ئه‌ڤرۆ نیوز، نه‌وزاد هلۆرى:
ئه‌ڤرۆ پاسا گه‌رۆك يا وه‌زاره‌تا كار و كاروبارێن جڤاكى ل هه‌رێما كوردستانێ كو ب هه‌ڤكاریا رێكخراوا GIZ یا ئه‌لمانى هاتیه رێكخستن، ب مه‌ره‌ما وه‌رگرتنا CV و داتایێن كه‌سانێن بێ كار گه‌هشته شێلادزێ و هژماره‌كا مه‌زن یا خه‌لكێ ده‌ڤه‌رێ ژ ده‌رچویێن زانكۆ و په‌یمانگه‌هان و وه‌لاتيێن بێ كار ناڤێن خوه تۆماركرن.
ئەڤرۆ نیوز، ھەرھین محەمەد:
د. عیماد قەشێ دێرا بەرانی ل دھوکێ بۆ رۆژناما ئەڤرۆ دیارکر کو وەکو ھەرسال ل رێککەفتی ٢٥\١٢\ ٢٠١٨ کو دکەڤیتە رۆژا سێشەمبی جەژنا حەزرەتێ مەسیح دھێتە گێران و ئەڤ جەژنە دێ بۆ دەمێ سێ روژان بەردەوام بیت و نێزیکی دو حەفتیان خەلک دێ مژیلی ڤێ جەژنێ بن و د ڤێ جەژنێ دا رۆژی دھێنە گرتن و نڤێژ تێدا دھێنەکرن.
قەشێ دێرا بەرانی زێدەتر گۆت: (وەکو ھەرسال مە بەرھەڤێن خوە کرینە بۆ رۆژا ژ دایکبوونا عیسا پێغەمبەری و مە ژی کاروبارێن خوە ئەنجام داینە ژ ھەموو لایەکێ ڤە، کەنیسە ژی مە خەملاندیە و د ڤێ رۆژێ دا دێ نڤێژ ھێنە کرن و ھەموو رێورەسمێن جەژنێ وەکو ھەرسال دێ ھێنە ئەنجام دان و چو جوداھیا ڤێ جەژنێ ل گەل جەژنا دی نینە ب تنێ ئارامی بۆ مە گەلەک یا گرنگە و جەژنێن خوە ب خێر و خوەشی بگێرین).
ئەڤرۆ نیوز:
هەڤسەرۆکا جڤاتا سووریا دیموکرات ئەمینە عومەر راگەهاند کو پشتی ڤەکێشانا هێزێن ئەمریکا ژ سووریێ دێ رەوش ئالۆز بیت و تورکیا ژی خوە بۆ هێرشەکا بەرفرەه بەرهەڤ کریە و گۆت: (هەلویستێ فرەنسا گەلەکێ باش بوو و شاندێ مە دەمێ سەرەدانا فرەنسا کری داخوازا هاریکاریێ ژ حوکمەتا فرەنسا کریە و بەرسڤا وان ژی ئەرێنی بوویە).
ناڤهاتیێ راگەهاند کو نابیت جڤاکێ نێڤدەولەتی ل هەمبەر مەترسیێن ل سەر رۆژئاڤایێ کوردستانێ بێ هەلویست بن و دڤێت گەلێ کورد و نەتەوێن دی یێن کو ل باکورێ سووریێ دژین بهێنە پاراستن.
ئەڤرۆ نیوز، عەلی حاجی:
رێڤەبەرێ پەروەردا زاخۆ نەزیر یوسف بۆ ئەڤرۆ نیوز دیار کر ل ئەڤ سالەدا بۆ ئەزمونێن دەرەکی ١٢٠٠ قوتابیان فورمێن خوە پێشکێشی رێڤەبەریا پەروەردا زاخۆ کرینە ژ بۆ ئەزمونێن دەرەکی ێن قوناغا دوازدێ زانستی و وێژەی کو ٧٠٠ ژ وان قوتابیان یێن بەشێ زانستی نە و ٥٠٠ قوتابیێن دی ژی یێن بەشێ ئەدەبی نە و ١٢ قوتابیێن دی یێن پیشەیی نە و بریارە ئەزمونێن دەربازبوونێ دێ ٢٠ مەھا ٢ دەست پێکەن و قوتابیێن بەشداری ئەزمونێن دەرەکی کرین دێ ل سنورێ باژێرێ دھوکێ کەن.
ناڤبری زێدەتر گوت : (مە گەلەک ھەولدان قوتابیێن زاخۆ یێن ئەزمونێن دەرەکی ئەنجام بدەن ل زاخۆ بکەن و وێ رێیا دوور نەبڕن بەلێ ھەمی ھەولێت مە بێ مفا بوون چونکو ل دووڤ بریارا وەزارەتا پەروەردا حوکمەتا ھەرێما کوردستانێ وەسا ددەتە دیار کرن ل ھەر ٤ پارێزگەھێن ھەرێما کوردستانێ ئەزمونێن دەرەکی دێ ل سنورێ وان باژێران ھێنە ئەنجام دان و نابیت ل سنورێ قەزایان بهێنە ئەنجام دان).
ئەڤرۆ نیوز:
سەرۆک وەزیرێن ئیسرائیلێ بنیامین نەتانیاهو ب توندی هێرشی سەرۆک کۆمارێ تورکیا رەجەب تەیب ئەردۆگانی کر و راگەهاند کو تورکیا گوندێن کوردان خراب دکەت، ژن و زارۆیان دکوژیت و هەموو بنەمایێن مافێ مرۆڤی بنپێ دکەت و ژ بەر هندێ ژی ئەو نەشێن وانێن مرۆڤاتیێ بدەنە مە.
ل هەمبەر ڤێ داخۆیانیێ ژی بەری دەمەکێ پەیڤدارێ سەرۆک کۆمارێ تورکیا ئیبراهیم کالین ژی راگەهاند کو نەتانیاهو ل وەلاتێ خوە تووشی گەلەک ئاریشان هاتیە و ژ بەر گەندەلیێ دهێتە دادگەهکرن و نها ژی دخوازیت ب ڤان هێرشان رۆژەڤێ بگوهۆریت.
ئەڤرۆنیوز، رەزوان رۆژبەیانی:
عەبدولقەھار کەریم موختارێ گوندێ گرێگا بۆ ئەڤرۆ نیوز دیار کر رێکا گوندی ھەتا سەر رێیا گشتی قەزا بەردەرەش دوو کیلۆ میتر و نیڤن ئەڤە ماوەیێ پێنج سالانە بریار ھاتیە دان کو رێیا گوندی بهێتە قێرکرن و تەندەر ژی ل سەر شول کر و تێکەلە ژی ھاتە دانان بەلێ پشتی وی کاری ژ بەر قەیرانا دارایی شول ھاتیە راوەستاندن و ئەم نزانین کا دێ ئەڤ پرۆژە ب دوماھی ئینن یان ژی دێ ھەر وەسا مینیت.
موختارێ گوندێ گرێگا گۆت ژی رێیا نوکە ‘ەلەک نەخوەش بوویە و ژ نەچارێ ئەم وەک خەلکێ گوندی رابووین ل سەر ئەرکێ خوە مە چێکر و ئەو ژی تنێ کو ترومبێلێن مە ژ ئەگەرێ وێ رێکی ژ کار نەکەڤک ئەو چێکرن ژی نە وەکو پێدڤیە تنێ ژ نەچارێی یە.
ناڤهاتی دیار ژی کر راستە دەمەکێ قەیران بوو بەلێ نوکە رەوشا حوکمەتێ باشتر لێ ھاتیە داخاز دکەین کو حوکمەت بۆ مە ڤێ رێکێ ب دووماھیک بینیت.
ئەڤرۆ نیوز، هۆشەنگ تاجر:
مستەفا ئۆچەلیک سەرۆکێ گشتی یێ پارتیا ئازادی یا کوردستانێ ل باکور بۆ ئەڤرۆ نیوز دیار کر کو دو کرێکارێن کورد ل باژێرێ ساکاریا یێ تورکیا ژ بەر ئاخڤتنا ب کوردی تووشی هێرشا فاشیستێن تورک هاتینە کو مخابن ئێک شەهید بوویە و کورێ وی ژی ب گرانی بریندارە، ئەڤە بەرهەمێ سیاسەتێ دەولەتا تورکیا یە کو ل سەر بنەمایێ دژاتیا گەلێ کورد برێڤە دچیت و گۆت: (ئەم ڤێ هێرشی ب توندی شەرمزار دکەین و دڤێت کوژەک ب زووترین دەم بگەهیتە سزایێ خوە).
سەرۆکێ گشتی یێ پارتیا سوسیالیست یا باکورێ کوردستانێ ژی راگەهاند کو ئەڤ هێرشە ل دژی هەموو گەلێ کوردە و ئاخڤتنا ب کوردی وەکو تاوانەکێ ل تورکیا دبینن و ژ بەر هندێ ژی دڤێت سیاسەتەکا کو ل سەر بنەمایێ دوژمناتیا گەلێ مە برێڤە دچیت ژ هولێ بهێتە راکرن و ئەم ڤێ هیرشا درندانە ل دژی دو وەلاتیێن کورد ب توندی شەرمزار دکەین.
ئەڤرۆ نیوز، هۆشەنگ تاجر:
چاڤدێرەکێ سیاسی ل رۆژهەلاتێ کوردستانێ دیار دکەت کو نابیت کورد ئەمریکا ب هندێ تومەتبار بکەن کو خیانەت ل رۆژئاڤایێ کوردستانێ کریە، بەلکو ئەمریکا ژ بۆ بەرژەوەندیێن خوە کار دکەت و ل گۆر کوردان ستراتیژیا خوە دیار ناکەت، ژ بەر هندێ ژی دڤێت هەموو هێزێن کوردی خوە بۆ هەر گوهۆرینەکێ ئامادە بکەن.
فەرهاد وەلی زادە راگەهاند ژی کو ڤەکێشانا ئەمریکا دێ کارتێکرنا خوە ل هەر چار پارچێن کوردستانێ کەت، ژ بەر هندێ ژی دڤێت هەموو هێزێن کوردی یێن هەر چار پارچێن کوردستانێ پێکڤە ل سەر ستراتیژیەکا نەتەوی کار بکەن وی دەمی گەلەک وەلاتێن جیهانێ ژ بۆ بەرژوەندیێن خوە دێ سەرەدەریەکا راست ل گەل کوردان کەن، ئانکۆ دڤێت کورد بشێن بەرژەوەندیێن هەڤپشک ل گەل زلهێزان دروست بکەن.
ئەڤرۆ نیوز:
پشتی کو ئەمریکا راگەهاندنی دێ هێزێن خوە ژ سووریێ ڤەکێشیت دەزگەهێن راگەهاندنا عەرەبی ژی دبێژن ئەو یەک د بەرژەوەندیا ئیرانێ دایە. فەرماندارەکێ حەشدا شەعبی ب ناڤێ ئەبو فارس راگەهاند کو ڤەکێشانا ئەمریکا رامانا سەرکەفتنا مە یە و حوکمەتا سووریێ دێ جارەکا دی شێت هەموو ئاخا سووریێ کەتە بن کۆنترۆلا خوە و گۆت: (داخواز ژ هێزێن سووریا دیموکرات و یەپەگێ ژی دکەین کو چەکێن خوە رادەستی لەشکرێ سووریێ بکەن، چونکو ئەو نەشێن شەرێ لەشکرێ سووریێ بکەن و هەکە چەکێن خوە رادەست بکەن دێ بۆ وان ژی باشتر بیت).
نيشاندان