ئه‌ڤرۆ نیوز:عه‌زیز هه‌ورامی
محه‌مه‌دی حاجی مه‌حمود، ئاشكرا دكه‌ت كانێ بۆچی په‌یوه‌ندیێن وی ل گه‌ل سه‌رۆك بارزانی ب هێزن و بۆ ئه‌ڤرۆ نیوز گۆت” هه‌ر سه‌ركرده‌یه‌ك كار بۆ سه‌رخه‌بوونێ بكه‌ت، ئه‌ز ژ وی سه‌ركردێ نێزیكم، نێزیكیا من بۆ سه‌رۆك بارزانی بۆ وێ یه‌كێ دزڤریت كو سه‌رۆك بارزانی هه‌موو خه‌باتا خوه بۆ سه‌رخوه‌بوونا كوردستانێ ته‌رخان كریه.
ئه‌ڤرۆنيوز:
وه‌زاره‌تا ناڤخوه ل هه‌رێما كوردستانێ پێنج هزار پارچێن چه‌كى ژناڤبرن وبرياره سوباهى ژى پێنج هزار چه‌كێ جۆراوجۆرێ دى ژى بهێته ژناڤبرن.
پشتى وه‌زاره‌تا ناڤخوه ل هه‌رێما كوردستانێ بريارا رامالينا چه‌كى ل هه‌رێما كوردستانێ ده‌ركرى ودحه‌فت خالێن وێ بريارێ ئاماژه بۆ وێ چه‌ندێ هاته كرن كو بۆ نه‌هێلانا دياردا چه‌كداريێ، ب تايبه‌تى چه‌كێ گران وناڤه‌ند وهێلانا وان چه‌كان تنێ دده‌ستێ هێزێن چه‌كدارێن حوكمه‌تا هه‌رێمێ، ئه‌و چه‌كێن بێ مۆله‌ت كو ژلايێ وه‌لاتيان ڤه دهێنه هه‌لگرتن، دێ ده‌ست ب سه‌ردا هێته گرتن وپێرابوونێن قانوونى هێنه وه‌رگرتن.
سامى جه‌لال، رێڤه‌به‌رێ گشتيێ ديوانا وه‌زاره‌تا ناڤخوه ل هه‌رێما كوردستانێ راگه‌هاند” ئه‌ڤرۆ مه نێزيكى پێنج هزار پارچێن چه‌كى ژناڤبرن وئه‌و چه‌كێن دێ ده‌ست ب سه‌ردا هێته گرتن ژى دێ هێنه كۆمكرن وژلايێ لژنه‌كا تايبه‌تمه‌ند ڤه هێنه جه‌ردكرن وژناڤبرن”.
گۆت ژى” ئه‌و چه‌كێن هاتينه ژناڤبرن هه‌موو جۆرێن چه‌كى تێدابوون وپتريا وان ده‌مانجه وكلاشينكۆف وچه‌كێ نێچيرێ بوو”.
گۆت ژى”لژنه يێن هاتينه پێكئينان وپۆليس وئاسايش دێ جهان ده‌ستنيشان كه‌ن بۆ رامالينا چه‌كان”.
ئەڤرۆنيوز ، زنار تۆڤی:
بریارە ل رۆژا پێنجشەمبی 14 شواتا 2019 سەرۆكێ دەمكی یێ پەرلەمانێ كوردستانێ ل گەل سەرۆكێن فراكسیۆنێن پەرلەمانێ كوردستانێ كۆم بیت.
رێڤنگ هرۆری، سەرۆكێ دەمكی یێ پەرلەمانێ كوردستانێ بۆ ئەڤرۆ نیوز دیار كر: پشتی پارتی دیموكراتی كوردستان و ئێكەتیا نیشتیمانی كوردستان بریار دای كو ل 18 شواتا 2019 كۆمبوونا پەرلەمانێ كوردستانێ بهێتە ئەنجامدان، ژ هنگێ وەرە ب رەنگەكێ بەردەوام كۆمبوون دهێنە كرن، هەروەسا مە ژی ل پەرلەمانێ كوردستانێ سەرەدانا هەموو فراكسیۆنێن پەرلەمانی كریە، ژ پێخەمەت ئەم ئالیەتا كۆمبوونا رۆژا دوشەمبیا بهێت بۆ هەلبژارتنا دەستەیا سەرۆكاتیا پەرلەمانێ كوردستانێ رێكبێخین، هەروەسا ل ڤان رۆژێن بهێن ژی دێ كۆمبوونێن مە د بەردوام بن.
زێدەتر گۆت: ل رۆژا پێنجشەمبی 14/2/2019 ئەز وەكو سەرۆكێ دەمكی یێ پەرلەمانێ كوردستانێ دێ ل گەل هەموو فراكسیۆنێن پەرلەمانێ كوردستانێ كۆم بم، داكو ئالیەتا كاری بۆ هەموویان یا رۆهن بیت ژبۆ كۆمبوونا رۆژا دوشەمبیا بهێت، چونكی ل 18 شواتێ دێ كۆمبوونا پەرلەمانی هێتە ئەنجامدان و پارتی یا رژدە ل سەر ئەنجامدانا ڤێ كۆمبوونێ، هەروەسا هەتا نوكە چو ئالیەكی نەگۆتیە ئەم پشكداریێ تێدا ناكەین، دیسا هەموو فراكسیۆنێن پەرلەمانێ كوردستانێ د هەڤرانە كو ئەڤ كۆمبوونە بهێتە كرن، د ڤێ كۆمبوونێ دا دێ دەستەیا سەرۆكاتیا پەرلەمانێ كوردستانێ هێتە هەلبژارتن، كو سەرۆكێ پەرلەمانی دێ ئێكەتی بیت و دیسا جێگرێ ئێكێ یێ سەرۆكێ پەرلەمانێ كوردستانێ ژ فراكسیۆنا پارتی دێ هێمن هەورامی بیت، هەروەسا ئەو سێ ئەندامێن هەتا نوكە ل پەرلەمانێ بەرهەڤ نەبووین، كو مافێ ئەندامەتیێ ژێ هاتیە وەگرتن و ل جهێ وان دێ سێ كه‌سێن دى وه‌كو په‌رله‌مانتار سويندا قانوونی خوينن كو ناڤێن وان بۆ پەرلەمانی هاتینە، ددووڤدا كۆمبوونا ئێكێ دێ ب دووماهی هێت.
ئەڤرۆ نیوز:
هێنری بارکێی نڤیسەری ناڤدارێ ئەمریکی دیار دکەت کو کورد ل رۆژهەلاتا ناڤین پشتی شەرێ داعشێ و قوربانیێن کو داینە بهێز بووینە و ئێدی قەبوول ناکەن وەکو بەرێ بژین و وان دڤێت ل عیراقێ و سووریێ بگەهنە مافێن خوە یێن رەوا، ژ بەر هندێ ژی وەلاتێن رۆژهەلاتا ناڤین نەشێن وەکو بەرێ ئاستەنگیان ل هەمبەر داخوازیێن کوردان دروست بکەن.
نڤیسەرێ ناڤدارێ ئەمریکی ئاماژە ب هندێ ژی کریە کو هەکە ئەمریکا هێزێن خوە ژ سووریێ ڤەکێشیت ژی ئیران و تورکیا نەشێن کوردێن سووریێ تەپەسەر بکەن و وان ژناڤ ببەن، چونکو کورد بهێز بووینە و قەبوول ناکەن وەکو بەرێ ل ژێر دەستهەلاتا شامێ دا بژین.
ئەڤرۆ نیوز، عەلی حاجی:
ئێکەتیا قوتابیێن کوردستانێ لقێ زاخۆ دیدارا بەردەوامیبوونێ ل دۆر بەردەوامیبوون و خزمەتکرن و پێگەھاندن و خوە گونجاندنا وێ رێکخراوێ بۆ سکرتێرێ ئێکەتیا قوتابیێن کوردستانێ و چەند ئەندامەکێن پێشتر یێ وێ رێکخراوێ سازکر.
ئەحمەد سەعید بەرپرسێ لقێ زاخۆ یێ ئێکەتیا قەتابیێن کوردستانێ بۆ ئەڤرۆ نیوز گوت: (ئەڤە دبیتە ئێکەم دیدارا ئێکەتیا قوتابیان ل زاخۆ ئەنجام ددەین پێخەمەتی وێ چەندێ د ھەمی قوناغێن ژیانێ دا ئێکەتیا قوتابیان کوردستانێ خوە بگونجینیت دگەل کەتوارێ نوکە یێ کوردستانێ و ھەر دیسان چاوانیا خزمەتکرن و پێگەھاندنا قوتابیان، ھەر دیسان ژی دیێ ب رێکا ڤێ دیدارێ ژی رێکێن نوو گەریێن بۆ بەردەوامی دانا خزمەتکرنا قوتابیان).
ناڤھاتی زێدەتر گوت: (د بەردەوامیا دیدارێ دا ئێکەتیا قوتابیان دێ سندوقەکا ھاریکاریێ بۆ زانکۆیا زاخۆ و پەیمانگەھا تەکنیکی ل زاخۆ بۆ قوتابیێن کێم دەرامەت دانیت و لیژنەیەکا دەستنیشان کری ژلایێ زانکویا زاخۆ ڤە ھاتیە دانان و پشتی ٢٠ روژان دێ ئەو سندوق ھێتە ڤەکرن و ھاریکاریێن وێ سندوقێ ل سەر قوتابیێن کێم دەرامەت ڤە دێ ھێتە بەلاڤ کرن دا کو ببیتە رێکەک قۆتابی بشێت بەردەوامیێ بدەتە خواندنا خوە).
ئەڤرۆ نیۆز، قائید میرۆ:
بڕیارە رۆژا ١٨ی شوباتێ کۆمبوونا پەرلەمانێ کوردستانێ بھێتە ئەنجامدان و پەرلەمانتارەکا پارتی ژی ئاشکرا کر، پۆستێ جێگرێ سەرۆکێ پەرلەمانی بۆ ھێمن ھەورامی ئێکلا بوویە و سەرۆکێ پەرلەمانی ژی دێ بۆ ئێکەتیێ بیت.
سەوسەن گەردی، پەرلەمانتارا فراکسیۆنا پارتی ل پەرلەمانێ کوردستانێ بۆ ئەڤرۆ نیۆز دیار کر” کۆمبوونا پەرلەمانی رۆژا ١٨ی شواتێ دێ د دەمێ خوە دا ھێتە ئەنجامدان و ھەموو بەرھەڤی ژی ھاتینە کرن بۆ رێڤەچوونا کۆمبوونێ، بڕیارە سبەی رۆژا چوارشەمبی فڕاکسیۆنا پارتی کۆمبوونەکێ ل دۆر رێڤەچوونا کۆمبوونا پەرلەمانی ئەنجام بدەت و چاوانیا سەرخستنا کۆمبوونا ١٨ی شوباتێ بھێتە بەحسکرن.
پەرلەمانتارا پارتی ئاشکرا کر” پۆستێ سەرۆکی پەرلەمانێ کوردستانێ بۆ ئێکەتیێ یە و ھەر ئێک ل بێگەرد تالەبانی و رێواس فایەق بەربژارێن ئێکەتیێ نە بۆ وەرگرتنا ئەڤی پۆستی.
سەوسەن گەردی دبێژیت” سەرۆکێ پەرلەمانی دو جێگر دێ ھەبن و جێگرەک دێ بۆ پێکھاتا بیت و جێگرێ ئێکێ ژی بۆ پارتی دیموکراتی کوردستانە، کو بەربژارێ پارتی بۆ وەرگرتنا جێگرێ سەرۆکێ پەرلەمانی ھەڤال ھێمن ھەورامیە و ئەڤ چەندە ئێکلا بوویە.
ئەڤرۆ نیوز ، عەلی حاجی:
چیا حەمید ئەندام پەرلەمانێ کوردستانێ د داخۆیانیەکێ دا بۆ ئەڤرۆ نیوز دیار کر سەرەرای ھاتنا ئاوارە و پەنابەران بۆ باژێرێ زاخۆ بەلێ میلاکێ پولیسان ل زاخۆ یێ کێمە و دێ ب رژدی کار ل سەر باشتر کرنا میلاکێ پولیسان ل زاخۆ کەین.
چیا حەمیدی زێدەتر گوت: (١٠٧ پولیسان ل زاخۆ دەست ژکارێ خوە کێشاینە و ژ کارێ وان ھاتینە دوورئێخستن بەلێ چو کەس ل جھێ وان نەھاتینە دامەزراندن، ل گورەی یاسایێ دڤێت ھندەک کەسێن دی ل جھێ وان بھێتە دامەزراندن بەلێ ھەتا نوکە ئەڤ چەندە نەھاتیە کرن).
ناڤبری زێدەتر گوت: (میلاکێ دامەرزاندنا پولیسێن زاخۆ یێ کێمە سەرەرای وێ چەندێ ژی باژێرێ زاخۆ یێ مەزن دبیت، سەرەدانێن مە وەکو پەرلەمانتارێن زاخۆ بۆ ھەمی دام و دەزگاێن حکومی حەفتیانە دێ بەردەوام بن دا کو ژ نێزیک ڤە رەوشا باژێرێ زاخۆ ئاگەھدار بین).
ئەڤرۆ نیوز، هۆشەنگ تاجر:
کەمال ئامەد نڤیسەرێ کورد ل ئەلمانیا بۆ ئەڤرۆ نیوز دیار کر کو ئەڤرۆکە ل ئەلمانیا دو دەزگەهێن کوردی یێن سەر ب پەکەکێ ب ناڤێ ناڤەندا میزوپوتامیا و هەروەسا میر مولتیمیدیا ب فەرمانا وەزارەتا ناڤخوە یا ئەلمانیا هاتنە داخستن.
ناڤهاتی ل دۆر ئەگەرێن داخستنا ڤان هەر دو ناڤەندان ژی راگەهاندن کو وەزارەتا ناڤخوە یا ئەلمانیا بۆ رێڤەبەرێن وان هەر دو دەزگەهان دیار کرینە کو هەوە پەیوەندی ل گەل پەکەکێ هەنە و کارێ هەوە خزمەتا پەکەکێ دکەت و ژ بەر هندێ ژی فەرمانا داخستنێ ژ ئالیێ دادوەرێ گشتی ڤە هاتیە دان.
ئەڤرۆ نیوز:
سەرۆکێ گشتی یێ پارتیا ئازادی یا کوردستانێ مستەفا ئۆزچەلیک بۆ ئەڤرۆ نیوز دیار کر کو دادگەها بلند یا تورکیا ژ بەر ناڤێ کوردستانێ و هەروەسا بەرنامێ پارتیا مە بەری نها داخواز ژ مە کربوو کو ناڤێ کوردستانێ ل سەر پارتیا خوە راکەین و هەروەسا گوهۆرینان ژی د بەرنامێ خوە دا بکەین و گۆت: (مە بەری نها گۆتیە و جارەکا دی ژی دێ بێژین کو ئەم ناڤێ پارتیا خوە ناگوهۆرین و دڤێت دەولەتا تورکیا قانوونێن خوە بگوهۆریت چونکو بەرسڤا داخوازیێن جڤاکێ نادەن).
ناڤهاتی ئەو یەک ژی دیار کر کو دڤێت تورکیا ئیرادە و داخوازیێن گەلێ کوردستانێ قەبوول بکەت، چونکو ب داخستنا پارتیان نە پرسا کوردی چارە دبیت نە ژی کورد دێ دەستان ژ مافێن خوە یێن رەوا بەردەن.
ئەڤرۆ نیوز، عەلی حاجی :
رێڤەبەریا ھاتنوچوونا قەزا زاخۆ ئاگەھداریا وان ترومبێلان دکەت یێ رادبن ب ڤەگەھاستنا ئاڤێ بۆ مالان، ھەر ترومبێلەکا ئاڤا وێ برژیتە سەر جاددەیان دێ ھێتە سزادان .
کومیسەر بەشیر یوسڤ ژ راگەھاندنا ھاتنوچوونا قەزا زاخۆ بۆ ئەڤرۆ نیوز گوت: (ئەڤ بریارە تایبەتە بۆ وان شوفێران یێ ئاڤێ بۆ مالان ڤەدگوھێزن، کو گەلەک جاران ژ بەر رێتنا ئاڤێ ل سەر جاددەیان، ئەو جادە ژناڤ دچوون یان ژی روودان پەیدا دبوون ژ بەر کو تانکێن ترومبێلێن خوە ژ رادەیێ وی تانکی زێدەتر فول دکرن، یان ژی گەلەک شوفێر ھەنە ئاڤێ ب ھەروەدی بەرددەنە جادەیان و جادە فول دبن ژئاڤێ) .
ناڤبری زێدەتر گوت ژی سزایێ وان کەسان دبیت پارەیەکێ دەست نیشان کری بیت یان ژی دەست ب سەر وێ ترومبێلێ دا بھێتە گرتن، ڤێجا ھیڤیدارین ھەمی شوفێر پێگریێ ب ڤێ بریارێ بکەن دا کو تووشی چو سزایان نەبن .
نيشاندان