ئەڤرۆ نیۆز، ئەمیر ئەترووشی:
دادگەھا بلند یا عیراقا فیدرال یاسا پەرلەمانێ عیراقێ کو ل خولا بوری ھاتبوو پەسەندکرن ھندەک خالێن وێ لادان، پشتی حکومەتا فیدرال تانە ل یاسا پەرلەمانێ عیراقێ دای، بریارا دادگەھا فیدرال دەرکەت ب پەسەندکرنا یاسایێ و لادانا ژمارەکا خالان د وێ قانوونێ دا.
د ڤی چارچوڤەی دا د. دیار تەیب، ئەندامێ فراکسیونا پارتی ل جڤاتا نوونەرێن عیراقێ، بۆ ئەڤرۆ نیۆز دیار کر، خالا ھەرە باس لێ دھێتە کرن و ببوو جھێ باسکرنێ ل ناف خەلکی و راگەھاندنێ دا، خالا ژمارە ١٣ بوو، کو گرێدای خانەنشینکرنا پەرلەمانتارا بوو و ئەڤە ژی ژ دەرڤەی یاسا خانەنشینا ئێکگرتی یا فیدرال بوو، ژ بەر کو د خالەکێ دا ھندەک ئیمتیاز دابوونە پەرلەمانتاری، ئەو ژی نە ل بەرچاڤ وەرگرتنا ژیێ خانەنشینێ کو ٥٠ سالن، واتە ئەگەر ژیێ وی نەگەھشت بیتن ژی ھەر دێ ھێتە خانەنشینکرن، پشتی پارەکی ددەتە سندوقا خانەنشینیێ و خالا ھەبونا خزمەتا کێمتر ژ ١٥ سالی بۆ خانەنشینیێ. ئەڤ خالە ھاتە لادان و دێ خانەنشینا پەرلەمانتارا ل دووڤ یاسا خانەنشینا عیراقێ بیت.
ھەروەسا دیار کر کو ئەڤ خالە ب تایبەتی سەرۆکێ پەرلەمانی داخوازا لادانا وێ کر بوو ب ناڤێ پەرلەمانی و ئەڤ یاسایە یا تایبەتە ب پەرلەمانێ عیراقێ ڤە و ژ پەرلەمانێ کوردستانێ ناگریت.
ل دووڤ مادێ ژمارە ١٣ ژ یاسایا پەرلەمانێ عیراقێ ئەوا ل سالا ٢٠١٨ دەرچووی کو ئێک ژ وان خالان یا گرێدایە ب خانەنشینکرن پەرلەمانتاران ڤە و دادگەھا بلندا عیراقا فیدرال ژی بریارا نە یاساییکرنا چەند برگێن وێ قانوونێ دایە و ئەڤ قانوونە ژ ٢٩ خالان پێک دھات و پشتی ڤێ راستڤەکرنێ ٥ خال ھاتنە لادان و ٢٤ خال ھتنە رەتکرن و ل دووماھیا خۆلا بەری نھا یا پەرلەمانێ عیراقێ ھاتبوو پەسەندکرن و حۆکمەتا عیراقێ یا عەبادی سەرۆکاتی دکر تانە ل ٢٥ مادەیان دابوو.
ئەڤرۆ نیوز، نەوزاد ھلوری:
دەمەکێ کێم بەری نوکە ژ ئەنجامێ تەقینەکێ، وەلاتیەکێ دەڤەرا بارزان ھاتە کوشتن، تەرمێ وی ھاتە رەوانەکرن بو نوژداریا داد ل سۆران.
موسلم دولەمەری، چالاکڤان و خەلکێ دەڤەرا شێروانی مەزن بو ئەڤرو نیوز گوت: ئەڤرۆ ژ ئەگەرەکێ نەدیار مالیدەیەکا کارەبێ ل ناحیا شێروانی مەزن یا سەر ب دەڤەرا بارزان تەقی و د ئەنجام دا کەسەک ھاتە کوشتن، نوکە تەرمێ وی ھاتیە رەوانەکرن بۆ نوژداریا داد ل سوران بۆ زانینا ئەگەرێ روودانێ.
زێدەتر گوت: ژبلی گیان ژ دەستدانا وی، دھەمان دەم دا کەسەکێ دن ژی برینداربوویە کو دبیتە برایێ وی کەسێ گیانێ خوە ژ دەست دایی.
ب گۆرەی ئاخفتنێن دولەمەری، ئەوان ھەردوو کەسان ل سەر تانکەرێ گازوایڵێ کارێ لەحیمێ دکر، ژ نیشکەکێڤە تانکەر د دەقیت.
ئەڤرۆ نیوز، نەوزاد ھلۆری:
گوندێ کوانێ ب ئێک ژ مەزنترین دەڤەرێن کوردستان و پارێزگەھا دھۆک دھێتە نیاسین، کو زورترین کریستیان تێدا ھەنە، ئەڤرۆ کریستیانێن ھەموو دەڤەرا ئامێدیێ سەرەدانا گوندێ کوانێ و کەسینەیا کوانێ کریە ب مەرەما کرنا نڤێژێ و ئەنجامدانا رێورسمێن جەژنێ.
ل گوندێ کوانێ ٦٠ خێزانێن کریستیان و ١٩٠ خێزانێن موسلمان ھەنە، ب ناڤەندا پێکڤە ژیانا ئاینی دھێتە نیاسین، مەزنترین کەنیسەیا دەڤەرێ دکەڤیتە کوانێ، مەترانێ پارێزگەھا دھۆک و زاخو خەلکێ کوانێ یە، ئەڤرۆ موسلمان و مکریستیانان پێکڤە جەژن پیرۆزکر و مال ب مال گەریان.
ئەڤرۆ نیوز:
بەری دەمەکێ کاروانەکا مەزن یا هێزێن سەربازی یێ رژێما سووریێ بەرێ خوە دانە باژێرێ منبجێ و هێزێن سووریێ نها گەهشتینە باژێرکێ ئورێمە یێ نێزیکی منبجێ.
ئەو یەک د دەمەکێ دایە کو چەند رۆژ بەری نها فرەنسا ژی هێزێن خوە یێن سەربازی رەوانەی منبجێ کرن و تورکیا ژی بەرهەڤیان بۆ هێرشەکا سەربازی ل سەر منبجێ دکەت.
ئەڤرۆ نیوز، هۆشەنگ تاجر:
سەرکردەکێ کورد ل رۆژئاڤایێ کوردستانێ دیار دکەت کو شامێ داخواز ژ پەیەدێ کریە هەموو ودەڤەرێن دی ل ژێر کۆنترۆلا خوە ب تایبەتی ژی دەڤەرێن عەرەبی یێن ل ژێر کۆنترۆلا خوە رادەست بکەت و ل هەمبەر دا سووریا دێ سەربازێن خوە ل سەر سنورێ تورکیا جێگر کەت.
محەمەد عەلی ئاماژە ب هندێ ژی دکەت کو شامێ داخواز ژ پەیەدێ کریە ژی کو باژێرێن رۆژئاڤایێ کوردستانێ ئانکۆ جهێ نها ل ژێر دەستهەلاتا پەیەدێ ئەو پێکڤە برێڤە ببەن و شاندەکێ پەیەدێ ژی نها ل روسیایە و داخوازا هاریکاریێ ژ روسیا دکەن دا رێگری ل هێرشێ تورکیا بکەت، لێ هەتا نها دیار نینە کا دێ هەلویستێ روسیا یێ دووماهیێ چاوا بیت.
ئەڤرۆ نیوز، قائید میرۆ:
سەرکردەیەکێ کورد ل رۆژئاڤایێ کوردستانێ ئاشکراکر، بزاڤ د بەردەوامن بۆ ڤەگەریانا لەشکرێ پێشمەرگەیێن رۆژ بۆ ناڤا رۆژئاڤایێ کوردستانێ و دیار کر ژی، ھەتا نوکە چو رێککەفتن د ناڤبەرا جڤاتا نیشتیمانیا کورد و پەیەدێ نەھاتیە ئەنجامدان بۆ ڤەگەریانا لەشکرێ رۆژ تنێ پەیەدە دانوستاندنان دگەل رژێما بەشار ئەسەدی دکەت.
جەدعان عەلی نوونەری پارتیا چاکسازیا کوردی ل ھەرێما کوردستانێ بۆ رۆژناما ئەڤرۆ گۆت” ھەتا نوکە چو رێککەفتن بۆ ڤەگەریانا لەشکرێ رۆژ دناڤبەرا ئەنەکەسێ و پەیەدێ دا نەھاتینە ئەنجامدان، مخابن ھەتا نوکە پەیەدێ ب فەرمی رەتکریە پێشمەرگەیێن رۆژ بکەڤنە ناڤا رۆژئاڤایێ کوردستانێ، بەلێ گڤاشتنێن زۆر ھەنە ژلایێ مللەتی ل رۆژئاڤایێ کوردستانێ ھەتا پێشمەرگەیێن رۆژ ڤەگەرن و وان بپارێزن، ژبەرکو خەلک گەھشتیە ئەڤێ باوەریێ ددەمێ نوکەدا زێدەتری ھەموو دەمەکی رۆژئاڤایێ کوردستانێ پێدڤی ب لەشکرێ رۆژ ھەیە.
جەدعان عەلی ئاماژە کر” بزاڤێن ئەمریکا بۆ ڤەگەریانا لەشکرێ رۆژ تنێ ئەڤە بوویە ھندەک وەلاتێن دەڤەرێ پشتی ڤەکێشانا ھێزێن ئەمریکی رازی نابن تنێ ھێزێن گرێدایی پارتا کرێکارێن کوردستانێ پەکەکێ دەستھەلات ھەبیت ل رۆژئاڤایێ کوردستانێ ب تایبەتی تورکیا، دڤیت کورد ئیدارەیا رۆژئاڤایێ کوردستانێ بکەن نەک پەکەکە لەوڕا ژی دێ بزاڤێن ڤەگەریانا پێشمەرگەیێن رۆژ ھەر بەردەوام بیت.
ئەڤرۆ نیوز:
عەبدولقادر ئیزوز شیرەتکارێ حوکمەتا سووریێ راگەهاند کو کورد وەلاتیێن سووریێ نە و د شەرێ ل دژی داعشێ دا ژی وەلاتێ خوە پاراستن و ئەم رێزێ ل کوردان دگرین، لێ چو پرسەک ب ناڤێ پرسا کوردی ل وەلاتێ مە نینە و لەشکرێن سووریێ دشێن بچنە هەموو دەڤەران و چو هێزەک ژی نەشێت ئاستەنگیان بۆ مە دروست کەت.
ل دۆر مافێ کوردان ژی ناڤهاتی راگەهاند کو پشتی ئەم کۆنترۆلا خوە ل سەر هەموو ئاخا سووریێ دروست بکەین دێ هەموو وەلاتیێن سووریێ وەکو ئێک بژین و دێ خزمەتا هەموویان کەین.
ئەڤرۆ نیوز، هۆشەنگ تاجر:
ئەندامەکێ مەکتەبا سیاسی یا پارتی دیموکرتی کوردستان/ سووریا بۆ ئەڤرۆ نیوز دیار کر کو دو هەتا سێ مەه دەم پێ دڤێن هەتا ئەمریکا هێزێن خوە ژ سووریێ ڤەکێشیت و ناکۆکیێن مەزن ژی د ناڤبەرا ئیدارا ئەمریکا دا ل دۆر ڤەکێشانێ هەنە، ژ بەر هندێ ژی ڤەکێشان وەسا ب ساناهی نابیت.
محەمەد عەلی ئەندامێ مەکتەبا سیاسی یا PDK/ سووریا ئەو یەک ژی دیار کر کو ل گۆر تێگەهشتنا مە و زانیاریێن ل بەر دەستێ مە ئەمریکا هەموو هێزێن خوە ژ سووریێ ڤەناکێشیت و دێ هندەک هێزێن وان مینن و ل گۆر هەر گوهۆرینەکێ ل دەڤەرێ ژی دێ ئەمریکا پێداچوونێ د هەلویستێ خوە دا بکەت، ئەو یەک ژی نیشا ددەت کو ئەمریکا پیلانا “ب” ژی یا هەی لێ هەتا نها گەلەک تشت ئاشکرا نەبووینە.
نيشاندان