ئەڤرۆ نیوز، عەلی حاجی:

ژ بەر نێزیکبوونا ھاتنا سەرێ سالا نوو ٢٠١٩ رێژەیا گەشتکرنا وەلاتیێن عێراقێ و کوردستانێ ل ماوێ ٥ روژێن بوری دا بۆ وەلاتێ تورکیا  بەر ب زێدەبوونێ ڤە.

ژێدەرەکێ باوەرپێکری ژ نڤیسینگەھا ئاکنجیبوون و پاسەپورتان ل گومرکا ئیبراھیم خەلیل  بۆ ئەڤرۆ نیوز گۆت: (ب رێیا دەرگەھێ سنوری یێ ئیبراھیم خەلیل زێدەتری ٧٥٠٠ گەشتیاران ژ ولاتیێن عێراقێ و کوردستانێ بەرەڤ وەلاتێ تورکیا ڤە چووینە ب مەرەما سەرێ سالا نوو ٢٠١٩ و دھێتە چاڤەرێکرن ئەڤ رێژەیە ھەتا سەرێ سالا نوو بەر ب زێدەبوونێ ڤە بچیت چونکو ھەتا نوکە چوونا وەلاتیان بۆ وی وەلاتی بەردەوامە).

ئەڤرۆ نیوز:

ستیفان دی میستورا نوونەرێ تایبەت یێ نەتەوێن یەکگرتی بۆ چارەکرنا قەیرانا سووریێ راگەهاند کو بزاڤێن نها یێن بۆ چارەکرنا قەیرانا سووریێ ناگەهنە چو ئەنجامان هەتا کو داخوازیێن کوردان ل سووریێ نەهێنە بجهکرن و گۆت: (کوردان رۆلەکا سەرەکی د شەرێ ل دژی داعشێ دا گێران و دڤێت بگەهنە مافێن خوە، ژ بەر هندێ ژی دڤێت وەلاتێن کو دخوازن پرسا سووریێ چارە بکەن داخوازیێن کوردان بجه بینن).

ناڤهاتی راگەهاند ژی کو دڤێت د ئامادەکرنا دستوورێ نوو یێ سووریێ دا کورد پشکدار  بن، چونکو نها کورد ل سووریێ بهێزن و بێی وان ژی پرسا سووریێ چارەسەر نابیت.

ئەڤرۆ نیوز، هۆشەنگ تاجر:

شیار عەمودی چالاکڤانێ سڤیل ل رۆژئاڤایێ کوردستانێ بۆ ئەڤرۆ نیوز دیار کر کو پشتی گەفێن تورکیا یێن ل سەر رۆژهەلاتێ فراتێ هۆزێن عەرەب ژی هەلویستێ خوە دیار کرن و راگەهاندن کو ئەم و کورد برایێن هەڤدوینە و ڤێرێ ئاخا مە یە و ئەم رێ نادەین تورکیا وەلاتێ مە داگیر بکەت و گۆت: (محەمەد ئەحمەد نوونەرێ هۆزا ئەلبو شەعبان کو ئێکە ژ هۆزێن هەری مەزن یێن عەرەبی راگەهاند ب سالانە ئەم و کورد پێکڤە دژین و گەلەک زۆلم و زۆرداری ل کوردان هاتیە کرن، نها ئەم و کورد ئێدی وەکو برا پێکڤە دژین و رێ نادەین تورکیا هێرشی ئاخا مە بکەت و دێ ل گەل برایێن خوە یێن کورد، ئاشوری و سوریانی و هەموو وەلاتیێن دی کو ل رۆژهەلاتێ فراتێ دژین دێ ل دژی تورکیا دەرکەڤین و ئاخا خوە پارێزین).

ئەڤرۆ نیوز، هۆشەنگ تاجر:

محەمەد شەهرامی ئەندامێ رێکخراوا مافێ مرۆڤی یا رۆژهەلاتێ کوردستانێ بۆ ئەڤرۆ نیوز دیار کر کو ئەڤسالە هەتا نها رژێما ئیرانێ ٥٠ وەلاتیێن کورد یێن رۆژهەلاتێ کوردستانێ ژ سێدارە داینە و مەترسیا سێدارەدانێ ل سەر ب دەهان وەلاتیان ژی یا بەردەوامە.

ناڤهاتی راگەهاند کو پرانیا کەسێن هاتینە سێدارەدان ژ بەر چالاکیێن وان یێن سیاسی بووینە و ب بەهانا کو کار بۆ ژناڤبرنا دەستهەلاتا ئیرانێ کرینە هاتینە سێدارەدان و گۆت: (زانیار و لوقمان مورادی و رامین حسێن پەناهی و گەلەک گەنجێن دی ئەڤسالە هاتنە سێدارەدان و مخابن ب دەهان گەنجێن مە ل زیندانێن ئیرانێ د رەوشەکا خراب دا دژین و هەتا نها چو وەلاتەکێ ئورۆپی ژی پشتەڤانی ل داخوازیێن رەوا یێن گەلێ کورد و زیندانیێن کورد ل ئیرانێ نەکرینە).