ئه‌ڤرۆنيوز:
سه‌رۆكا ده‌زگه‌هێ شه‌هيدان ل عيراقێ ئه‌ڤرۆ شه‌مبيێ 29/12/2018 هژمارا چه‌كدارێن حه‌شدا شه‌عبى راگه‌هاندكو ل شه‌رێ دژى داعشێ هاتينه كوشتن و ل ده‌زگه‌هێ وان وه‌كو شه‌هيد هاتينه تۆماركرن.
ناجيحه عه‌بدولئه‌مير ئه‌لشمه‌رى، سه‌رۆكا ده‌زگه‌هێ شه‌هيدان ل عيراقێ بۆ مالپه‌رێ (وه‌ته‌ن نيوز) يێ عيراقى گۆت” ده‌زگه‌هێ شه‌هيدان 25 هزار شه‌هيدێن حه‌شدا شه‌عبى تۆماركرينه كو ل شه‌رێ ئازادكرنا چه‌ندين ده‌ڤه‌رێن عيراقێ ژ ده‌ستێ تيرۆرستێن داعشێ گيانێ خوه ژده‌ستداين”.
ناڤبريێ داخواز ژ وه‌زاره‌تا دارايى يا عيراقێ كر كو مووچه‌ى بۆ كه‌سوكارێن وان دابين بكه‌ت.
ئه‌ڤرۆ نیوز،بارزان مزوورى:
د.فارس بریفكانى،جێگرێ سه‌روكێ لژنا ته‌ندروستى و ژینگه‌هى ل په‌رله‌مانێ عێراقێ بو ئه‌ڤرۆ نیوز ئاشكرا كر ژبه‌ر پێش ڤه‌چوونا كه‌رتێ ساخله‌میێ ل وان ده‌ڤه‌رێن مادێ 140 به‌رى دوو رۆژه دگه‌ل وه‌زیرێ ته‌ندروستى یێ حكومه‌تا عێراقێ سه‌ره‌دانا پارێزگه‌ها مووسل دا” ئه‌م گه‌هشتینه رێكه‌فتنه‌ك فه‌رمى كو هه‌ر ژ قه‌زا شه‌نگال و مه‌خمور و ده‌شتا مووسل و شێخان كو وان ده‌ڤه‌را پشكه‌كا ده‌رمان و ئامیرێن ته‌ندروستى بو بهێن دابین كرن وه‌كو قه‌ره‌بوكرن ل پێش سالێن بورى هه‌ر ده‌ڤه‌ره‌ك لدوڤ وان زیانێن لێكه‌فتین ل شه‌رێ داعشدا ،
ناڤهاتى خویاكر كو:پشكا كوردستانێ ب شێوه‌یه‌ك گشتى یا ده‌رمانا ئه‌ڤه دوو سال بو 12% حه‌تا 13% نه‌دهات دابین كرن ئه‌ڤ سال لژنا ته‌ندروستى یا په‌رله‌مانێ عێراقێ بریار دایه كو پشكا كوردستانێ یا ده‌رمانا 17% كێمتر نابیت .
ناڤهاتى گوت:بودجه‌یا تایبه‌ت یا هاتیه دابین كرن بو كه‌رتێ ساخله‌میێ بو سالا بهێت دێ بیته 1 ملیارو چارسه‌د ملیون دولار دێ گهورینه‌ك پێش چاڤ كه‌فتینه د كه‌رتێ ساخله‌میێ دا.
ئەڤرۆ نیۆز، قائید میرۆ
بەری دو رۆژان شەش بەرپرسێن بزاڤا ئیسلامی ل کوردستانێ دەست ژکارێ خۆ بەردان و داخوازکر، رێبەرێ حزبا وان دەست ژکارێ خۆ بەردەت، چونکە بەری ھەلبژارتنان سۆزدایە ھەگەر بزاڤا ئیسلامی سێ کۆرسیێن پەرلەمانی بدەستڤە نەئینیت دێ دەست ژکارێ خۆ بەردەت.
بزاڤا ئیسلامی ل سالێن ھەشتیا یا چەرخێ بۆری ھاتیە دامەزراندن و ب دایکا لایەنێن ئیسلامی دھێتە نیاسین، بەلێ پشتی سەرھەلدانێ تووشی ئاریشەیێن نافخۆ بویە و چەندین حزبێن وەک بزاڤا ئێکبوون و کۆمەلا ئیسلامی ل ھناڤێن بزاڤا ئیسلامی پەیدابووینە.
دکتۆر عەبدولا وەرتی، کارگێڕێ مەکتەبا سیاسیا بزاڤا ئیسلامی بۆ ئەڤرۆ نیۆز دیارکر” پشتی کو ئەنجامێن ھەلبژارتنێن پەرلەمانێ کوردستانێ ھاتینە راگەھاندن و دەنگێن بزاڤا ئیسلامی داکەتی، ئەم حاشا لڤێ راستیێ ناکەین کو ئەم نەشیاینە دەنگێن پێدڤی بدەستڤە بینین، لەوڕا مە بڕیار دایە سالانوودا کۆنفڕانسێ بزاڤا ئیسلامی بھێتە ئەنجامدان و تێدا بڕیار لسەر گۆھۆڕینان بھێتەدان دناڤا بزاڤا ئیسلامی دا، ھەروەسا خالێن لاواز و بووینە ئەگەرێ کێمبوونا دەنگێن بزاڤا ئیسلامی دێ ھێنە دیارکرن و چارەسەرکرن.
لدۆر داخوازا شەش بەرپرسێن بزاڤا ئیسلامی بۆ دەست ژکار کێشانا رێبەرێ گشتیێ بزاڤێ ئەڤی سەرکردەیێ بزاڤا ئیسلامی گۆت” ئەف برایێن مە راستە دەست کارێ خۆ بەردایە بەری دو رۆژان، بەلێ تنێ دەست پۆستێن خۆ بەرداینە و ھەر دناڤا رێزێن حزبێ ماینە، بۆ لادان یان دەست ژکارکێشانا ھەر کەسەکی ئەڤە ب داخویانیا راگەھاندنێ نابیت، بەلکۆ دڤێت حزب کۆمببیت و سەرکردەیێن بزاڤا ئیسلامی بڕیار بدەن کی بمینیت و کی بھێتە دۆرخستن ل پۆستێ وی.
دکتۆر عەبدولا وەرتی زێدەتر دبێژیت” کەس یێ زێدە نینە ناڤا بزاڤا ئیسلامی دا، لەوڕا ژی پشتی دەست ژکارکێشانا ئەڤان برایێن مە بڕیار بۆ پێداچوونێ ھاتیەکرن و کۆنفڕانسێ حزبێ دێ ھێتە گرێدان و ڤێرێ دێ بڕیار ھێنەدان.
ئەڤرۆ نیوز:
دەستەیا دەسپاکیا ھەرێما کوردستانێ ئەڤرۆ رۆژا شەمبی د راگەھاندنەکێ دا دیارکر کو ئەو لیستەیا ناڤێن وان کەسان ل تورێن جڤاکی بەلاڤ بووی بەری چەند رۆژان دەربارەی وێ چەندێ کو ڤەکولین دگەل وان دا دھێتە کرن ژ ئەگەرێ گەندەلیێ چو پەیوەندی ب وان ڤە نینە.
د ڤێ راگەھاندنا دەستەیا دەسپاکیا ھەرێما کوردستانێ دا ھاتیە ئەڤ بابەتە چەندین جاران بەری نوکە ب ناڤێ وان ژ لایێ دەزگایێن راگەھاندنێ و تورێن جڤاکی ھندەک لیستێن ناڤان دھێتە بەلاڤ کرن و تێدا چەندین کەسان تومەتبار دکەن ب گەندەلیێ لێ یا راستی وان چو پەیوەندی ب ڤێ چەندێ ڤە نینە و ھیڤی خواست ناڤێ وی جھی دیاربکەن یێ ب ڤەکولینا ڤان جورە کەیسا رادبیت.
ل دووماھیێ ڤێ راگەھاندنێ دا ھاتیە ھەر دەمێ ب کارەکێ ڤی جوری رابن دێ ب فەرمی و ئاشکرا و بێ لایەن بەلاڤ کەن.
ئەڤرۆ نیوز:
ب شێوەکێ فەرمی ستێرا یانا بەرشەلونە و ھەلبژارتیێ ئەرژەنتین لیونێل مێسی بۆ باشترین گۆلکارێ سالا ٢٠١٨ ب ٥١ گۆلان پشتی ستێرا یانا یوڤانتوس کرستیانو رونالدوی نەشیایی ئەڤرۆکە ھژمارا گۆلێن خوە زێدەتر بکەت.
مێسی ل سالا ٢٠١٨ شیابوو ٤٧ گۆلان دگەل یانا خوە یا ئسپانی بەرشەلونە توماربکەت و چار گۆلان ژی دگەل ھەلبژارتیێ خوە ئەرژەنتین توماربکەت سەرجەمێ وان گەھاندبوونە ٥١ گۆلان د ماوێ ئەڤ سالە دا، بەرامبەر ستێرا پرتوگالی و یانا یوڤانتوس یا ئیتالی کرستیانو رونالدۆ پشتی ئەڤرۆکە شیایی دو گۆلان تومار بکەت ل سەر یانا سامبدوریا ل رێزا دویێ ھات ب ٤٩ گۆلان کو بەری نوکە ٤٣ گۆل دگەل یانا ریال مەدرید و یوڤانتوس تومارکریە دیسان شەش گۆل ژی دگەل ھەلبژارتیێ پرتوگال کو سەرجەمێ وان دبنە ٤٩ گۆل د سالا ٢٠١٨ دا.
ئەڤرۆ نیۆز، ئەمیر ئەترووشی:
سەرۆکێ بەروەخت یێ پەرلەمانێ کوردستانێ راگەھاند، ھەتا نوکە سێ ئەندامێن نوو دەرچووین بۆ پەرلەمانێ کوردستانێ پەیوەندی ب پەرلەمانی نەکریە و راوێژکارێ قانوونی یێ پەرلەمانێ کوردستانێ ژی راگەھاند کو ھەر دەمێ ٩٠ رۆژ ل سەر روونشتنا ئێکێ دەربازبوون وان سێ ئەندام پەرلەمانان مافێ ئەندامەتیێ نامینیت.
رێڤینک ھروری، سەرۆکێ بەروەخت یێ پەرلەمانێ کوردستانێ بۆ ئەڤرۆ نیۆز دیار کر، ل روونشتنا ئێکێ یا پەرلەمانێ کوردستانێ ل دەمێ خواندنا سووندا قانوونی، سێ ئەندامێن پەرلەمانێ کوردستانێ ب ناڤێ (قوباد تالەبانی، شاسوار عەبدولواحد، شەعبان عەلی شەعبان) ئامادەنەبوون و سووندا قانوونی نەخواندن و ھەتا نوکە ژی ب چو رەنگان پەیوەندی ب پەرلەمانێ کوردستانێ نەکریە و گۆت: ھەتا نوکە ڤان ھەرسێ پەرلەمانتاران ئەگەرێن نە ئامادەبوونا خوە ل پەرلەمانی دیار نەکریە.
د. وەعدی مزوری، راوێژکارێ قانوونی یێ پەرلەمانێ کوردستانێ بۆ ئەڤرۆ نیۆز دیار کر، ل گۆرەی پەیرەوێ ناڤخۆ یێ پەرلەمانێ کوردستانێ یێ نوو، ئەگەر پەرلەمانتارەک بۆ ماوێ ٣٠ رۆژان پەیوەندیێ ب پەرلەمانی نەکەت، مافێ ئەندامەتیێ نامینیت، بەلێ ژ بەر کو د روونشتنا ئێکێ یا پەرلەمانێ کوردستانێ دا روونشتن ڤەکری مایە، لەوما نھا دێ ل گۆرەی پەیرەوێ ناڤخۆ یێ کەڤن سەرەدەری ل گەل وان ھەر سێ ئەندام پەرلەمانێن نە ئامادەبووی ھێتە کرن، ئەو ژی ٩٠ رۆژن و ئەگەر ٩٠ رۆژ بوورین و بەرھەڤ نەبوون، بێگومان وان ھەر سێ پەرلەمانتاران مافێ ئەندامەتیێ نامینیت.
ئەڤرۆ نیۆز، قائید میرۆ:
ل چەند رۆژێن بۆری دا داعش ھژمارەکا ھێرشان ل عێراقێ ئەنجامدان و شارەزایەکێ سەربازی ژی زێدەبوونا ھێرشێن داعش بۆ لاوازیا ھێزێن عێراقی ڤەدگەڕینیت، ھەروەسا دبێژیت، ڤەکێشانا ئەمریکا دێ کاریگەری ل سەر رەوشا عێراقێ و سووریێ ژی ھەبن.
عەقید ھێمن سالح، شارەزایێ سەربازی بۆ ئەڤرۆ نیۆز دیارکر” زێدەبوونا ھێرش و لڤینێن تیرۆرستێن داعش ل چەند رۆژێن بۆری دا ل دەڤەرێن جودایێن عێراقێ ژبۆی دو ئەگەران ڤەدگەڕیت، یا ئێکێ لاوازیا ھێزێن ئەمنی و سەربازیێن عێراقی، کو نەشێن کۆنتڕۆلا رەوشێ بکەن و شارەزایی ل دەڤەرێن تێدا جێھگیرکری نینە، یا دویێ ژی بۆ ڤەکێشانا ھێزێن پێشمەرگەی ل دەڤەرێن کوردستانی یێن دەرڤەی ئیدارەیا حوکمەتا ھەرێما کوردستانێ ڤەدگەڕیت، چونکە ئەو دەڤەرێن بەری نوکە سەنگەرێن پێشمەرگەی تێدا نوکە بووینە ھێلینا چەکدارێن داعش.
لدۆر کاریگەریێن ڤەکێشانا ئەمریکا ل سووریێ ل سەر زێدەبوونا لڤینێن داعش، عەقید ھێمن سالح گۆت” ھەرچەندە ھێشتا دیارنینە دێ ئەمریکا کەنگی و چاوا ھێزێن خۆ ڤەکێشیت، بەلێ ھەر چاوابیت ڤەکێشانا ھێزێن ئەمریکا دێ کاریگەری لسەر رەوشا ئەمنیا عێراقێ و سووریێ ژی ھەبیت، چونکە ئەمریکا لسالێن بۆری گورزێن کوژەک ل گروپا تیرۆرستیا داعش داینە و نەمانا ھاریکاریێن ئەمریکا دێ بیتە ئەگەر داعش بھێز بکەڤیت.
ئەڤرۆ نیوز:
ئەڤرۆکە رۆژا شەمبی تیمێن بەرگریا شارستانی ل مووسل شیان لاشێن ١١ کەسان دەربێخن ژ تاخەکێ مووسل یا کەڤن پشتی ھندەک کەسێن وی تاخی پێزانین ل سەر ڤان تەرما داین پولیسان.
ژێدەرێن نافخو یێن باژێرێ مووسل دیارکریە کو ل دەڤەرا ساعە یا مووسل لاشێ یازدە کەسان ھاتیە دیتن د ناف وان ١١ لاشان دا سێ ژ وان ئافرەتێن ب تەمەنن کو ھاتینە دەرخستن ژێر خانیەکی ھەرفتی ڤە کو یێن دەمێ شەرێ ئازادکرنا مووسل بوون ژلایێ ھێزێن عیراقێ ڤە دیسان ھەموو لاش ھاتینە رەوانەکرن بۆ پزیشکا داد داکو بھێنە ھنارتن بۆ خودانێن وان.
نيشاندان