ئه‌ڤرۆ نيوز، نيوار محه‌مه‌د سه‌ليم:

په‌يڤدارێ فراكسيۆنا پارتى ديموكراتى كوردستان ل په‌رله‌مانێ كوردستانێ راگه‌هاند كو ده‌نگۆيه‌ك هه‌يه‌ كۆمبوونا ئه‌ڤرۆ يا په‌رله‌مانێ كوردستانێ نه‌هێته‌ كرن، به‌لێ هێشتا چو تشتێ فه‌رمى نينه‌.

پێدڤيه‌ پشتى حه‌فت رۆژان ژ خواندنا دويێ بۆ هه‌ر پرۆژه‌ قانوونه‌كێ، په‌رله‌مانێ كوردستانێ خواندنا سيێ بۆ وێ قانوونێ بكه‌ت و بهێته‌ په‌سه‌ندكرن و بۆ ڤێ مه‌ره‌مێ په‌رله‌مانێ كوردستانێ د نڤيساره‌كێ دا راگه‌هاند كو ئه‌ڤرۆ رۆژا چارشه‌مبى دێ كۆمبوونا په‌رله‌مانێ كوردستانێ ب مه‌ره‌ما خواندنا سيێ و په‌سه‌ندكرنێ بۆ پرۆژێ راستڤه‌كرنا قانوونا سه‌رۆكاتيا هه‌رێما كوردستانێ دێ په‌رله‌مانێ كوردستانێ روونيت.

پێشه‌وا هه‌ورامى، ئاخفتنكه‌رێ ب ناڤێ فراكسيۆنا پارتى ديموكراتى كوردستان ل په‌رله‌مانێ كوردستانێ د داخۆيانيه‌كێ دا بۆ ئه‌ڤرۆ نيوز گۆت: “هه‌تا نها چو تشته‌كێ فه‌رمى بۆ پاشخستنا كۆمبوونا په‌رله‌مانێ كوردستانێ نينه‌ و د دو سێ ده‌مژمێرێن بهێت دا دێ تشته‌ك ديار بيت”.

زێده‌تر گۆت: “هێشتا بۆچوونا پارتى ديموكراتى كوردستان ب ره‌نگه‌كێ فه‌رمى يا ديار نينه‌ و هه‌ر ده‌مێ بڕيار دا، ئه‌م ژى دێ ل گه‌ل وێ بڕيارێ بين”، ده‌رباره‌ى په‌يره‌وێ ناڤخۆ ژى گۆت: “دێ بزاڤێ كه‌ين كاره‌كێ وه‌سان بهێته‌ كرن دژى قانوونێ نه‌بيت”.

ل دووڤ وى پرۆژه‌ى، ده‌زگه‌هێ سه‌رۆكاتیا هه‌رێما كوردستانێ دێ هێته‌ كاراكرن وپشتى حه‌فتیه‌كێ ژى په‌رله‌مانێ كوردستانێ دێ ده‌رگه‌هێ خوه‌ به‌ربژاركرنێ بۆ پۆستێ سه‌رۆكاتیا هه‌رێما كوردستانێ ڤه‌كه‌ت و پاشى سه‌رۆكێ هه‌رێمێ دێ هێته‌ هه‌لبژارتن و ژ لايێ خوه‌ ڤه‌ ئه‌و دێ كه‌سه‌كى ده‌ست نيشان كه‌ت دا كو د ماوێ هه‌يڤه‌كێ دا كابينا خوه‌ يا حوكمه‌تێ رابگه‌هينيت.

نێچیرڤان بارزانى جێگرێ سه‌رۆكێ پارتى دیموكراتى كوردستان، به‌ربژارێ پارتى يه‌ بۆ وه‌رگرتنا پۆستێ سه‌رۆكێ هه‌رێما كوردستانێ.

ئه‌ڤرۆ نیوز:

په‌رله‌مانێ كوردستانێ سوباهى چارشه‌مبى 10/4/2019  دێ كۆمبیت وپرۆژه‌ پێشنیازا كاراكرنا ده‌زگه‌هێ سه‌رۆكایه‌تیا هه‌رێما كوردستانێ دێ په‌سه‌ند كه‌ت.

كۆمبوونا په‌رله‌مانێ كوردستانێ د ده‌مه‌كى دایه‌ كو پێشتر دو جاران خواندن بۆ وى پرۆژى قانوونێ هاتیه‌ كرن وپارتى وگۆران ژى پشته‌ڤانی ل په‌سه‌ندكرنا پرۆژه‌ى دكه‌ن.

وەیسی سەعید، ئه‌ندامێ په‌رله‌مانێ كوردستانێ ژ فراكسیۆنا پارتى دیموكراتى كوردستان د داخۆیانیه‌كا رۆژنامه‌ڤانى دا گۆت” د وێ كۆمبوونێ دا پرۆژه‌ قانوونا پێشنیازكرى بۆ كاراكرنا سه‌رۆكاتیا په‌رله‌مانێ كوردستانێ دێ هێته‌ په‌سه‌ندكرن”.

زێده‌تر بۆ وشه‌ گۆت” هه‌تا نوكه‌ چو كێشه‌ك ل به‌رده‌م په‌سه‌ندكرنا پرۆژه‌ى نینه‌ ول دووڤ قانوونێ ژى هه‌ر پرۆژه‌ك پشتى دو جاران خواندن بۆ دهێته‌ كرن، دهێته‌ په‌سه‌ندكرن”.

ل دووڤ وى پرۆژه‌ى، ده‌زگه‌هێ سه‌رۆكاتیا هه‌رێما كوردستانێ دێ هێته‌ كاراكرن وپشتى حه‌فتیه‌كێ ژى په‌رله‌مانێ كوردستانێ دێ ده‌رگه‌هێ خوه‌ به‌ربژاركرنێ بۆ پۆستێ سه‌رۆكاتیا هه‌رێما كوردستانێ ڤه‌كه‌ت وپاشى سه‌رۆكێ هه‌رێمێ دێ هێته‌ هه‌لبژارتن”.

دهێته‌ زانین نێچیرڤان بارزانى جێگرێ سه‌رۆكێ پارتى دیموكراتى كوردستان یێ به‌ربژاره‌ بۆ وه‌رگرتنا پرستێ سه‌رۆكێ هه‌رێما كوردستانێ.

ئه‌ڤرۆ نیوز:

ئه‌ندامه‌كێ سه‌ركردایه‌تیا پارتى دیموكراتى كوردستان ئاشكراكر كو دو پێشنیاز ل دۆر ئه‌نجامدانا هه‌لبژارتنێن جڤاتێن پارێزگه‌هێن عیراقێ یێن هه‌ین، به‌لێ هێشتا بریارا دووماهیێ نه‌هاتیه‌ دان.

خسرۆ گۆران، ئه‌ندامه‌كێ سه‌ركردایه‌تیا پارتى دیموكراتى كوردستان وبه‌رپرسێ ده‌زگه‌هێ هه‌لبژارتنێن پارتى د داخۆیانیه‌كا رۆژنامه‌ڤانى دا گۆت” چو بریار نه‌هاتینه‌ دان بۆ ئه‌نجامدانا هه‌لبژارتنێن جڤاتێن پارێزگه‌هێن عیراقێ، تنێ پێشنیازه‌ ل 16/11/2019 بهێنه‌ ئه‌نجامدان ئه‌و ژى پێشنیازا كۆمسیۆنا هه‌لبژارتنێن عیراقێ یه‌، هێشتا نه‌ په‌رله‌مانێ عیراقێ ونه‌ سه‌رۆك وه‌زیرێن عیراقێ بۆچوونێن خوه‌ ل سه‌ر نه‌داینه‌، به‌لێ دو بۆچوون د ناڤ په‌رله‌مانێ عیراقێ دا یێن هه‌ین، هنده‌ك لایه‌ن دخوازن ل دووماهیا سالا 2019 هه‌لبژارتن بهێنه‌ ئه‌نجامدان وهنده‌ك دبێژن كو ل 2020 بهێنه‌ ئه‌نجامدان”.

گۆت ژى” هێشتا زوویه‌ پارتى بۆچوونا خوه‌ ل دۆر ڤێ چه‌ندێ ده‌رببریت، هه‌ر ده‌مێ بریار هاته‌ دان كو هه‌لبژارتن بهێنه‌ ئه‌نجامدان، دێ مه‌ ژى ئاخڤتنا خوه‌ هه‌بیت”.

دیاركر ژى” ل دووڤ ڤێ ره‌وشا نوكه‌، هه‌موو قه‌وارێن سیاسى یێن كوردستانێ ل كه‌ركووكێ وخانه‌قینێ وشنگالێ ومه‌خموورێ دێ ده‌نگێن كێمتر ئینن، له‌وما بێ ئاسایی كرنا ره‌وشێ، دێ كورد زیاندارێن ئێكێ بن د هه‌لبژارتنان دا”.

دووپاتكر ژى” پێدڤیه‌ سه‌ركردایه‌تیا سیاسى یا كوردستانێ پشتى پێكئینانا كابینا نوو یا حوكمه‌تا هه‌رێمێ، بزاڤێ بكه‌ت ره‌وشا ده‌ڤه‌رێن پشتى 16 ئوكتوبه‌رێ گوهۆرین ب سه‌ر دا هاتین، بهێته‌ ئاسایى كرن، ژبلى وێ چه‌ندێ چه‌ندین باده‌ك د ناڤبه‌را هه‌ولێرێ وبه‌غدا یێن هه‌ین كو پێدڤى ب گاڤێن جدى نه‌، پشكه‌ك ژ وان ژى بابه‌تێن په‌ترۆلێ وپشكا هه‌رێما كوردستانێ، مووچێ پێشمه‌رگه‌ى وبابه‌تێ مادێ 140″.