ئەڤرۆ نیوز:
راھێنەرێ فرەنسی و یانا ریال مەدرید زێدان پشتی سەرکەفتنا ئەڤ شەڤە یا یانا ریال مەدرید ل سەر ئەتلەتیکو بلباو ب سێ گولان بێ بەرامبەر کو ھەر سێ گول ژلایێ ستێرا وێ یا فرەنسی کەریم بن زیما ھاتینە تومارکرن کو وی راھێنەری کەیفخوشحالیا خوە دەربری ب تومارکرنا ھاتریک وی ھێرشبەرێ خوە.
زێدەتر زێدان بوو رۆژناما مارکا دیارکر ئەوی بەری یاریێ ھەست ب وێ چەندێ دکر رەوشا تیما وی گەلەک یا باشە و دێ شێن سەرکەفتنێ تومارکەن و پشتی گولا ئێکێ رەوش بەر ب باشتر ڤە چوو ئەو شیان ب تمامی کونترولا یاریێ بکەن تایبەت ھێرشبەرێ وێ کەریم بن زیما شیا ئاستەکێ گەلەک بلند پێشکێش بکەت .
سەبارەت بن زیمای ئەرێ دبینت ئەو باشترین ھێرشبەرانە ل جیھانێ ناڤبری دیارکر بێ گومان ئەو ھەردەم ھەست ب وێ چەندێ دکەت ئەوی باشترین ھێرشبەر ھەیە ل جیھانێ و ھەموو یانێن جیھانێ خەونا ب ھەبوونا ھێرشبەرەکێ وەکو بن زیمای دبەن کو ئەوی ل دووماھیی چار یاری شیا ھەشت گولان توماربکەت بێ گومان ئەو دێ دبینت باشترین ھێرشبەرە ل جیھانێ.
ل دووماھیێ ناڤبری دیارکر ل سەر ئەوان پێدڤی یە کاربکەن بوو رەوشا تیمێ بەر ب باشتر ببەین ھەتا دووماھیا ڤی وەرزی و پاش ھزر ل وەرزێ بھێت بکەین بوو ب ھێزتر بھێنە دناڤ ھەڤرکیا خول و قارەمانیێن نافخوی و ئورۆپی بوو وەرزێن بھێت.

ئەڤرۆ نیوز،ھەژار مەعروف:
د ھەردو خولێن پلا سێ و دو یێن تورکیا دا پێنچ یانێن کوردی د پشکدارن کو دو ژ ئەوان د شەرێ ھەڤرکیا مسوگەرکرنا خولێ دا نە و ئێک ژی ھەڤرکیا دەربازبوونێ دکەت بوو دەربازبوونێ بوو قوناغا پلەی ئوڤ.
د یاریێن خۆلا پلا دو دا یانا ئامەد سپور ئەوا ھیڤێن دەربازبوونێ بوو قوناغا پلەی ئوڤ ژ دەستدای د یاریا خوە یا ئەڤرۆ دا توشی خوسارەتیەکا مەزن بووی ل سەر دەستێ یانا بودروم سپور ب سێ گولان بێ بەرامبەر ژ چارچوڤێ یاریێن گەرا ٣٢ ژ خولێ کو نوکە ئامەد سپور ل رێزا حەفتێ دھێت ب ٤٩ خالان ھیڤی دەربازبوونێ ژ دەستداینە بوو قوناغا پلەی ئوڤ .
ژلایەکێ دیڤە د یاریێن خۆلا پلا سێ و د یاریێن کوما ئێکێ دا یانا باتمان پەترول سپور شیا مانا خوە مسوگەر بکەت د خولێ دا بەری ب دووماھیی ھاتنا یاریێن خولێ ب دو حەفتیان پشتی ب سەرکەفتی ل سەر یانا کوزان ب دو گولان بێ بەرامبەر ژ چارچوڤێ یاریێن گەرا ٣١ و ب ڤی ئەنجامی باتمان خالێن خوە گەھاندنە ٣٨ خالان و خوە ژ مەترسیا داکەفتنێ قورتالکر .
ژ یاریێن کوما دوێ ژ خۆلا پلا سێ و ژ یاریێن گەرا ٣٢ ھەتا رادەیەکێ ھەرە مەزن یانا وان سپور دەربازبوونا خوە بوو قوناغا پلەی ئوڤ مسوگەرکر پشتی ژ دەرڤەی یاریگەھا خوە شیای سەرکەفتنێ ل سەر یانا سولتان بای توماربکەت ب دو گولان بێ بەرامبەر کو ل دو یاریێن بھێت پێدڤی ب خالەکێ یە .
د یاریێن کوما سێ دا و ژ چارچوڤێ گەرا ٣٢ ھەڤرکیەکا ب ھێز دھێتەکرن بوو شەرێ مانێ دخولێ دا کو یانا جەزیرە سپور نوونەرا جەزیرا بوتان شیا سەرکەفتنەکا گرنگ ل سەر یانا چوروم سپور توماربکەت ب دو گولان بەرامبەر گولەکێ ھیڤێن خوە گەشکرن بوو مانێ دخولێ دا و د یاریەکا دی دا یانا دیاربەکر سپور شیا سەرکەفتنێ ل سەر یانا موگلا سپور توماربکەت ب دو گولان بەرامبەر گولەکێ کو دیاربەکر ھیڤێن دەربازبوونێ بوو قوناغا پلەی ئوڤ ژ دەستداینە و مانا خوە ژی مسوگەر کریا بوو وەرزێ بھێت.

ئەڤرۆ نیوز:
نوونەرا کوردا دخۆلا پلا ئێک یا سوید دا یانا دالکورد پشتی بورینا چار یاریان ژ خۆلێ شیا سەرکەفتنا ئێکێ ل وەرزێ ئەڤ سالە توماربکەت پشتی بەری دەمەکێ کێم شیای سەرکەفتنێ ل سەر یانا میالبی توماربکەت ب دو گولان بەرامبەر گولەکێ.
دڤێ یاریێ دا دەستپێکێ دالکورد ب رێیا یاریزانێ خوە جوسێپ کیسی پێشکەڤت ل دەقیقا ٢٣ و ل نیڤا دوێ یانا میالبی ب رێیا یاریزانێ خوە بەرگسترۆەم ل دەقیقا ٥٨ گولا وەکھەڤیێ تومارکر و بەری ب دووماھیی ھاتنا یاریێ ب دو دەقیقان یانا دالکورد ب رێیا یاریزانێ خوە کەرفالا سیسیکو پێشکەڤت کو یاری ھەر وەکو خوە ما ھەتا دووماھیا فیرکا دادڤانی ب سەرکەفتنا دالکورد ب دو گولان بەرامبەر گولەکێ ب ڤی ئەنجامی دالکورد خالێن خوە گەھاندنە ٤ خالان ژ چار یاریان .