایی دێ ھێنە گازیکرن بۆ کۆمبوونا ئەڤرۆ.
ھەدار بارزانی گۆتژی” عێراق ئێکە ژوان وەلاتێن زۆرترین گەندەلی تێدا ھەی، چونکە ھژمارەکا زۆرا بادەکێن گەندەلیێ گەھشتینە پەرلەمانی ژی، لەوڕا سامانێ عێراقێ ب ھەروە دھێتەدان، ئەڤەژی بۆیە ئەگەر عێراق ل رێزا پێشیێ یا وەلاتێن گەندەلبیت، بەلێ جڤاتا نوونەران بڕیاردایە ھەموو بزاڤەکێ بکەت بۆ لێپرسینێ ل گەندەلکاران و گورەی قانوونێ دێ ھێنە سزادان.
نيشاندان