ئەڤرۆ نیوز، سالار دۆسکی:

ئەندامەکێ پەرلەمانێ عیراقێ ژ فراکسیونا پارتی دیموکراتی کوردستان ئەو گۆتن رەتکرن یێ بەحسێ بڕینا مووچێ فەرمانبەرێن کوردستانێ دکەن، ئاشکرا کر کو مەرەمێن سیاسی ل پێش ئەڤان ئەڤان گۆتنان ھەنە و مووچێن فەرمانبەران بووینە قانوون و کەسەک نەشێن ببڕیت، دیار کر کو نوکە ھەموو بزاڤێ دھێنەکرن ژلایێ فراکسیوونا پارتی دیموکراتی کوردستان ڤە کو ھەموو کێشێن ھەلاویستی ل گەل بەغدا بھێنە چارەسەکرن.

ھندرین لەزگین دۆسکی، ئەندامێ پەرلەمانێ عیراقێ ژ فراکسیونا پارتی دیموکراتی کوردستانی ئەو ژی دیار کر جھێ حێبەتیێ بوو بۆ ھەموو ئەندامێن کورد ل پەرلەمانێ عیراقێ کو ئەڤ داخویانیە ھاتینە دان ھەمبەر بڕینا مووچێن خەلکی و خەلکێ خوە ل کوردستانێ پشستراست دکەین کو چو راستی بۆ ئەڤان گۆتنان نینە و کەسەک نەشێت مووچە و مافێن خەلکێ کوردستانێ ئێدی ببڕیت چنکو بووینە قانوون و ل پەرلەمانێ عیراقێ ب پرانیا دەنگان ھاتینە پەسەندکرن.

ھەمان ئەندامێ پەرلەمانێ عیراقێ ئەو ژی ئاشکراکر کو ئارمانج ژ گۆتنا ئەڤان ئاخڤتنان ئەوە بۆ بدەستڤە ئینانا ھندەک کارتێن فشارێ یە ل سەر پارتی دیموکراتی کوردستان و تایبەت نوکە پارتی و ئێکەتی د قوناغا دانوستاندنان دانە ل سەر دروستکرنا کابینا نەھێ یا حوکمەتا ھەرێما کوردستانێ و ئێکەتیێ دڤێت بڕینا مووچێ خەلکی ژلایێ عیراقێ ڤە وەک کارتەکا فشارێ بەرامبەر پارتی ب کاربینت بۆ بدەستڤە ئینانا ھندەک پلە و پوستان لێ بلا  خەلکێ مە یێ ب ئومێد بیت چو راستی بۆ ئەڤان گۆتنان نینە و مووچە دێ بەردەوام بیت و ھەتا قانوونێ دا ھاتیە ئەگەر ھات و  ھەرێما کوردستانێ یا پابەند نەبوو ب ھنارتنا ٢٥٠ ھزار بەرمیلێن پەترۆلێ رۆژانە ب رێکا کومپانیا سومو بەغدا ماف ھەیە بۆدجا ھەرێما کوردستانێ ببڕیت، لێ ھنارتنا مووچەی چو پەیوەندی ب بڕینا بودجێ ڤە نینە ئانکو  ھەرێما کوردستانێ ھەتا پەترۆلێ نەھنێریت ژی بەغدا ل سەر ھنارتنا مووچێ فەرمانبەرێن ھەرێما کوردستانێ دێ یا بەردەوام بیت.

ھندرین لەزگین ھەمزانی ئەو ژی نەڤەشارت و دیارکر کو بەلاڤەکرنا ئەڤان جورە داخویانیا کو دەروونێ خەلکێ مە ل کوردستانێ پێ تێشینن چ خزمەتا دوزا رەوایا مللەتێ مە ناکەت و ھەتا دێ بنە ھۆکار ئێکرێزیا ناف مالا کوردی بھێتە  تێکدان، لەوما گرنگە ئەندامێن پەرلەمانێ عیراقێ و تایبەت یێن کورد خوە ژ ئەڤان جورە داخویانیا دوور بخێن و ھەموو ئەندامێن پەرلەمانی کار بکەن بۆ رێکخستنا ناف مالا کوردی  و کاربکەت بۆ خزمەتکرنا ماف و خزمەتا خەلکێ کوردستانێ .

ھندرین لەزگین دۆسکی، ئەندامێ فراکسیوونا زەر ل پەرلەمانێ عیراقێ زێدەتر ژی گۆت: پشتی پشکا بۆدجا ھەرێما کوردستانێ و مووچێ فەرمانبەرێن ھەرێما کوردستانێ د قانوونا بۆدجا عیراقێ دا ل پەرلەمانی ھاتینە بنەجھکرن و بووینە قانوون و ھاتینە پەسەندکرن، نوکە ھەموو بزاڤ دھێنەکرن کو ھەموو کێشێن ھەرێما کوردستانێ ل گەل بەغدا بەر ب چارەسەربوونێ ڤە بچن و کار ژلایێ فراکسیوونا پارتی دیموکراتی کوردستان ڤە ل سەر ڤێ مژارێ یا بەردەوامە و ب ئومێدین کابینا داھاتی یا حوکمەتا ھەرێما کوردستانێ دێ ھەموو بزاڤا کەت ئەڤ کیشێن بووینە گرێ و ھەتا نوکە نەھاتینە ڤەکرن ل گەل بەغدا ب زووترین دەم بھێنە چارەسەکرن و خەلکێ کوردستانێ بلا پشستراست بیت ئێدی چو حوکمەت ل بەغدا نەشێن قویتێ خەلکێ مە ببڕن.

ئەڤرۆ نیوز، زنار تۆڤی:

ئەندامەکێ پەرلەمانێ کوردستانێ ژ فراکسیۆنا پارتی دیموکراتی کوردستان، بۆ ئەڤرۆ نیوز دیار کر فراکسیۆنا پارتی دیموکراتی کوردستان ل پەرلەمانێ کوردستانێ پرۆژە قانوونەک بۆ راستڤەکرنا قانوونا سەرۆکاتیا ھەرێما کوردستانێ بەرھەڤ کریە، ھەر چەندە نوکە پارتی د دانوستاندنان دایە ل گەل بزاڤا گۆران و ئێکەتیێ و ئالیێن دیتر یێن کوردستانی، چونکی پارتی دڤێت ئەڤ پرۆژە یێ نیشتیمانی بیت و ھەموو ئالیێن سیاسی یێن کوردستانی پشکداریێ د راستڤەکرنا پرۆژە قانوونا سەرۆکاتیا ھەرێمێ دا بکەن و دیسان ھەموو ئالی ل سەر رازی بن و رێکبکەڤن، ژ نوو ئەم دێ وی پرۆژەی دەینە سەرۆکاتیا پەرلەمانێ کوردستانێ و کار دێ ل سەر ھێتە کرن، ھەر چەندە ئەو پرۆژە یێ ئامادەیە، لێ ھێشتا مە نەدایە سەرۆکاتیا پەرلەمانێ کوردستانێ.

رێڤینگ ھرۆری زێدەتر دبێژیت: پارتی ل گەل بزاڤا گۆران دێ شێت ڤێ پرۆژە قانوونێ ل پەرلەمانێ کوردستانێ دەرباز کەت و پەسەند کەت، ھەروەسا پارتی حەز ناکەت، زێدەتر دەمی ب بورینیت، ھەر چەندە پارتی نەڤێت بێی ئێکەتیێ پرۆژە قانوونا سەرۆکاتیا ھەرێما کوردستانێ راستڤەکەت، لەوما ئەم دخوازین ئێکەتی ژی پشکداریێ تێدا بکەت، دیسان ل دەستپێکێ دا دێ قانوونا راوەستاندنا دەستھەلاتا سەرۆکێ ھەرێمێ ھێتە لابرن و ھەروەسا د ماوێ بوری دا ب قانوونەکێ دەستھەلاتێن سەرۆکێ ھەرێمێ ھاتبوونە بەلاڤەکرن ل سەر پەرلەمانی و دادوەریا گشتی و جڤاتا وەزیران، دێ ئەو قانوون ژی ھێتە ھەلوەشاندن، جارەکا دی قانوونا سەرۆکاتیا ھەرێما کوردستانێ دێ ھێتە کارا کرن، سەرۆکێ ھەرێمێ دێ دناڤا پەرلەمانێ کوردستانێ دا ھێتە ھەلبژارتن، نە دناڤا خەلکێ دا، ھەروەسا بۆ ڤی پرۆژەی ئەم حەز دکەین ئێکەتی پشکداریێ  تێدا بکەت، لێ ھەکە ئێکەتی گیرو بوو و پشکداری تێدا نەکر، ئەم وەکو پارتی دێ ڤی پرۆژەی ل پەرلەمانی پەسەند کەین، ھەروەسا ل ڤان نێزیکان ئەڤ پرۆژە قانوونە دێ ھێتە دەرباز کرن و ئێدی گەلەک دەم ڤەناکێشیت، لەوما ب پرانیا دەنگان ئەم وەک پارتی ل گەل بزاڤا گۆرانێ و ئالیێن دیتر دێ ڤێ قانوونێ تێپەرینین ل پەرلەمانی، ھەر چەندە ئەز وەسا دبینم، کو ئێکەتی ژی دێ پشکداریێ د راستڤەکرنا ڤێ قانوونێ دا کەت.