ئه‌ڤرۆنيوز:
شره‌تكاره‌كێ مه‌كته‌با سياسى يا ئێكه‌تى نيشتمانى كوردستان ل دۆر په‌يوه‌نديێن دناڤبه‌را پارتى وئێكه‌تيێ راگه‌هاند، په‌يوه‌نديێن هه‌ردو لايه‌نان دێ ئاسايى بن.
سمكۆ ئه‌سعه‌د، شيره‌تكارێ مه‌كته‌با سياسى يا ئێكه‌تى نيشتمانى كوردستان گۆت” بريارا مه‌كته‌با سياسى يا ئێكه‌تيێ بۆ ئاساييكرنا په‌يوه‌نديێن پارتى وئێكه‌تيێ ئه‌وه كو كێشين مه ل سه‌ر مێزا دانوستاندنێ بهێنه چاره‌كرن، هه‌روه‌سا ئه‌م هه‌ردو لايه‌ن وه‌كو دو لايه‌نێن به‌رپرس مامه‌لێ ل گه‌ل چاره‌نڤيسێ ملله‌تێ خوه بكه‌ين”.
سمكۆى زێده‌تر بۆ باسنيوز گۆت” ئارمانجا ئێكه‌تيێ ئه‌وه ده‌ستهه‌لاتا كوردستانێ ل سه‌ر ئاستێ هه‌موو كوردستانێ يا ئێكگرتى بيت نه‌كو ده‌ڤه‌ر ب ده‌ڤه‌ر بهێته جوداكرن، ئه‌ڤه ئه‌و بناغه كو ئێكه‌تى دخوازيت دانوستاندنێ ورێككه‌فتنێ ل سه‌ر بكه‌ت”.
گۆت ژى” باوه‌ر ناكه‌م پارتى وئێكه‌تى بشێن په‌يوه‌نديێن خوه ببرن، چه‌نكى ئه‌و دولايه‌نه دزانن به‌رژه‌وه‌نديا بلند يا ملله‌تێ مه دسه‌ر به‌رژه‌وه‌نديێن حزبان دايه، هه‌روه‌سا ئێكه‌تى وپارتى هه‌تا نوكه ژبۆ به‌رژه‌وه‌نديا ملله‌تێ كورد خه‌بات وسياسه‌ت كريه، له‌وما چو ده‌مه‌كى په‌يوه‌نديا پارتى وئێكه‌تيێ ناگه‌هيته حاله‌تا دووركه‌فتنێ”.
دووپاتكر كو پارتى وئێكه‌تى دێ كۆمبن ودێ ل سه‌ر مێزا دانوستاندنێ كێشان چاره‌كه‌ن، گۆت ژى”به‌رپرسێن پارتى وئيكه‌تيێ بزاڤا چاره‌كرنا وان كێشان دكه‌ن، چونكى هه‌كه ئه‌و دو لايه‌نه كێشێن خوه چاره نه‌كه‌ن، دبيت زيان بۆ وه‌لاتيان هه‌بيت”.
شيره‌تكارێ مه‌كته‌با سياسى يا ئێكه‌تێ خوياكر ژى”ئاسايي كرنا په‌يوه‌نديێن پارتى وئيكه‌تيێ پێدڤى ب ناڤبه‌ريا چو لايه‌نه‌كێ دى نينه، چونكى پارتى وئێكه‌تى چه‌ندين ساله ڤى وه‌لاتى ب رێڤه‌دبه‌ن وهه‌ر ئه‌و ب خوه ژى لايه‌نێن سيێ وچارێ نه وهه‌ر ئه‌و ب خوه دێ بن ئێك لايه‌ن بۆ چاره‌كرنا كێشان”.
ئه‌ڤرۆنيوز:
ئه‌ندامه‌كێ په‌رله‌مانێ كوردستانێ ژفراكسيۆنا پارتى ديموكراتى كوردستان ده‌ستپێشخه‌ريه‌كا سه‌رۆك مه‌سعود بارزانى بۆ چاره‌كرنا كێشێن هه‌رێما كوردستانێ وپێكئينانا حوكمه‌تا نوو يا هه‌رێمێ ئاشكرا دكه‌ت.
زانا مه‌لا خالد، ئه‌ندامێ په‌رله‌مانێ كوردستانێ ژ فراكسيۆنا پارتى بۆ باسنيوز راگه‌هاند” ده‌نگوباسه‌كێ دلخوه‌شكه‌ر بۆ خه‌لكێ كوردستانێ يێ ب رێڤه وب ده‌ستپێشخه‌ريا سه‌رۆك مه‌سعود بارزانى ل چه‌ند رۆژێن داهاتى گرفتێن دناڤبه‌را پارتى وئيكه‌تيێ ل دۆر پێكئينانا حوكمه‌تا نوو يا هه‌رێما كوردستانێ دێ هێنه چاره‌كرن”.
ل دۆر وێ چه‌ندێ ژێده‌ره‌كى بۆ باسنيوز دووپاتكر كو سه‌رۆك بارزانى داخوازكريه هه‌ردو مه‌كته‌بێن سياسى يێن پارتى وئێكه‌تيێ ب زووترين ده‌م كۆمببن.
ئه‌ڤرۆنيوز:
جڤاتا دادوه‌ريێ يا بلند ل عيراقێ زمانێ كوردى ل سه‌ر لۆگۆيێ خوه يێ نوو لادا، جێگرێ سه‌رۆكێ په‌رله‌مانێ عيراقێ ژى داخوازا رۆهنكرنێ ژ جڤاتا ناڤبرى دكه‌ت.
به‌شير حه‌داد، جێگرێ دويێ يێ سه‌رۆكێ په‌رله‌مانێ عيراقێ دداخۆيانيه‌كا رۆژنامه‌ڤانى دا راگه‌هاند كو وى داخوازا رۆهنكرنێ ژ جڤاتا دادوه‌رى يا بلند ل عيراقێ كريه كو ئه‌گه‌رێ لادانا زمانێ كوردى ل سه‌ر لۆگۆيێ نوو يێ جڤاتا ناڤبرى رۆهن بكه‌ن.
به‌شير حه‌داد گۆت ژى” ئه‌ڤ كارێ جڤاتا دادوه‌رى يا بلند ئه‌نجامداى، به‌رۆڤاژى مادا چار ژ دستوورێ عيراقێ يه وبه‌رۆڤاژى مادێن 3 و 4 يێن قانوونا زمانێن فه‌رمى يه ل عيراقێ يا هژمار 7 يا سالا 2014 ومه نڤيساره‌كا فه‌رمى ئاراسته‌ى جڤاتا ناڤبرى كرى ودێ دووڤچوونا جدى ژى بۆ كه‌ين ودێ مه هه‌لويست ژى هه‌بيت”.
به‌رى ده‌مه‌كى جڤاتا دادوه‌رى يا بلند ل عيراقێ، لۆگۆيێ خوه گوهارتيه ونڤيسينا كوردى ل سه‌ر لادايه وتنێ زمانێ عه‌ره‌بى وئينگليزى ل سه‌ره.
ئه‌ڤرۆنيوز:
سه‌رۆك مه‌سعود بارزانى ئه‌ڤرۆ پێنجشه‌مبى 21/2/2019 پێشوازى ل ئيره‌ج مه‌سجدى باليۆزێ كۆمارا ئيسلامى يا ئيرانى ل به‌غدا وشانده‌كێ دگه‌لدا كر كو پێكهاتبوون ژ كونسۆلێن ئيرانێ ل هه‌ولێرێ وسلێمانيێ وكه‌ربه‌لا ونه‌جه‌ف.
د كۆمبوونه‌كێ دا ره‌وشا سياسى يا ده‌ڤه‌رێ وپرۆسا سياسى ل عيراقێ هاته به‌حسكرن، هه‌روه‌سا به‌حسێ په‌يوه‌نديێن دناڤبه‌را هه‌رێما كوردستانێ وبه‌غدا وهه‌لسه‌نگاندنا ئه‌رێنى بۆ سه‌ره‌دانا بۆرى يا سه‌رۆك بارزانى بۆ به‌غدا هاته كرن.
دپشكه‌كا دى يا ديدارێ دا دووپاتى ل سه‌ر به‌رفره‌هكرنا په‌يوه‌نديان دناڤبه‌را هه‌رێما كوردستانێ وكۆمارا ئيسلامى يا ئيرانى هاته كرن.
پرۆسا سياسى ل هه‌رێما كوردستانێ وگاڤێن پێكئينانا حوكمه‌تێ وپه‌رله‌مانێ هه‌ريمێ ته‌وه‌ره‌كێ دى يێ كۆمبوونێ بوو.
ئەڤرۆ نیوز:
دلاوەر کۆبانی چاڤدێرێ سیاسی یێ رۆژئاڤایێ کوردستانێ بۆ ئەڤرۆ نیوز دیار کر کو بەرپرسەکێ تەڤگەرا جڤاکا دیموکراتیک بۆ من دیار کریە حەفتیا بۆری شاندەکێ ئەمریکا سەرەدانا ئورۆپا کرینە و داخواز ژ چەندین وەلاتێن ئورۆپا ب تایبەتی ژی بریتانیا، فرەنسا و ئەلمانیا کرینە کو پشتی ڤەکێشانا هێزێن ئەمریکا ئەو هێزەکا هەڤپشک رەوانەی رۆژئاڤایێ کوردستانێ بکەن.
ناڤهاتی راگەهاند کو ل گۆر ئاگاهیێن بەرپرسێ تەڤدەمێ دایە من وەلاتێن ئورۆپا داخواز ئەمریکا رەت کرینە و فرەنسا ب رەنگەکێ ئاشکرا دیار کریە کو هەکە ئەمریکا هێزێن خوە ڤەکێشیت ئەو ژی دێ نەچار بن پشتی دەمەکێ ژ سووریێ دەرکەڤن.
ئەڤرۆ نیوز ، عەلی حاجی :
ل دور ڤێ چەندێ سەگڤان سالح خوەدانێ سەنتەرێ سالح بۆ ئەڤرۆ نیوز گوت: (ئەڤ سەنتەرە من ل سەر داھاتێ خوە بۆ زارۆێین بێ سەمیان ڤەکریە، دناڤ سەنتەرێ مە جھێ ڤەحەواندنێ ھەیە و ھەر دیسان ھەمی پێدڤیێن ڤان زارۆیان دێ ب ستویێ خوەڤە گرین، ھەر دیسان ئەو زارۆێین ژ لایێ سەنتەرێ مەڤە ھاتینە وەرگرتن دێ رەوانەی قوتابخانێ و باخچەی ژی کەین) .
ناڤھاتی ئەو چەندە ژی گوت: ( دقوناغا دەستپێکی دا مە ١١ زاروێین بێ سەمیان وەرگرتینە و بەردەوام پەیوەندی ب مە دھێتە کرن بەلێ پشتی دیڤچوونا وان زارۆێین ناڤێن خوە تومار کری دھێتە کرن، هەکە ئەو زارۆ بێ سەمیان بن دێ رێژەیەکا دی ژی ھێنە وەرگرتن، مەرەما من ژ ڤی پرۆژەی ئەوە ھاریکاریا زارۆێین بێ سەمیان بکەین و چاڤدێریەکا باش ل سەر وان زارۆیان بھێتە کرن، ل داھاتی دا مە ئەو ھزر ھەیە ئاڤاھیەکێ تایبەت و مەزن بۆ سەنتەری ڤەکەین دا کو بشێین رێژەیەکا باشتر یا زارۆێین بێ سەمیان وەربگرین ).
ئەڤرۆ نیوز، عەلی حاجی:
ژێدەرەکێ نێزیک ژ پەرلەمانتارێ کوردستانێ چیا حەمیدی بۆ ئەڤرۆ نیوز دیار کر پشتی چیا حەمیدی مووچەیێ خوە یێ ئێکێ وەکو ئەندامێ پەرلەمانێ کوردستانێ وەرگرتی ھەمی پێشکێشی رێڤەبەریا شەھید و ئەنفالکریان ل زاخۆ کر .
وی ژێدەری ئەو چەندە ژی گوت: (ھەر چەندە چیا حەمیدی د ھەوا بانگەشەیا ھەلبژارتنا دا چو سوزەک نەدابوو دێ مووچەیێ خوە تەرخان کەت بۆ جھێن پێدڤی، بەلێ پشتی مووچەیێ خوەیێ ئێکێ وەرگرتی ھەمی پێشکێشی رێڤەبەریا شەھید و ئەنفالکریان ل زاخۆ کر و ب ئامادەبوونا رێڤەبەری ئەو پارە ھەمی ھاتنە رادەست کرن ).
وی ژێدەری زێدەتر گوت: (د بەرنامەیێ پەرلەمانتار چیا حەمیدی دایە پشکەکێ ژ مووچەیێ خوەیێ ھەیڤانە پێشکێشی جھێن پێدڤی بکەت و ھەر دیسان ژی پێشکێشی ھێزێن پێشمەرگەی بکەت و زێدەتر خزمەتا خەلکی بکەت).
نيشاندان