ئەڤرۆ نیوز:

یانا ریال مەدرید ئەڤرۆ رۆژا چارشەمبی ماوێ دورکەفتنا یاریزانێ وێ یێ گەنج ڤینیسیوس جونیور ئاشکرا کر ئەوێ تووشی ھنگافتنێ بووی دوھی د یاریا بەرامبەر ئەیاکس ئەمستردام ل ژ قارەمانیا چامپیونزلیگ و پشکداری ٩ یاریێن بھێت یێن یانا مەلەکی ناکەت.

یانا مەلەکی ب رێکا پەیجێ خوە یێ تایبەت یێ تورا جڤاکی یا تویتەری دیارکر ئەو ھنگافتنا یاریزانێ وێ یێ بەرازیلی ڤینیسیوس جونیور تووش بووی دێ بۆ ماوێ دو ھەیڤان ڤەکێشیت پشتی ئەڤرۆ پشکنینێن نوشداری بۆ ھاتیە کرن دیاربوو کو ھنگافتن د چوکێ وی یێ راستێ دا پەیدابوویە و دێ بۆ ماوێ دو ھەیڤان ژ یاریگەھان دورکەڤیت و پشکداریێ د یاریێن بەرامبەر بەلەد وەلید، سێلتا فیگو، ھویسکا، ڤالێنسیا، ئیبار، لیگانێس، ئەتلەتیکو بلباو، خیتاڤی و رایوڤالیکانو دا ناکەت.

ئەڤرۆ نیوز:

یانا گارە شیا سەرکەفتنێ ل سەر یانا خاک تومار بکەت ب دو گۆلان بەرامبەر گۆلەکێ ژ یاریێن چارگۆشا زێرین بۆ دەربازبوون بۆ خولا نایاب د يا خولا پلە ئێک.

ڤێ یاریێ دەسپێکر بێ ھیچ یانەیەک فشارێ ل سەر گۆلا ئێکدو پەیدابکەن و زێدەتر یاری ل نیڤا یاریگەھێ دھاتە کرن، ھەتا خولەکا ٢٦ دەمێ یاریزانێ گارە شیمال خورشید شیای ژ شوتەکا بھێز گۆلا ئێکێ بۆ یانا خو تومار بکەت، پشتی ڤێ گۆلا یانا گارە ھەولدا گۆلا دویێ ژی تومار بکەن لێ نەشیان مفای ژ وان ھێرشان وەرگرن یێن بۆ وان پەیدابووین، نیڤا ئێکێ ژ ڤێ یاریێ ب پێشکەفتنا گارە ب گۆلەکێ بێ بەرامبەر ب دووماھی ھات.

د نیڤا دویێ دا یانا خاک بۆ راستڤەکرنا ئەنجامێ یاریێ فشارەکا مەزن ل سەر گۆلا گارە پەیدا کر، و ئەڤ چەندە ل خولەکا ٥٩ ژ یاریێ دەستڤەھات دەمێ یاریزانێ وێ عەلی حوسێن ژ فاولەکا ئێکسەر گۆلا وەکھەڤیێ تومارکری ، پشتی ڤێ چەندێ راھێنەرێ یانا گارە ئاشتی مستەفا چەند گوھۆرین کرن بۆ تومارکرنا گۆلا دویێ، شیان چەند ھێرشان ل سەر گۆلا خاک پەیدابکەن و د دەلیڤەکێ دا ھێرشبەرێ گارە عەلی کەریم ل خولەکا ٧٠ شیا گۆلا دویێ و سەرکەفتنێ بۆ یانا خوە تومار بکەت، دەمێ مای ژ یاریێ چ ژ ئەنجامێ یاریێ نەھاتە گوھۆرین ھەتا یاری ب سەرکەفتنا یانا گارە ب دو گۆلان بەرامبەر گۆلەکێ ب دووماھی ھات.

ب ڤێ سەرکەفتنێ یانا گارە یا بەردەوامە ل سەر ھەڤرکیێن دەربازبوونێ بۆ خولا نایاب ب ھەشت خالان ل رێزا سیێ یا چارگۆشا زێرین و چارەنڤیسێ وێ ژی مایە ھەلاویستی ھەتا یاریا بھێت بەرامبەر سیروانا نوێ ل حەفتیا بھێت، بەرامبەر یانا خاک ب ڤێ خوسارەتیێ چ ھیڤیێن دەربازبوونێ نەمان و ما ل رێزا دووماھیێ ب خالەکێ .

ئەڤرۆ نیوز:
پشتی د ماوێ حەفتیەکێ دا یانا ریال مەدرید سێ قارەمانی ژ دەستداین کو دو خوسارەتی ل دیڤ ئێک ل کلاسیکو ل گەل یانا بەرشەلۆنا و ھەردیسان ل شەڤا بوری ژی توشی خوسارەتیەکا مەزن بووی ل گەل یانا ئەیاکس و قارەمانیا یانێن ئورۆپا قارەمانێن خۆلا ب جە ھێلای کو دبیتە جارا ئێکێ پشتی ٩ سالان یانا ریال مەدرید ل قوناغا ١٦ قارەمانیێ ب جە بھێلت .
پشتی یاریا ئەیاکس ب دووماھیی ھاتی تورەبوونەکا مەزن ل دەڤ جەماوەرێ یانا ریال مەدرید ل ناڤا یاریگەھێ و دەرڤەی یاریگەھێ پەیدابوو رۆژناما موندو یا ئیسپانی دیارکریە جەماوەرێ ریال مەدرید ل ناڤا یاریگەھێ داخوازی ژ سەرۆکێ یانا فلورنتینو پێریز کر دەست ژ پوستێ سەرۆکاتیا یانێ بەردەت ژبەرکو ئەو بەرپرسێ ئێکێ یە ژ ئەنجامێن لاواز یێن وەرزێ ئەڤ سالە یێن یانێ .