گوهۆڕین د خشتێ‌ ئه‌زموونێن ده‌ستپێكی دا هاتینه‌ كرن

06/01/2019 11:25

2029

ئه‌ڤرۆ نیوز:
خشتێ‌ ئه‌زموونێن ده‌ستپێكی یێ سالا خواندنێ‌ 2018-2019 هاته‌ راگه‌هاندن و چه‌ند گوهۆڕین تێدا هاتینه‌ كرن.
ل دووڤ خشتێ‌ ئه‌زموونێن ده‌ستپێكی، ئه‌زموون ل 20/2/2019 دێ‌ ده‌ستپێكه‌ن و رۆژانه‌ دێ‌ هێنه‌ ئه‌نجامدان و هه‌ر رۆژ ئه‌زموون دێ‌ ل ده‌مژمێر 1ی پشتی نیڤرۆ هێنه‌ ئه‌نجامدان و ل سالێن بۆری ل ده‌مژمێر 2ی پشتی نیڤرۆ دهاتنه‌ ئه‌نجامدان، پێدڤیه‌ قوتابی د هشیاری ڤێ‌ چه‌ندێ‌ بن.
هه‌روه‌سا ل سالێن بۆری ئه‌زموونا په‌روه‌ردا ئیسلامی ل گه‌ل زمانێ‌ عه‌ره‌بی دهاته‌ ئه‌نجامدان، لێ‌ ئه‌ڤ ساله‌ رۆژه‌كا تایبه‌ت بۆ هاتیه‌ دیاركرن، ئانكو دێ‌ جودا هێته‌ ئه‌نجامدان.

16 زەلامان د سالا بۆری دا خوە ل دھۆکێ کوشتیە

06/01/2019 10:54

ئەڤرۆ نیوز، رێوار مزیری:

سەرۆکێ رێکخراوا ئێکەتیا زەلامێن کوردستانێ دیار کر کو د سالا بۆری دا رێژا توندوتیژیێ ھەمبەر زەلامان بەراورد ل گەل سالێن بۆری زێدەتر لێ ھاتبوو و گۆت: “د سالا 2018ێ دا 16 زەلامان خوە ل دھۆکێ کوشتبوو”.

دکتور ئەژی ئیبراھیم، سەرۆکێ رێکخراوا ئێکەتیا زەلامێن کوردستانێ بۆ ئەڤرۆ نیوز ئاشکرا کر کو د سالا بۆری دا 558 سکالا ژ لایێ زەلامان ڤە ھاتینە تۆمارکرن کو ژ وان 39 حالەت دەرخستنا زەلامێن دانعەمر بوون و 57 ژی خیانەتا ھەڤژینیێ بوون، ھەروەسا نەە حالەتێن توندوتیژیا جەستەیی ژی ھاتبوونە تۆمارکرن و گۆت: “178 حالەتێن دەستێوەردانا کەسوکارێن خێزانێ د ژیانا ھەڤژینیێ دا و 36 حالەتێن گڤاشتنا دەروونی و سێکسی، ھەروەسا ھەشت حالەتێن دەست ب سەرداگرتنا مووچەی و 231 حالەتێن دەست ب سەرداگرتنا زارۆیان و بێ بەھرکرنا بابی ژ دیتنا وان ھاتبوونە تۆمارکرن”.

ناڤھاتی ئاماژە دا وێ چەندێ کو د سالا 2018ێ دا 115 زەلامان خوە ل ھەرێما کوردستانێ کوشتبوو ب شێوەیەکی 45 حالەت ل پارێزگەھا سلێمانیێ، 23 حالەت ل پارێزگەھا ھەولێرێ، 18 حالەت ل پارێزگەھا کەرکووکێ، 16 حالەت ل پارێزگەھا دھۆکێ، 13 حالەت ل پارێزگەھا ھەلەبجە و گۆت: “د ھەمان سال دا پێنج زەلام ژ لایێ ھەڤژینێن خوە ڤە ب ھاریکاریا ھندەک کەسێن دی ل ھەرێما کوردستانێ ھاتبوونە کوشتن”.

زێدەتری 800 ھزار گەشتیاران ب فرۆکێ ھاتینە ھەرێمێ

06/01/2019 10:14

ئەڤرۆ نیوز:
وەزارەتا ڤەگوھاستن و گەھاندنێ یا حوکمەتا ھەرێما کوردستانێ دیار کر کو د سالا بۆری دا زێدەتری 800 ھزار گەشتیاران ب رێیا فرۆکخانێن ھەولێر و سلێمانیێ ھاتینە ھەرێمێ.
ل دووڤ ئامارەکا وەزارەتا ڤەگوھاستن و گەھاندنێ یا حوکمەتا ھەرێما کوردستانێ کو تێدا ھاتیە ل سالا 2018ێ دا ھژمارا وان گەشتیاران یێن کو ب رێیا فرۆکخانێن ھەولێر و سلێمانیێ ھاتنوچوون کرین پێکھاتیبوون ژ ملیۆنەک و 674 ھزار و 585 گەشتیاران.
د ھەمان ئامار دا ھاتیە کو ل سالا 2018ێ ھژمارا وان گەشتیارێن ب رێیا ھەر دو فرۆکخانێن ھەولێر و سلێمانیێ ھاتینە ھەرێما کوردستانێ 812 ھزار و 786 کەس بوون و ئەو گەشتیارێن ژ ھەرێما کوردستانێ ژی چووین 861 ھزار و 799 کەس بوون.
ل دووڤ ئامارەکا وەزارەتا ڤەگوھاستن و گەھاندنێ یا حوکمەتا ھەرێما کوردستانێ د ھەمان سال دا 18 ھزار و 872 گەشتێن ئاسمانی ل فرۆکخانا ھەولێر و سلێمانیێ ھاتینە ئەنجامدان.

پێشبینی دھێتە کرن ئەڤ سالە بەرھەمێ دومبەلانان دوجارکی زێدەبیت

06/01/2019 09:52

521

ئەڤرۆ نیوز، رەمەزان ھەرنی:

ژبەر رێژا مەزنا بارنبارینێ پێشبینی دھێتە کرن کو ئەڤ سالە بەرھەمێ دومبەلانا دوجارکی پتر ژ پار سال بھێتە بەرھەمئینان، ژ بەر کو بەرھەمێ دومبەلانا ل جھێن ئاخەکا زۆر و ئاڤەکا باش لێ ھەبیت شوون دبیت.
سەعید مەحمود، شارەزایەکێ بەرھەمێن سرۆشتی و چیایی بۆ ئەڤرۆ نیۆز دیارکر کو دومبەلان جورەکێ کڤارکایە و ل بن ئەردیە ب کوراتیا ٢ ھەتا ٥٠ سم دروست دبیت ل ناڤ تەقنێ و جھێن ئاخ زێدە لێ شیندبن و شێوەیێ وێ وەکو یێ پتاتێ یە و چو گول و بەلگ نینن و رەنگێن جودا ھەنە وەک سپی و قەھوەیی و رەش ل دەمێ باران گەلەک دبارن شوون دبن و دەردکەڤن.
ناڤھاتی ئاماژە دا وێ چەندێ کو بەرھەمێ دومبەلان ناڤێن جودا و رەنگێن جودا یێن ھەین د ناڤ ئەردی دا ل دەڤەرێن دەشتێ شوون دبن و ل سنوورێ دەشتا نەینەوا رێژەکا باش یا بەرھەمێ دومبەلانا دھێتە بەرھەمئینان و گۆت: “دومبەلان ل کوردستانێ ژی ھەنە و سالانە ب تەنان ل بازارێن روژانە ب بھایەکێ باش دھێتە فروتن.

ئه‌رمه‌نێن كوردستانێ دێ رێوره‌سمێن جه‌ژنا ژدايكبوونا مه‌سيحى گێرن

06/01/2019 00:23

163

ئه‌ڤرۆنيوز:

ئه‌رمه‌نێن هه‌رێما كوردستانێ ئه‌ڤرۆ ئێكشه‌مبى 6/1/2019 دێ رێ وره‌سمێن جه‌ژنا ژدايكبوونا حه‌زره‌تێ مه‌سيح گێرن.

فاهيك كه‌مال، ئه‌ندامێ په‌رله‌مانێ كوردستانێ ونوونه‌رێ ئه‌رمه‌نان ل په‌رله‌مانى دا بۆ ئه‌ڤرۆنيوز گۆت” سالانه‌ ل 6 كانوونا دويێ، ل دووڤ رۆژهژمێرا رۆژهه‌لاتى يا كه‌نيسا ئه‌رمه‌نێن ئارسوزوكس، جه‌ژنا ژدايكبوونا حه‌زره‌تێ عيسايێ مه‌سيحه‌”.

فاهيك گۆت ژى” دڤێ جه‌ژنێ دا، ئه‌م ئه‌رمه‌ن قوداسێ ل كه‌نيسێ دكه‌ين وپشتى ب دووماهى هاتنا قوداسى سه‌ره‌دانا مالێن هه‌ڤدو دكه‌ين بۆ پيرۆزباهيێ ب هه‌لكه‌فتا وێ جه‌ژنێ”.

په‌رله‌مانتاره‌ك: نەدادپەروەریەكا مه‌زن یا دموچێ‌ خانەنشینان دا هەی

05/01/2019 22:05

380

ئەڤرۆنیوز، سەباح زێباری:

ئه‌ندامه‌كێ په‌رله‌مانێ كوردستانێ ل سەر لیستا پارتی دیموكراتی كوردستان بۆ ئەڤرۆنیوز راگه‌هاند كو پارتی ل بانگەشا هەلبژارتنادا بریاردا كو چاكسازیێ بكەت، لێ مخابن هندەك لایەن رێگربوون ل هەمبەر چاكسازیێ، ژبەر هندێ‌ د ڤێ‌ خۆلێ‌ دا پارتی بریار یا دای كو چاكسازیێ بكەت، تایبەت دناڤ موچەخور و خانەنشینان دا.

هيڤيدار ئه‌حمه‌د، ئه‌ندامێ په‌رله‌مانێ كوردستانێ ژفراكسيۆنا پارتى زێدەتر گۆت” مە ل هەرێما كوردستانێ‌ 230 هزار خانەنشین يێن هه‌ين و خانەنشینێن سلێمانیێ هندی خانەنشینێن دهوك و هەولێرێ‌ نە، دهەیڤه‌كێ‌ دا 106 ملیار دينار دچنە پارێ‌ خانەنشینیێ دا، كو بلندترين خانەنشینی یا دادوەرانە ل كوردستانێ‌، كو 9 ملیۆن دیناران وەردگرن بێ پاشكەفت، ئەڤە ژی نە دادپەروەریەكا ئێكجار مه‌زنه‌.

پەرلەمانتارێ‌ فراكسیونا پارتی گۆت ژی كو حوكمەتا هەرێما كوردستانێ‌ بریاردابوو كو كێمترین موچەخورێ‌ خانەنشینی بگەهینتە 300 هزار ديناران، ئەڤە ژی ل سەر حوكمەتا هەرێما كوردستانێ‌ د هەیڤێ‌ دا 8 ملیار دیناران د راوەستیت، لێ هه‌كه‌ بەرێ‌ خوە بدەینە قانونا هژمار(4) یا سالا 2014 یا عێراقێ یا گرێدای خانەنشینیێ و ل كوردستانێ‌ پراكتیك بكەی، ل وی دەمی 100 ملیار دینار دێ‌ چنە سەر بودجا هەرێما كوردستانێ‌، ئەم وەك پارتی دێ‌ هەموو بزاڤان كه‌ين كو هەكە خانەنشینی یا هەرێما كوردستانێ‌ وەكو یا عيراقێ ژی نەبیت، لێ يا نێزیك بیت ژ يا عيراقێ.

تانكەرەكی سوتەمەنیێ‌ ل دێرەلۆكێ‌ هاته‌ سوتن

05/01/2019 21:19

119

ئەڤرۆ نیوز، مەحمود نهێلی

بەرپرسێ‌ بنگەهێ‌ بەرەڤانیا باژێری ل دێرەلۆكێ‌ بۆ ئەڤرۆ نیوز دیاركر، كو ئەڤ شەڤە ئاگر بەربوو تانكەرەكی سوتەمەنیێ‌ ل سەنتەرێ‌ ناحیا دێرەلۆك و زیانێن مادی گه‌هشتنێ.

جیدارێ‌ ئێكێ‌ ئیحسان سەنعان، بەرپرسێ‌ بنگەهێ‌ بەرەڤانیا باژێری ل دێرەلۆكی دیاركر، كو ئەڤ ئاگرە ژ ئەنجامێ‌ پەقینا تەكەرەكی تانكەری دروست بوویە و گۆت: ( ل دەمێ‌ تەكەرێ‌ ترۆمبێلێ‌ پەقی شوفێر نەشیایە كونترۆلێ‌ ل سەر ترۆمبێلێ‌ بكەت و ب راوەستینيت و د ئەنجامدا ئاگر بەردبیتە تەكەرێ‌ ترۆمبێلێ‌ ).

گۆت ژى كو تیمێن وان ب زووترین دەم گەهشتینە جهێ‌ روودانێ‌ و شیان ئاگری كونترۆل بكەن و نەهێلن ئاگر بەرببیتە سوتەمەنیا‌ تێدا كو دوورێن 18 هزار لیترێن گازوايلێ‌ دناڤ دا بوون و گۆت: ( بتنێ‌ زیان گەهشتنە چار تەكەرێن تانكەری و هەروەسا سوندێن وێ‌ ژی هاتینە سوتن و چەند زیانێن دی یێن بچووك گەهشتینە ترۆمبێلێ‌).

ئێزدی ‌جەژنا باتزمێ‌ دگێرن

05/01/2019 21:16

117

ئەڤرۆ نیوز:بارزان مزووری:

جەژنا باتزمێ‌ ئێك ژجەژنێن گرنگ یێن هوزا “چێلكان” یا كوردێن ئێزدی يه‌ بۆ ده‌مێ حەفت رۆژان بەردەوام دبیت، هەر رۆژەكێ‌ جۆرەكێ‌ رێ ورەسمێ‌ دهێت گێران ل رۆژا دوماهیێ‌ كو دكەڤیتە 6 كانوونا دويێ‌ 2018 ب سمات سەروپی خوارن دێ‌ ب دوماهی هێت.

كاژین خەلەف ، ئێك ژ ئافرەتێن دانعەمره دناڤ هوزا چێلكان بۆ ئەڤرۆ نیوز گۆت: هەر رۆژەكێ‌ جۆرەكێ‌ رێ ورەسمان دهێته‌ گێران ژوان دو رۆژان ب رۆژی دبین وسەوكێن نانی و سەروپێكا و سمات و هەلكرنا دو چرایان دناڤ مالێ‌ دا و سەرەدانا خەوراتێ‌ دكەن هەركەسێ‌ سەرەدانێ‌ بكەت دێ‌ گۆژمەكێ‌ پارەی دانیتە وی جهێ‌ خەورات لێ‌ ،

زێدەتر گۆت: هوزا چێلكا ژ 5 هزار خێزانان پێك دهێت وهەموو خێزان ڤێ‌ جەژنێ‌ دگێرن یێن كوردستانێ‌ و دەرڤەی كوردستانێ‌.

رێيا بابلۆ بۆ ئەتروش هاته‌ ڤەكرن

05/01/2019 20:17

292

ئەڤرۆ نیوز، بارزان مزووری:

سەرۆكێ‌ باژێرڤانیا زاویتە راگه‌هاند، ل شەڤا بوری دەمژمێر 12:30 خۆلەك كەسەكی پەیوەندی ب مەكر كو ل نێزیك گوندێ‌ كزو رێ بۆ ئەتروش هاتیە داخستن وسێ‌ كەڤرێن مەزن ل چیایی هاتینە درێ‌ دا، سپێدێ‌ تیمەكا باژێرڤانیا زاويته‌ دگەل ئامیرێن پاقژكرنێ چوینە جهێ‌ رێ لێ هاتیە گرتن ورێ هاتە ڤەكرن وهاتنوچوون ئاسایی بویە.

صالح بەرواری، سەرۆكێ‌ باژێرڤانیا زاویتە بۆ ئەڤرۆ نیوز گوت: ئه‌ڤ رێ به‌رى نوكه‌ ژى ل 30 كانوونا ئێكێ‌ 2018 هاتبوو داخستن ژبەر كه‌فتنا كەڤرێن مەزن ل چیای.

زێدەتر گوت: رێيا گوندێ‌ “بوتیا” ژی كەڤرێن مەزن هاتینە د رێ دا وسپێده‌يا سوباهى ئێكشه‌مبى 6 كانوونا دويێ‌ 2019 تیمێن مە دێ‌ ‌ وێ‌ رێ ڤه‌كه‌ن وهاتنوچوون بۆ وی گوندی دێ‌ ئاسايی بیت.

فرۆكێن توركی پشتا گوندێ‌ سەرگەلێ‌ توپبارانكر

05/01/2019 20:07

153

ئەڤرۆ نیوز، مەحمود نهێلی
فرۆكێن لەشكەرێ‌ توركی پشتا گوندێ‌ سەرگەلێ‌ یێ‌ سەر ب ناحیا دێرەلۆك توپبارانكر و ترس و دودلی ئێخستە دلێ‌ خەلكێ‌ دەڤەرێ‌ و تا نوكە زیانێن وێ‌ نەهاتیە زانین.
وەلاتیەكی گوندی سەرگەلێ‌ بۆ ئەڤرۆ نیوز دیاركر، كو ئەڤ توپبارانكرنه‌ گەلەك یا نێزیكی گوندی بوویە و خانیێن وه‌لاتیان هەموو هەژیانە و ترس ودودلی ئێخستیە دلێ‌ ئاكنجیێن گوندى.
حوسنی سەرگەلی، ئاكنجیێ‌ گوندێ‌ سەرگەلی دیار ژی كر، كو ئەڤە ده‌مێ چار سالایە گوندێ‌ وان ژلایێ‌ فروكێن توركی ڤە دهێتە توپبارانكرن و گەلەك جاران زیانێن مادی گەهاندینە گوندی، ژ وان ژی ژناڤبرنا پرۆژێ‌ ئاڤا ڤەخوارنێ‌ یا گوندی و هەروەسا شكاندنا پەنجەرێن خانیان و تیكچوونا ئاڤاهیان.
گۆت ژى كو توپبارانكرنا ڤێ‌ جارێ‌ هەر چەندە گەلەك یا نێزیكی گوندی بوویە، لێ‌ چو زیانێن گیانی نەبووینە و زیانین مادی ژی تا نوكە ب دروستی ئاشكرا نەبوینە كا زیان گەهشتینە خانیێن كیش هاولاتیان.
گوندێ‌ سەرگەلێ‌ دكەڤیتە دەڤەرا نهێلێ‌ یا سەر ب ناحیا دێرەلۆك ل قەزا ئامێدیێ‌، پشتی سەرهەلدانێ‌ جارەكا دا هاتیە ئاڤەدانكرن و دورێن 100 خێزانان لێ‌ ئاكنجی نە.

نيشاندان 1...1,000 2,000 1,1241,1251,126 2,120 3,120 4,120...4,170 زێده‌تر

لاپه‌ر 1,125 ژ 4,170