ئەڤرۆ نیوز:
رێکخراوا شەرێ ل دژی مادێن هۆشبەر و تاوانان یا سەر ب نەتەوێن یەکگرتی (UNODC) راگەهاند کو سالا بۆری ٣٠ هزار ژن ب دەستێ گرۆپێن مافیا هاتینە کوشتن و بازرگانی ب جەستەیێ وان هاتیە کرن.
هەمان رێکخراوێ راگەهاند ژی کو نها ل جیهانێ هەری زێدە ژن دبنە قوربانیێن دەستێ گرۆپێن مافیا و مخابن د ئاستێ جیهانێ دا وەکو پێدڤی شەر ل دژی وان گرۆپان نەهاتیە کرن و ژ بەر هندێ ژی هژمارا قوربانیان رۆژ ب رۆژێ زێدەتر دبن.
ئەڤرۆ نیوز:
رۆژنامەیا موندو دیبورتیڤو یا کەتالونی دیارکر یانا ریال مەدرید دێ سکالایەکێ ل سەر دادڤانێ یاریا یانا خوە ھەمبەر یانا ریال سوسیداد تومارکەت.
زێدەتر ڤی ژێدەری دیارکر ریال مەدرید دێ سکالایەکێ ل ئێکەتیا تەپا پێ یا ئسپانیا تومارکەت دژی دادڤانێ یاریا وان دگەل ریال سوسیداد ژ بەر نە ھژمارتنا پەنەلتیەکا ١٠٠% دروست دەمێ گۆلپارێزێ ریال سوسیداد یاریزانێ ریال مەدرید ئێخستی د ناف دەڤەرا پەنەلتیێ دا بێ کو دادڤان بریارەکێ ل سەر دەت، سەرەرای نە رازیبوونا یاریزانێن ریال مەدرید ل سەر دادڤانێ یاریێ تەکنولوژیا var ژی بکار نەئینایە لەورا داخوازێ دێ ژ ئێکەتیا تەپا پێ ئسپانیا کەت چەند روونکرنا ل سەر ڤێ روودانێ بدەت کو ب نە دادپەروەری ل قەلەم ددەن.
ئەڤرۆ نیوز، هۆشەنگ تاجر:
فەیسەل ئیسماعیل ئەندامێ سەرکردایەتیا پارتی دیموکراتی کوردستان/ سووریا بۆ ئەڤرۆ نیوز دیار کر کو تورکیا هندەک هێزێن خوە ژ عەفرینێ ڤەدکێشیت و بەرهەڤیان بۆ هێرشەکا سەربازی ل رۆژهەلاتێ فراتێ دکەت و گۆت: (رێککەفتنەکا نهێنی د ناڤبەرا تورکیا، روسیا و ئەمریکا دا هەیە کو هەموو هێزێن چەکدار و هشکباوەر ژناڤ ببەن و تورکیا ژی دبێژیت دڤێت یەپەگە ژی ژناڤ بچیت و نها تورکیا بەرهەڤیان بۆ هندێ دکەت و هندەک هێزێن خوە ژ عەفرینێ ڤەدکێشیت و بەرهەڤیان بۆ ئۆپەراسیۆنا سەربازی ل رۆژهەلاتێ فراتێ دکەت).
ناڤهاتی راگەهاند کو هێزێن چەکداری یێن کو پشتی سالا ٢٠١١ ل سووریێ هاتینە ئاڤاکرن سەردەمێ وان بسەر ڤە چوویە و هێزێن جیهانی دخوازن ئەڤ هێزە ئێدی نەمینن.
ئەڤرۆ نیوز:
ئەڤرۆ ل رۆژا دوشەمبی ٧-١-٢٠١٩ ل سەلاحەدین سەروک مەسعود بارزانی پێشوازی ل سەروکێ بزاڤا عەتا و راوێژکارێ ئاسایشا نشتیمانیا عیراقێ فالح فەیاز کر و د دیدارەکێ دا بەحس ل دۆر بارودوخێ سیاسی یێ عیراقێ ھاتە کرن.
د ڤێ دیدارێ دا ھەردو لایان بەحس ل بارودوخێ سیاسی یێ عیراقێ ھاتە کرن و دووماھی پێنگاڤێن تمامکرنا حوکمەتا نوو یا عیراقێ ھاتە گوتوبێژ کرن، دیسان ھەردو لا تەکست ل ھەماھەنگیا ھەردو لایان بۆ سەرخستنا پروسەیا سیاسی یا عیراقێ و چارەسەرکرنا کێشەیان کر
ئەڤرۆ نیوز، عەلی حاجی :
سەنتەرێ سالح سەنتەرەکێ خێرخوازیێ ل زاخۆ بۆ زارویێن بێ سەمیان و دەست کورت ژ لایێ خێرخوازەکی ڤە ھاتە ڤەکرن و ئەڤ سەنتەرە دێ ھەمی پێدڤییان بۆ وان زارویان دابین دکەت ئەوێن ل وی سەنتەری دھێنە وەرگرتن.
ل دۆر ڤی ڤەکرنا ڤی سەنتەری مەسعود کوردی کارگێرێ سەنتەرێ سالح د داخویانیەکێ دا بۆ ئەڤرۆ نیوز گۆت: کارێن یاسایی یێ سەنتەرێ ناڤبری ب دووماھی ھاتینە و ئەڤ سەنتەرە دێ بێ بەرامبەر بۆ وان زارویێن بێ سەمیان ئەوێن و نەشێن ژیانا خوە برێڤە ببەن و زاروک دێ ل ژیێ ٤ ھەتا ١٨ سال ھێنە وەرگرتن و جھێ نڤستن و ڤەحەواندنا وان کەسان دێ ل سەنتەری بیت.
ناڤبری زێدەتر گۆت: ئەو کەسێ بھێتە وەرگرتن ل سەنتەرێ مە دێ ھەموو پێدڤیێن ل سەر کیستێ سەنتەری بن و ھەر دیسان دێ فرێکەینە قوتابخانا ژی داکو بێ بەھر نەبن ژ خواندنێ و سەنتەر دێ رابیت ب ئامادەکرنا جل و بەرگا ژی بو وانا.
زاخۆ، عەلی حاجی:
ل گورەی ئامارەکا بنگەھێن ساخلەمیێن باتیفا و کومەلگەھا بێگوڤا دیارکر ل ماوێ بوری ٥١٧ کێلوگرام و ١٥١ لترێن کەرەستەیان یێن دەم ب سەرڤەچووی ژلایێ لژنا ھەڤپشکا ھاتینە دەستەسەرکرن و ژناڤبرن.
ل دۆر ڤی بابەتی دلشێر عەبدولستار رێڤەبەرێ ناحیا باتیفا بۆ ئەڤرۆ نیوز گۆت : ژلایێ لژنا ھەڤپشکا کو چەند نوونەرەکان پێک دھێت ژ ناحیا باتیفا وساخلەمی و ئاسایش و پولیسێن باتیفا ڤە دەست ب سەر ٥١٧ کێلوگرام ژ ماددەێن ھشک و ١٥١ لتر ژ مادەیێن روھن ژکەرەستەێن خوارنێ یێن جورا و جور دەم ب سەرڤە چووی ھاتینە دەستەسەر کرن و ل دویڤ را ژلایێ لژنا ھەڤپشک ڤە ھاتینە ژناڤبرن.
ناڤبری زێدەتر گۆت : لژنێت مە بەردەوامن ل سەر لێگەریان و ژ ناڤبرنا وان کەرەستەێن دەم ب سەرڤە چووی دکەت دیسان ژی پێرابونێن یاسایی دەرحەقێ وان کەسان ژی ھێنە وەرگرتن.
ئەڤرۆ نیوز:
عەلی شەمخانی سەرۆکێ جڤاتا ئاسایشا نەتەوی یا ئیرانێ بەری دەمەکێ ل تەهرانێ راگەهاند کو ئیرانێ چو هێزێن سەربازی ل سووریێ و عیراقێ نینن هەتا کو هێزێن خوە ڤەکێشیت و گۆت: (بەری نها مە هندەک شیرەتکارێن سەربازی رەوانەی سووریێ کربوون دا هاریکاریا لەشکرێ سووریێ بکەن و ل عیراقێ ژی مە هندەک شیرەتکارێن سەربازی هەبوون کو بەری نها مە ئەو ڤەکێشاینە).
ئەو یەک د دەمەکێ دایە کو هەتا نها ب هزاران سەرباز و ئەفسەرێن ئیرانێ ل سووریێ هاتینە کوشتن.
ئەڤرۆ نیوز:
بەر دەمەکێ شیرەتکارێ ئێمناهیا ئەمریکا گەهشتە تورکیا و بریارە ل گەل بەرپرسێن وی وەلاتی ل دۆر رەوشا سووریێ و رۆژئاڤایێ کوردستانێ دانوستاندنان بکەت.
بەری سەرەدانا خوە بۆ تورکیا ژی ناڤهاتی دیار کربوو هەتا پاراستنا کوردان گەرەنتی نەکەن ئەو هێزێن خوە ژ سووریێ ڤەناکێشن و بەرپرسێن تورکیا ژی ژ ڤێ داخۆیانیا وی توورە ببوون.
بریارە پشتی سەرەدانا خوە یا بۆ تورکیا جۆن بۆلتۆن سەرەدانا رۆژئاڤایێ کوردستانێ بکەت و ل گەل بەرپرسێن یەپەگێ و رێڤەبەریا خوەسەر ژی هەڤدیتنان بکەت.
ئەڤرۆ نیوز، هۆشەنگ تاجر:
هەشت پارتێن کوردی یێن باکورێ کوردستانێ ئەڤرۆکە ل باژێرێ ئامەدێ یێ باکورێ کوردستانێ هەڤپەیمانیا خوە راگەهاندن و دیار کرن کو دێ ل ژێر ناڤێ هەدەپێ پێکڤە پشکداریێ د هەلبژارتنێن باژێرڤانیان یێن ٢١ ئادارێ دا کەن.
محەمەد گولەر چاڤدێرێ سیاسی ل ئامەدێ بۆ ئەڤرۆ نیوز دیار کر کو هەڤپەیمانیا هەشت پارتێن کوردی پێنگاڤەکا گرنگ و دیرۆکیە و ئەم هێڤیدارین بۆ هەلبژارتنێن دی هەموو پارتێن کوردی ل باکور بەرەیەکێ نیشتمانی ئاڤا بکەن.
ل ئالیێ دی زانا سەزەن نوونەرێ پارتیا ماف و ئازادیان ل هەرێما کوردستانێ ژی بۆ ئەڤرۆ نیوز دیار کر کو هەڤپەیمانیا پارتێن کوردی ل سەر بنەمایێ بەرژەوەندیێن نەتەوی نینە و ئەڤ هەڤپەیمانیا یا دەمدرێژ نابیت و هەدەپە خوە وەکو پارتیەکا کوردستانی نابینیت و ژ بەر هندێ ژی نەشێت هەڤپەیمانیێ ل گەل پارتێن کوردی دروست بکەت.
ئەڤرۆ نیوز، رەمەزان ھەرنی:
ل سنوورێ ئاکرێ ھژمارەکا رەزو باغێن زەیتونان ھەنە ئەڤ سالە ل دەڤەرێ رێژا بەرھەمێ زەیتونا باشترە ژ پار سال، بەلێ جوتیار کێم دچینن، ژ بەر کو بەرھەئینانا وان یاب زەحمەتە و سەخبێریەکا باش دڤێت.
عەکان عەبدولسەلام، رەزڤانەکێ دەڤەرا ئاکرێ یە بۆ ئەڤرۆ نیوز دیار کر کو ب دو رێیان زەیتون دھێنە چنین ھندەک خێزان زەیتونا ب دەستان ژێڤەدکەن و ھندەک ژی مینا گویزا ب جەلا دادقوتن و لایلون و پارچە پەروانان لبن دار زەیتونێ ددانن داکو خراب و پیس نەبن ،پشتی چنینێ ب چەقۆیان شەق دکەن دا ئاڤ بچیتە دناڤ دا و یان ب رێکا ئاڤا سویر بۆ دەمێ ھەیڤەکێ داکو تاما تالاتیێ نەمینیت. و گۆت: “ھەر حەفتیێ جارەکێَ ئاڤا زەیتونا دھێتە گوھرین یێن رەش ل گەل یێن دی دھێنە ژێک جوداکرن ، جوتیار ب گشتی کێم زەیتونا دچینن زو مەزن نابن و ب زەحمەتن ئاڤ یا کێمە و بھایێ کیلویا زەیتونێ د ناڤبەرا دو بۆ چار٤ ھزار دیناران دایە، سالانە زەیتون یا بەرھەمدارە بەلێ ھندەک سالان بەرھەمێ وێ یێ کێمە”.
ژ ئالیێ خوە ڤە ئەحمەد جەمیل، رێڤەبەرێ چاندنا ئاکرێ بۆ ئەڤرۆ نیوز گوت : ل سنوورێ ئاکرێ ئاخەکا باش ھەیە بۆ چاندنا بەرھەمێ دار زەیتونان، نوکە ب 50 ھزار دارێن زەیتونان ل سنوورێ ئاکرێ ھەنە و سالانە ھزار و 250 تەنێن زەیتونان دھێنە بەرھەمئینان ل ئاکرێ و گۆت: “کەرتێ چاندنێ ب گشتی ل دەڤەرا ئاکرێ گرنگی پێ دھێتە دان سال بۆ سالێ بەرفرەھتر لێ دھێت”.
نيشاندان