ئه‌ڤرۆنیوز:
ژێده‌ره‌كى ژ ریڤه‌به‌ریا گشتى یا كه‌شناسیێ ل عیراقێ راگه‌هاند ئه‌ڤ شه‌ڤه دێ پاله‌پستویه‌كا نزم به‌ر ب پارێزگه‌هێن هه‌رێما كوردستانێ ڤه‌هێت وبیته ئه‌گه‌رێ باران بارینێ.
سادق عه‌تیه، شاره‌زایێ پێشبینیێن كه‌شناسیێ ل رێڤه‌به‌ریا گشتى یا كه‌شناسیێ ل عیراقێ راگه‌هاند” دره‌نگیا ئه‌ڤ شه‌ڤه دێ كارتێكرنا وى پاله‌پستۆیێ نزم دیاربیت ودێ بیته ئه‌گه‌رێ باران بارینێ ل مووسلێ ول سپێده‌یا رۆژا سوباهى ئێكشه‌مبى 3/3/2019 ئه‌و پێلا بارانێ دێ گه‌هیته دهۆكێ وهه‌ولێرێ”.
ئه‌ڤرۆنیوز:
وه‌زاره‌تا خواندنا بلند ل هه‌رێما كوردستانێ رۆهنكرنه‌ك ل دۆر پرسا سه‌خته‌بوونا باوه‌رناما سه‌رۆكێ زانكۆیا هه‌له‌بجه به‌لاڤكر.
دوێ رۆهنكرنێ دا وه‌زاره‌تا خواندنا بلند ئاماژێ ب ده‌نگوباسه‌كێ هاتیه به‌لاڤكرن ل دۆر سه‌خته‌یا باوه‌رناما سه‌رۆكێ زانكۆیا هه‌له‌بجه دكه‌ت وئاشكرا دكه‌ت كو چه‌ند هه‌یڤه‌كه وه‌زاره‌تا خواندنا بلند ئاگه‌هدارى وى بابه‌تى یه ول سه‌ر داخوازا سه‌رۆكێ زانكۆیا هه‌له‌بجه، دووڤچوون ل دۆر وى بابه‌تى كریه وب نڤیسار ئاراسته‌ى ده‌سته‌یا ده‌ستپاكیێ ل هه‌رێما كوردستانێ كریه.
وه‌زاره‌تا خواندنا بلند دیاركر ژى كو ده‌سته‌یا ده‌ستپاكیێ دێ ڤه‌كۆلینێ دراستى ودروستیا وى بابه‌تى كه‌ت ووه‌زاره‌تا خواندنا بلند چاڤه‌رێ بریارا ئێكلاكه‌را ده‌سته‌یا ده‌ستپاكیێ دكه‌ت، له‌وما داخواز ژ هه‌ر كه‌سه‌كى كریه كو به‌لگه ل دۆر وێ پرسێ ل به‌رده‌ست دایه، ئاراسته‌ى ده‌سته‌پا ده‌ستپاكیێ بكه‌ت.
وه‌زاره‌تا ناڤبرى داخوازكریه ژى كو چو كه‌س ولایه‌نه‌ك نه‌هێته تۆمه‌تباركرن تاكو لایه‌نێن په‌یوه‌ندیدار ب فه‌رمى ئێكلا دكه‌ن ودۆسیێ ساخ دكه‌ن، دیاركر ژى كو سه‌رۆكێ زانكۆیا هه‌له‌بجه خواندنا (به‌كالوریۆس وماسته‌ر ودكتۆرا) ل هه‌رێما كوردستانێ یا تمامكرى.
پێشتر په‌رله‌مانتاره‌كێ سه‌ر ب نه‌وه‌ى نوێ نڤیساره‌كا وه‌زاره‌تا خواندنا بلند ل عیراقێ به‌لاڤكربوو كو تێدا ئاماژه ب وێ چه‌ندێ هاتیه دان، سه‌رۆكێ زانكۆیا هه‌له‌بجه ل سالێن 1991 و1992 ل خواندنا به‌كالوریۆسێ نه‌مایه، به‌لێ پاشى زانكۆیا هه‌له‌بجه رۆهنكرنه‌ك به‌لاڤكر وئاشكراكر كو سه‌رۆكێ زانكۆیا هه‌له‌بجه وه‌كو سه‌دان قوتابیێن كورد یێن دى، پشتى سه‌رهلدانا خه‌لكێ كوردستانێ ل سالا 1991، ل زانكۆیا به‌غدا نه‌ما ول زانكۆیا سه‌لاحه‌دین ل هه‌ولێرێ درێژى ب خواندنا خوه دایه.
ئه‌ڤرۆنیوز:
وه‌زاره‌تا ده‌رڤه‌یا ئه‌مریكى راگه‌هاند كو پارتیا كاركه‌رێن كوردستانێ (په‌كه‌كه) دێ دناڤ لیستا تیرۆرێ دا هێلیت.
ل دووڤ به‌یاننامه‌كا وه‌زاره‌تا ده‌رڤه‌یا ئه‌مریكى دا كو دوهى ئه‌ینیێ 1/3/2019 هاتیه به‌لاڤكرن، هاتیه” ب درێژیا زێده‌تر ژ 20 سالایه په‌كه‌كه دناڤ لیستا تیرۆرێ یا ئه‌مریكا دا هاتیه دانان، ئه‌و وه‌لاته به‌رده‌وام به‌رهنگاریا گه‌فێن په‌كه‌كێ بوویه ول گه‌ل هه‌ڤپه‌یمانا خوه ل ناتۆ (توركیا) كاركریه بۆ رێگرتن ل كاروبارێن دارایى وكۆمكرنا پاره‌ى ژلایێ په‌كه‌كێ ڤه ل وه‌لاتێن ئورۆپى ول وه‌لاتێن دى ژى”.
وه‌زاره‌تا ده‌رڤه‌یا ئه‌مریكى دووپات كریه ژى كو دێ په‌كه‌كه دناڤ لیستا (رێكخراوێن تیرۆرستى یێن بیانى) مینیت وئه‌مریكا یا پێگیره ب به‌رهنگاریا وێ.
دیاركر ژى كو ئه‌ڤ بریاره دێ رێ ده‌ته حوكمه‌تا ئه‌مریكى بۆ بجهئینانا قانوونێ دژى ئه‌ندام وسه‌ركردێن په‌كه‌كێ ورێ نه‌دان ب په‌كه‌كێ بۆ كاركرنێ دناڤ سیسته‌مێ بانكى ودارایى یێ ئه‌مریكى دا.
پێشتر ژى ل سالا 2018، حوكمه‌تا ئه‌مریكى خه‌لاته‌كێ 12 ملیۆن دۆلارى بۆ وان وان كه‌سان ته‌رخان كربوو كو پێزانینان ل سه‌ر جهێ سێ ژ سه‌ركردێن بلند یێن په‌كه‌كێ بده‌ن ورێ خوه‌شكه‌ر بن بۆ ده‌سته‌سه‌ركرنا وان.
ئه‌ڤرۆنیوز:
شانده‌كێ هه‌رێما كوردستانێ ل سه‌ر چه‌ند پرسێن جودا دێ چیته به‌غدا وبریاره ل وێرێ كۆمبوونه‌كا به‌رفرهه بۆ چاره‌كرنا كێشان بهێته ئه‌نجامدان.
عه‌بدولرزاق ناوه‌نده‌یى، رێڤه‌به‌رێ گشتى ل وه‌زاره‌تا پیشه‌سازى وبازرگانى ل هه‌رێما كوردستانێ راگه‌هاند” بریاره شانده‌كێ هه‌رێما كوردستانێ ل سه‌ر پرسا ئاهێن خوارنێ وپارێ گه‌نمێ جوتیاران وچاوانیا تۆماركرنا كۆمپانیێن بازرگانى، سه‌ره‌دانا به‌غدا بكه‌ت”.
گۆت ژى”بۆ چاره‌كرنا كێشان ل به‌غدا ول گه‌ل وه‌زاره‌تا پیشه‌سازیا عیراقێ دێ دانوستاندنێ كه‌ین، به‌لێ هنده‌ك پرس یێن هه‌ین وه‌كو پشكا ئاهێن خوارنێ یا وه‌لاتیان په‌یوه‌ندى ب ده‌ستهه‌لاتا ناڤه‌ندى یا به‌غدا یا هه‌ى”.
ئه‌ڤرۆنیوز:
وه‌زیرێ ده‌رڤه‌یێ توركیا راگه‌هاند،توركیا ل به‌ره ئاستێ ئالوگۆریا بازرگانى ل گه‌ل عیراقێ به‌رفره‌هتر بكه‌ت، بۆ وێ مه‌ره‌مێ ژى ده‌رگه‌هه‌كێ سنوورى یێ نوو دناڤبه‌را هه‌ردو وه‌لاتان دا دێ ڤه‌كه‌ت.
ئاژانسا ئه‌نادۆل یا ده‌نگوباسان یا توركى ژزارده‌ڤێ چاوشوگلۆ وه‌زیرێ ده‌رڤه‌یێ توركیا ئه‌ڤرۆ شه‌مبیێ 2/3/2019 به‌لاڤكر” عیراق خودان پێگه وتایبه‌تمه‌ندیه‌كا ب هێزه ئه‌ڤ چه‌نده وه‌دكه‌ت ئاستێ ئالوگۆریا بازرگانى دگه‌لدا بلند بكه‌ین بۆ وێ چه‌ندێ بگه‌هیته نێزیكى 100 ملیار دۆلاران د ئێك سال دا”.
وه‌زیرێ ده‌رڤه‌یێ توركی دیاركر ژى كو وه‌لاتێ وى ل به‌ره ده‌رگه‌هه‌كێ سنوورى یێ نوو ل گه‌ل عیراقێ ل نێزیك گوندێ (ئاوفاكوى) ل پارێزگه‌ها شرناخ ڤه‌كه‌ت كو تنێ 7 كیلۆمه‌تران ژ سێگۆشه‌ا سنوورێ هه‌ڤپشكێ توركیا وسووریێ وعیراقێ دووره.
ئه‌ڤرۆنیوز:
سه‌رۆك مه‌سعود بارزانى ئه‌ڤرۆ شه‌مبیێ 2/3/2019 پێشوازى ل ئه‌یاد عه‌لاوى سه‌رۆك ئیئتیلافا وه‌ته‌نى یا عیراقى كر.
دكۆمبوونه‌كێ دا سه‌رۆك بارزانى وئه‌یاد عه‌لاوى به‌حس ل ره‌وشا سیاسى یا عیراقێ وده‌ڤه‌رێ هاته كرن. هه‌روه‌سا بیرورا ل دۆر پێشڤه‌چوونێن دناڤ پرۆسا سیاسى یا عیراقێ وهه‌رێما كوردستانێ وچاره‌كرنا كێشێن دناڤبه‌را هه‌ولێرێ وبه‌غدا هاتنه ئالوگۆركرن.
ئەڤرۆ نیوز:
ئەحمەد سالحی ئەندامێ رێکخراوا مافێ مرۆڤان یا رۆژهەلاتێ کوردستانێ بۆ ئەڤرۆ نیوز دیار کر کو ل پارێزگەها ئیلام یا رۆژهەلاتێ کوردستانێ مینێن کو د سەردەمێ شەرێ عیراقێ و ئیرانێ دا هاتینە چاندن و هەتا نها ژی نەهاتینە ژناڤبرن دبنە ئەگەرێ هندێ کو رۆژانە وەلاتی ژ بەر پەقینا ڤان مینان دبنە قوربانی و گۆت: (دوهی ژی کچەکا ١٥ سالی کو ل گەل خێزانا خوە چووبوو گەشتەکێ پێل مینەکێ کریە و بوویە قوربانی).
ناڤهاتی راگەهاند کو هەتا نها گەلەک جاران رێکخراوێن مافێ مرۆڤی داخواز ژ دەستهەلاتدارێن ئیرانێ کرینە کو مینێن ل سنوری پاقژ بکەن، لێ مخابن هەتا نها وەکو پێدڤی کار ل سەر هندێ نەهاتیە کرن.
ئەڤرۆ نیوز، بارزان مزووری:
دیار بیبۆ رێڤەبەرێ کەمپا ئێسیان یا ئاواران ل قەزا شێخان بۆ ئەڤرۆ نیوز دیار کر کو مە لیژنەک پێک ئینایە دناڤ کەمپا ئێسیان دا سەرەدانا وان فروشگەھان کریە ل دووڤ ئامارا ھاتیە دروست کرن ژلایێ وێ لیژنێ ڤە ٢٦٠ فروشگەە دناڤ کەمپێ دا یێن ھەین ھەموو پێزانین وان یێن ھاتینە تومارکرن، خودانێن وان ئاگەھدار کرینە کو سەرەدانا کەرتێ ساخلەمی بکەن ل ناحیا باعەدرێ بۆ دانانا رێنمایێن دروستکرنا مولەتا فروشگەھێ.
ناڤھاتی ئەو یەک ژی دیار کر ھەر فروشگەھەکا مولەتێ دروست نەکەت فروشگەھا وی دێ ھێتە داخستن و راگەهاند کو مەرەم ژ دروستکرنا ڤێ مولەتێ ئەوە کو بشێن کەل و پەلێن ماوە ب سەرڤەچوویی بهێنە قەدەغەکرن.
ئەڤرۆ نیوز، بارزان مزووری:
عومەر عەزیز ئێک ژ جوتیارێن دەڤەرا ئەتروش بۆ ئەڤرۆ نیوز گوت: (ئەو پێلا بەفرێ یا دەڤەرێن چیای گرتی ل دو رۆژێن بوری دا مەترسی بۆ بەرھەمێ باھیڤێ دروست کریە ژ بەر کو بەری ئەو پێلا بەفرێ بھێت ٦٠% باھیڤێن قەزا شێخان گول دابوون د نھا دا ھەر وەختەکێ عەور نەمینیت ژ ئەسمانی ببیتە ساھی دێ سەرما دروست بیت ئەو گولێن باھیڤێ دێ کەڤنە بەر سەرمایێ دێ رزن د ڤان دو رۆژان بارانەک نەباریت سەر وێ بەفرێ ب تنێ ئێک گول ژی نامینیت).
جەمال زوبێر بەرپرسێ بەشێ باغداری ل ھوبا چاندنا قەسروک بۆ ئەڤرۆ نیوز دیار کر کو ئەو بەفرا ل وان دو رۆژێن بوری دا چیایێن ھەرێما کوردستانێ گرتین باران لێ نەھێت مەترسیێن مەزن ل سەر بەرھەمێ باھیڤا ئەڤسالە، کریە ژ بەر کو دەڤەرا شێخان رێژا زێدەتر باھیڤێ گول دایە ئەو گول ژی گەلەک یا نازکە خوە ل بەر وێ سەرمایا بەفرێ ناگریت.
ئەڤرۆ نیوز:
رۆژنامەڤانێ ناڤدارێ تورکیا جەنگیز چاندار راگەهاند کو بەری چەندین سالان تورکیا هەموو بزاڤ کرن کو نەهێلیت ل عیراقێ چو هەرێم ب ناڤێ کوردستانێ بهێتە ئاڤاکرن، لێ د بزاڤێن خوە دا سەرکەفتی نەبوو و دووماهیێ ژی نەچار ما دانپێدانێ ب هەرێما کوردستانێ کر.
ناڤهاتی راگەهاند کو نها رەوشا سووریێ ژی گەلەکێ ئالۆزە و هەبوونا گەلەک هێزێن بیانی ل سووریێ ژی وەسا کریە کو رەوش هەر کو بچیت ئالۆزتر لێ بهێت و گۆت: (ئەز ب باوەرم پشتی دەمەکێ هەکە رەوش ل سووریێ ئارام بیت و کیانەکێ کوردی بهێتە ئاڤاکرن، دێ تورکیا ژی نەچار بیت دانپێدانێ ب کوردێن رۆژئاڤایێ کوردستانێ بکەت).
نيشاندان