ئەڤرۆ نیوز ، زنار تۆڤی:

ل ڤان رۆژێن بوری عەلی سیستانی لێڤەگەرێ ئاینی یێ شیعێن عیراقی، پشتی چاڤ ب نوونەرێ گشتی یێ یۆئێنێ کەفتی، نامەک بۆ ھەموو خەلکێ جیھانێ ڤرێکریە و چەند خالێن تایبەت د وێ نامێ دا بەلاڤکرینە، ژ وانا ژی کو رێز ل سەروەریا ئاخا عیراقێ بھێتە گرتن، ھەروەسا بەلانس بھێتە راگرتن دناڤبەرا پەیوەندیێن عیراقێ ل گەل ھەردو وەلاتێن ئیرانێ و تورکیا، ھەروەسا چەک بکەڤیتە دەستێ حوکمەتا عیراقێ و گەندەلچی بھێنە دادگەھکرن، دیسا ئاوارە ڤەگەرنە سەر جە و وارێن خوە و ئەو وەزارەتێن مایی د حوکمەتا نوو دا بھێنە دانان.
سەبارەت ڤان خالان د. سۆزان ئامێدی مامۆستایا زانستێن سیاسی ل زانکۆیا دھۆکێ بۆ ئەڤرۆ نیوز گۆت: سەروەریا ئاخا عیراقێ یا گرێدایە ب دەستھەلاتا حوکمەتا عیراقێ ڤە ل بەغدا، ھەروەسا جیھان ھەموو دزانیت، کو ئەڤ چەندە یا گرێدایە ب بەرژەوەندیا ئیرانێ ڤە، لەوما ب تنێ رێیەک ھەیە، کو سەروەریا عیراقێ بھێتە پاراستن، ئەو ژی ئەوە کو عیراق ل ژێر دەستێ ئیرانێ دەرکەڤیت، ئەڤە ژی دێ ب رێیا ھەبوونا کۆدەتایەکێ دناڤبەرا ھەردو ئالیێن شیعی یێن گرێدایی ئیرانێ و یێن گرێدایی عیراقێ ڤە ھێتە کرن، ئەڤە گرنگترە کو سەروەریا عیراقێ بھێتە پاراستن ژ تورکی و ئیرانێ و ئەمریکا، ھەروەسا بۆ پەیداکرنا بەلانسێ دناڤبەرا تورکیا و ئیرانێ دا، ئەڤە نە یا دروستە بھێتە گۆتن، چونکی دۆخ و دۆرھێلێ عیراقێ و دیسا عەلی سیستانی ژی دزانیت، کو کەس نەشێت بەلانسێ دناڤبەرا تورکیا و ئیرانێ دا راگریت، ژبەرکو ئیرانێ چو دەلیڤە بۆ تورکیا ل عیراقێ نەھێلایە، کو مایتێکرنێ د کاروبارێن عیراقێ دا بکەت.

ناڤھاتیێ ئەو ژی گۆت: دڤێت چەک بکەڤیتە د دەستێ ھیزێن حوکمەتا عیراقێ دا، لەوما ھەکە ئەڤ خالە بھێتە پەیرەوکرن، دێ تەناھی ل ھەموو عیراقێ پەیدا بیت، ل گەل ھندێ ژی دێ ھندەک کارێن خراب و نە ئارامی ژی پەیدا بیت، چونکی ئەڤە د بەرژەوەندیا ھندەک ئالیێن شیعی دا نینە، ب تایبەتی ئەوێن د بەرژەوەندیا ئیرانێ دا کار دکەن، ھەر چەندە عەلی سیستانی بەحسێ حەشدا شەعبی نەکریە، لێ ھندەک ئالیێن شیعی ئەڤ چەندە بۆ بەرژەوەندیا خوە کریە، ھەروەسا وان ئالیێن شیعی بزاڤکرینە کو ھندەک میلیشیاتان چێکەن و ناڤێ وێ بکەنە حەشدا شەعبی، کو ئەڤ چەندە درێژە پێدانە بۆ حەرەس سەوری یا ئیرانی، لەوما د شەرێ ھەمبەری تیرۆرستێن داعش دا، جیھانێ ھەموو یێ دیت، کو چەندین فەرماندارێن سەربازی یێن ئیرانی د سەنگەرێن شەریدا بوون ل عیراقێ، حەشدا شەعبی ل ژێر فەرمانا وان شەرێ داعشێ کریە.

سۆزانێ ئاشکرا کر ژی: گەلەکا ب زەحمەتە بۆ حوکمەتا نوو یا عیراقێ، گەندەلکارا بدەتە دادگەھێ، چونکی ئەڤ حوکمەتە ب خوە ژی درێژەپێدانا وان حزبێن بەری نوکە، یێن کو حوکمەت پێکئینای، چونکی یا ب زەحمەتە ئەو ڤی بابەتی ڤەکەن، ژبەرکو دێ گەلەک کارتێکرن ل سەر وان ب خوە ژی ھەبیت، لێ سەرۆک وەزیرێ عیراقێ عادل عەبدولمەھدی دشێت ھندەک پێنگاڤێن گرنگ دڤی واری دا بھاڤێژیت، لێ ل گەل ھندێ ژی یێ کەفتیە ژێر دەستێ مالا شیعی و وان ژی گەلەک گڤاشتن داناینە سەر وی، ھەروەسا ب تنێ د ئێک خال دا ئەو دێ شێت سەرکەفتنێ ب دەستڤە ئینیت، کو ئەو ژی شەرێ گەندەلیێ بکەت، ھەکە ھندەک ئالیێن نێڤدەولەتی پشتەڤانیێ ل وی بکەن.
ئەو مامۆستایا زانکۆیێ ھێشتا دبێژیت: ڤەگەریانا ئاواران ژی خالەکا گەلەکا گرنگە، چونکی کارتێکرنا وێ دێ بۆ پاشەرۆژێ یا مەزن بیت، ب تایبەتی ھندەک ئالیێن سوننی ل گەل ھندەکێن شیعی بزاڤێ دکەن، کو دۆخێ وان ئاواران خرابتر لێ بکەن، چونکی ئەو ئاوارە خێزانێن داعشا نە، ھەروەسا ئەو ھەموو خێزانێن ئاوارە یێن گرێدایی وان دەڤەرێن داعش لێ، د ژیانەکا گەلەک مەترسیدا دژین، ئەو ژیان دێ کارتێکرنێ ل زارۆیێن وان کەت، لەوما ئەو نفشێ ژ وانا رادبیت، دێ گەلەک ژ داعشان خرابتر بیت، چونکی ئەو ھزرێن داعشێ ھەر دێ میننە دناڤا وان خێزانان دا و دێ ھزرەکا رادیکالی تر پەیدا بیت، دێ کارتێکرنێ ل ھەموو دەڤەرێ کەت، چونکی دەمەکێ درێژ ل ژێر دەستھەلاتا داعشێ دا ژیاینە.

ئەو ژی گۆت: ھەتا نوکە کابینا نوو یا حوکمەتا عیراقێ نەھاتیە تەمام کرن، کو ئەڤە ژی یا گرێدایە ب ئالیێن شیعە ڤە و کارتێکرنا وێ ژی بۆ وان دزڤریت، ھەروەسا ئەو فەرماندارێن حەشدا شەعبی یێن گرێدایی ئیرانێ، دانپێدانێ ب سیستانی ناکەن، چونکی ھەر ئالیەکێ ژ وان لێڤەگەرێ خوە یێ ئاینی یێ تایبەت ھەیە، لەوما گەلەک ژ وان فەرماندێن حەشدێ ڤێ ناما سیستانی ب گرنگ ناوەرگرن، ھەر چەندە عەلی سیستانی لێڤەگەرەکێ ئاینی یێ گرنگە ل جیھانێ.