ئەڤرۆ نیوز:
نوونەرێ تایبەت یێ ئەمریکا بۆ کاروبارێن سووریێ جێمز جێفری راگەهاند کو پرۆسێسا ڤەکێشانا مە ژ سووریێ دێ ب هەماهەنگی ل گەل هەڤپەیمانێن مە بیت، ئەم ب ئێکجاری هێزێن خوە ژ سووریێ ڤەناکێشین و دێ ل گەل هەڤپەیمانێن خوە چاوا ڤەکێشانێ گەنگەشە کەین و دێ ڤەکێشان ژی پێنگاڤ ب پێنگاڤ بیت.
نوونەرێ تایبەت یێ ئەمریکا ئەو یەک ژی دیار کر کو ئەم چو پێنگاڤەکێ ناهاڤێژین کو زیانا خوە بۆ هەڤپەیمانێن مە ل سووریێ هەبیت، ب تایبەتی ژی یێن شەرێ داعشێ کری و قوربانیێن مەزن دایی ئەم وان ب تنێ ناهێلین.
ئەڤرۆ نیوز، نەوزاد هلوری:
دچارچوڤێ راگەهاندنا داتا و ئامارێن سێ سالێن بوری یێن ڤەکرنا نەخوشخانا گشتی یا بلێ ل دەڤەرا بارزان، ئاخفتنکەرێ وەزارەتا ساخلەمیێ یا حوکمەتا هەرێما کوردستانێ دیارکر کو حوکمەتا هەرێما کوردستانێ ب پشتەڤانیا هەر دو وەزارەتێن دارایی وسامانێن سرۆشتی لسەر خزمەتکرن و دابینکرنا دەرمان و خزمەتکرنا هەموو نەخوشخانە و بنگەهێن ساخلەمیێ ل ناڤخوە و دەرڤەیی باژێری بەردەوامە ب تایبەتی بۆ دەرڤە.
رێڤەبەرێ نەخوشخانا گشتی یا بلێ بۆ ئەڤرۆ نیوز دیارکر کو پتری 50% ژ وان نەخوشێن قەستا نەخوشخانا بلێ دکەن خەلکێ دەڤەرێن دەرڤەیی دەڤەرا بارزانن ب تایبەتی دەڤەرێن ئاکرێ و سوران و ئامێدیێ و شێلادزێ.
ئه‌ڤرۆ نيوز، نيوار محه‌مه‌د سه‌ليم:
سه‌رۆكێ ده‌مى يێ په‌رله‌مانێ كوردستانێ راگه‌هاند كو هه‌كه رێكه‌فتنا سياسى يا پارتى و ئێكه‌تى سه‌رنه‌گريت ژى، سوبه‌هى رۆژا دوشه‌مبى كۆمبوونا په‌رله‌مانێ كوردستانێ دێ هه‌ر هێته كرن و سه‌رۆكاتيا په‌رله‌مانى هێته هه‌لبژارتن، هه‌كه سه‌رۆكێ په‌رله‌مانى نه‌هێته هه‌لبژارتن ژى.
ل دووڤ راگه‌هاندنه‌كا په‌رله‌مانێ كوردستانێ بڕياره سوبه‌هى رۆژا دوشه‌مبى رێكه‌فتى 18ى شوباتا 2019ێ كۆمبوونا په‌رله‌مانێ كوردستانێ بۆ هه‌لبژارتنا ده‌سته‌يا سه‌رۆكاتيا په‌رله‌مانى بهێته ئه‌نجام دان.
رێڤينگ هرۆرى، سه‌رۆكێ ده‌مى يێ په‌رله‌مانێ كوردستانێ راگه‌هاند كو بڕياره سوبه‌هى هه‌ردو جێگر و سه‌رۆكێ په‌رله‌مانى بهێنه هه‌لبژارتن و گۆت: “به‌لێ ژ به‌ر كو هێشتا ئێكه‌تيێ خوه ئێكلا نه‌كريه، دبيت ب تنێ هه‌ردو جێگرێ بهێنه هه‌لبژارتن”.
ده‌رباره‌ى به‌ربژارێن وان هه‌ردو پۆستان ژى هرۆرى گۆت: “جارێ زوويه كانديدان ئاشكه‌را بكه‌ين، ل ده‌سپێكا روونشتنا په‌رله‌مانى ناڤ دێ هێنه ئاشكه‌را كرن”.
ب گۆره‌ى ئه‌و پێزانينێن ل به‌ر ده‌ست ئه‌ڤرۆ نيوز، هه‌ر ئێك ژ بێگه‌رد ته‌له‌بانى و رێواز فايه‌ق به‌ربژارێن ئێكه‌تيێ نه بۆ پۆستێ سه‌رۆكا په‌رله‌مانى كو هێشتا ئێكلا نه‌بوويه و جێگرێ ئێكێ ژى بۆ پارتى يه كو هێمن هه‌ورامى ئێكلا بوويه و جێگرێ دويێ ژى بۆ توركمانايه و به‌ربژار هه‌تا نها ب تنێ مونا قه‌هوه‌چى يه.
سه‌رۆكێ ده‌مى يێ په‌رله‌مانێ كوردستانێ دا زانين كو نها هه‌موو ئاماده‌كراى بۆ ئه‌نجامدانا كۆمبوونا سوبه‌هى هاتينه كرن و گۆت: “هێشتا چو لايه‌نان ب ره‌نگه‌كێ فه‌رمى داخوازا پاشخستنا كۆمبوونا په‌رله‌مانێ كوردستانێ بۆ 48 ده‌مژمێرێن دى نه‌كريه”.
ئێكه‌تى نشتيمانى كوردستان دڤێت كۆمبوونا په‌رله‌مانێ كوردستانێ بۆ 48 ده‌مژمێرێن دى بهێته پاشخستن هه‌تا كو ئه‌و رێكه‌فتنا د ناڤبه‌را وان و پارتى ديموكراتى كوردستان دا دهێته ئيمزا كرن.
ئه‌ڤرۆ نيوز:
بلێسه جه‌بار فه‌رمان، ئه‌نداما سه‌ركرداتيا ئێكه‌تى نشتيمانى كوردستان بۆ كوردستان 24 راگه‌هاند كو ئه‌ڤرۆ دێ دانوستاندن د به‌رده‌وام بن و ئه‌و بزاڤێ دكه‌ت كۆمبوونا په‌رله‌مانى پاش بێخن، دا كو ئه‌و ره‌شنڤيسێ ژ لايێ ئێكه‌تيێ ڤه هاتيه پێشكێش كرن بۆ پارتى رێكه‌فتن ل سه‌ر بهێته كرن و پاشان كۆمبوونا په‌رله‌مانى بهێته كرن.
ئەڤرۆ نیوز، لەزگین جوقی:
بەرپرسێ نڤێسینگەھا رزگارکرنا رەڤاندیێن ئێزدی ل دھۆکێ بۆ ئەڤرۆ نیوز دیارکر کو سنێلەکێ دی یێ ئێزدی ب ناڤێ “دەروێش جاسم حەسەن” یێ 16 سالی خەلکێ گوندێ “وەردیە” یە ئەڤرۆ 17/2/2019 ژ دەستێن تیرۆرستێن داعش ھاتنە رزگارکرن کو ل جینوسایدا شنگال ھاتبوو رەڤاندن.
حسێن کورۆ قائیدی، بەرپرسێ نڤێسینگەھا رزگارکرنا رەڤاندییان یا ب سەر نڤیسینگەھا سەرۆکێ حوکمەتا ھەرێما کوردستانێ ڤە بۆ ئەڤرۆ نیوز دیارکر: “پشتی رزگارکرنا وان فۆرمەک ژ ئالیێ نڤێسینگەھێ ڤە بۆ دھێتە چێکرن و ھەموو داتایێن وان و چیرۆکا وان و شێوازێ رزگارکرنێ و چەند مایە د دەست تیرۆرستان دا و چ ب سەری ھاتیە ھەموو دھێتە دێکیۆمێتکرن، پاشی پشکنینێن ساخلەمیێ بۆ دھێنە کرن کو سازیێن ھەرێمێ و ب تایبەت یێن پارێزگەھا دھۆک رۆلەکێ سەرەکی تێدا گێڕایە ب کارێ خوە رادبن، زێدەباری تێکچوونا وان ژ ھەر دو روویێن ساخلەمی و دەروونی ڤە گەلەک جاران پێدڤی تایبەتمەندیێن دەروونی دبن بۆ وێ یەکێ سەرەدەرییەکا تەمام د گەل دا بھێتە کرن و جارەکا دی بۆ ژیانا نۆرمال بھێتە ڤەگەڕاندن و جھێن حەواندن و پێدڤیێن دەستپێکی پێ دھێنە دان”.
ئەو ژی دیارکر کو ھەتا نھا سێ ھزار و 356 رەڤاندیێن کوردێن ئێزدی ژ سەرجەمێ شەش ھزار و 417 رەڤاندییان ژبن دەستێ تیرۆرستێن داعش ھاتینە رزگارکرن ھەولێن رزگارکرنا ھەموو رەڤاندییان د بەردەوامن، “ھەتا ئێک رەڤاندی مابیت دێ کارێ رزگارکرنێ ژی یێ بەردەوام بیت”.
ئەڤرۆ نیۆز، قائید میرۆ:
بڕیارە سوبەی رۆژا دوشەمبی پەرلەمانێ کوردستانێ بۆ ھەلبژارتنا دەستەیا سەرۆکایەتیا پەرلەمانی کۆم ببیت و پەرلەمانتارەکێ پارتی ژی دیارکر كو ئێک دەنگیەک ھەیە بۆ ب رێڤەچوونا کۆمبوونا پەرلەمانی.
زانا مەلا خالد، پەرلەمانتارێ فڕاکسیۆنا پارتی ل پەرلەمانێ کوردستانێ بۆ ئەڤرۆ نیۆز دیارکر كو پارتی ب تنێ بڕیار ل دۆر کۆمبوونا پەرلەمانی نەدایە، بەروڤاژی د کۆمبوونا ناڤبەرا شاندێ پارتی و ئێکەتیێ بڕیار ھاتیەدان و ھەر چاوان بیت سوبەی رۆژا دوشەمبی دێ کۆمبوون ھێتە ئەنجام دان، ئەف پاشڤەکێشانا ئێکەتیێ ژی بۆ پشکداریا کۆمبوونا پەرلەمانی هه‌تا رادەیەکی ھاتیە چارەکرن و د کۆمبوونا رۆژا ئەینیێ یا پارتی و ئێکەتیێ دا ھەردولا رێکەفتینە ئێکەتی ژی پشکداری کۆمبوونا پەرلەمانی بکەت.
ئەڤی پەرلەمانتارێ پارتی ئاماژەکر كو پارتی دەمێ پێدڤی بۆ پێکئینانا کابینا حوکمەتێ تەرخانکریە، بەلێ د ھەمان دەم دا چاڤەڕێی چو لایەنەکی ژی نابین کو دەم یێ ڤەکری بیت د ھەمبەر دا ھەتا خوە ئێکلا دکەت، ژ بەر کو ئێدى خەلکێ کوردستانێ چاڤەڕێی لایەنێن سیاسی ناکەت.
زانا مەلا خالد گۆت: “د کۆمبوونا سەرۆکێ دەمکی یێ پەرلەمانی د گەل سەرۆکێن فڕاکسیۆنان ژبلی نەوەی نوێ ھەموو فڕاکسیۆنێن پەرلەمانی ئێک دەنگ بووینە کو سوبەی رۆژا دوشه‌مبى ١٨ی شواتێ کۆمبوونا پەرلەمانی دێ بڕێڤە چیت، تنێ ئێکەتیێ گۆتیە دڤێت کۆمبوونا مەکتەبا سیاسی د گەل پارتی بڕیارێ بدەت، نوکە ئەم چاڤەڕێی دیارکرنا بەربژێرا ئێکەتیێ دکەین بۆ وەرگرتنا پۆستێ سەرۆکا پەرلەمانی و دخوازین برادەرێن ئێکەتیێ ئێک بەربژێر پێشکێش بکەن”.
ئەڤرۆ نیۆز، قائید میرۆ:
وەزارەتا گەھاندنا حوکمەتا ھەرێما کوردستانێ ل دۆر ئەرزانکرنا بھایێ ئه‌نترنێتێ ئاماژە ب وێ چەندێ دکەت كو وەزیرێ گەھاندنا عيراقێ ھۆشداری دایە کۆمپانیێن گەھاندنێ و پەیڤدارێ وەزارەتێ ژی دبێژیت، “ب گورەيی بڕیارا وەزارەتا گەھاندنا عيراقێ دڤێت ئاریشا خاڤیا ھێلێن ئه‌نترنێتێ بھێتە چارەسەرکرن و بھا ژی بھێتە كێمكرن”.
ئومێد محەمەد سالح، پەیڤدارێ وەزارەتا ڤەگوھاستن و گەھاندنا حوکمەتا ھەرێما کوردستانێ بۆ ئەڤرۆ نیۆز دیارکر بەری سێ رۆژان وەزیرێ گەھاندنا عيراقێ ل گەل کۆمپانیێن گەھاندنێ و ئه‌نترنێتێ کۆمبوویە و وەزیرێ گەھاندنێ ئەف پەیامە گەھاندیە کۆمپانیا، کو بھایێ کریا بکارئینانا کێبلێ ئه‌نترنێتێ ل سەر کۆمپانیا ٢٥%ێ ئەرزانکریە، ھەتا بھایێ ئه‌نترنێتێ بھێتە ئەرزانکرن ل سەر وەلاتیان.
ئومێد محەمەد سالح ئاماژەکره وێ چه‌ندێ كو ب گورەی بڕیارا وەزارەتا گەھاندنا عيراقێ دڤێت کۆمپانیا باجا خوە بدەنە حوکمەتێ و ئاریشا خاڤیا ھێلێن ئه‌نترنێتێ ژی بھێتە چارەسەرکرن، بەلێ ھێشتا دیار نینە، “ھەكە کۆمپانى د پێگیر نەبن دێ بەغدا چاوا سەرەدەریێ ل گەل دا بکەت”.
ئه‌ڤرۆ نيوز:
رێڤەبەریا گشتیا کەشناسی و بیڤەلەرزێ ل ھەرێما کوردستانێ راگەھاند کو سوبەھی رۆژا سێشه‌مبى رێکەفتی 18ی شوباتا 2019ێ ئەسمان دێ ئه‌وره‌كێ كێم بيت.
پشکا پێشبینیان ل رێڤەبەریا گشتیا کەشناسی و بیڤەلەرزێ ل ھەرێما کوردستانێ د نڤیسارەکێ دا کو دانەک بۆ ئەڤرۆ نیوز رەوانە کرینە راگەھاند کو دهێته پشبينيكرن ئه‌سمان ئه‌وره‌كێ كێم بيت.
پشکا پێشبینیان دایە زایە زانین کو دێ لەزاتیا بایی د ناڤبەرا 5 ھەتا 10کم دا و ماوێ دیتنێ ژی دێ د ناڤبه‌را 8 بۆ 10کم دا بیت، پلێن گەرمێ ژی دێ د ناڤبەرا 6 بۆ 12 پلان دا بن.
نيشاندان