ئەڤرۆ نیوز:
ئەڤرۆ رۆژا ئێکشەمبی ٦-١-٢٠١٩ ل دەمژمێر ٤:٤٣ ئێڤاری بیڤەلەرزەکێ ل چەند دەرڤەرێ، ھەرێما کوردستانێ روودا و ل پارێزگەھا دھۆکێ ژی ھەست پێ ھاتە کرن.
ل دۆر ئاژانسا موکریان نیوز دیارکر کو ناڤەندا ڤێ بیڤەلەرزێ ل رۆژھەلاتا کوردستانێ بوویە و ھەتا نوکە چو زانیاریێن دی نە ھاتینە بەلاڤ کرن ھەتا ماوێ بھێت.
ئەڤرۆنیوز، رەزوان رۆژبەیانی:
کامیران نورەدین محەمەد بەر پرسێ چاڤدێریا بارزگانی ل قەزا بەردەرەش بۆ ئەڤرۆ نیوز خویاکر د سالا ٢٠١٨ ژ پێخەمەت چاڤدێریا بازاری و ساخلەمیا وەلاتیان ب ھەڤکاری دگەل لیژنا ئابووریا قایمەقامیا قەزا بەردەرەش مە سەرەدانا ٣٦٥٧ جھێن بازرگانی و فرۆشگەھان دناڤ بازارێ قەزا بەردەرەش و ھەر سێ ناحیێن وێ کریە. ئاشکرا ژی کر ٣١٥٥ جە ژبەر ھندەک کێماسیان ژ ژلایێ مە ڤە ھاتینە ئاگەهدار کرن کو ئەڤ دیاردە دوبارە نەبیت و ٢٤٥ جھێن دی سوز نامە ژ وان ھاتینە وەرگرتن.
دیسان گوت ٩٤٥٠ کێلۆیێن کەلوپەلێن ئێکسپایەر دەست ب سەردا ھاتینە گرتن کو ژ کەلوپەلێین سپیاتی و ڤەخارن و ھشکاتیێ پێک دھێن ئاماژە دا وێ چەندێ ژی کو ٢٦٣ جە ژ بەر سەرپێچیان و پێگیرنەکرن ب رێنمایان ھاتینە دائێخستن و ب کوژمێ ٣٨٦٥٠٠٠ دیناران ھاتینە سزادان.
ئەڤرۆنیوز، سەباح زێباری:
عیماد محمد رێڤەبەرێ فیترنەری ل ئاکرێ بۆ ئەڤرۆ نیوز دیارکر ل ئاکرێ ٩ کلینیکێن فیتەرنەری ھەنە بۆ چارەسەریا ئاژەلان و ل سالا بوری ٢٧١ نشتەگەری بۆ ھاتینە کرن.
ناڤھاتی ئاماژە دا وێ چەندێ کو ل ئاکرێ تیمەکێ نوشداری ھەیە بۆ ئاژەلان نشتەرگەریا دکەن و سالا بوری دا ٢٧١ نشتەرگەری ئەنجامداینە، کو ئەڤ نشتەرگەریە ژی بۆ وان ئاژەلان ھاتینەکرن.
د بەردەوامیا ئاخفتنا خوە دا گۆت: سالێن بەری نوکە ڤاکسین بۆ ئاژەلان د ھاتنە دانان و تووشی نەخوشیا نە دبوون، لێ نھا ئەڤ چەندە نەمایە و گەلەک جارا حالەتێن نەخوشیا د ناڤ ئاژەلان دا پەیدادبن گرنگە بەری وێ بھێنە ڤاکسیندان داکو ژ مەترسیا نەخوشیا بھێنە پاراستن.
ئەڤرۆ نیوز، بارزان مزووری:
ئەندازیارێ چاندنێ خالد محەمەد ل بەشێ شیرەتکاریا چاندنێ ل قەزا بەردەرەش بو ئەڤرۆ نیوز گوت: مە سەرەدانا وان جھان دا ئەو جھێن تووشی ڤی کرمێ بووین و دیار بوو کو جورێ کرمەکی یە بتنێ ب شەڤ کارێ خوە دکەت رەھێن گەنمی دگەل بەلگێن وێ دخووت، ئێکسەر ئەڤ گەنمە ھشک دبیت ب رۆژێ ئەڤ کرمە نێزیک ٢٠ سم خوە دناڤ ئاخێ دا ڤەشێریت ب شەڤ دەردکەڤیت.
زێدەتر گوت چارەسەریا ژناڤبرنا وی جورێ کرمی گەلەک یا ب زەحمەتە ژ بەر کو ئەو دەرمان د بازاری دا بھایێ وێ گران د راوەستیت سەر جوتیاری ژ بەر کو بکارئینانا وی دەرمانی پێدڤی ب ژمارەکا مەزن یا کرێکارایە ب دەستی دێ ڤی دەرمانی ھاڤێنە گەنمی هەتا بشێن نەھێلن ئەڤ کرمە زێدەتر کارێ خوە بکەت چونکو گەلەک جوتیاران ژی جورەک دی یێ دەرمانی بکار ئینایە لێ ئەو کرمە نەھاتیە ژناڤ برن.
ئەڤرۆ نیوز، لەزگین جوقی:
بەرپرسێ ھۆبا پلاندانانێ ل فەرمانگەھا ژینگەھا دھۆکێ دیارکر سالا بۆریدا ٤٧٠٧ نموونەیێن ئاڤا ڤەخوارنێ یێن ھاتینە وەرگرتن د ئەنجامدا ژی ب رێژا ( ١.٤%) ئاڤا ڤەخۆارنێ ل دھۆکێ یا پیس بوویە ل دەوروبەرین دھۆکێ ژی ب رێژا ( ٧.٦) ئاڤا ڤەخۆارنێ یا پیس بوویە.
فازل رەشید مەحمود، بەرپرسێ ھۆپا پلاندانانی ل فەرمانگەھا ژینگەھا دھۆکێ بۆ ئەڤرۆ نیوز دیارکر کو پتریا رێژا پیسبوونا ئاڤا ڤەخۆارنی ل قەزا ئاکری و شێخان بوویە لێ دووڤ ستاندەرێن جیھانی ئاڤا ڤەخۆارنی ل سەرانسەری پارێزگەھا دھۆکێ گەلەک یا باشە و بەردەوام تیمێن فەرمانگەھا ژینگەھا دھۆکێ کارێ کۆمکرنا نموونەیێن ئاڤا ڤەخۆارنی ل ھەموو دەڤەران دکەن د سالا بۆریدا ١٠٢ ئاگەھداری ب پرۆژان یێن ھاتینە دان و شەش پرۆژە ژی یێن ھاتینە سزادان.
ناڤھاتی ئەو ژی دیارکر کو سالا بۆری دا دووڤچون ل سەر ٢٦٧ پرۆژان یا ھاتیە کرن و پتر ژ ١٥٠ پرۆژان رازەمەندی بۆ ھاتیە دان سالا بۆری دا و ١٩٥٠ نەمامێن دارێن ھەمە جۆر یێن ھاتینە دابەشکرن ب مەرەما زێدەکرنا رووبەرێ کەسکاتیێ بۆ پاقژ راگرتنا ژینگەھی.
ئەڤرۆ نیوز، هۆشەنگ تاجر:
مەجید شادیانی ئەندامێ رێکخراوا مافێ مرۆڤی یا رۆژهەلاتێ کوردستانێ بۆ ئەڤرۆ نیوز دیار کر کو پشتی سەرێ سالێ جارەکا دی هێزێن ئێمناهیێ یێن ئیرانێ دەست ب دەستەسەرکرنا چالاکڤانێن کورد ل رۆژهەلاتێ کوردستانێ کرینە و گۆت: (هەفتیا بۆری شەش کەس ل پارێزگەها سنە و سێ کەس ل پارێزگەها ئورمیێ و چار کەس ژی ل پارێزگەها ئیلام هاتینە دەستەسەر کرن).
ناڤهاتی ئەو یەک ژی دیار کر کو هەفتیا بۆری دو کۆلبەرێن کورد ژی ب دەستێ هێزێن پاسدارێن ئیرانێ ل سەر سنوری هاتینە کوشتن.
ئەڤرۆ نیوز، هۆشەنگ تاجر:
ئەندامەکێ مەکتەبا سیاسی یا پارتی دیموکراتی کوردستان/ سووریا دیار دکەت کو هەلویستێ ڤێ دووماهیێ یێ ئەمریکا د بەرژەوەندیا کوردان دایە، لێ مخابن رۆژانە گوهۆرین د هەلویستێ ئەمریکا دا دروست دبیت و ئەم هێڤیدارین هەلویستێ ئەڤرۆکە یێ جۆن بۆلتۆن جدی بیت.
ناڤهاتی راگەهاند کو من بەری نها ژی دیار کربوو ئەمریکا ژ بەر بەرژەوەندیێن خوە وەسا زوو دەستان ژ سووریێ بەرنادەت، ئەمریکی باش دزانن هەکە سووریێ چۆل بکەن نەیارێن وان ئانکو روسیا و ئیران دێ دربێن مەزن ل بەرژەوەندیێن ئەمریکا بدەن و ژ بەر هندێ ژی بریارەکا وەسا داینە کو جارێ هێزێن خوە ڤەنەکێشن و ئەز ب باوەرم ژی هەموو هێزێن خوە ڤەناکێشن.
ئەڤرۆ نیوز:
جۆن بۆلتۆن شیرەتکارێ ئێمناهیا ئەمریکا راگەهاند کو هەتا ل سووریێ رێککەفتنەک ل دۆر پاراستنا کوردان نەهێتە کرن ئەمریکا ب چو رەنگەکێ هێزێن خوە ژ سووریێ ڤەناکێشیت و گۆت: (نها ئەم بۆ هندێ کار دکەین و هەتا رێککەفتنەک نەهێتە کرن و پاراستنا کوردان ل سووریێ نەهێتە گەرەنتی کرن دێ هێزێن مە ل سووریێ مینن).
ناڤهاتی راگەهاند کو تورکیا بەری نها ژی بۆ مە دیار کریە مە نەڤێت بێی هەماهەنگی ل گەل ئەمریکا هێرشی رۆژهەلاتێ فراتێ بکەین و مە ژی بۆ تورکیا گۆتیە کو نابیت هوون دەست ب هێرشەکا وەسا بکەن چونکو ئەو یەک دێ بیتە ئەگەرێ ئالۆزبوونا رەوشێ و ئەم ب توندی رەت دکەین.
ئەڤرۆ نیوز، سەباح زێباری:
بەرپرسێ سەندیکا ھونەرمەندێن ئاکرێ دیارکر ھونەرمەند(اسماعیل ێالح) کو ل سالا ١٩٤٦ ل باژێرێ ئاکرێ ژ دایک بوویە، ئەڤرۆ رێکەفتی ٦/١/٢٠١٩ وەغەرا داویێ کر.
رزگار رەشید بەرپرسێ سەندیکا ھونەرمەندێن قەزا ئاکرێ بۆ ئەڤرۆ نیوز دیارکر کو ھونەرمەند(اسماعیل ێالح) ل سالێن حەفتێ دا کارێ شانویێ کریە و ل دوڤدا قەستا ئیرانێ کریە و ل وێرێ ژی بەردەوامی دا کارێ خوە یێ ھونەری، ھەروەسا وەکو ئەکتەر ژی گەلەک کار کرینە، ئێک ژ کارێ وی یێ گرنگ شانویا(گوندەک و گوندورەک)بوو، ھەروەسا چەندین کارێن دی یێن درامی.
ئەڤرۆ نیور: بارزان مزووری:
سوبە سپێدێ رێکەفتی ٧ کانوونا دووێ ٢٠١٨ رێڤەبەریا رەوشەنبیری و ھونەری قەزا شێخان دێ کونفرانسێ خو ئەنجام دەت د وی کونفرانسی دا دەستەیەکا نوی بۆ سەنتەرێن رەوشەنبیری یێن شێخان و ناحیا کەلەکچی و کومەلگەھا چرە ب رێکا ھەلبژارتنان دانیت.
حەجی ئەحمەد، رێڤەبەرێ رەوشەنبیری و ھونەری ل قەزا شێخان بۆ ئەڤرۆ نیۆز گۆت:ماوەکێ درێژە کونفرانسێن بۆ سەرنترێن روشەنبیری نەھاتینە ئەنجام دان گەلەک ژ دەستەیا وان سەنتەرا چووینە دەرڤەی وەلاتی رێژەکا کێم ژ دەستەیا مابوون وەکو پێدڤی نەشیان چالاکیان ئەنجام دەن ب بەرھەڤبوونا قائیمقامێ قەزا شێخان و نوێنەرێن رێڤەبەریا سەنتەرا و نوێنەرێن رێکخراوێن جەماوەری و پیشەی دێ رێکا ھەلبژارتنان دەستەیەک نوو ھێنە ھەلبژارتن.
نيشاندان