ئەڤرۆ نیوز، لەزگین جوقی:

ئەندامەکی جڤاتا پارێزگەھا نەینەوا دیار کر کو ھەتا نوکە رەڤاندیێن ئێزدی د ناڤ خێزانیێن مووسل دا ھەنە و بەردەوام تووشی توندوتیژیێ دبن.

خەلیل شەمۆ، ئەندامێ جڤاتا پارێزگەھا نەینەوا بۆ ئەڤرۆ نیوز دیار کر کو گەلەک حالەت ھەبووینە و کچێن رەڤاندی یێن ژ ناڤ مالان ھاتینە رزگارکرن ھەتا نوکە ب سەدان رەڤاندیێن ئێزدی ھەنە ھێشتا ب نھێنی د ناڤ مالان دا د ڤەشارتینە و بەردەوام تووشی توندوتیژیی دبن، پێدڤیە ھەموو بزاڤ بھێنە کرن ب شێوەیەکێ بەرفرەھتر کاری ل سەر رزگارکرنا رەڤاندیێن ئێزدی بھێتە کرن و گۆت: “ھەر خێزانەکا ل مووسل کچەک یان ژنەکا ئێزدی د ناڤ مالا وی دا ھەبیت و رادەستی ھێزین ئەمنی نەکەت ئەو خێزانا مووسل دێ تووشی لێپرسینێ و سزادانەکا توند بیت”.

ناڤھاتی ئاشکرا کر کو گەلەک کچێن رەڤاندی یێن ئێزدی ھێشتا ل نک وان خێزانان ماینە یێن ل سەر دەمێ تیرۆرستێن داعش ئەو رەڤاندیێن ئێزدی برینە د ناڤ مالێن خوە دا و گۆت: “ئەم دەنگێ خوە دگەل دەنگێ کەسوکارێن رەڤاندیێن ئێزدی بلند دکەین بۆ وێ چەندێ ھەموو کار بۆ رزگارکرنا رەڤاندیێان بھێنەکرن”.

ئەڤرۆ نیوز، قائید میرۆ:

بەرپرسەکێ کورد ل کەرکووکێ ئاشکرا کر کو پێلا تەعریبێ یا بەردەوامە بۆ داگیرکرنا ئەردێ کوردان و پشتی روودانێن ١٦ی ئۆکتۆبەرێ عەرەبێن بەدو ھاتینە دەڤەرێ و گەفێن داگیرکرنا ئەردێ کوردان دکەن.

محەمەد کەمال، سەرۆکێ لیستا برایەتی ل جڤاتا پارێزگەھا کەرکووکێ بۆ ئەڤرۆ نیوز دیار کر کو ھژمارەکا زۆرا عەرەبێن شۆفێنی ھاتینە سنوورێ پارێزگەھا کەرکووکێ، ئەڤە ددەمەکی دایە ل سالێن بۆری د چارچوڤێ مادێ ١٤٠ یێ دستوورێ عیراقێ دا مفاداربووینە، بەلێ پشتی روودانێن ١٦ی ئۆکتۆبەرێ دیسان ڤەگەڕیاینە کەرکووکێ و پارێزگارێ سەپاندیێ کەرکووکێ ژی دەست د ئینانا عەرەبێن شۆفێنی بۆ کەرکووکێ دا ھەیە.

محەمەد کەمال ئاماژە دا وێ چەندێ کو ئەو عەرەبێن ھاتینە کەرکووکێ و دخوازن ئەردێ کوردان داگیر بکەن دبێژن عەرەبێن بەدو کو ئەو عەرەب د بێ رەگەزناما عیراقینە و ل سەر سنورێن د ناڤبەرا سووریا و عیراق و کوێتێ د ئاکنجینە، ددەمێ خوە دا سەدام حسێن ئیناینە سەر ئەردێ کوردان ل کەرکووکێ.