ئەڤرۆ نیوز، ئەمیر ئەترووشی:
رێڤەبەریا ڤێتێرنەریا دھۆکێ ل دور وێ نەخۆشیا ئەوا ل شێلادزێ پەیدابووی و بوویە ئەگەرێ کۆشتنا ٨٠ سەرێن پەزی ھاتە دەنگ و روونکرنەکێ ددەتە ئەڤرۆ نیۆز.
د. عەبدولرەزاق ئێمینکی، بەرپرسێ پشکا ساخلەمیا ئاژەلی ل رێڤەبەریا ڤێتێرنەریا دھۆکێ بۆ ئەڤرۆ نیۆز ئاشکرا کر، چەند رۆژەکە ل ھژمارەکا دەزگەھێن راگەھاندنێ بەلاڤبووی کو نێزیکی ٨٠ سەرێن پەزی ل شێلادزێ ژ ئەگەرێ نەخۆشیەکێ مرینە بێ کو چو لایەنێن پەیوەندیدار خوە لێ بکەنە خودان، لێ ئەم دووپات دکەین ل دووڤ ئاخفتنا بەرپرسێ بنگەھێ ڤێتێرنەری ل ناحیا شێلادزێ کو خودانێ پەزی ب چو شێوەیان بەری ھینگی سەرەدانا بنگەھێ ڤێتێرنەری نەکریە و کەس پێ ئاگەھدار نەکریە.
ئاشکرا ژی کر کو راستە نەخۆشیەک ھەبوویە و بوویە ئەگەرێ مرنا وان سەرێن پەزی، بەلێ نە ب وی شێوەیە یێ کو ھاتیە باسکرن و وەکو دیار سەقایێ ئەڤ سالە گەلەک یێ ھاریکارە ژ بۆ پەیدابوونا نەخۆشیێن کۆژەک دناڤ ئاژەلی دا و جھێن حەواندنا ئاژەلان ژی د گونجای نینن و نەپێگیریا ئاژەلداران ب بەرنامێ ڤاکسینکرنا ئاژەلی ئەگەرێ دی یێ پەیدابوونا نەخۆشیانە.
د. عەبدولرەزاق ئێمینکی، بەرپرسێ پشکا ساخلەمیا ئاژەلی ئاماژە ب ھندێ ژی دا کو ھندەک ئەگەرێن دی ژی ھەنە بۆ پەیدابوونا نەخۆشیێن کۆژەک دناڤا ئاژەلی دا، وەکو نەبوونا پلانەکا ستراتیژی ژلایێ حۆکمەتێ ڤە بۆ ڤاکسینکرنا ئاژەلی دژی نەخۆشیێن ویبائی و نە سنووردارکرنا لڤینێن ئاژەلی و ھاتنا ئاژەلی ب شێوەیێن نە قانوونی و گەلەک ئەگەرێن دی ژی ھەبووینە رێ بۆ پەیدابوونا نەخۆشیێن ئاژەلی ڤەکرینە و نھا بنگەھێ ڤێتێرنەریا شێلادزێ ژی دووڤچوونێ ل سەر وێ نەخۆشیێ دکەت و ب زووترین دەم دێ ئەنجامان راگەھینین.
نيشاندان
