ئەڤرۆ نیوز:
پارتیا بزاڤا نەتەوەپەرست یا تورکیا (مەهەپە) بەری نها داخوازا دوبارە هژمارتنا دەنگێن باژێرێ قەرسێ یێ باکورێ کوردستانێ کربوو، لێ پشتی هژمارتنا دەنگێ چەندین بنگەهان دەنگێ هەدەپێ زێدەتر لێ هات، نها ژی مەهەپە داخوازا هلوەشاندنا هەلبژارتنان ل قەرسێ دکەت.
ل دۆر ڤی بابەتی ژی سەرکەفتیێ هەدەپێ ل قەرسێ ئایهان بیلگەن راگەهاند کو دڤێت هەموو ئالیەک رێزێ ل دەنگێ خەلکی بگریت و هەدەپێ شیایە ل قەرسێ سەرکەڤیت و مەهەپە ژی نەچارە رێزێ ل ئەنجامێن هەلبژارتنان بگریت.
ئەڤرۆ نیوز:
هژمارەکا ئەندامێن پەرلەمانێ ئورۆپا داخواز ژ ئاکپارتیێ کرن کو رێزێ ل ئەنجامێن هەلبژارتنێن باژێرڤانیان بگریت و ل گۆر پیڤەرێن دیموکراسیێ بزاڤان بکەت.
جێگرێ سەرۆکێ کۆمسیۆنا ئورۆپا فرانس تیمەرمانس ژی راگەهاند کو ئاریشێن ل دۆر ئەنجامێن هەلبژارتنان ل ئستەنبۆلێ و گەلەک دەڤەرێن دی هەنە دڤێت بهێنە چارەکرن و ژ بەر هندێ ژی پێدڤیە دەستهەلاتا ئاکپارتیێ رێزێ ل دەنگێ خەلکی بگریت.
ئەڤرۆ نیوز، هۆشەنگ تاجر:
عەلی شەهرامی چالاکڤانێ مافێ مرۆڤان ل رۆژهەلاتێ کوردستانێ بۆ ئەڤرۆ نیوز دیار کر کو ئەڤرۆ وەزیرێ ناڤخوە یێ ئیرانێ عەبدولرزا رەحمانی فەزل دیار کر کو مەترسیا لەهیان ل رۆژێن پێشیا مە دێ ل بیست باژێرێن ئیرانێ هەبیت و ژ بەر هندێ داخوازا چۆلکرنا گەلەک تاخێن وان باژێران هاتیە کرن.
ناڤهاتی راگەهاند کو شەش ژ وان باژێرێن رۆژهەلاتێ کوردستانێ نە کو کەڤنە پارێزگەهێن ئیلام و لورستانێ و رەنگە مەترسی ل سەر چەند باژیرێن کرمانشانێ ژی هەبیت و داخوازا چۆلکرنا چەندین باژێران هاتیە کرن.
عەلی راگەهاند ژی کو ل گۆر دەزگەهێن راگەهاندنا ئیرانێ هەتا نها ژ بەر لەهیان پتر ژ ٧٠ کەسان ل ئیرانێ و رۆژهەلاتێ کوردستانێ جانێ خوە ژ دەست داینە.
ئەڤرۆ نیوز، عەلی حاجی :
پشتی گوندێ شەرانشا مەسیحیان ژ لایێ گوندیان ڤە ھاتیە چول کرن ژ ئەگەرێ بەردەوامیا بەردومانا ھێزێن سوپایێ تورکیا بۆ سەر گوندێ ناڤبری، ماوێ دو روژایە جارەکا دی سوپایێ تورکیا ب ھێجەتا ھەبوونا ھێزێن پەکەکێ ب ٤ توپان ئەو گوندە بوردومان کر.
زێرەڤان موسا رێڤەبەرێ ناحیا دەرکارێ بۆ ئەڤرۆ نیوز گوت : دوھی ل روژا ئەینیێ ل رێککەفتی ٥/٤/٢٠١٩ و ل دەمژمێر ١٢:٤٥ خولەک جارەکا دی سوپایێ تورکیا توپەک ئاراستە کری یە و ئەو توپە دناڤبەرا شەرانشا موسلمانان و مەسیحیان دا کەفتیە بلێ خوەش بەختانە چو زیانێن گیانی نەبوینە ، ھەر دیسان ئەڤرۆ ل روژا شەمبیێ ل رێکەڤتی ٦/٤/٢٠١٩ دەمژمێر ٢:١٥ خولەک جارەکادی سوپایێ تورکیا گوندێ شەرانشا مەسیحیان ب سێ توپان بوردومان کر و زیانێن ماددی ژی بەر وان ھاولاتیان کەڤتینە.
ناڤھاتی ئەو چەندە ژی گوت : توپباران کرنا گوندێ شەرانشێ ددەمەکێ دا بو کو گوندیێن وی کوندی دخاستن کەلو پەلێن خوەیێن ناڤ مالێن خوە دا ڤەگوھێزنە باژێرێ زاخۆ دا کو توشی چو زیانان نەبن بەلێ ددەمەکێ دا توپەک نێزیکی مالێن وان کەفتیە و ترسەکا مەزن خستە د دلێ وان دا و ئێکسەر رەڤینە و گوند ھێلاینە.
ئەڤرۆ نیوز، عەلی حاجی :
د داخویانیەکێ دا راگەھاندنا ساخلەمیا زاخۆ بۆ ئەڤرۆ نیوز دیارکر ئەڤرۆ ل روژا شەمبیێ رێککەفتی ٦/٤/٢٠١٩ ھەوا نیشتیمانی یا ڤاکسیندانا دژی فالنجا زاروکان ل سنورێ دەڤەرا زاخۆ دەست پێکەت و بو ڤێ مەرەمێ مە چەندین تیمێن گەروک بەرھەڤکرینە.
ئەمیر عەلی زێدەتر گۆت: ھەوا نیشتیمانی یا ڤاکسیندانێ دژی فالنجا زاروکان ھەر ئەڤرۆ روژا شەمبیێ رێکەڤتی ٤/٦/٢٠١٩ دەست پێکەت و دێ بەردەوام بیت بۆ ماوێ ٥ روژان و ئەڤ ڤاکسیندانە دێ بو زاروکێن ئێک روژی ھەتا ١٠ سالی بیت و کو د ڤێ ھەوێ دێ زێدەتری ٥ ھزار زاروکان ل سنورێ دەڤەرا زاخۆ ھەمی دا ڤەگریت، بۆ ڤی کاری ٩٩ تیمێن گەروک و ھەردیسان ١٩ سەرپەرشتیار و ٥٥ ترومبێل بەرھەڤ کرینە و بریارە ئەڤ تیمە سەرەدانا ھەمی مالان بکەن.
ئەڤرۆ نیوز:
ئەڤرۆ ل وەلاتێ ئوردن ب پشکداریا سەرۆک بارزانی کۆربەندێ ئابووری یێ جیهانی برێڤە دچیت کو تێدا هزار کەسایەتی ل وەلاتێن جودا جودا یێن جیهانێ پشکدارن.
دهێتە چاڤەرێکرن کو د ڤێ کۆربەندێ دا پرسێن ئاشتیا جیهان، پرسگرێکێن کەشوهەوا و پرسێن ئابووری ل باکورێ ئەفریقیا و رۆژهەلاتا ناڤین بهێنە گەنگەشە کرن.
سەرۆک بارزانی ل سەر ڤەخواندنا فەرمی یا شاهێ ئوردن پشکداری د ڤێ کۆربەندێ دا دکەت.
ئەڤرۆ نیوز، نەوزاد ھلۆری:
ئەڤرۆ بەری نیڤرۆ د کونگرەیەکێ رۆژنامەڤانی دا رێڤەبەریا پۆلیسێن پارێزگەھا ھەولێر گرتنا ٢١ تاوانباران لسەر تاوانێن جیاواز راگەھاند.
نیسان عەبدولقادر ھاریکارێ رێڤەبەریا پۆلیسێن پارێزگەھا ھەولێر د کونگرەیەکێ رۆژنامەڤانی دا گرتنا ٢١ تاوانباران راگەھاند و گۆت: (ئەڤ تاوانبارە جوراوجور و لسەر تاوانێن جوراوجور بوون، ژ وانان لسەر تاوانا کوشتن، بارزگانیکرن ب ماددێن ھوشبەر و دزی).
زێدەتر گۆت: (دوو تاوانبار لسەر کوشتنێ بناڤێن “د.ک.ا” و “پ. م. م”، دیسان ١٤ تاوانبار ژی لسەر دزیێ بناڤێن “ع. ا. ک” و “ع. ک. ع” و “د. ق. س” و”ک. ر. م” و “ھـ. ج. س” و “ع. ن. ع” و “س. خ. ی” و “م. ع. م” و “ع. م. ر” و “م. ع. م” و “ت. ڕ. ا” و “ش. ا. س”و “ێ. ع. ع” و “ش. ت. ح” و پێنج تاوانبار ژی لسەر مادێن ھوشبەر بناڤێن “ع. ع. ح” و “گـ. ا. گ” و “کـ. ا. ا” و “ھـ. ا. ا” و “ف. ا. ح”)
ناڤبری دوپاتکر کو ب بگورەی قانوونێ ئەڤ تاوانبارە ھەموو ھاتینە رەوانەکرن بۆ دادگەھێ دا کو ب سزایێ قانوونیێ خوە بگەهن.
ئەڤرۆ نیوز ، عەلی حاجی :
رێڤەبەرێ چاندنێ ل زاخۆ ئاشکەرا کر ژبەر ھاتنا رێژەیەکا زور یا بارانێ پشکەکا بەرھەمێ گەنمێ جوتیاران زەر بوویە و ھەر بارانەکا ژ نوکە پێڤە باریت دێ زیانان ب بەرھەمێ گەنمی گەھینیت و ئەڤ چەندە ژی دێ بیتە ئەگەر جوتیار توشی ئاریشەیان ببیت.
زێدەتر ئەحمەد سامی ئەو چەندە ژی گۆت: د ئەڤ سالە دا رێژەیەکا زور یا بارانێ باریە و دھێتە چاڤەرێکرن رێژەیەکا زێدەتر یا بارانێ بباریت، لەورا ھەر بارانەکا ژنوکە پێڤە بباریت دێ بیتە ئەگەرێ زەربوونا گەنمێ جوتیاری و دێ رێژەیا نەخوەشیێ دناڤ گەنمی دا زێدەتر کەت و ئەڤ چەندە ژی دێ بیتە ئەگەرێ زیانێ و پشکەکا بەرھەمێ وان ژی ژناڤ بچیت.
ناڤھاتی گوت ژی: مە چەند تیمەک ھەنە سەر ب رێڤەبەریا مە ڤە ھەردەما باران راوەستیان دێ سەرەدانا بەرھەمێ گەنمێ ھەمی جوتیاران کەن دا کو بزانن چو جورە نەخوەشیەک کەفتیە ناڤ گەنمێ جوتیاری دا و د نوکە ژی دا مە دەرمانەک ئامادە کری یە و ئەگەر بزانین گەنمێ جوتیارەکێ توشی نەخوەشیەکێ بویە ئەم ئامادەینە وزی دەرمانی ل گەنمێ جوتیاری ب رەشینن ب بھایەکێ گەلەک کێمتر ژ بازاری وەکو پشتەڤانیەک بو بەرھەمێن جوتیاری.
ئەڤرۆ نیوز:
یانا بەرشەلۆنا یا ئیسپانی چاڤ ل ستێرەکا گەنچ یا بەرازیلی یە ئەوێ نوکە بوویە جھێ گرنگیا چەندین یانێن مەزن ل ئورۆپا کو چاڤێ چەندین یانە ل سەر ئەوی یاریزانی یە .
رۆژنانا موندو دیپورتیڤو یا کەتەلونی ئاشکراکریە یانا بەرشەلۆنا لژنەیەکا تایبەت ھنارتی یە بەرازیل بوو دیڤچوونا یاریزانێ ھەلبژارتیێ بەرازیل یێ تازەپێگەھشتیان و یاریزانێ یانا پالمراس گابریێل ڤیرون یێ ١٦ سالی بکەن کو ئەڤی یاریزانی شیانێن گەلەک مەزن ھەنە و پێشبینیەکا مەزن بوو ڤی یاریزانی دھێتەکرن .
ھەژی گوتنێ یە چ یانێن ئورۆپی و دەرڤەی وەلاتێ بەرازیل نەشێت ھەڤبەستێ ل گەل گابریێل ڤیرون ئیمزا بکەن ھەتا ژیێ وی نە گەھیتە ١٨ سالی لێ یانا بەرشەلۆنا ھەکە ل سەر ھەڤبەستا ئەوی یاریزانی رێککەفت ب رێیا بریکارێ خوە یێ تایبەت یێ وەرزشی ل بەرازیل دێ رێککەفتنەکێ ل گەل پالمراس کەت ھەتا ژیێ ١٨ سالی ئەو یاریزان ل وێ یانێ بکەت و پشتی ژیێ وی د بیتە ١٨ سال پەیوەندی ب بەرشەلۆنا بکەت.
https://www.youtube.com/watch?v=TWeMASPZuYc&t=64s
نيشاندان