ئه‌ڤرۆ نیوز، نه‌وزاد هلۆرى:
ل ناڤه‌ندا بازارێ سوران یێ سه‌ر ب پارێزگه‌ها هه‌ولێرێ، ڤه‌گوهاستنا نه‌فه‌ران ژلایێ ترومبێلێن تایبه‌ت ڤە بوویه تشته‌كێ نورمال و ب بهایه‌كێ نه‌دیاركرى و ئه‌رزانتر ژ ته‌كسیا نه‌فه‌ران ڤه‌دگوهێزن، ئه‌ڤ یه‌كە ژى بوویه جهێ دلگرانیا شۆفێرێن ته‌كسیا.
ره‌وان مێرگه‌سوورى، وه‌لاتیه‌كێ ده‌ڤه‌رێ یه بۆ ئه‌ڤرۆ نیوز گۆت: (ل سنوورێ قه‌زا سوران و مێرگه‌سوورێ ژى ڤه‌گوهاستنا نه‌فه‌ران هێشتا نه‌بویه شێوازه‌كێ رێكخستى و هه‌ر كه‌س ب كه‌یفا خوه نه‌فه‌ران ڤه‌دگوهێزن، ب دیتنا من ئه‌ڤ یه‌ك بو دوو ئه‌گه‌را دزڤریت، چوو پیڤه‌ر بۆ ڤه‌گوهاستنا نه‌فه‌ران وه‌كو پاره نه‌هاتینه دیاركرن و هه‌ر شوفێره‌ك ب گوره‌ى حه‌زا خوه نه‌فه‌ران ل جهه‌كێ بو جهه‌كێ دن ڤه‌دگوهێزیت و وه‌لاتى دكه‌ڤیته مامه‌له‌یان ل گه‌ل شوفێرى، ل ڤێره ترومبێلێن تایبه‌ت ئه‌رزانتر ژ ته‌كسیا نه‌فه‌ران دبه‌ن، خالا دوویێ ترومبێلێن توزوبا زوربوینه و سزادان نینن، ژبه‌رڤێ ئه‌و ڤه‌گوهاستنا نه‌فه‌ران بخوه ب ده‌لیڤه دبینن).
جادر عه‌بدوللا وه‌لاتیه‌كێ سورانه و ب ترومبێلا خوه یا تایبه‌ت نه‌فه‌ران ڤه‌دگوهێزیت بۆ ئه‌ڤرۆ نیوز گۆت: (ئه‌ڤه چه‌ند ساله بزاڤى َدكه‌م كو ترومبێلا خوه یا مودێل كه‌ڤن بگوهرم ب ته‌كسیه‌كێ داكو بشێم باشتر نه‌فه‌ران ڤه‌گوهێزم به‌لێ ره‌وشا داراى بویه ئه‌گه‌ر هه‌تانوكه نه‌شێم بگوهرم، ئه‌ز ب نه‌چارى نه‌فه‌ران ڤه‌دكوهێزم ژبه‌ركو خێزاندارم و چه‌ند زارو من هه‌نه و موچه‌یێ من تێرا مه ناكه‌ت و گیرو دبیت).
ئێك ژ خودانێن ته‌كسیا بناڤێ سیروان ئه‌حمه‌د دیاركر كو ئه‌و روژانه وه‌كو شوفێرێ ته‌كسیێ نه‌فه‌ران ل سوران ڤه‌دگوهێزیت و بۆ ئه‌ڤرۆ نیوز گۆت: (ب گوره‌ى رێنمایێن كو حوكمه‌ت و لایه‌نێن شوله‌ژێ بومه دیاركرى، ئه‌م نه‌فه‌ران ڤه‌دگوهێزین، به‌لێ جهى َداخێ یه ترومبێلێن تایبه‌ت ژى ل گه‌ل مه كار دكه‌ن و ئه‌ز رسوماتێن هاتنووچۆنێ دده‌م و ئه‌و ناده‌ن، ئه‌ڤێ یه‌كێ كارتێكرن ل كارێ مه‌كریه).
زێده‌تر گۆت: (پێدڤى یه جهێن شوله‌ژێ ب باشى كونترولا ناڤا سه‌نته‌رێ سوران بكه‌ن بو ڤه‌گوهاستنا نه‌فه‌ران، دیسان ژبلى ناڤا سه‌نته‌رى دهه‌مان ده‌م دا نه‌فه‌ر ژلایێ ترومبێلێن تایبه‌ت بو ده‌رڤه‌یێ سه‌نته‌رى ژى ژ باژێره‌كێ بو باژێره‌كێ دن دهێنه ڤه‌گوهاستن).
دلاوه‌ر له‌تیف، ئاختنكه‌رێ هاتنووچۆنا سوران بۆ ئه‌ڤرۆ نیوز گۆت: (ب گوره‌ى قانونێن هاتنووچۆن و ڤه‌گوهاستنێ ژى، ترومبێلێن تایبه‌ت نابیت نه‌فه‌ران ژ جهه‌كێ بو جهه‌كێ دن، ل باژێره‌كێ بو باژێره‌كێ دن ڤه‌گوهێزن،تنێ ترومبێلێن ته‌كسى ب گوره‌ى رێنما و قانونان دڤێت كارێ ڤه‌گوهاستنا نه‌فه‌ران بكه‌ن).
زێدتر گۆت: (پێدڤى یه قانون ب دروستى كارێ خوه بكه‌ت و هه‌ر شوفێره‌كێ نه‌فه‌ران ڤه‌گوهێزیت و نه‌هاتبینه توماركرن دڤێت بهێته سزادان، پێدڤى یه ئێدى خه‌لك ژى هاریكاربن ل گه‌ل جهێن شوله‌ژێ داكو بشێن خزمه‌ته‌كا باشتر بو سوران بكه‌ین و كارێ ڤه‌گوهاستنێ ژى بهێته رێكخستن).
ناڤبرى دیاركر ژى كو ڤه‌گوهاتنا نه‌فه‌ران ب ترومبێلێن تایبه‌ت ل سوران دزڤریت بو داب و نه‌ریتێن جڤاكى و ئه‌ڤ یه‌ك بویه كه‌لتوور و خه‌لك بخوه په‌یوه‌ندیێ ب ترومبێلێن تایبه‌ت دكه‌ن و دخوازن ل گه‌ل كه‌س و كارێ، خوه هاتنووچۆنێ بكه‌ن و كێمتر ب ته‌كسیان هاتنووچۆنى َدكه‌ن و زێده‌تر گۆت: (ل ناڤه‌ندا قه‌زا سوران و رێیێن سه‌ره‌كى یێن سوران پترى 200 ته‌كسیان هه‌نه و دشیاندایه بێ كێشه هه‌موو نه‌فه‌ران ڤه‌گوهێزن).
نيشاندان
