ئەڤرۆ نیوز:
جێگرێ فەرماندارێ گشتی یێ هێزێن پاسدارێن ئیرانێ حسێن سەلامی راگەهاند کو ئەمریکا داخواز ژ مە دکەت کو هێزێن خوە ژ سووریێ ڤەکێشین، ئەم ب چو رەنگەکێ داخوازا ئەمریکا بجه نائینین و ئەمریکا وەلاتەک داگیرکەرە و دڤێت ئاخا سووریێ چۆل بکەت.
فەرماندارێ ئیرانێ ئەو یەک ژی دیار کر کو ئەم ل سەر داخوازا حوکمەتا سووریێ چووینە وی وەلاتی و مە شەرێ تیرۆرستان کریە، لێ ئەمریکا ئاخا سووریێ داگیر کریە و نەڤێت ژ سووریێ دەرکەڤیت.
شێخان، بارزان مزووری:
ئەڤرۆ دەمژمێر ئیڤاری رێکەفتی ١١ی شوباتێ ٢٠١٩ی شاندەکێ پارتی دیموکراتی کوردستان ب سەروکاتیا “فازل میرانی” سکرتێرێ مەکتەبا سیاسی پا پارتی دیموکراتی کوردستان پشکداری د تازیا میر تەحسین بەگ میرێ ئێزدیان کر ل قەزا شێخان.
فازل میرانی، دکونگرەکێ رۆژنامەڤانی دا بۆ دەزگەھێن راگەھاندنێ دیار کر میر تەحسین بەگ نە ژ ئێزدیان چویە بەلکو ژ ھەموو مللەتێ کورد چویە و میر ئێک ژ کەساتیێن مەزن یێ کورد بوویە و پێگەھێ وی یێ کەسایەتی ژی د ناف ھەموو مللەتێ کورد دا یێ دیاربوو.
ناڤھاتی زێدەتر گوت: ئەم وەکو پارتی دیموکراتی کوردستان ژ لایەکی ڤە ئەم غەمبارین و ژلایەکی ڤە خوشحالین کو دبینین خەلکەک بڤی شێوەی جھێ میری وەکو ھەژی راگرتی ھیڤیا مە ئەوە جڤاتا روحانیا ئێزدیان میرەکێ دی دەسنیشان بکەت ئەم ھەموو ژی دێ پشتەڤانیا وی میری بین ھەر وەکو ئەم پشتەڤانیا میر تەحسین بوینە بریارێن دوماھیێ بو چ حیزبا نینن بەلکو دێ بۆ جڤاتا روحانیا ئیزدیان بیت.
کەریم سلێمان ،شێوەردارێ جڤاتا روحانیا ئێزدیان بو ئەڤرۆ نیوز گۆت: ئەو کارێ ھاتیە کر ن بۆ تازیا میر تەحسین بەگ ھەر ژ فروکخانا نیڤدەولەتی حەتا شێخان تایبەت ژلایێ سەروکێ حکومەتا ھەرێما کوردستانێ ڤە کارەکێ مێژووی بو چ جارا ناھێتە ژبیرکرن.
ئەڤرۆ نیوز:
پشتی ل شەڤا بوری گه‌لکه‌رێ یانا مانچێسته‌ر سیتی سێرجیو ئوگویرو شیای ھاتریکێ ل گەل یانا خوە ل یاریا بەرامبەر چێلسی توماربکه‌ت ئەوا ب سەرکەفتنا یانا وی مانچێستەر سیتی ب دووماھیی هاتی ب شه‌ش گولان بێ به‌رامبه‌ر .
ب تومارکرنا وێ هاتریکێ ئوگوێرو شیا ب گەھیتە نمرا ستێرا بەری نوکە یا ھەلبژارتیێ ئنگلتەرا و یانا نیوکاسل ئالان شیرار ئەوێ خودانێ مەزنترین ھاتریک دخۆلا ئنگلتەرا کو ١١ هاتریک به‌ری نوکه تومارکربوون.
هه‌ردیسان روبی فولو ب تومارکرنا ٩ ھاتریکا ل رێزا سیێ دهێت و هه‌ر ئێک یاریزانان تێری ھنری ستێرا فرەنسی و یانا ئەرسینال یا بەری نوکە و ھاری کین یاریزانێ نوکە یێ توتنھام و مایک ئوین یاریزانێ بەری یێ مان یوناید و لیڤەرپول ل رێزا سیێ دهێن ب تومارکرنا هه‌شت هاتریکا .
ئەڤرۆ نیوز، عەلی حاجی:
د داخویانیەکێ دا ئەحمەد سەفار ئەندامێ پەرلەمانێ عێراقێ بۆ ئەڤرۆ نیوز دیارکر د بودجەیا عێراقێ یا سالا ٢٠١٩ دا قەرێن دەرەکی ھاتینە راگرتن و ئێدی ب چو رەنگان نابیت حکومەت قەرێن دەرەکی وەربگریت.
نافھاتی زێدەتر گۆت: ئەڤ بریارە بدلێ حکومەتا عێراقێ نەبو دبودجەیا ئەڤ سالە دا قەرزێن دەرەکی بھێنە راوەستاندن لێ مەترسیەکا مەزن ل سەر عێراقێ ھەبوون ژ ئەگەرێ قەرزێن ل سەر عێراقێ، ئەگەر حکومەتا عێراقێ بەردەوام بایە ل سەر قەرزێن دەرەکی دا بیتە مەترسیەکا مەزن ل سەر حکومەتێ و ئێدی د شیانێت وێ دا نەبوو مووچەیێ فەرمانبەران دابین بکەت.
ناڤھاتی زێدەتر گۆت: ئەڤ پێنگاڤە ھاتە پێش ژبەرکو ئەگەر ل چەند سالەکێن داھاتی دا حکومەتا عێراقێ بەردەوام قەرێن دەرەکی کربانە دا عێراق بەر ب ئاقارەکێ نەدیار ڤە چیت و تنێ دا شێت داھاتێ گازێ دەتە دەینا ئەڤە ژی دابیتە کورتھێنانا بودجەیا عێراقێ.
ئەڤرۆ نیوز:
تیما تەپا پێ یا سێمێل تووشی خوسارەتیەکا گران بوو ل سەر دەستێ یانا زانکویا جیھان ب چار گۆلان بەرامبەر گۆلەکێ د یاریێن گەرا دویێ یا خولا پلە دویا کوردستانی یا تەپا پێ دا.
د ڤێ یاریێ دا سێمێل شیا نیڤا ئێکێ گۆلەکێ تومار بکەت لێ نەشیا بەردەوامیێ بدەتە پاراستنا ڤی ئەنجامی بکەت پشتی تووشی چار گۆل ل سەر ئێک ژلایێ یاریزانێن زانکویا جیھان ڤە ھاتنە تومارکرن و دەمێ مای ژ یاریێ سێمێل نەشیا چو گۆھۆرینان د ئەنجامێ یاریێ دا بکەت و ئەڤ یاریە ب چار گۆلان بەرامبەر گۆلەکێ ب دووماھی ئینا.
ئەڤرۆ نیوز، نەوزاد ھلۆری:
بەری دروستبوونا باژێرێ شێلادزێ، جھێ شێلادزێ بەری ٥٠ سالان دارستانەکا پری دار و ب مەترسی بوو و کێم کەس دشیان ژبەر ئاژەلێن ب مەترسی و درندە و ھەبوونا دارستانەکا پری دار و تاری و ئاسێ ھاتنووچۆنێ بکەن، بەلێ پشتی سالا ١٩٧٦ و ڤەگوھاستنا خەلکێ دەڤەرێن سنووریێن نێروەورێکان و دوسکی بو شێلادزێ و دێرەلووکێ، ئەو دارستان ھەموو ھاتە برین و جھێ وێ کرنە خانی و ئاڤەدانی، ژ وێ دارستانا پری دار و ئاسێ بتنێ دارەک مایە و ئەو ژی دکەڤیتە دناڤ حەوشا (مزگەفتا پیراڤدەل) ل سەنتەرێ باژێرێ شێلادزێ.
ل بارا ژیێ دارێ و دارستانا شێلادزێ و سالوخەت و چەوانیا پارستن و مانا وێ دارێ، ماموستا سەفەر حسێن پیراڤدەلی چەند زانیاریەکان بو ئەڤرۆ نیوز دیارکر کو دارا پیراڤدەل ٥٠ سالان بەری دروستبوونا شێلادزێ ھەبویە، نوکە ژیێ وێ ژ ١٠٠ سالان بوری یە، ئێکە ژ دارێن بەرێ یێن ئەسلی و سالانە ژلایێ خەلکی دھێتە پاراستن و نوکە بویە ھێمایەک بو تاخێ پیراڤدەل ل شێلادزێ.
ئەڤرۆ نیوز:
ئەڤرۆ رۆژا دوشەمبی رێککەفتی ١١/٢/٢٠١٩ نێچیرڤان بارزانی سەرۆک وەزیرێن ھەرێما کوردستانێ ل ھەولێرێ پێشوازی ل د.عومەر ئەلکندەری، قونسلێ وەلاتێ کوێت ل ھەرێما کوردستانێ و شاندێ دگەل دا کر.
د ڤێ دیدارێ دا ئەلکندەری خوشحالیا خوە ب ڤێ ھەڤدیتنێ دگەل نێچیرڤان بارزانی دیارکر و دەستخوشی ل حوکمەت و سەروک وەزیرێن ھەرێمێ کر پشتی ب سەرکەفتیانە ھەموو قەیران دەربازکرین و ئەو رێژەیا زور یا پەنابەر و ئاوارەیان حەواندی، دیسان بەحسا ئەوان ھاریکاریێن وەلاتێ خوە یێن مروڤایەتی بۆ ھەرێمێ ھنارتین پێخەمەت ھاریکاریا ئاوارەیێن ھەرێمێ.
ژلایێ خوە ڤە نێچیرڤان بارزانی سوپاسیا سەرەدان و ھاریکاریێن مروڤایەتی یێن وەلاتێ کوێتێ بۆ ھەرێما کوردستانێ کرن تایبەت رولێ میرێ کوێتێ بۆ دابینکرنا وان ھاریکاریان و بارسڤکرنا ل سەر ملێن حوکمەتا ھەرێمێ.
د تەوەرەکێ دی یێ ڤێ ھەڤدیتنێ دا بەحس ل پەیوەندیێن ھەرێما کوردستانێ دگەل بەغدا دیسان سەرەدانا نێچیرڤان بارزانی بۆ بەغدا و کومبوونا دگەل عادل عەبدولمەھدی سەروک وەزیرێن عیراقێ ھاتە کرن، زێدەباری پەیوەندیێن ھەرێمێ دگەل وەلاتێن جیران و پێشخستنا وان پەیوەندیان د بوارێن جودا دا.
ئەڤرۆ نیوز، هۆشەنگ تاجر:
دارا ناتق ئەندامێ سەرکردایەتیا پارتی دیموکراتی کوردستان/ ئیران کو پارتیا وان رۆلەکێ بەرچاڤ د ناڤەندا هەڤکاریا پارتێن رۆژهەلاتێ کوردستانێ دا دگێریت بۆ ئەڤرۆ نیوز دیار کر کو بریارە رۆژێن ١٣ و ١٤ ڤێ مەهێ ب دەستپێشخەریا ئەمریکا ل پایتەختێ وەلاتێ پۆلەندا ل باژێرێ وارشۆ کۆنفرانسەک ل دۆر رۆلێ خراب یێ ئیرانێ برێڤە بچیت و ئارمانجا سەرەکی یا ئەمریکا ژی دروستکرنا بەرەیەکێ یە ل دژی ئیرانێ و گۆت: (وەکو پارتێن رۆژهەلات ئەم داخواز دکەین کو د کۆنفرانسێ وارشۆ دا بەحسێ مافێن کوردان و نەتەوێن دی ل ئیرانێ بهێتە کرن، چونکو رۆژانە رژێما ئیرانێ مافێ کوردان و نەتەوێن دی بنپێ دکەت و هەکە ئەمریکا بڤێت چارەکێ بۆ رەوشا ئیرانێ پەیدا کەت دڤێت مافێ کوردان و نەتەوێن دی بەرچاڤ وەربگریت).
ناڤهاتی ئەو یەک ژی دیار کر کو کۆنفرانسێ وارشۆ بۆ دروستکرنا بەرەیەکێ ل دژی رژێما ئیرانێ گرنگە، لێ دڤێت مافێ کوردان و پاشەرۆژا کوردان ل ئیرانێ ژی بەرچاڤ بهێتە وەرگرتن.
ئەڤرۆ نیوز، عەلی حاجی:
ل دووڤ ئامارەکا رێڤەبەریا ساخلەمیا زاخۆ دیارکریە د ماوێ حەفیتەکێ دا ل سنورێ قەزا زاخۆ ١٤ کەسان ب ئەگەرێن جودا گیانێ خوە ژ دەست داینە.
ل دور ڤێ چەندێ ئەمیر عەلی ژ راگەھاندنا ساخلەمیا زاخۆ ، بۆ ئەڤرۆ نیوز گۆت: ژ رێکەفتی ٤/٢/٢٠١٩ ھەتا ١١/٢/٢٠١٩ ل سنوری قەزا زاخۆ ١٤ وەلاتیان ژ ئەگەرێ جودا گیانێ خوە ژ دەست داینە لێ پرانیا وان کەسان ژ ئەگەرێ جەلتێ بویە ، ١١ کەسان ژ دەرڤەی نەخوشخانەیێ و ٣ کەسان ژی دناڤ نەخوشخانەێن زاخۆ گیانێ خوە ژ دەست داینە.
ناڤبری زێدەتر گۆت: ل ماوەیێ حەفیەکێ دا ١٢٨ زاروک ھاتینە سەر دونیایێ ٦٥ ژوان کور بوون و ٦٣ ژی کچ بوینە ، دیسان ل نەخوشخانا زاخۆ یا گشتی و تەنگاڤیان ١٦ نەشتەرگەریێن مەزن ھاتینە ئەنجام دان و ھەمی نەشتەرگەری ب سەرکەفتیانە ب دووماھی ھاتن.
ئەڤرۆ نیوز:
رۆژناما وول ستریت جۆرنال یا ئەمریکی دوهی د راپۆرتەکێ دا دیار کر کو هێزێن سووریا دیموکرات پەترۆلا ل ژێر کۆنترۆلا خوە ب رێیا هندەک کۆمپانیان دفرۆشنە رژێما بەشاری، کۆمپانیێن کو کارێ پەترۆلێ ل گەل هێزێن سووریا دیموکرات (هەسەدێ) دکەن بەری نها ژ ئالیێ ئەمریکا ڤە هاتینە سزادان، ژ بەر هندێ ژی بەرپرسێن ئەمریکا ژ هەلویستێ هێزێن سووریا دیموکرات دلگرانن.
ئەو یەک د دەمەکێ دایە کو بەری نها فەرماندارێن هێزێن سووریا دیموکرات دیار کربوون کو ئەو ب چو رەنگەکێ پەترۆلێ نافرۆشنە رژێما بەشاری و چو راستی بۆ هندێ نینن.
نيشاندان