ئەڤرۆ نیوز:
تیما تەپا پێ یا سێمێل تووشی خوسارەتیەکا گران بوو ل سەر دەستێ یانا زانکویا جیھان ب چار گۆلان بەرامبەر گۆلەکێ د یاریێن گەرا دویێ یا خولا پلە دویا کوردستانی یا تەپا پێ دا.
د ڤێ یاریێ دا سێمێل شیا نیڤا ئێکێ گۆلەکێ تومار بکەت لێ نەشیا بەردەوامیێ بدەتە پاراستنا ڤی ئەنجامی بکەت پشتی تووشی چار گۆل ل سەر ئێک ژلایێ یاریزانێن زانکویا جیھان ڤە ھاتنە تومارکرن و دەمێ مای ژ یاریێ سێمێل نەشیا چو گۆھۆرینان د ئەنجامێ یاریێ دا بکەت و ئەڤ یاریە ب چار گۆلان بەرامبەر گۆلەکێ ب دووماھی ئینا.
ئەڤرۆ نیوز، نەوزاد ھلۆری:
بەری دروستبوونا باژێرێ شێلادزێ، جھێ شێلادزێ بەری ٥٠ سالان دارستانەکا پری دار و ب مەترسی بوو و کێم کەس دشیان ژبەر ئاژەلێن ب مەترسی و درندە و ھەبوونا دارستانەکا پری دار و تاری و ئاسێ ھاتنووچۆنێ بکەن، بەلێ پشتی سالا ١٩٧٦ و ڤەگوھاستنا خەلکێ دەڤەرێن سنووریێن نێروەورێکان و دوسکی بو شێلادزێ و دێرەلووکێ، ئەو دارستان ھەموو ھاتە برین و جھێ وێ کرنە خانی و ئاڤەدانی، ژ وێ دارستانا پری دار و ئاسێ بتنێ دارەک مایە و ئەو ژی دکەڤیتە دناڤ حەوشا (مزگەفتا پیراڤدەل) ل سەنتەرێ باژێرێ شێلادزێ.
ل بارا ژیێ دارێ و دارستانا شێلادزێ و سالوخەت و چەوانیا پارستن و مانا وێ دارێ، ماموستا سەفەر حسێن پیراڤدەلی چەند زانیاریەکان بو ئەڤرۆ نیوز دیارکر کو دارا پیراڤدەل ٥٠ سالان بەری دروستبوونا شێلادزێ ھەبویە، نوکە ژیێ وێ ژ ١٠٠ سالان بوری یە، ئێکە ژ دارێن بەرێ یێن ئەسلی و سالانە ژلایێ خەلکی دھێتە پاراستن و نوکە بویە ھێمایەک بو تاخێ پیراڤدەل ل شێلادزێ.
ئەڤرۆ نیوز:
ئەڤرۆ رۆژا دوشەمبی رێککەفتی ١١/٢/٢٠١٩ نێچیرڤان بارزانی سەرۆک وەزیرێن ھەرێما کوردستانێ ل ھەولێرێ پێشوازی ل د.عومەر ئەلکندەری، قونسلێ وەلاتێ کوێت ل ھەرێما کوردستانێ و شاندێ دگەل دا کر.
د ڤێ دیدارێ دا ئەلکندەری خوشحالیا خوە ب ڤێ ھەڤدیتنێ دگەل نێچیرڤان بارزانی دیارکر و دەستخوشی ل حوکمەت و سەروک وەزیرێن ھەرێمێ کر پشتی ب سەرکەفتیانە ھەموو قەیران دەربازکرین و ئەو رێژەیا زور یا پەنابەر و ئاوارەیان حەواندی، دیسان بەحسا ئەوان ھاریکاریێن وەلاتێ خوە یێن مروڤایەتی بۆ ھەرێمێ ھنارتین پێخەمەت ھاریکاریا ئاوارەیێن ھەرێمێ.
ژلایێ خوە ڤە نێچیرڤان بارزانی سوپاسیا سەرەدان و ھاریکاریێن مروڤایەتی یێن وەلاتێ کوێتێ بۆ ھەرێما کوردستانێ کرن تایبەت رولێ میرێ کوێتێ بۆ دابینکرنا وان ھاریکاریان و بارسڤکرنا ل سەر ملێن حوکمەتا ھەرێمێ.
د تەوەرەکێ دی یێ ڤێ ھەڤدیتنێ دا بەحس ل پەیوەندیێن ھەرێما کوردستانێ دگەل بەغدا دیسان سەرەدانا نێچیرڤان بارزانی بۆ بەغدا و کومبوونا دگەل عادل عەبدولمەھدی سەروک وەزیرێن عیراقێ ھاتە کرن، زێدەباری پەیوەندیێن ھەرێمێ دگەل وەلاتێن جیران و پێشخستنا وان پەیوەندیان د بوارێن جودا دا.
ئەڤرۆ نیوز، هۆشەنگ تاجر:
دارا ناتق ئەندامێ سەرکردایەتیا پارتی دیموکراتی کوردستان/ ئیران کو پارتیا وان رۆلەکێ بەرچاڤ د ناڤەندا هەڤکاریا پارتێن رۆژهەلاتێ کوردستانێ دا دگێریت بۆ ئەڤرۆ نیوز دیار کر کو بریارە رۆژێن ١٣ و ١٤ ڤێ مەهێ ب دەستپێشخەریا ئەمریکا ل پایتەختێ وەلاتێ پۆلەندا ل باژێرێ وارشۆ کۆنفرانسەک ل دۆر رۆلێ خراب یێ ئیرانێ برێڤە بچیت و ئارمانجا سەرەکی یا ئەمریکا ژی دروستکرنا بەرەیەکێ یە ل دژی ئیرانێ و گۆت: (وەکو پارتێن رۆژهەلات ئەم داخواز دکەین کو د کۆنفرانسێ وارشۆ دا بەحسێ مافێن کوردان و نەتەوێن دی ل ئیرانێ بهێتە کرن، چونکو رۆژانە رژێما ئیرانێ مافێ کوردان و نەتەوێن دی بنپێ دکەت و هەکە ئەمریکا بڤێت چارەکێ بۆ رەوشا ئیرانێ پەیدا کەت دڤێت مافێ کوردان و نەتەوێن دی بەرچاڤ وەربگریت).
ناڤهاتی ئەو یەک ژی دیار کر کو کۆنفرانسێ وارشۆ بۆ دروستکرنا بەرەیەکێ ل دژی رژێما ئیرانێ گرنگە، لێ دڤێت مافێ کوردان و پاشەرۆژا کوردان ل ئیرانێ ژی بەرچاڤ بهێتە وەرگرتن.
ئەڤرۆ نیوز، عەلی حاجی:
ل دووڤ ئامارەکا رێڤەبەریا ساخلەمیا زاخۆ دیارکریە د ماوێ حەفیتەکێ دا ل سنورێ قەزا زاخۆ ١٤ کەسان ب ئەگەرێن جودا گیانێ خوە ژ دەست داینە.
ل دور ڤێ چەندێ ئەمیر عەلی ژ راگەھاندنا ساخلەمیا زاخۆ ، بۆ ئەڤرۆ نیوز گۆت: ژ رێکەفتی ٤/٢/٢٠١٩ ھەتا ١١/٢/٢٠١٩ ل سنوری قەزا زاخۆ ١٤ وەلاتیان ژ ئەگەرێ جودا گیانێ خوە ژ دەست داینە لێ پرانیا وان کەسان ژ ئەگەرێ جەلتێ بویە ، ١١ کەسان ژ دەرڤەی نەخوشخانەیێ و ٣ کەسان ژی دناڤ نەخوشخانەێن زاخۆ گیانێ خوە ژ دەست داینە.
ناڤبری زێدەتر گۆت: ل ماوەیێ حەفیەکێ دا ١٢٨ زاروک ھاتینە سەر دونیایێ ٦٥ ژوان کور بوون و ٦٣ ژی کچ بوینە ، دیسان ل نەخوشخانا زاخۆ یا گشتی و تەنگاڤیان ١٦ نەشتەرگەریێن مەزن ھاتینە ئەنجام دان و ھەمی نەشتەرگەری ب سەرکەفتیانە ب دووماھی ھاتن.
ئەڤرۆ نیوز:
رۆژناما وول ستریت جۆرنال یا ئەمریکی دوهی د راپۆرتەکێ دا دیار کر کو هێزێن سووریا دیموکرات پەترۆلا ل ژێر کۆنترۆلا خوە ب رێیا هندەک کۆمپانیان دفرۆشنە رژێما بەشاری، کۆمپانیێن کو کارێ پەترۆلێ ل گەل هێزێن سووریا دیموکرات (هەسەدێ) دکەن بەری نها ژ ئالیێ ئەمریکا ڤە هاتینە سزادان، ژ بەر هندێ ژی بەرپرسێن ئەمریکا ژ هەلویستێ هێزێن سووریا دیموکرات دلگرانن.
ئەو یەک د دەمەکێ دایە کو بەری نها فەرماندارێن هێزێن سووریا دیموکرات دیار کربوون کو ئەو ب چو رەنگەکێ پەترۆلێ نافرۆشنە رژێما بەشاری و چو راستی بۆ هندێ نینن.
ئەڤرۆ نیوز:
فەرحان کۆبانی چاڤدێرێ سیاسی یێ رۆژئاڤایێ کوردستانێ بۆ ئەڤرۆ نیوز دیار کر کو هێزێن سووریا دیموکرات ل دەوروبەرێن دێرازۆرێ دەست ب ئۆپەراسیۆنا خوە یا دووماهیێ بۆ ژناڤبرنا داعشێ ل هەموو سووریێ کرینە و گۆت: (تیرۆرستێن داعشێ ب هەموو رەنگەکێ شەری دکەن ئانکۆ مرۆڤ دشێت بێژیت نها رێکخراوا تیرۆرستی یا داعشێ شەرێ خوە یێ دووماهیێ دکەت، چونکو هەموو دەڤەرێن ل ژێر دەستێ داعشێ هاتینە ئازادکرن).
ئەو یەک د دەمەکێ دایە کو دوهی هێزەکا تایبەت یا ئەمریکی ژی راگەهاند وان دەست ب ئۆپەراسیۆنەکا تایبەت بۆ دەستەسەرکرنا خەلیفێ رێکخراوا تیرۆرستی یا داعشێ کرینە و چو نەمایە ئەبوبەکر بەغدادی ب کوشتی یان ژی ب ساخی بکەڤیتە دەستێ وان.
ئەڤرۆ نیوز، لەزگین جوقی:
رێڤەبەرێ گشتیی یێ ساخلەمیا پارێزگەھا دھۆکێ دیارکر کو ئەڤرۆ ١١/٢/٢٠١٩ پرۆژی چاڤدێریا ناڤین ب کوژمێ زێدەتر ژ ٤٣٨ ھزار یورویا ل نەخۆشخانا تەنگاڤیان دھۆکێ ھاتە ڤەکرن.
د. نزار عسمەت، رێڤەبەرێ گشتی یێ ساخلەمیا پارێزگەھا دھۆکێ دیارکر کو پرۆژێ چاڤدێریا ناڤین ل نەخۆشخانا تەنگاڤیان ل دھۆکێ ھاتە ڤەکرنو ئەڤە تەمامکەرێن پرۆژەیێن بەری نوکە نە یێن پشتەڤانیا ئێکەتیا ئوروپا و ھەڤکاریا ئیتالیی و بجھئینانا رێکخراوا AISPO ھاتیە ئەنجامدان بۆ چێکرنا چەندین ھۆلێن نشتەگەری و جھێن بێھنڤەدانی بۆ وەلاتیان و نەخوشان و گۆت: ئەڤ پرۆژە ب ناڤێ بھێزکرنا خزمەتێن چاڤدێریا چر و قورتالکرنێ بو نەخۆشێن دھێنە رەوانەکرن بۆ نەخۆشخانا تەنگاڤیان ل پارێزگەھا دھۆکێ ودەزگەھێ ئیکو یێ ئێکەتیا ئوروپا پشتەڤانی کریە ورێکخراوا AISPO یا ئیتالی پرۆژە بجە ئینایە ھاتە ڤەکرن.
ناڤھاتی ئەوژی دیارکرکو ئەڤ پرۆژە د ماوێ ١٢ ھەیڤاندا ھاتیە ئەنجامدان ب کوژمێ ٤٣٨ ھزار و ٦٥٣٧٢ یورو بوون ئەڤ پرۆژە پێنج تەختان بخوەڤە دگریت و چێکرنا چار وێستگەھێن ھاوارھاتنا بلەز ١٢٢ ل دەڤەرا ئامێدیی بتایبەت ل نێزیکی وان جھێن دبنە ئارمانجێن بوردومانکرنێ و جھێن ئاوارە و پەنابەر لێ ھەین دھێنە چێکرن داکو بشێین خزمەتێن ساخلەمیێ یێن باشتر پێشکێش بکەین، ئەم سوپاسیا دەزگەھێ ئیکو یێ ئێکەتیا ئوروپا دکەین بۆ پشتەڤانیا وان یا بەردەوام دگەل ساخلەمیا دھۆکێ ژ دەستپێکا قەیرانێ و ھاتنا تیرۆرستێن داعش ڤێ ریکخراوی پشتەڤانیا مە کریە ھەتا نوکە ژی یا بەردەوام بوویە ئەڤە نە پرۆژێ ئێکێ یە دروست دکەن، بەلکو چەندین کار وخزمەتێن دی ل ساخلەمیا دھۆکێ ئەنجامداینە.
ھەر ئێک ژ نوونەرێن رێکخراوا ئیکو و ئاسپو ژی دیارکرن کو ئەو دێ بەردەوام خزمەتێن ساخلەمیێ پێشکێشی وەلاتیێن پارێزگەھا دھۆکێ کەن.
ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 11ى شوباتا 2019ێ بهايێ دراڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:
| 100 دولارێ ئه‌مريكى | 120.100 دينار |
| 100 يۆرۆيێ ئه‌ورۆپى | 136.500 دينار |
| 100 ليرێ توركى | 23.000 دينار |
بۆ وه‌رگرتنا نووترين پێزانينان ل سه‌ر ره‌وشا دراڤى ژماره “2” بۆ شورتكودێن “KOREK “2279 يان “Asiacell “4593 يان ژى ب ره‌نگه‌كێ به‌رده‌وام سه‌ره‌دانا مالپه‌رێ ئه‌ڤرۆ نيوز www.evronews.net بكه.
نيشاندان