ئەڤرۆ نیوز، هۆشەنگ تاجر:

خالد رەحیمی چاڤدێرێ سیاسی ل باژێرێ مهابادێ یێ رۆژهەلاتێ کوردستانێ بۆ ئەڤرۆ نیوز دیار کر کو پیلانەکا رژێما ئیرانێ بۆ گوهۆرینا دیموگرافیا باژێرێ مهابادێ ژ ئالیێ هندەک کەسان ڤە هاتیە ئاشکرا کرن و ژ بەر هندێ ژی ئەم داخواز ژ هەموو خەلکێ خوە یێ مهابادێ و باژێرێن دی دکەین کو رێگریێ ل ڤێ پیلانێ بکەن.

ل دۆر ناڤەرۆکا پیلانێ ژی ناڤهاتی دیار کر کو بەری نها چەندین پرۆژێن ئاڤاهیان ل مهابادێ هەبوون، پشتی پرۆژە هاتینە تەمامکرن نها ب فەرمانا پاسدارێن ئیرانێ ئەڤ ئاڤاهیە بێ پارە ل سەر کەسێن ئازەری دهێنە بەلاڤکرن و ئارمانجا دەولەتا ئیرانێ ژی ئەڤە دیموگرافیا باژێرێ بگوهۆریت و ئازەریان ل باژێرێ مهابادێ بجه بکەت و گۆت: (بەری نها ل ئورمیێ و نەقەدێ ژی هەمان تشت کرن و نها رێژەکا مەزن یا ئازەریان ل وێرێ هاتینە بجهکرن و ئەو یەک ئاریشەکا مەزن بۆ خەلکێ وان باژێران دروست کریە).

ئەڤرۆ نیوز:

ڤێ هەفتیێ وەزیرێ دەرڤە یێ فرەنسا جان لودریان دێ سەرەدانا هەولێرێ کەت و بریارە ل گەل بەرپرسێن هەرێما کوردستانێ ل دۆر پەیوەندیێن هەر دو ئالیان و رەوشا عیراقێ و گوهۆرینێن ل دەڤەرێ دانوستاندنان بکەن.

ل ئالیێ دی هاتە زانین کو هەر ڤێ هەفتیێ دێ وەزیرێ دەرڤە یێ ئیرانێ محەمەد جەواد زەریف ژی سەرەدانا هەرێما کوردستانێ کەت، سەرەدانا زەریف پشتی سەرەدانا وەزیرێ دەرڤە یێ ئەمریکا بۆ عیراقێ و هەرێما کوردستانێ دهێت.

ئەڤرۆ نیوز، ئەمیر ئەترووشی:

قایمقامێ قەزا شنگالێ راگەھاند، ل سالا ٢٠١٤ دەمێ کارەساتا شنگالێ پەیدابووی، نێزیکی ھزار کوردێن ئێزدی بەرەڤ وەلاتێ سۆریا برێکەفتن و ل وێرێ د کەمپەکێ دا ب ناڤێ (مخیم نوروز) ئاکنجی بووینە و رەوشا وان یا ژیارێ گەلەک یا بێسەرۆبەرە و نھا ژ بەر تێکچوونا رەوشا رۆژئاڤای، جارەکا دی ئەو پەنابەرە ڤەگەریانە ھەرێما کوردستانێ و ھندەک ژی جارەکا دی چوونە شنگالێ.

مەحما خەلیل، قایمقامێ قەزا شنگالێ، بۆ ئەڤرۆ نیوز دیار کر، ماوێ زێدەتر ژ چوار سالان بویە نێزیکی ٥٠٠٠ کوردێن ئێزدی چووبوونە سوریا و ھندەک ژی ل کەمپا نەوروز دا ل رۆژئاڤایێ کوردستانێ دا دژیان و رەوشا وان گەلەک یا خراب بوو و ژین و ژیارا وان ژی گەلەک یا نەباش بوویە و نھا ژی پشتی رەوشا رۆژئاڤایێ شنگالێ تێکچوویە و بەرەڤ خرابتربوونێ ڤە چوی، ئەو کوردێن ئێزدی ھەموو یێ ڤەدگەرنەڤە و ھندەک ژی وان جارەکا دی چووینە شنگالێ سەر مال و مۆلکێن خوە و ھندەک ژی ڤەگەریاینە ھەرێما کوردستانێ.

مەحما ئاشکرا ژی کر کو رەنگە د ڤێ مەھێ دا ھەموو کوردێن ئێزدی کەمپا نەوروز ل رۆژئاڤای چولبکەن و بگەھنە شنگال یان ژی ھەرێمێ، بەلێ ئەو کوردێن ئێزدی یێن چووینە شنگال د رەوشەکا گەلەک خراب دانە و خانیێن وان ھەموو ژلایێ داعش ڤە ھاتینە خرابکرن و بێ مال و حال و بێ خزمەتگۆزاری ماینە ل شنگال.