ئه‌ڤرۆنيوز:

هێزێن پێشمه‌رگه‌ى وهه‌ڤپه‌يمانان ل سنورێ قه‌زا خورماتوو ئوپه‌راسيۆنه‌كا هه‌ڤپشك ئه‌نجامدا.

ژێده‌ره‌كێ له‌شكرى راگه‌هاند، ئه‌ڤرۆ هێزێن پێشمه‌رگه‌ى وهه‌ڤپه‌يمانان ل سنورێ قه‌زا خورماتوو ئۆپه‌راسيۆنه‌كا هه‌ڤپشك ئه‌نجامدا وسێ چه‌كدارێن داعشێ تێدا هاتنه‌ كوشتن.

گۆت ژى” ئارمانجا ئۆپه‌راسيۆنێ گه‌ريانه‌ ل دووڤ پاشمايێن چه‌كدارێن داعشێ ل وى سنورى”.

دياركر”دئۆپه‌راسيۆنێ دا سێ چه‌كدارێن داعشێ هاتن كوشتن وژئه‌گه‌رێ په‌قينا بۆمبه‌كێ ژى سێ پێشمه‌رگه‌ بريندار بوون وخوه‌شبه‌ختانه‌ برينێن وان دسڤكن وهاتينه‌ هنارتن بۆ نه‌خوه‌شخانا قه‌زا كفرى وئۆپه‌راسيۆن ب سه‌ركه‌فتيانه‌ ب دووماهى هات”.

ئه‌ڤرۆنيوز:

جێگرێ سه‌رۆكێ په‌رله‌مانێ كوردستانێ، جه‌عفه‌ر ئێمينكى، راگه‌هاند، ئێك ژ بريارين ديرۆكى كو خۆلا چارێ يا په‌رله‌مانێ كوردستاني ده‌ركرين، هنارتنا پێشمه‌رگه‌ى بوو بۆ كۆبانى ژبۆ به‌رگريكرنێ ژ وى باژێرى ورێگرتنێ ل داگيركرنا وى ژلايێ چه‌كدارێن داعشێ ڤه‌، هه‌روه‌سا ريفراندۆم بۆ سه‌ربخوه‌يا كوردستانێ وچه‌ندين بريارێن دى.

ئه‌ڤرۆ چارشه‌مبى 31/10/2018 دووماهى روونشتنا خۆلا چارێ يا په‌رله‌مانێ كوردستانێ ب رێڤه‌چوو، جێگرێ سه‌رۆكێ په‌رله‌مانى ژى ئاشكراكر كو ل ده‌مێ چار سالێن كاركرنا په‌رله‌مانێ كوردستانێ 31 قانوون ده‌ركرن.

جه‌عفه‌ر ئێمينكى، جێگرێ سه‌رۆكێ په‌رله‌مانێ كوردستانێ دداخۆيانيه‌كا رۆژامه‌ڤانى دا گۆت” سه‌ره‌راى كێماسيان وناكۆكيا سياسى، په‌رله‌مانێ كوردستانێ دگه‌له‌ك پرسان دا يێ سه‌ركه‌فتى بوو، ب تايبه‌ت بريارا هنارتنا پێشمه‌رگه‌ى بۆ كۆبانى وريفراندۆم بۆ سه‌ربخوه‌يا كوردستانێ وچه‌ندين بريارێن دى”.

ئێمينكى گۆت ژى” هنارتنا پێشمه‌رگه‌ى بۆ كۆبانى برياره‌كا ديرۆكى بوو، خه‌لكێ هه‌رچار پارچێن كوردستانێ ژى ب وێ بريارێ خوه‌شحال بوون، ئه‌ڤه‌ ژى نيشانا ب هێزيا هه‌رێما كوردستانێ دياركر كو دشێت هاريكاريا پارچێن دى بكه‌ت، ئه‌و برياره‌ ژى يا ب ساناهى نه‌بوو، بريارا سه‌رۆك بارزانى بوو وپه‌رله‌مانێ كوردستانێ ژى په‌سه‌ندكر، ئه‌ڤه‌ ژى بۆ جهێ حێبه‌تيا خه‌لكێ جيهانێ كو كوردستانێ ئه‌و هێزه‌ هه‌بيت كو نه‌كو تنێ خوه‌ بپارێزيت، به‌لكو عيراقێ وكۆبانى ژى بپارێزيت”.

جه‌عفر ئێمينكى به‌حسێ ريفراندۆما سه‌ربخوه‌يا هه‌رێما كوردستانێ ژى كر كو تێدا زێدتر ژ 92% ژ پشكداربوويێن ريفراندۆمێ ب (به‌لێ) ده‌نگ بۆ سه‌ربخوه‌يا كوردستانێ دا ودبێژيت” بريارا ريفراندۆمێ، برياره‌كا دى بوو ژ بريارێن كو په‌رله‌مانێ كوردستانێ ده‌نگ ل سه‌ر داى”.

ئه‌ڤرۆنيوز:

سه‌رۆكێ جڤاتا قه‌زا شنگالێ راگه‌هاند، په‌كه‌كه‌ خه‌لك وچه‌كدار ولايه‌نگرێن خوه‌ هاندايه‌ خوه‌نيشدانان دژى زڤرينا ئيدارا شه‌رعى يا شنگالێ ئه‌نجام بده‌ن.

وه‌يس نايف، سه‌رۆكێ جڤاتا قه‌زا شنگالێ گۆت” پشتى كۆمبوونا ئيدارا پارێزگه‌ها نه‌ينه‌وا وئيدارا قه‌زا شنگالێ، بريار هاته‌ دان ئه‌ڤرۆ چارشه‌مبى ئيدارا شه‌رعى يا شنگالێ بزڤريت قه‌زا شنگالێ، به‌لێ ل سپێدێ‌ په‌كه‌كه‌ لايه‌نگر وهژماره‌كا چه‌كدارێن خوه‌ هانداينه‌ بۆ رێگريكرنێ ل زڤرينا ئيدارا قه‌زايێ.

ناڤبرى زێده‌تر بۆ ئاژانسا ئه‌نادۆل يا ده‌نگوباسان گۆت”ئاشكرايه‌ په‌كه‌كێ نه‌ڤێت ئارامى وسه‌قامگيرى بۆ شنگالێ بزڤريت، له‌وما نه‌رازيبوونێ دژى زڤرينا ئيدارا شنگالێ دياردكه‌ت، مه‌ ژى داخواز ژ له‌شكرێ عيراقێ كريه‌ خرڤه‌بوونا چه‌كدار ولايه‌نگرێن په‌كه‌كه‌ به‌لاڤه‌ بكه‌ت وزێره‌ڤانيا ئيدارا قه‌زايێ ب ستوويێ خوه‌ڤه‌ بگريت تاكو بزڤرنه‌ شنگالێ.

ل دۆر چاره‌نڤيسێ په‌كه‌كێ پشتى زڤرينا ئيدارا شه‌رعى يا شنگالێ، نايف سه‌يدۆ رێڤه‌به‌رێ ناحيا سنوونێ يا سه‌ر ب قه‌زا شنگالێ ڤه‌ گۆت” رێككه‌فتنا ئيدارا قه‌زا شنگالێ ل دۆر زڤرينا ئيدارا شه‌رعى يا قه‌زايێ ي ل گه‌ل حوكمه‌تا عيراقێ وئيدارا پارێزگه‌ها نه‌ينه‌وا هاتيه‌ كرن، دخوازين سه‌قامگيرى ل سنوورێ شنگالێ هه‌بيت وده‌ليڤه‌ ب چو گرۆپه‌كا نه‌ دستوورى نه‌هێته‌ دان دژى به‌رژه‌وه‌نديێن شنگالێ وئيدارا شنگالێ كار بكه‌ت”.

ئه‌ڤرۆنيوز:

مالپه‌رێ https://www.accuweather.com  كو مالپه‌ره‌كێ تايبه‌ته‌ ب ره‌وشا سه‌قاى ڤه‌ ل جيهانێ، به‌لاڤكر كو ل رۆژا 6/11/2018 پێله‌كا بارانێ دێ پارێزگه‌هێن هه‌رێما كوردستانێ ڤه‌گريت.

وى مالپه‌رى دياركر ژى كو ئه‌و پێلا بارانێ دێ بۆ ده‌مێ حه‌فت رۆژان يا به‌رده‌وام بيت.