ئەڤرۆ نیوز:
پشتی ا شەڤا بوری یانا پاریس سانجێرمان ل یاریا دێربیا فرەنسا توشی خوسارەتیێ بووی ل گەل یانا لیون ب دو گولان بەرامبەر گولەکێ و كو دبيته خوسارەتیا ئێکێ يا یانا پاریس ل وه‌رزێ ئه‌ڤ ساله و ب ڤێ چەندێ یانا یوڤانتوس یا ئیتالی بوو یانا ئێکێ ل وەرزێ ئەڤ سالە ل سەر ئاستێ خولێن مەزن یێن ئورۆپی توشی خوسارەتیێ نەبووی کو ل ٢٠ یاریێن خوە یێن وەرزێ ئەڤ سالە شیا ١٩ سەرکەفتنا توماربکەت و سێ وەکھەڤیا.
ئەڤرۆ نیوز:
ب ئامادەبوونا نێچیرڤان بارزانی سەرۆکێ حوکمەتا هەرێما کوردستانێ تەرمێ میر تەحسین سەعید بەگی میرێ ئێزدیان ب رێیا فرۆکەيه‌کا تایبەت ل سه‌ر ئه‌ركێ نێچيرڤان بارزانى سه‌رۆكێ حوكمه‌تا هه‌رێما كوردستانێ ژ وەلاتێ ئەلمانیا گەهشتە فرۆکخانا هەولێرێ یا نێڤدەولەتی.
کەریم سلێمان، شیرەتکارێ جڤاتا روحانیا ئێزدیان بۆ دەزگەھێن راگەھاندنێ دیار کر کو تەرمێ میری دێ بۆ قەزا شێخان ھێتە ڤەگوھاستن، ل دەسپێکا گەھشتنا تەرمێ وی بۆ قەزا شێخان دێ ل کومەلگەھا مەھەت ڕا بوریت ژ بەر کو ھندەک رێورەسمێن تایبەت ل وێ کومەلگەھێ ھاتینە بەرھەڤکرن دیسان ل چار ریانا شێخان پێشوازی ب رێورەسم دێ ژ لایێ جەماوەرێ قەزایێ ڤە لێ ھێتە کرن دیسان دناڤ سەنتەرێ شێخان دا ل نێزیک ھولا لالش دێ تەرمێ وی ھێتە ڤەگوھاستن بۆ قەسرا میری بریار ژی ھاتە دان کو دناڤ قەسرا میری دا بھێتە ڤەشارتن دناڤ سەنتەرێ شێخان دا و گۆت: “تازی دێ ل رۆژا سێ شەمبی بیت بۆ دەمێ حەفت رۆژان یا بەردەوام بیت دێ ڤان ھەر حەفت رۆژا رێورەسمێن ئایینی د بەردەوام بن”.
پشتی تێکچوونا رەوشا ساخلەمیا میر تەحسین سەعید بەگ، میرێ ئێزدیان ل کوردستانێ و جیھانێ ل سپێدەھیا رۆژا دوشەمبیا 28ى كانوونا دويێ 2019 ل ئێک ژنەخۆشخانێن ئەلمانیا وەغەرا دووماهیێ کر.
ئەڤرۆ نیوز، قائید میرۆ:
رێڤەبەرێ گشتیێ چاپ و وەشانێ ل وەزارەتا رەوشنبیری و لاوان یا حوکمەتە هەرێما وردستانێ دیار کر کو ڤێ حەفتیێ دووماھی ژڤانێ وان و کەنالێن راگەھاندنێ یە یێن کو مۆلەتا کارکرنێ نوو نەکەن و گۆت: “وەزارەتا ناڤخۆ دێ پەخشێ وان کەنالێن ئاسمانی ڕاگریت یێن پابەندی بڕیارێن وەزارەتێ نەبن”.
محەمەد گەردی، رێڤەبەرێ گشتیێ چاپ و وەشانێ ل وەزارەتا رەوشنبیری و لاوان یا حوکمەتا هەرێما کوردس بۆ ئەڤرۆ نیوز دیار کر کو دووماهی ھۆشداریا حوکمەتێ بۆ کەنالێن راگەھاندنێ یێن مۆلەتا کارکرنێ نوو نەکربیت ل ڕۆژا پێنجشەمبیا بۆری ب دووماھی ھات، بەلێ ل سەر داخوازا راگەھاندنێن پارێزگەهێن دھۆک و سلێمانی و ھەولێرێ دەمێ گرتنا وان ھاتیە درێژکرن بۆ ڤێ حەفتیێ و گۆت: “ب تنێ ل رۆژا پێنجشەمبا بۆری دوازدە کەنالێن راگەھاندنێ سەرەدانا وەزارەتا رەوشەنبیری کریە و مۆلەتا کارکرنا خوە نووکریە، لەوڕا ژی ڤێ حەفتیێ دوماھی مۆلەتە بۆ ھەموو کەنالێن ناڤخۆیی و ئاسمانی بەرۆڤاژی دێ سزایێ قانوونی بۆ ھەبیت”.
ناڤهاتی ئاماژە دا وێ چەندێ کو ھەر کەنالەکێ ناڤخۆیی و ئاسمانی پێگیریێ ب بڕیار و رێنمایی یێن وەزارەتێ نەکەت ئێک ژ سزایێن وان دێ گرتنا پەخشێ وان کەنالێن ناڤخۆیی بیت، ھەروەسا بۆ کەنالێن ئاسمانی ژی ب فەرمانا سەرۆکایەتیا جڤاتا وەزیران دێ نڤیسارەکێ دەینە وەزارەتا ناڤخۆ داکو پەخشێ وان بھێتە ڕاگرتن، چونکی وان مۆلەتا وەزارەتا ناڤخۆ ژی ھەیە و گرتنا پەخشێ وان دبیت ژلایێ وەزارەتا ناڤخۆ ڤە بیت.
ئەڤرۆ نیوز:
یانا ریال مەدرید شیا سەرکەفتنەکا گرنگ ل سەر یانا ئالاڤیس توماربکەت ب سێ گولان بێ بەرامبەر ژ چارچوڤێ یاریێن گەرا ٢٢ ژ خۆلا لالیگا ئیسپانیا .
ھەرسێ گولێن ریال ژ لایێ یاریزانێن وێ کەریم بن زیما ل دەقیقا ٣٠ و ڤینیسیوس جونیور ل دەقیقا ٨٠ و ماریو دیاز ل دەقیقا ٩٠ ھاتنە تومارکرن و ب ڤی ئەنجامی ریال خالێن خوە گەھاندنە ٤٢ خالان و جیاوازی دناڤبەرا خوە ھەردو یانێن سەرکێشا خولێ بەرشەلۆنا و ئەتلەتیکو مەدرید کێمتر لێ کر .
ئەڤرۆ نیوز:
سەرەرای خوسارەتیا ئەڤرۆ ل گەل یانا ریال بتیس ژ چارچوڤێ یاریێن خۆلا لالیگا راھێنەرێ ئەرژەنتینی و یانا ئەتلەتیکو مەدرید دیگو سیمیونی دیارکر ئەو خوە بێ ھیڤی ناکەن بوو دەستدانا ھەڤرکیا ناسناڤێ خۆلێ و ھێشتا ئەوان دەلیڤەکا مەزن مایە بوو ھەڤرکیا ناسناڤێ خولێ.
ھەردیسان ناڤبری دیارکر ئەو یێ گەشبینە دێ شێن ھەڤرکیەکا ب ھێز ل گەل یانا بەرشەلۆنا کەن ژبەرکو ئەوان یاریێن ب زەحمەت ماینە و ئەو ژ ئاستێ یاریزانێن خوە یێ رازی یە سەرەرای خوسارەتیا یاریا ئەڤرۆ .
ئەڤرۆ نیوز، رێوار مزیری:
ئنستیۆتا هێلین بۆ راهێنان و گەشەپێدانێ ب هەمەهەنگی دگەل ناڤەندا ڤەکۆلینێن روداوو دێ خۆلا راهێنانێن ئافرەتێن سەرکردە ل رۆژێن 4 هەتا 8/2/2019 ل هەولێرێ ڤەکەت.
شەیما مستەفا، ئەنداما مەکتەبا سکرتاریەتا ئێکەتیا ئافرەتێن کوردستانێ بۆ ئەڤرۆ نیوز دیار کر کو حەفت پەرلەمانتارێن ئافرەت ژ فراکسیۆنا پارتی دیموکراتی کوردستان و چەندین ئەندامێن سکرتاریەتا ئێکەتیا ئافرەتێن کوردستانێ و بەرپرسێن ئەنجوومەنێن ئافرەتان دێ د ڤێ خۆلێ دا پشکدار بن و گۆت: “وانێن ڤێ خۆلێ دێ ژلایێ مامۆستایێن کورد ڤە هێنە گۆتن”.
ناڤهاتیێ ئاماژە دا وێ چەندێ کو مەرەم ژ ڤەکرنا ڤێ خۆلێ ئەوە داکو ئەو ئافرەتێن ژنوو د بوارێ ئافرەتان دا دەست بکاربووین ب شێوەیەکێ باشتر ئەتەکێتێن کاری بزانن و ئافرەت ب چو شێوە دێ شێت خوە پێ گەهینیت و دێ ب چو شێوە خوە دگەل جڤاکی گۆنجینن و خزمەتێ کەن”.
ئەڤرۆنیۆز، سالار دۆسكی:
ل كافيا قوبەهان یا رەوشەنبیری ئەڤرۆ ئێڤاری 3/2/2019 ب هەلكەفتا بورینا هەشتێ سالان ل سەر دامەزراندنا رادیویا كوردی ل بەغدا و بەرهەڤبوونا چەند رەوشەنبیر و رۆژنامەڤان، سمینارەك ل سەر رۆلێ رادیۆیا ناڤبری بۆ بێژەرێ رادیۆیا كوردی یا بەغدا(جەمال بەرواری) هاتە سازكرن.
جەمال بەرواری، بۆ ئەڤرۆ نیۆز دیاركر كو رێكەفتی 29/1/1939 پشكا كوردی یا رادیویا كوردی هاتیە دامەزراندن، دەسپێكا بەخشێ وێ 15 خولەك بوویە، پشتی بیانا 11 ئادار یا سالا 1970 رادیۆیا كوردی بۆ رێڤەبەری و پشكێن تایبەت هەبوون و هاتنە بەرفرەهكرن، سپێدێ دەست ب پەخشێ خوەدكر هەتا دوی شەڤ.
بەرواری، گۆت ژی: رادیۆیا كوردی ل بەغدا رۆلەكێ مەزن هەبوو ل دروستكرنا هەستا نەته‌وى دا و گەلەك جاران سترانێن شورەشگێری و هێما هاتینە بەلاڤكرن.
ناڤبری گۆت: گەلەك بەرپرسێن ده‌زگه‌هيچن راگه‌هاندنێ ل كوردستانێ يێن نوكە دەرچوويێن رادیویا كوردی یا بەغدا بووینە و بەر دەستێ مامۆستایێن رادیۆیێ فێر بووینە، پتریا نڤیسەرێن كورد پرۆگرام هەبوون ل رادیویا كوردی یا بەغدا و رۆلەكێ بەرچاڤ هەبوو.
بێژەرێ رادیۆیا كوردی یا بەغدا، جەمال بەرواری گۆت ژی : پشتی ژناڤچوونا رژێما بەعس ل سالا 2003 رادیویا كوردی هاتە راوه‌ستاندن.
جهێ ئاماژەكرنێ یە كو رۆژنامەڤانێ دێرین (جەمال بەرواری) ل سالا 1972 قەستا رادیۆیا كوردی یا بەغدا كریە، بێژەرێ دەنگ و باس و چەندین پرۆگرامان بویە، ژ پرۆگامێن پێ بەرنیاس بووی وی سەردەمی پرۆگرامێ (ل گەل گوهدارا) بوویە ئێكەم كەس بوو ل رادیۆیا ناڤبری پرۆگرامێن ئێكسەر پەیوەندیێن تیلەفونی وەربگریت.
ئەڤرۆ نیوز، نەوزاد هلۆری:
سێ گەنجێن گوندێ سێلکێ ل مزیری بالا یا سەر ب دەڤەرا بارزان دناڤ ئاڤا سار و بەفرێ دا مەڵەڤانیان دکەن، داکو لەشەکێ ساخلەم بۆ خوە پەیدا کەن.
هوشیار سێلکی، ئێک ژ وان گەنجایە بو ئەڤرۆ نیوز گۆت: (مزیری بالا ب گشتی و گوندێ سێلکێ ب تایبەتی دەڤەرەکا زور سارە و رێژەیەکا زور یا بەرێ لێ دباریت، دوهی ژی رێژەیەکا زورا بەفرێ باری یە، ئەڤرو دناڤ کەش و هەوایەکێ ساردا و دناڤ بەفر و ئاڤا بەفرێ دا، ب مەرەما پەیداکرنا لەشەکێ ساخلەم مە مەلەڤانی دناڤ ئاڤا سار و بەفر دا کر کو ب راستی بو خوش و مفاداربوو).
زیدەتر گوت: (ئەم سالانە مەلەڤانیان دناڤ ئاڤا سار و بەفرێ دا دووبارە دکەین، هەرچەندە زور سارە و وێرەکی دڤێت بەلێ ژبەرکو بو ساخلەمیا مروڤی باشە ئەم خوە دهاڤێژینیێ).
ئه‌ڤرۆنیوز:
پشتی ئه‌ڤرۆ ئێكشه‌مبی 3/2/2018 سه‌رۆكێ ئه‌مریكی دونالد ترامپ راگه‌هاندی كو هێزێن ئه‌مریكی بۆ چاڤدێریكرنا ئیرانێ دێ ل عیراقێ هێلیت، به‌ری ده‌مه‌كێ كێم جێگرێ ئێكێ یێ سه‌رۆكێ په‌رله‌مانێ عیراقێ به‌رسڤا ترامپی دا وراگه‌هاند، رێ ناده‌ین ئاخا عیراقێ بۆ ده‌ست درێژیكرنێ ل سه‌ر وه‌لاتێن جیران بهێته بكارئینان.
حه‌سه‌ن كه‌عبی، جێگرێ ئێكێ یێ سه‌رۆكێ په‌رله‌مانێ عیراقێ دكۆنگره‌كێ رۆژنامه‌ڤانی دا دووپاتكر كو په‌رله‌مانێ عیراقێ دێ رێككه‌فتنا ئه‌منی ل گه‌ل ئه‌مریكا هه‌لوه‌شینیت، ب ڤێ چه‌ندێ ژی دێ دووماهیێ ب هه‌بوونا هێزێن ئه‌مریكی وراوێژكار وراهێنه‌رێن له‌شكرێ ئه‌مریكی ل عیراقێ ئینن.
كه‌عبی گۆت ژی داخویانیا ئه‌ڤرۆ یا ترامپی سنوربه‌زاندنه‌كا ئاشكرا تێدا بوو به‌رانبه‌ر سه‌روه‌ریا ئاخا عیراقێ وپێشیلكرنا دستوورێ عیراقێ بوو، ب تایبه‌تی كو ددستووری دا دا هاتیه دووپاتكرن كو رێ ناهێته دان ئاخا عیراقێ بۆ هێرشكرنێ ل سه‌ر وه‌لاتێن دی بهێته بكارئینان”.
ئه‌ڤرۆنیوز:
به‌ری ده‌مه‌كێ كێم یاریا دناڤبه‌را ریال بیتیس ومێهڤانا وێ ئه‌تله‌تیكو مه‌درید دچارچۆڤێ گه‌را 22 ژ خۆلا ئیسپانی ب سه‌ركه‌فتنا ریال بیتیس ب ئه‌نجامێ 1-0 ب دووماهی هات.
ب ڤی ئه‌نجامی یانا ریال بیتیس ب 32 خالان هاته رێزا شه‌شێ درێزبه‌ندا خۆلا ئیسپانی دا ویانا ئه‌تله‌تیكو مه‌درید ب 44 خالان ل رێزا دویێ دمینیت.
ریال بیتیس ب ڤێ سه‌ركه‌فتنا خوه‌ل سه‌ر ئه‌تله‌تیكو مه‌درید شیا جوداهیا خالان دناڤبه‌را به‌رشه‌لونا سه‌ركێشا خۆلێ ب 50 خالان وئه‌تله‌تیكو مه‌درید خودانا رێزا دویێ ب 44 خالان هه‌ر وه‌كو خوه ب مینیت ئه‌وژی 6 خالن ودیاریه‌ك پێشكێشی به‌رشه‌لونا كر ب تایبه‌تی پشتی كو به‌رشه‌لونا دوهی ب زه‌حمه‌ت ل سه‌ر یاریگه‌ها خوه ل گه‌ل ڤالنسیا ب ئه‌نجامێ 1-1 وه‌كهه‌ڤ بووی.
نيشاندان