ئەڤرۆ نیوز، نەوزاد ھلۆری:

 محەمەد مێرگەسووری رێڤەبەرێ چاندنا مێرگەسوور بۆ ئەڤرۆ نیوز گۆت: (باران بارین ل سنورێ قەزا مێرگەسوور ب رێژەکا بەرچاڤ ل گۆر سالا بوری زێدە بوویە، ددەما ٢٤ دەمژمێرێن بوری دا ل دەڤەرا بارزان ٨٤سم باران باریە، ب ڤێ یەکێ ژی باران بارینا ئەڤ سالە گەھشتە دو ھزار و ٣٠٤ ملم باران).

 زێدەتر گۆت: (سالا بوری دڤی دەمی دا تنێ ۹٤۹ملم باران باریبوون کو ئەو یەک ژی گەلەک کێمە، باران بارینا ئەڤسالە دبیتە پتری دو جار و نیڤان ھندی سالا بوری، ب ڤێ یەکێ جوتیار دلخوەش بووینە و ھشکەسالی نامینیت).

.

ئەڤرۆ نیوز، عەلی حاجی:

 ئەندازیار دیندار سالم برێکارێ سەرۆکێ باژێرڤانیا زاخۆ بۆ ئەڤرۆ نیوز ئاشکرا کر دا کو رێژەیا کەسکاتیێ دناڤ باژێرێ زاخۆ دا زێدە بیت دماوەیێ ھەیڤەکێ دا مە زێدەتری ١٥٠ دار و شتلێن داران چاندینە و ھەر دیسان وەکو باژێرڤانیێ  زێدەتری ٢٠٠٠ داران ئامادە کرینە و ھەر دەمێ کەش و ھەوا یێ گونجایی بیت دێ دەست ب چاندنا وان داران کەین و ھەر دبەردەوامیا کاری دا تیمێن مە شیاینە زێدەتری ٤٠٠ گولان دناڤ سەنتەرێ باژێری دا بچینن).

ناڤھاتی زێدەتر گوت: (ل سەر جاددەیا سەرەکی یا تاخێ شەعبانیکێ دیوارەک ھەبوو دیمەنەکێ نەجوان دا باژێرێ زاخۆ، ئەم رابووینە ب نەخشاندنا وی دیواری ب چەند وێنەیەکێن کو دەربرینێ ژ ھێما و دیرۆکێ باژێرێ زاخۆ دکەت و کارێ وێ ژی ب دووماھی ھاتیە و جوانیەکا دیتر دایە وی دیواری).

ئەڤرۆ نیوز، نەوزاد ھلۆری:

ئیسماعیل مستەفا قایمقامێ قەزا ئامێدیێ بۆ ئەڤرۆ نیوز گۆت: (پشتی کو چەند رۆژێن بوری بارانێن بھێز باری و لەھی دروست بوویی، ھێلا ئاڤا ئامێدیێ بۆ ناحیا سەرسنکێ ب تەمامی تێکچوو و ھاتە برین، ژ بەر کو جادە داچوویە).

زێدەتر گۆت: (ھێلا ئاڤێ ب تنێ بۆ ناحیا سەرسنکێ و کومەلەھا قەدش و گوندێن ب سەر وانڤە تێکچوویە و نوکە ھاتیە برین، ھەتا کو ە جارەکا دی بوری دھێتە چێکرن دێ ب رێیا بیرێن ئیرتیوازی و پرۆژێن کەڤن ئاڤ بۆ وان دەڤەران ھێتە دابینکرن).

ب گورەی ئاخڤتنێن قایمقامێ ئامێدیێ ئەوان ژ نێزیک سەرەدانا جھێ روودانێ کریە کو دکەڤیتە نێزیک گوندێ سکەی و لیژنەک بۆ چارەسەرکرنا بوریا ئاڤێ پێکئینایە و دەست ب چێکرنا وێ دکەن و زێدەتر گۆت: (ب زووترین دەم ئەو ھێلا ئاڤێ دێ دوبارە ھێتە چێکرن و کەڤیتە دخزمەتا وەلاتیان دا).

ئەڤرۆ نیوز، عەلی حاجی:

دداخویانیەکێ دا بەرپرسێ رێکخراوا کاریتاس ل زاخۆ بۆ ئەڤرۆ نیوز دیار کر د ماوەیێ سالەکێ دا ھزار و پێنچ سەد خێزان ژ ئاوارە و خوەجھێن ل سنورێ دەڤەرا زاخۆ سودمەند بووینە ژ روویێ ھاریکاریێن مادی ڤە و ھەتا نوکە مە شیایە د ماوەیێ سالەکێ دا زێدەتر ملیون دۆلاران وەکو ھاریکاری بەلاڤ بکەین.

فیراس خەلیلی زێدەتر گوت: (بەلاڤکرنا ھاریکاریێن مادی ل سەر خێزانێن دەستکورت ژ ئاوارە و خوەجھێن دەڤەرا زاخۆ وەکو کارەکێ خێرخوازی یە ژلایێ رێکخراوا مە ڤە و زێدەتری ھزار و پێنچ سەد خێزان ھاتبوونە دەستنیشان کرن بۆ وەرگرتنا ھاریکاریێن مادی و ئەو رێژەیا خێزانان ل سەر سێ پشکان ھاتبوونە دابەش کرن و ب خوەشحالی ڤە ئەو ھارکاریە گەھشتنە ھەمی خێزانان و بۆ ھەر وەلاتیەکێ ٥٠ دۆلار ھاتبوونە تەرخانکرن).