ئەڤرۆ نیوز، رێوار مزیری:
ئەندامەکێ پەرلەمانێ کوردستانێ ژ فراکسیۆنا پارتی دیموکراتی کوردستان بۆ رۆژناما ئەڤرۆ دیار کر کو پەرلەمانێ کوردستانێ ئەڤرۆ رۆژا ٢٦/٢/٢٠١٩ێ ل دووڤ پەیرەوێ ناڤخۆ یێ پەرلەمانی دێ کۆمبوونەکا نەئاسایی بۆ پێکئینانا لیژنا قانوونی یا پەرلەمانی ئەنجام دەت و گۆت: “فراکسیۆنا ئێکەتیی نشتیمانی کوردستان د ڤێ کۆمبوونێ ژی دا پشکدار نابیت”.
بژار خالد عزێر کۆچەر، ئەندامێ پەرلەمانێ کوردستانێ ژ فراکسیۆنا پارتی دیموکراتی کوردستان خویا کر کو د ڤێ کۆمبوونێ دا لیژنا قانوونی یا پەرلەمانی دێ ل دووڤ ھەر دو مادێن ٢٨ و ٢٩ یێن پەیرەوێ ناڤخۆ یێ پەرلەمانی ھێتە پێکئینان و گۆت: “ھەر فراکسیۆنەک دێ بەربژارێن خوە بۆ لیژنا قانوونی پێشکێش کەت و سەرۆکا پەرلەمانی دێ خواندنێ بۆ کەت و پەرلەمانتار دێ دەنگان دەنێ و ھەکە وان بەربژاران دەنگێن پەرلەمانتاران ب دەستخوە ڤە ئینان دێ بنە ئەندامێن ڤێ لیژنێ و دڤێت ئەڤ لیژنە ژ پێنج ئەندامان کێمتر نەبیت و ژ ١١ ئەندامان زێدەتر نەبیت، بەلێ ژ بەر کو فراکسیۆنا ئێکەتی نشتیمانی کوردستان پشکداریێ د ڤێ کۆمبوونێ دا ناکەت دێ جھێ بەربژارێن وێ مینیتە ڤالا و ھەر دەمێ پشکداری کۆمبوونێن پەرلەمانی بۆ دێ بەربژارێن وێ ژی ھێنە ھەلبژارتن”.
ناڤھاتی ئاماژە دا وێ چەندێ کو پشتی لیژنا قانوونی یا پەرلەمانی دھێتە ھەلبژارتن ئەندامێن ڤێ لیژنێ د دەمێ حەفتیەکێ دا دێ سەرۆک و جێگر و پەیڤدارێ لیژنێ د ناڤ خوە دا ھەلبژێرن، بەلێ ئەندامبوون د لیژنا قانوونی دا دێ ل دووڤ بەھر و مافێن فراکسیۆنان بیت و سەرۆکێ ڤێ لیژنێ ژی دێ ژ فراکسیۆنا پارتی بیت و پشتی ئەڤ لیژنە دھێتە پێکئینان دێ کارێ وێ یێ ئێکێ راستڤەکرنا قانوونا سەرۆکاتیا ھەرێمێ بیت و گۆت: “دڤێت ھەتا رۆژا ١٤/٣/٢٠١٩ێ ھەر ١٥ لیژنێن پەرلەمانی بھێنە ھەلبژارتن”.
نيشاندان