ئەڤرۆ نیوز، بارزان مزووری:

جەمیل عەبدوللا رێڤەبەرێ رێڤەبەریا چاڤدێری و گەشەپێدانا جڤاکی ل قەزا شێخان بۆ ئەڤرۆ نیوز دیار کر ب ھەلکەفتا رۆژا جیھانی یا نەخوشیا ئوتیزمێ ئەڤرۆ رێککەفتی ٢ی نیسانێ ٢٠١٩ی ئەو زارۆیێن تووشی نەخوشیا ئوتیزمێ بووین دیاری ل سەر وان ھاتنە دابەشکرن دگەل نامیلکەکێ کو د وێ نامیلکێ دا چەندین زانیاری تێدانە ل دۆر خو پاراستن ل نەخوشیا ئوتیزمێ.

 ناڤھاتی خویاکر کو ئەو زارۆیێن تووشی نەخوشیا ئوتیزمێ بووین١٥ کەسن ھندەک ژ وان ژلایێ مەڤە مووچەکێ ھەیڤانە دھێتە دان یێن دی ژی ناڤێن وان ھاتینە تومارکرن ژ بەر قەیرانا دارای ھاتینە راوەستاندن.

ناڤھاتی گوت ژی ھەموو قەزایا سەنتەر بۆ وان ھاتیە ڤەکرن ژ لایێ حوکمەتێ و خێرخوازان ڤە بەلێ شێخان هەتا نھا سەنتەرەک نەھاتیە ڤەکرن داخواز ژ حوکمەتێ و خێرخوازا دکەین کو کار بکەن بۆ ڤەکرنا سەنتەرەکێ ل قەزا شێخان.

ئەڤرۆنیوز، سەباح زوھێر:

مجاھد محەمەد سەعید رێڤەبەرێ چاڤدێری و گەشەپێدانا جڤاکی  ل ئاکرێ بۆ ئەڤرۆنیوز ددەتە دیارکرن کو مە وەکو رێڤەبەریا چاڤدێری و گەشەپێدانا جڤاکی ل ئاکرێ ب ھەڤکاری دگەل دەزگەھێ خێرخوازیێ بارزانی و کومەلا ئۆتیزمێ ل دھۆکێ ل ژێر چاڤدێریا قایمقامێ قەزا ئاکرێ مە ب فەر زانی ئەڤێ رۆژێ ساخ بکەین.

ناڤھاتی گۆت ژی دڤێ چالاکیێ دا یاریێن زارۆیا و جل و بەرگ ل سەر ٣١ زارۆیێن نەخوشیا ئۆتیزمێ ھاتنە دابەشکرن، کو ئەو زارۆبوون ئەڤێن ل رێڤەبەریا مە ھاتینە تومارکرن و رۆژ ب رۆژێ ئەڤ نەخوشیە بەر ب زێدەبوونێ ڤە یا دچیت.

نڤهاتی ئەو یەک ژی دیار کو مە داخواز ل سەرۆکێ حوومەتا ھەرێمێ کریە کو پرۆژێ چاڤدێریا کێم ئەندام و چاڤدێریا خێزانی بھێتە کاراکرن و راستڤەکرن، مە ھەولدایە دگەل لایەنێن پەیوەندیدار کو سەنتەرەکێ تایبەت ب نەخوشێن ئۆتیزمێ ل ئاکرێ بھێتە ڤەکرن، چونکو ئەڤ نەخوشە پێدڤی جھەکێ تایبەتن و پێدڤیە ستافەکێ نە کو چارەسەریا وان بکەن دا کو نەخوشیا وان بەر ب باشیێ ڤە بچیت و ببنە کەسێن نورمال.

ئەڤرو نیوز، مەحمود نھێلی:

ب ھەلکەفتا رۆژا جیھانیا ھوشیاریا نەخوشیا ئوتیزمێ ئەڤرۆ 2/4/2019 چەند چالاکیەک ژ لایێ ‏رێڤەبەریا چاڤدێری و گەشە پێدانا جڤاکی ل قەزا ئامێدیێ و ب ھەڤکاری ل گەل رێڤەبەریا ‏پەروەردا ئامێدیێ ھاتنە ئەنجامدان و تێدا چەند زارۆیێن توشبوویێن ڤێ نەخوشیێ ھاتنە ‏خەلاتکرن.‏

مافپەروەر سەرھەنگ حسێن رێڤەبەرێ چاڤدێری و گەشەپێدنا خێزانی ل ئامێدیێ بۆ ئەڤرۆ نیوز ‏دیارکر، کو ب ھەلکەفتا رۆژا جیھانیا ئوتێزمێ ئەوان دڤیا ھشیاریەکی پێکێشی خەلکێ دەڤەرێ بکەن ‏بتایبەتی ئەو خێزانێن توشبووێن ڤێ نەخوشیێ ھەیی و گۆت: ( ئەم شیان چەند خێزانێن ‏توشبووێن ڤێ نەخوشیێ دناڤ دا ھەی و کوم بکەین و پەیامەکا ھشیاریێ بگەھینیێ کو ژلایێ ‏نوژدارێ دەرونی پەرژان ئاکرەی ڤە ھاتە پێکێشکرن ھەر ئەو بوو مەبەستا مە ژ ساخکرنا ڤێ رۆژێ ‏و دیسان چاوانیا سەرەدەری کرن ل گەل ڤان نەخوشان، بۆ وان شروڤەبکەین).‏

ناڤھاتی ئاشکرا کو تا نوکە 50 کەسێن توش بووی ب ڤێ نەخوشیێ ل دەڤ وان ھاتینە تومارکرن و ‏گۆت: (رێژەیا توشبوویێن ڤێ نەخوشیێ ل دەڤەرێ پترە ژ وێ یا ل دەڤ مە ھاتیە تومار کرن ژ ‏بەرکو گەلەک خێزان ھەنە تا نوکە سەرەدانا مە نە کریە و دیسان تا نوکە چ سەنتەرێن ئوتیزمێ ل ‏دەڤەرێ نین کو ئەڤە ژی ئەگەرێ سەرەکیێ نەبوونا چ ئامارێن پێدڤی یێن ڤێ نەخوشیێ ل دەڤەرێ ‏‏).‏

ئاشکرا کر، کو ئەڤ نەخوشیە بەرڤ زێدەبوونێ یە ل دەڤەرێ و ئەگەرێن وێ ژی ڤەگەران بۆ خرابیا ‏رەوشا ئابوری و تێکچوونا رەوشا سیاسیا دەڤەرێ.‏

ناڤھاتی دیار کر، کو ئەوان بزاڤ کرینە بۆ ڤەکرنا سەنتەرەکی بتایبەتی ب ڤی نەخوشیێ و ئەرد ژی ‏بۆ ھاتیە تەرخانکرن، لێ ژ بەر تێکچوونا رەوشا ئابوری و ھەروەسا نەبوونا کادرێن تایبەت ئەڤ ‏پرۆژەیە نەھاتیە ب جھئینان.‏