ئەڤرۆ نیوز:
وەزارەتا ساخلەمی و ژینگەها عیراقێ راگەھاند: د ٢٤ دەمژمێرێن بوری دا دو ھزار و ٧٦٨ حالەتێن نوو یێن کۆرۆنایێ و دو ھزار و ٦٢٦ حالەتێن باشبوونێ و ٥٨ حالەتێن وەغەرکرنێ ھاتینە تۆمار کرن.
هەتا نوکە ٢٠٤ ھزار و ٣٤١ کەس ل عیراقێ تووشی ڤایرۆسێ کۆرۆنایێ بووینە، ژ وێ ھژمارێ شەش ھزار و ٤٢٨ کەسان وەغەر کریە، هەروەسا ١٤٦ ھزار و ٤٠٩ کەس ژی باشبووینە.
ئەڤرۆ نیوز:
ئەڤ شەڤه دێ یاریا دوماهیێ یا چامپیۆنز لیگا ئورۆپی دناڤبەرا هه‌ردو یانێن بایرن میونخ یا ئه‌لمانى و پاریس سان جێرمان یا فره‌نسى هێتە ئەنجامدان.
د ڤی وەرزی دا هه‌ردو یانان ناسناڤێن خول و جاما نافخوە یا وەلاتێن خوە بده‌ست ڤه ئیناینه، ئەڤ شەڤە ئارمانجا هەردو یان ژی ب دەستڤە ئینانا چامپیۆنز لیگە.
ئەڤە جارا ئێکێ یە یانا پاریسی دگەهیته یاریا دووماهیێ و ژ پێخەمەت ڤێ چەندێ چه‌ندین یاریکەرێن ناڤدار یێن جیهانی کرینە، ل هەمبەری ڤێ چەندێ یانا بایرن یا ئەلمانی دێ بزاڤان كه‌ت، بۆ جارا شه‌شێ ناسناڤێ چامپیۆنز لیگێ بده‌ست خوە ڤه بینیت.
هەروەسا ئه‌ڤ شەڤە بۆ جارا دەهێ ێ یانێن پاریس و بایرن روو ب روو ئێك بن، د یاریێن بورى دا بایرن چار جاران سه‌ركه‌فتن تۆمار كریه و پاریس ژى پێنج جاران سه‌ركه‌فتن تۆمار کریه و جارەکێ ژى وه‌كهه‌ڤ بووینه، یاریا ئەڤ شەڤە دێ ل ده‌مژمێر 10:00 شه‌ڤ ل یاریگه‌ها لوس ل له‌شبۆنه یا پورتۆگالى هێته ئه‌نجام دان.
ئەڤرۆ نیوز:
بەرپرسەکێ ئێکەتیا ئورۆپا راگەهاند کو راگرتنا شەرێ ل لیبیا د بەرژەوەندیا هەموو خەلکێ وی وەلاتیە و ئێکەتیا ئورۆپا پێشوازیێ ل کارەکێ وەسا دکەت و داخواز ژ هەر دو هێزێن سەرەکی یێن لیبیا ژی دکەت کو ئاریشێن د ناڤبەرا خوە دا چارەسەر بکەن.
نوونەرێ نەتەوێن ئێکگرتی ل لیبیا ژی راگەهاند کو ئاگربەستا ل لیبیا دەستپێکرنا قۆناغەکا گرنگ و دیرۆکی یە، ژ بەر هندێ ژی پێدڤیە جەنەرال حەفتەر و حوکمەتا فەیاز سیراج بەردەوامیێ بدەنە ئاگربەستێ و هەموو پرسێن هەی ب رێیێن سیاسی چارەسەر بکەن.
ئەڤرۆ نیوز:
وەزارەتا دارایی یا عیراقێ راگەهاند کو سالا بهێت دێ عیراقێ ب جهێ ئیرانێ پەیوەندیێن خوە د بیاڤێ وزێ دا ل گەل ئەمریکا ب هێزتر لێ کەت و ژ بۆ هندێ ژی گرێبەستێن مەزن ل گەل کۆمپانیێن ئەمریکی و وەربەرهێنەرێن سعوودی هاتینە ئیمزا کرن.
پشتی سەرەدانا مستەفا کازمی بۆ ئەمریکا عیراقێ گەلەک گرێبەستێن جودا جودا ل گەل ئەمریکا ئیمزا کرینە کو چاڤدێرێن سیاسی ژی دیار دکەن کازمی دڤێت عیراقێ ژ ئیرانێ دوور بکەت لێ ئەو یەک بوویە جهێ دلگرانیا بەرپرسێن ئیرانێ و هێزێن شیعە یێن عیراقێ.
ئەڤرۆ نیوز:
ماریان ترامپ خووشکا دۆنالد ترامپێ سەرۆکێ ئەمریکا راگەهاند کو دۆنالد ترامپ مرۆڤەک بێ بنەمایە، چو رەوشتێن باش ل دەف وی نینن، گەلەک درەوان دکەت و ئەو تویتێن بەلاڤ دکەت ژی هەموو درەون، ژ بەر هندێ ژی ترامپ هەژی هندێ نینە جارەکا دی ببیتە سەرۆکێ ئەمریکا.
خووشکا ترامپی دبێژیت دۆنالد ترامپ ب فێلبازیێ زانکۆ تەمام کریە و گەلەک پارە داینە هندەک کەسان دا هاریکاریا وی بکەن.
ئەڤرۆ نیوز:
رێڤەبەریا گشتی یا گەشتوگۆزارێ ل پارێزگەها دهۆکێ ئاگەهداریا هەمی کۆمپانی و بریکار و نڤیسینگەهێن گەشتیاری یێن پارێزگەها دهۆکێ دکەت کو ژ ئەڤرۆ 23/8/2020 دشێن گرۆپێن گەشتیاری ژ پارێزگەهێن (هەولێر، سلێمانی، حەلەبجە) بیننە پارێزگەها دهۆکێ و بەرۆڤاژی ژ پارێزگەها دهۆکێ ژی ببەنە پارێزگەهێن ناڤهاتی بێ کو پشکنینا کۆرۆنایێ ل زالگەهان بۆ گەشتیاران بهێتە ئەنجامدان.
رێڤەبەریا گشتی یا گەشتوگوزارێ داخواز ژ هەموو گەشتیاران ژی دکەت کو پێگیریێ ب رێنمایێن ساخلەمیێ بکەن.
ئه‌ڤرۆ نیوز:
د. دارا ره‌شید وه‌زیرێ پلاندانانا حوكمه‌تا هه‌رێما كوردستانێ و ئه‌ندامێ چاندێ دانوستانكارێ هه‌رێمێ بۆ به‌غدا راگه‌هاند هه‌ولێر و به‌غدا ل چه‌ند رۆژێن بوری ل ده‌مێ سه‌ره‌دانا كازمی بۆ ئه‌مریكا پشتی ڤه‌گه‌راندنا وی دێ به‌رده‌وام بین ل هه‌ڤگوهارتنا بوچوونان ل سه‌ر ئاریشه‌یێن دناڤبه‌را هه‌رێم و به‌غدا بۆ چاره‌كرنێ، دوی چارچوڤه‌یی دا ره‌شنڤیسێ رێكه‌تنا تایبه‌ت ب موچه‌یێ فه‌رمانبه‌رێن هه‌رێمێ ئێخستیه بیاڤێ بجهكرنێ دا.
ئه‌ندامێ دانوستانكارێ هه‌رێمێ بۆ به‌غدا ئه‌و چه‌نده ژی راگه‌هاند: رێكه‌تن بۆ درێژاهیا ئیسال كار پێ هێته‌كرن و به‌غدا پاره‌یێ موچه‌یێن فه‌رمانبه‌رێن هه‌رێما كوردستانێ هنێریت، بریاره ژی د ده‌مه‌كێ نێزیك دا ب مه‌به‌ستا به‌رهه‌ڤكاریێن دانوستاندنێ ل سه‌ر ژماره‌یه‌كا دوسه‌یێن دناڤبه‌را هه‌ولێرێ و به‌غدا بۆ پرۆژه‌یێ یاسایا بۆدجا سالا 20221 یا عیراقێ، شاندێ هه‌رێمێ سه‌ره‌دانا به‌غدا كه‌ت.
لگۆری ئه‌وێ رێكه‌تنا دناڤبه‌را هه‌رێم و به‌غدا هاتیه ئه‌نجامدان، فه‌رمانبه‌رێن دیوانا چاڤدێریا عیراقێ دچنه ده‌رگه‌هێن خالێن توخیبی و رێژه‌یا 50% یا گۆمركێ بۆ به‌غدا چیت، هه‌مبه‌ر به‌غدا 320 ملیار دیناران هه‌یڤانه بۆ هه‌رێما كوردستانێ ره‌وانه كه‌ت.
ئەڤرۆ نیوز:
وەزارەتا دەرڤە یا ئیماراتێ راگەهاند کو رێککەفتنا وان ل گەل ئیسرائیلێ پێنگاڤەکا گرنگە بۆ ئارامیا ل دەڤەرێ و هەر دو وەلات دێ ژ بۆ ئارامیا ناڤخوەیی ل هەر دو وەلاتان هاریکاریا هەڤدو کەن.
وەزارەتا دەرڤە یا ئیماراتێ ئەو یەک ژی دیار کریە کو هەر دو وەلات دێ د بیاڤێن بازرگانی، زانستی و گەلەک بیاڤێن دیتر دا پەیوەندیێن خوە ب هێزتر لێ کەن و ئەو یەک ژی ل سەر بنەمایێ دژایەتیا چو وەلاتەکێ دی نینە.
ئه‌ڤرۆ نیوز:
وه‌زاره‌تا ساخله‌میا حوكمه‌تا هه‌رێما كوردستانێ، ژماره و رێژه‌یا توشبوویێن ڤارۆسێ كورونایێ د ماوه‌یێ هه‌فتیه‌كێ دا ل هه‌رێما كوردستانێ به‌لاڤكرن.
ئه‌ڤرۆ 23/8/2020 وه‌زاره‌تا ساخله‌میا حوكمه‌تا هه‌رێما كوردستانێ، ئامارا ڤایرۆسێ كورونایێ ژ 14/8/2020 هه‌تا 20/8/2020 سێ هزار و 712 كه‌س تووشی كورونایێ بوون.
وه‌زاره‌تا ساخله‌مێ ئه‌و چه‌نده ژی دازانین د ئه‌ڤێ هه‌فتیێ ل هه‌رێما كوردستانێ 163 كه‌س ب ئه‌گه‌رێ ڤایرۆسێ كورونایێ گیانێ خوه ژ ده‌ست داینه.
نيشاندان