ئەڤرۆ نیوز، لەزگین جوقی:
رێکخەرێ چالاکیا ساخکرنا سالڤەگەرا داستانا لومانا بۆ ئەڤرۆ نیوز دیار کر کو ب ئامادەبوونا سەرۆک بارزانی سالڤەگەرا داستانا لومانا ئەڤرۆ 12/12/2018 ل دەمژێر 1:00 نیڤرۆ دێ ب چەندین چالاکیان ل ھۆلا کونفرانسان ل زانکۆیا دھۆک ھێتە ساخکرن.
غازی گەردی، رێکخەری چالاکیا ساخکرنا سالڤەگەرا داستانا لومانا بۆ ئەڤرۆ نیوز دیار کر کو جەنابێ سەرۆک بارزانی دێ پەیڤەکێ پێشکێش کەت وەکو د ناڤ بەرنامێ چالاکیێ دا ھاتیە دیارکرن و دێ چەندین کەسایەتی و کەسوکارێن سەربلندێن شەھیدان و ھژمارەکا مەزن یا مێھڤان بەرھەڤ بن و گۆت: “ئەڤ چالاکیە ژ لایێ کۆڤارا سەنگەر و پێشمەرگە ڤە ب ھەماھەنگیی و ھەڤکاریا فەرماندەیا دھۆکێ و لەشکرێ ئێک و گولان ڤە ھاتیە رێکخستن”.
ناڤھاتی ئاماژە دا وێ چەندێ کو ل سالا 1961 پێشمەرگێ قەرەمان کوردستانێ داستانا لومانا ل شۆرەشا ئیلولێ تۆمارکر د وی دەمی دا ڤێ داستانا مەزن حوکمەتا بەعس نەچارکر بھێن دانوستاندنێ بکەن، چونکو پێشمەرگێ کوردستانێ ل وی دەمی ھژمارەکا مەزن یا لەشکرێ حوکمەتا بەعس وەکو دیل دەستەسەرکرن و گۆت: “د ڤێ چالاکیێ دا ژبلی خواندنا پەیڤان دی پێشانگەھەکا وێنان ھێتە ڤەکرن بۆ جارا ئێکی دێ ھندەک وێنە ھێنە نیشادان یێن شورەشا ئیلولێ و سەرۆک بارزانی و فلمەکێ دیکومینتاری ل سەر داستانا لومانا ل زاویتەی دھێتە نیشادان دگەل بەلاڤکرنا ھژمارەکا مەزن ژ کوڤارا سەنگەر و پێشمەرگە”.

ئەڤرۆ، رێوار مزیری:

رێڤەبەرێ گشتی یێ گەشت و گۆزارێ ل پارێزگەھا دھۆکێ بۆ ئەڤرۆ نیوز دیار کر کو ھەموو بەرھەڤی بۆ ھاتنا گەشیاران بۆ سەرێ سالا 2019ێ ھاتینە کرن و پێشبینی دھێتەکرن بۆ سەرێ سالا نوو ھژمارا ھاتنا گەشتیاران بۆ پارێزگەھا دھۆکێ ژ سالا بۆری زێدەتر بیت و گۆت: “ئاھەنگەکا مەزن بۆ شەڤا سەرێ سالێ دێ ل پارکا نەورۆز ل دھۆکێ ھێتە گێڕان”.

عوبەیدوللا داود، رێڤەبەرێ گشتی یێ گەشت و گۆزارێ ل پارێزگەھا دھۆکێ دیار کر کو ب ھەلکەفتا ھاتنا سەرێ سالا نوو ئەو ب ناڤێ رێڤەبەریا گشتی یا گەشت و گۆزارێ ل پارێزگەھا دھۆکێ پیرۆزباھیێ ل ھەموو خەلکێ ھەرێما کوردستانێ و ب تایبەت یێ پارێزگەھا دھۆکێ دکەت و گۆت: “مە پلانەکا گەلەک باش بۆ ھاتنا گەشیاران بۆ سەرێ سالا نوو دانایە بۆ وێ چەندێ ئەم بشێن ب شێوەکێ گەلەک باش پێشۆازیا گەشتیاران بکەین و نوکە رەوشا ئابووری یا وەلاتیان باشتر لێ ھاتیە و مە ب رێیا تۆرێن جڤاکی دیمەنێن گەلەک جھێن گەشتیاری یێن پارێزگەھا دھۆکێ بۆ ژێری و ناڤەراستا عیراقێ فرێکرینە و سەرەرایی ڤێ چەندێ دێ چەندین چالاکیان ژی ئەنجامدەین ژ بەر ڤێ چەندێ ئەم پێشبینیێ دکەین رێژا ھاتنا گەشتیاران بۆ سەرێ سالا 2019ێ بۆ پارێزگەھا دھۆکێ دێ دو جاران ھندی یا سەرێ سالا 2018ێ بیت”.

ناڤھاتی ئاماژە دا وێ چەندێ کو ئاھەنگەکا مەزن بۆ سەرێ سالا نوو دێ ل شەڤا 31/12/2018ێ ب پشکداریا چەندین ھونەرمەندان ل پارکا نەورۆز د ناڤ سەنتەرێ باژێرێ دھۆکێ دا ھێتە گێڕان و ھەر د ڤێ ئاھەنگێ دا دێ چەندین یاریێن ئاگری ل چرکێن دووماھیا سالا 2018ێ ھێنە ھاڤێتن و سەرەرایی ڤێ چەندێ چەندین کەس دێ جلکێن بابەنۆێلان کەنە بەر خوە و دێ دیاریان ل سەر زارۆیێن ل ئاھەنگێ بەرھەڤ دبن بەلاڤ کەن، ژبلی ڤێ چەندێ ژی وان ھەماھەنگیا گەلەکا باشە ل گەل کەرتێ تایبەت ھەیە و داخواز ژ خودانێن ئۆتێل و مۆتێل و خوارنگەھان کریە جھێن خوە بۆ پێشوازیا گەشتیاران ب خەملینن و ئاھەنگێن ھونەری ب گێڕن و گۆت: “مە شاشەکا مەزن بۆ پیرۆزباھیێن سەرێ سالا نوو و ریکلاما جھێن گەشتیاری و نیشادانا چەندین فلمێن گەشتیاری ل بەرامبەر پارکا نەورۆز کرێ کریە و ژ رۆژا 15/12/2018ێ ھەتا شەڤا 31/12/2018ێ ئەو تشتێن مە ئاماژە پێ کری دێ ل سەر وێ شاشێ ھێنە نیشادان”.

رێڤەبەرێ گشتی یێ گەشت و گۆزارێ ل پارێزگەھا دھۆکێ خویا کر کو ھەر ب ھەلکەفتا ھاتنا سەرێ سالا نوو وان ھژمارەکا بەرچاڤ یا لافیتێن گەشتیاری بۆ پیرۆزباھیا سالا نوو و پێشوازیا گەشتیاران بەرھەڤکرینە و دێ ل دەرگەھێن سەرەکی یێن پارێزگەھا دھۆکێ ھێنە ھەلاویستن، ھەروەسا وان خودانێن مۆل و فرۆشگەھێن مەزن ژی ھانداینە کو داشکاندنێ بۆ گەشتیاران د کەلوپەلێن خوە دا بکەن و سەرەرایی ڤێ چەندێ وان ھەماھەنگیەکا باش ل گەل سازیێن پەیوەندیدار وەکو ئاسایش و پۆلیس و پۆلیسێن ھاتنوچوونێ و دەزگەھێن خزمەتگوزاری ھەیە بۆ وێ چەندێ پتر خزمەتا گەشتیاران بھێتەکرن و گۆت: “مە چو ئاریشە د جھێ ڤەحواندنا گەشتیاران دا ل پارێزگەھا دھۆکێ نینن، چونکی مە ھژمارەکا باش یا ئۆتێل و مۆتێلان ھەنە و زێدەباری ڤێ چەندێ مە جھێن یەدەک ژی بۆ حەواندنا گەشتیاران ھەنە”.