ئه‌ڤرۆنيوز:
يانا يوڤه‌نتوس سه‌ركێشا خۆلا ئيتالى ئه‌ڤرۆ ل گه‌ل يانا ئه‌تلانتا ب ئه‌نجامێ 2-2 وه‌كهه‌ڤ بوو.
گۆلێن يانا يوڤه‌نتوس ژلايێ ياريكه‌ران ديمسيتى ( ياريكه‌رێ ئه‌تلانتا ب شاشى ڤه) ل خۆله‌كا 2 و كريستيانو رونالدۆ ل خۆله‌كا 78 هاتن تۆماركرن وگۆلێن ئه‌تلانتا ل خۆله‌كێن 24 و56 ژلايێ ياريكه‌رێ وێ زاباتا هاتن تۆماركرن.
ب ڤى ئه‌نجامى يانا يوڤه‌نتوس مانا خوه ل رێزا ئێكێ ل رێزبه‌ندا خۆلا ئيتالى ب 50 خالان پاراست ويانا ئه‌تلانتا ب 25 خالان ل رێزا 7 دهێت.
ئه‌ڤرۆ نیۆز، ئه‌میر ئه‌ترووشى
لیژنا دووڤچوونا بازاری ل قایمقامیا دهۆكێ سه‌ره‌دانا چه‌ندین جهان ل تاخێ ماسیكا2 و زركا دا و د ڤێ سه‌ره‌دانێ دا نانپێژیه‌ك هاته داخستن.
د. ئاراز، ئه‌ندامێ لیژنا دووڤچوونێ بۆ ئه‌ڤرۆ نیۆز دیار كر، ئه‌ڤرۆ رۆژا چوارشه‌مبى 26/12/2018، لیژنا دووڤچوونا بازاری ل قايمقامیا دهۆكێ سه‌ره‌دانا چه‌ندین ماركێت و خوارنگه‌ه و جهێن بازرگانی كرن و ژ نێزیكی هایداری ره‌وشا ڤان جهان و پێگیریا وان ب رێنمایێن ساخله‌میێ بوون.
دكتور ئاراز گۆت: نانپێژیا پێل ل جادا 30 مه‌ترى ل تاخێ ماسیكا2 ژ به‌ر نه‌بونا ده‌ستووریا ساخله‌میێ بۆ ماوێ سێ رۆژان هاته داخستن و ماركێتا چار برا ب كوژمێ (٣٠٠) هزار دیناران هاته سزادان ژ به‌ر هه‌بوونا كه‌ره‌ستێن ئێكسپایه‌ر.
ئه‌ڤرۆنيوز:
ژ ئه‌نجامێ شه‌ر ونه‌سه‌قامگيريێ ل عيراقێ، نێزيكى 5 مليۆن و600 هزار زارۆك بێ دايك وباب ماينه و9% ژ وان زارۆكان كو دبن 10 ساليێ دانه ل سه‌ر جاده‌يان كاردكه‌ن، ژبلى وێ 31% خه‌لكێ عيراقێ دبێ كارن و35% ژى دبن هێلا هه‌ژاريێ دانه.
رێكخراوه‌كا مافێن مرۆڤى ل عيراقێ به‌لاڤكر ژى كو 2 مليۆن ژن ل عيراقێ پشتى شه‌ر وكاڤلكرنێ بێ هه‌ڤژين ماينه.
ل دووڤ راپۆرته‌كا رێكخراوا ناڤبرى 6 مليۆن عيراقێ ژنڤيسينێ وخواندنێ دبێ به‌هرن و6% مادێن بێهوشكه‌ر بكاردئينن.
دياركر ژى كو نێزيكى 40 نه‌خوه‌شيێن مه‌ترسيدار دناڤ خه‌لكێ عيراقێ دا يێن به‌لاڤ بووين ژوان ژى كۆلێرا وئيفلجبوونا زارۆكان وپه‌نجه‌شێر.
ئه‌ڤرۆنيوز:
يانا مانشسته‌ر سيتى د ياريا دويێ ل سه‌رئێك تووشى دووراندنێ بوو، پشتى ئه‌ڤرۆ ل گه‌ل مێهڤاندارا خوه ليسته‌ر سيتى ب ئه‌نجامێ 1-2 هاتيه دوراندن.
گۆلێن ليسته‌ر سيتى ل خۆله‌كێن 19 و81 ژلايێ ياريكه‌ران ئالبرايتون وبيريرا هاتن تۆماركرن وگۆلا ئێكانه يا مانشسته‌ر سيتى ل خۆله‌كا 14 ژلايێ برناردۆ سيلڤا هاته تۆماركرن.
ب ڤى ئه‌نجامى يانا مانشسته‌ر سيتى پاشڤه هاته رێزا سيێ ب 44 خالان ورێزا دويێ بۆ يانا توتنهام بجه هێلا ئه‌وا سه‌ركه‌فتنه‌كا مه‌زن ل سه‌ر بۆرنموس ب ئه‌نجامێ 5-0 تۆماركرى.
ئه‌ڤرۆ نيوز:
ل ده‌مژمێر 7 و 20 ل سه‌نته‌رێ باژێرێ دهۆكێ ته‌قه ل كه‌سه‌كى دهێته كرن و د ئه‌نجامدا گيانێ خوه ژ ده‌ست دده‌ت، هێمن سلێمان به‌رپرسێ په‌یوه‌ندى و راگه‌هاندنا پولیسێن پارێزگه‌ها دهوكێ دياركر گه‌نجه‌كێ ته‌قه ل كه‌سه‌كێ 42 سالى كريه و د ئه‌نجامدا گيانێ خوه ژ ده‌ستدايه و گۆت: ل دووڤ په‌رێن ڤه‌كولينێ يێن ده‌ستپێكى كێشا خوينداريێ د ناڤبه‌را ڤان كه‌سان داهه‌بوويه و هێش بكوژ نه‌هاتيه گرتن، به‌لێ ناڤێ وى يێ ل ده‌ف مه، ئه‌گه‌ر خوه راده‌ست نه‌كه‌ت، دێ ب زووترين ده‌م هێته گرتن.
ئه‌ڤرۆنيوز:
پشتى حه‌فتيه‌كێ ژ بريارا سه‌رۆكێ ئه‌مريكى ب ڤه‌كێشانا هێزێن ئه‌مريكى ژ سووريێ، به‌رپرسه‌كێ عيراقێ ئاشكرا دكه‌ت كو له‌شكرێ ئه‌مريكى دو بنگه‌هێن دى يێن له‌شكرى ل رۆژئاڤايێ عيراقێ ونێزيكى سنورێ سووريێ دروست دكه‌ت.
فه‌رحان دلێمى، ئه‌ندامێ جڤاتا پارێزگه‌ها ئه‌نبار گۆت” له‌شكرێ ئه‌مريكى دو بنگه‌هێن نوو ل ده‌ڤه‌رێن ده‌شتێ ل ئه‌نبار دروست دكه‌ت”.
گۆت ژى” بنگه‌هێ له‌شكرى يێ ئێكێ ل باكوورێ باژێركێ رومانه يه يێ سه‌ر ب قه‌زا قايم ڤه ل سه‌ر سنورێ سووريێ ب دووراتيا 360كيلۆمه‌تران ژ رۆژئاڤايێ رومادى سه‌نته‌رێ پارێزگه‌ها ئه‌نبار وبنگه‌هێ له‌شكرى يێ دويێ ژى ل رۆژهه‌لاتا باژێرێ روتبه دهێته دروستكرن ب دووراتيا 310 كيلۆمه‌تران ژ رۆژئاڤايێ رومادى كو تنێ 100 كيلۆمه‌تران ژسنورێ سووريێ دووره”.
دياركر” دروستكرنا وان هه‌ردو بنگه‌هێن له‌شكرى بۆ هاريكاريا هێزێن عيراقى يه دكونترۆلكرنا سنورانه ورێگرتنه ژهاتنا چه‌كدارێن داعشێ بۆ ناڤ ئاخا عيراقێ”.
ئەڤرۆ نیۆز، ئەمیر ئەترووشی:
رێڤەبەرێ ئایین و پێکڤەژینێ ل وەزارەتا ئەوقاف و کاروبارێن ئاینی یا حۆکمەتا ھەرێما کوردستانێ راگەھاند، ھەتا نھا ل ھەرێمێ ھەشت ئایینان مۆلەت ھەیە و ب فەرمی دشێن ھەلکەفت و کاروبارێن خوە یێن ئایینی برێڤە ببەن.
ئەمیر ئوسمان، رێڤەبەرێ ئایین و پێکڤەژینێ ل وەزارەتا ئەوقاف و کاروبارێن ئاینی یا حۆکمەتا ھەرێما کوردستانێ بۆ ئەڤرۆ نیۆز دیار کر، ھەتا نوکە ل ھەرێمێ ھەشت ئایینان مۆلەت ھەیە و ب شێوەیەکێ فەرمی دشێن ھەلکەفت و کاروبارێن خوە یێن ئایینی ل ناڤا کوردستانێ د بجھبینن و ھەر ئایینەکێ دی ژی بخوازیت، مۆلەت دێ پێ ھێتە دان وەکو ئازادی د بجھئینانا ئایین و بیر و باوەران دا. ئاشکرا ژی کر کو نھا ئەو کار د پرۆژەیەکی دا دکەن بۆ ھندێ چو جوداھی دناڤبەرا ئایینان دا نەھێتە کرن و ھەر کەسەکی کا بیر و باوەر ب چ ھەبن، ل گۆرەی ھزرێن خوە ژیانا خوە ب ئازادنە برێڤەببەت.
ئەڤرۆ نیۆز، ئەمیر ئەترووشی:
ڤەکۆلەرەکێ ئێزدی دیار کر، ژ دەستپێکا شەرێ داعش و ھاتنا حەشدا شەعبی و ھەتا نھا، ٢٥٩٦ زارۆ ئێتیم و سێوی بووینە و ھندەک ژی وان بێ باب ماینە و ھندەک بێ دایک و ھندەک ژی بێ دایکوباب ھەردو ماینە.
ڤەکۆلەرێ ئێزدی داوود موراد خەتاری بۆ ئەڤرۆ نیۆز راگەھاند، ژ سالا ٢٠١٤ و ھەتا نھا ھژمارەکا مەزن یا زارۆیێن ئێزدی تووشی دەربەدەریێ و مالوێرانیێ بووینە و زیانا مەزن یا ئێزدیان ب بەر زارۆان کەفتیە و گۆت: ھەتا نوکە ٣٧٢ زارۆ بێ دایک و باب ھەردوو ماینە، ھەروەسا ١٧٨٨ زارۆ بێ باب ماینە و نھا ب تنێ ل گەل دایکا خۆ دژین، دیسا ژی ٤٣٦ زارۆ ماینە بێ دایک و نھا ب تنێ ل گەل بابێ خۆ دژین.
رێکخراوا یونیسف ژی ل عیراقێ د دووماھی ئامارا خوە یا سالانە دا ئاشکرا کریە کو ھەتا نھا ژ ئەنجامێ شەری و ململانەیان و نەبوونا وەبەرھێنانێ، د ماوێ چار سالێن بوری و ھەژاریێ دا، نێزیکی چار ملیۆن زارۆیێن عێراقێ پێدڤی ب پشتەڤانیێ و خزمەتکاریێن بلەز ھەیە ل ھەموو دەڤەرێن عێراقێ.
ھەروەسا ئاماژە دایە ھندێ کو ملیۆنەک و ٣٠٠ ھزار زارۆ دناڤا دۆ ملیۆن و ٦٠٠ ھزار ملیۆن ئاوارەیان دا ھەنە، ئانکو نیڤا رێژەیا ئاواران زارۆن کو ژ ئەنجامێ شەری ل دەڤەرێن جۆدا ئاوارە بووینە.
ئەڤرۆ نیوز، نەوزاد ھلۆری:
ل ھەرێما کوردستانێ ھژمارەکا ھونەرمەندێن کوردستانێ ژ ئەگەرێن جودا گیانێ خوە ژ دەستدایە، ھندەک ژ وان رەوشا ساخلەمیا وان نەباشە، سەروکا لقێ دھۆک یا سەندیکا ھونەرمەندێن کوردستانێ ژی دیارکر کو ل پارێزگەھا دھۆک ل سالا ٢٠١٨ دا ھەشت ھونەرمەندان گیانێ خوە ژ دەستدایە.
زێدەتر ئەڤین بوتی سەرۆکا لقێ دھۆک یا سەندیکا ھونەرمەندێن کوردستانێ ل پارێزگەھا دھۆک بۆ ئەڤرۆ نیوز گۆت: ل سنوورێ پارێزگەھا دھۆک د سالا ٢٠١٨ دا ھەشت ھونەرمەندان گیانێ خوە ژ دەستدایە کو ئەو ژی ” عەبدوللا حاجی، زیرەک خەتاب، جەمیل حەمید، عەبدولحەکیم عەبدوللا، عنتەر زاخویی، تەوفیق شاکر، ئەنەس ئامێدی، محەمەد عەلی ئەترۆشی” بوون، کو پشکەک ژ وان ژ ئەگەرێ نەخوشیان گیانێ خوە ژ دەستدایە، نوکە ل سنوورێ پارێزگەھا دھۆک ١٧ ھونەرمەندێن نەخوش ھەنە و ھندەک ژ وان چارەسەریێن نوژداری وەردگرن ، ھندەک ژ وان پێدڤی ب زێدەتر چارەسەریانن ژوان خەلیل قەدشی و نوژدار محەمەد تاھر.
زێدەتر گۆت: ژبلی ئەندامێن سالێن بووری یێن سەندیکا ھونەرمەندان، ئەڤ سالە ل سەندیکا ھونەرمەندێن کوردستانێ و لقێ دھۆک ٥٥ ھونەرمەندێن نوو ھاتینە تومارکرن کو ئەو ژی ٢٦ موزیک ژەن، ١٧ شانوکار ، ١٠ شێوەکار و دوو فلم سازبوون.
ژبلی گیان ژ دەستدانا ھژمارەکا ھونەرمەندێن دھۆکێ، د ھەمان دەم دا ھژمارەکا دی یا ھونەرمەندان ل پارێزگەھێن دی یێن ھەرێما کوردستانێ گیانێ خوە ژ دەستدایە ژ وانان “حەمە جەزا زەنگەنە، جەلال حەردان ، رێھاد حەمە عەزیز، بھار موستەفا، روستەم باجەلان ، سەید محەمەد سەرچاوەیی، کەمال دلشاد، ئیسماعیل پاکزادە، مەجید خدر، رەئوف حەسەن ، رەحیم زوبێحی و پشتیوان نوری ”
بوتی د درێژاھیا ئاخفتنێن خودا دیارکر ژی کو ئەوان د رێیا خوە دا ھاریکاری بو چەندان ھونەرمەندان کریە و زێدەتر گۆت: سەندیکا ب رێیا خوە ھەموو بزاڤان دکەن کو رەوشا ھونەرمەندێن پارێزگەھا دھۆک یا باش و ساخەم بیت ب تایبەتی ھونەرمەندێن نەخوش، دەنگێ وان دگەھینیتە جھێن شولەژێ.
ئەڤرۆ نیوز، بارزان مزووری:
بەیار حازم سەرپەرشتێ بنگەھێن دەنگدانێ ل شێخان سەر ب کومسیونا بالا یا ھەلبژارتنان تایێ مووسل بۆ ئەڤرۆ نیوز ئاشکرا کر کو کومسیونا بالا یا ھەلبژارتنان ل عێراقێ ئەم ئاگەھدار کرینە ب نڤیسارەکا فەرمی کو ئەو کەسێن بایومەتری ئەنجام نەدابیت پێدڤیە ل دەستپێکا سالا نوو سەرەدانا بنگەھێن دەنگدانێ بکەت ئەو بنگەھێن ناڤێ وی لێ بیت بایومەتری ئەنجام فدەت، کارتا خوە یا دەنگدانێ وەرگریت ژ بەر کو بریار ھاتیە دان کو ھەر کەسێ بایومەتری ئەنجام نەدەت ماف نامینیت بۆ دەنگدانێ ئەڤە دووماھیک دەلیڤەیە بۆ وان کەسان، ل شێخان بنگەە ھاتیە ڤەکرن ھەر ژ سپێدێ هەتا ئێڤاری دێ دەوام لێ ھێتە کرن بۆ ئەنجامدانا بایومەتری.
ناڤھاتی خویا کر کو ئەو کەسێن ئاوارە سەرەدانا وان بنگەھێن خوە بکەن یێن جھێ لێ ئاوارەبووین ھەر ئێک بۆ دەڤەرا خوە یێن کەمپان ژی دێ بنگەھێن دەنگدانێ ھێن ڤەکرن بۆ وان.
بەیار حازم گوتژی ٩٠% خەلکی بایومەتری ئەنجام نەدابوو بەری نھا ب تنێ ١٠% ئەنجام دابوون، ئەو کەسێن بایومەتری ئەنجام دایی وان ژی ئاگەھدار دکەین کو بھێن و کارتا خوە یا نوو وەرگرن.
نيشاندان